1-2. Nama deka dipelajarka kitai dalam artikel tu?

 NAMA asai ati nuan enti barang ke diudar nuan enda datai ba maya ti dianti nuan? Kati nuan deka berasai irau? Nuan engka ngasaika utai ti dipadah ba Jaku Dalam 13:12 b: ‘Utai ti diadang orang tang enda datai, iya ngasuh ati tusah.’ Tang baka ni enti nuan nemu bisi kebuah ti manah barang nya bedau datai? Nuan engka deka nganti enggau sabar.

² Dalam artikel tu, kitai deka meda sekeda prinsip Bup Kudus ke ulih nulung kitai ngembuan ulah sabar “nganti.” (Mik. 7:7) Udah nya, kitai deka mansik baka ni kitai ulih sabar nganti Jehovah ba dua pekara. Ke penudi iya, kitai deka meda berekat ke diulih sida ke sabar nganti Jehovah.

 3. Nama ulih dipelajarka kitai ari Jaku Dalam 13:11?

³ Siti chunto ari Bup Kudus ke ngajar kitai kebuah patut besabar bisi ba Jaku Dalam 13:11. Ayat nya madahka: “Enti nuan mudah bulih pengaya, jampat agi ga nuan deka ngelenyauka iya. Enti nuan mar [tauka ‘lubah-lubah,’ NWT] ngulihka pengaya, mayuh agi ga pengaya deka ulih nuan.” Nama dipelajarka kitai ari ayat tu? Orang ke bepenemu-dalam ti ngereja utai enggau bejimat sereta besabar, deka ngulihka asil ti manah.

 4. Nama dipelajarka kitai ari Jaku Dalam 4:18?

 ⁴ Jaku Dalam 4:18 madahka, “Jalai ti ditengah orang ke lurus nya baka penumbuh mata hari. Iya majak terang-seterang datai ke hari nyau siang.” Ayat nya nunjuk pasal chara Jehovah nulung nembiak Iya meretika tuju Iya. Iya ngereja tu enggau belubah-lubah. Ayat tu mega ulih nulung kitai mereti pasal chara orang Kristian ngaga ubah ba pengidup lalu majak semak ngagai Jehovah. Kitai begunaka mayuh awak kena datai semak ngagai Jehovah. Enti kitai enggau bejimat belajar sereta ngasika jaku lalau ke diberi nengah Jaku Petara sereta gerempung Iya, kitai ulih ngemansangka kualiti baka Kristus. Kitai mega deka ngelala Petara enggau manah agi. Aram kitai meda chara Jesus nerangka tu.

 5. Nama sempama dikena Jesus kena nunjukka seseiku orang begunaka awak kena ngaga ubah?

⁵ Jesus ngena siti sempama kena nerangka baka ni benih pemendar pasal Perintah Petara ke ditusui kitai ulih tumbuh enggau belubah-lubah ba ati orang ke lurus. Iya madahka: “[Orang ke naburka benih] enda nemu baka ni ku utai nya matuk lalu tumbuh. Tanah nya ti ngeluarka asil, terubah, batang pegari, udah nya utai nya murai, lalu udah nya tangkai pegari.” (Mrk. 4:27, 28) Nama reti ku Jesus? Iya nerangka, baka utai ti ditanam ke belubah-lubah tumbuh, seiku orang ke nerima Berita Manah mega begunaka awak kena ngaga ubah. Ambika chunto, lebuh pemelajar Bup Kudus kitai mansang semak ngagai Jehovah, kitai deka meda sida ngaga mayuh ubah ti manah ba pengidup. (Eps. 4:22-24) Tang kitai patut ingat, Jehovah ke ngasuh benih nya tumbuh.—1 Kor. 3:7.

 6-7. Nama ulih dipelajarka kitai ari chara Jehovah nempa dunya?

⁶ Jehovah ngena awak ti chukup kena nembuka semua pengawa Iya. Iya ngereja nya kena ngemuliaka nama Iya sereta meri penguntung ke orang bukai. Ambika chunto, aram kitai meda baka ni Jehovah belubah-lubah nyediaka dunya ke mensia.

 ⁷ Maya Bup Kudus nerangka baka ni Jehovah nempa dunya, Bup Kudus madahka Jehovah “ngeletak pemesai dunya,” “nudukka batu pemun dunya,” lalu ngengkahka “pugu iya.” (Jop 38:5, 6; Mas. 104:5) Jehovah mega ngena awak kena belematika semua pengawa Iya. (P-kal. 1:10, 12) Ulih nuan ngambarka asai ati bala melikat maya sida meda utai ke ditempa Jehovah? Sida amat gagit! Ketegal nya, sida “manjung gaga ati.” (Jop 38:7) Nama ulih dipelajarka kitai? Jehovah ngena awak beribu taun nempa dunya, bintang, enggau semua utai idup. Lalu maya Jehovah meda semua utai ke udah ditempa Iya, Iya madah semua nya “manah magang.”—P-kal. 1:31.

 8. Nama deka dipejuraika kitai diatu?

⁸ Ba semua chunto ke dipadah tadi, kitai ulih meda mayuh prinsip Bup Kudus ke ngajar kitai kebuah patut besabar. Diatu kitai deka meda baka ni kitai ulih nganti Jehovah ba dua pekara.

 9. Ni maya kitai patut nganti Jehovah?

⁹ Kitai engka patut nganti sampi kitai disaut. Lebuh kitai besampi minta pengering kena betan, tauka minta tulung kena mutarka pengelemi diri, kitai engka ngasaika Jehovah lama deka nyaut sampi kitai. Nama kebuah Jehovah enda nyaut sampi kitai tekala nya?

10. Nama kebuah kitai patut besabar nganti Jehovah nyaut sampi kitai?

¹⁰ Jehovah ningaka sampi kitai. (Mas. 65:2) Ba Jehovah, sampi kitai nya nunjukka pengarap kitai ngagai Iya. (Heb. 11:6) Lebuh kitai besampi minta Jehovah nulung kitai ngereja utai ti ngelantangka ati Iya, Jehovah deka meda sekalika kitai bebendar deka idup sejalai nitihka sampi kitai lalu ngereja peneka Iya. (1 Jhn. 3:22) Nya alai maya kitai minta Jehovah nulung kitai badu ngereja utai ti enda dikerinduka Iya, kitai mega patut besabar lalu bebendar ngaga ubah ti patut. Jesus nulung kitai meretika utai tu. Ku iya: “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita. Laban genap iku orang ke minta, deka nerima, lalu orang ke ngiga, deka nemu, lalu ke orang ke nekung, utai nya deka dibuka ke sida.” (Mat. 7:7, 8) Lebuh kitai nitihka jaku lalau tu sereta “seruran majak besampi,” kitai andal Jehovah ningaka sampi kitai sereta deka nyaut.—Kol. 4:2.

11. Baka ni 1 Peter 5:6 nulung kitai enti sampi kitai enda disaut tekala nya?

¹¹ Taja pan sampi kitai enda disaut tekala nya, Jehovah besemaya deka nyaut sampi kitai “ba maya ti patut.” (Bacha 1 Peter 5:6.) Nya kebuah, kitai enda patut nyalahka Jehovah enti Iya enda nyaut sampi kitai ba maya ti dikedekaka kitai. Ambika chunto, mayuh orang udah lama besampika Perintah Petara ngujungka dunya ti jai tu. Indah Jesus mega ngasuh kitai besampika pekara tu. (Mat. 6:10) Sayau amat enti kitai lenyau pengarap ba Petara ketegal pengujung dunya ti jai tu enda datai ba maya ti dikedekaka kitai! (Hab. 2:3; Mat. 24:44) Kitai deka terus nganti Jehovah lalu terus besampi ngagai Iya. Kitai andal Jehovah deka nyaut sampi kitai. Pengujung deka datai ba maya ti patut, laban Jehovah udah milih “hari tauka jam” kena ngujungka dunya ti jai tu. Lalu hari ti dipilih Jehovah nya deka nyadi maya ti pemadu manah ke semua orang ti rinduka Jehovah.—Mat. 24:36; 2 Pet. 3:15.

12. Ni maya kitai engka tusah deka besabar?

¹² Kitai patut besabar maya nganti ulah ti enda lurus diputarka. Orang di dunya suah  bejaika sida ke enda sama penempa, bansa, gaya pengidup, tauka orang ke datai ari menua bukai. Sida ke bukai engka dipejai ketegal sida bisi penimpang, tauka enda bepengerai ari segi mental. Mayuh nembiak Jehovah patut napi ulah ti enda lurus ketegal pengarap sida ba Bup Kudus. Lebuh kitai napi penanggul ke baka tu, kitai patut ingat jaku lalau ari Jesus. Iya madahka: “Orang ke tan datai ke ujung, deka diselamatka.” (Mat. 24:13) Tang baka ni enti nuan nemu bisi seiku orang ngereja penyalah ti besai dalam eklisia? Pengudah bala tuai gempuru nemu pasal pekara tu, kati nuan sabar nganti sida mutarka pekara tu nitihka chara Jehovah? Nama patut digaga tuai gempuru lebuh bisi seiku orang ngereja penyalah ti besai?

13. Nama patut digaga tuai gempuru lebuh bisi orang ngereja penyalah ti besai?

¹³ Lebuh tuai gempuru nemu pasal seiku orang ke ngaga penyalah ti besai dalam eklisia, sida besampi lalu minta Jehovah meri “penemu-dalam ti datai ari atas” ngambika sida ulih meretika pekara nya nitihka chara Jehovah. (Jas. 3:17) Juluk ati sida nya deka nulung orang ke ngereja penyalah “pulai baru ari jalai ti salah.” (Jas. 5:19, 20) Bala tuai gempuru mega bebendar deka nyaga eklisia sereta ngelantangka ati orang ke udah dikemediska. (2 Kor. 1:3, 4) Lebuh tuai gempuru nemu bisi seiku orang udah ngereja penyalah ti besai, sida patut ngiga semua fakta. Tu engka begunaka mayuh awak. Udah nya, sida deka besampi, lalu meri jaku lalau ari Bup Kudus sereta ngemetulka sida ke ngereja penyalah nitihka “takat ti patut.” (Jer. 30:11, NWT) Taja pan tuai gempuru enda nganti kelalu lama, sida mega enda ngaga pemutus enggau jejampat. Lebuh pekara tu diputarka nitihka iring ari Jehovah, eklisia deka bulih penguntung. Taja pan tuai gempuru udah mutarka pekara tu enggau manah, tang orang ke nyadi mansa engka agi berasai pedis ati. Enti utai tu kala nyadi ba nuan, baka ni nuan ulih ngurangka asai pedis ati nya?

14. Nama chunto ari Bup Kudus ke ulih ngelantangka ati nuan enti bisi menyadi Kristian udah ngemediska ati nuan?

¹⁴ Kala orang ngemediska ati nuan? Engka iya seiku ari menyadi Kristian. Nuan ulih belajar ari teladan orang ba Bup Kudus ke ulih nulung kitai nganti Jehovah mutarka pekara  nya. Ambika chunto, taja pan Josep napi ulah ti enda lurus ari bala menyadi iya, iya enda ngelakka ulah sida ngasuh iya nyadi ringat. Tang, iya bebendar gawa ke Jehovah, lalu Jehovah merekatka iya laban iya sabar sereta tan ati napi penanggul nya. (P-kal. 39:21) Nyau kelama, Josep ulih ngampunka sida ke udah ngemediska iya lalu meda chara Jehovah merekatka iya. (P-kal. 45:5) Baka Josep, kitai ulih lantang ati lebuh kitai nyemakka diri ngagai Jehovah lalu nganti Iya ngemetulka ulah ti enda lurus ba maya ti patut.—Mas. 7:17; 73:28.

15. Nama nulung seiku menyadi indu napi ulah ti enda lurus?

¹⁵ Kitai engka enda napi ulah ti enda lurus ke balat baka Josep, tang kitai engka berasai pedis ati lebuh orang jai enggau kitai. Lebuh kitai napi penanggul, nyengkaum enggau orang ke enda nyembah Jehovah, kitai tau bulih penguntung enti kitai nitihka jaku lalau ari Bup Kudus. (Plp. 2:3, 4) Peratika siti peneleba. Seiku menyadi indu berasai amat pedis ati lebuh iya nemu orang ke sama gawa enggau iya bejaika iya ngagai orang bukai. Tang menyadi nya enda jampat ringat. Iya ngena awak belematika chunto Jesus. Lebuh Jesus dikeduan, iya enda malas. (1 Pet. 2:21, 23) Ketegal nya, menyadi indu nya mutuska enda ngereja nama-nama utai pasal pekara nya. Udah nya, iya nyau nemu orang ke sama gawa enggau iya nya sakit sereta balat irau. Nya alai, menyadi indu nya ngumbai orang ke sama gawa enggau iya nya nadai tuju ati ti jai. Menyadi indu nya amat gaga ati laban iya udah betan napi ulah ti enda lurus, lalu iya ngembuan pengelantang ba ati.

16. Nama ulih ngelantangka nuan enti nuan benung napi ulah ti enda lurus? (1 Peter 3:12)

¹⁶ Enti nuan benung napi ulah ti enda lurus tauka benung tusah ati ketegal kebuah bukai, kingatka meh, Jehovah semak enggau “orang ke tusah ati.” (Mas. 34:18) Iya rinduka nuan laban nuan sabar sereta sanggup nyerahka penusah diri ngagai Iya. (Mas. 55:22) Jehovah Hakim di serata dunya. Iya meda semua utai ke nyadi. (Bacha 1 Peter 3:12.) Enti nuan benung napi penanggul ke enda ulih diputarka nuan tekala nya, kati nuan sanggup nganti Jehovah?

17. Baka ke ditulis ba Isaiah 30:18, nama semaya Jehovah ke kitai?

¹⁷ Enda lama da agi, Jehovah deka merekatka kitai nengah Perintah Iya. Isaiah 30:18 madahka: ‘Jehovah nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba Jehovah.’ Orang ke manggaika pengarap sida ba Jehovah tauka nganti Iya deka nerima mayuh berekat diatu sereta ba dunya baru ti deka datai.

18. Nama berekat ke nganti kitai?

¹⁸ Lebuh nembiak Petara tama ngagai dunya baru ila, sida enda ibuh napi pengirau sereta penusah baka ke diatu. Ulah ti enda lurus sereta pemedis deka nadai agi. (Pem. 21:4) Kitai enda ibuh irau pasal utai ke diguna kitai laban ila bisi utai ti chukup ke semua orang. (Mas. 72:16; Isa. 54:13) Naka meh pemanah berekat ke diberi Jehovah ila!

19. Nama benung digaga Jehovah ke kitai diatu?

¹⁹ Kemayaharitu, Jehovah benung nyediaka kitai ngambika ulih diau di baruh Perintah Iya. Iya nulung kitai mutarka ulah ti enda manah sereta ngemansangka kualiti ke ngelantangka Iya. Anang asa ati sereta anang ngetu nyembah Jehovah. Kitai deka bisi pengidup ti manah enda lama agi. Aram meh kitai nganti Jehovah enggau sabar lalu terus ngereja utai ke diasuh Iya!