1. Nama kebuah orang Babilon kagum enggau nabi Daniel?

 ORANG Babilon naban nabi Daniel nyadi orang tangkap ba menua Babilon, endur ti jauh ari Jerusalem. Maya nya iya agi nembiak. Taja pan iya agi biak, tang bala pegawai orang Babilon kagum enggau iya. Sida “meda gamal” Daniel ‘nadai penimpang sereta sigat,’ lalu iya datai ari ruang bilik ti penting. (1 Sam. 16:7) Ketegal nya, orang Babilon ngelatih iya ngambika iya ulih gawa ba istana.—Dan. 1:3, 4, 6.

 2. Nama asai ati Jehovah pasal Daniel? (Esekiel 14:14)

² Jehovah rinduka Daniel ukai ketegal penyigat gamal iya, tauka ketegal iya bisi pangkat ti besai ba istana. Tang Jehovah rinduka Daniel ketegal pemutus ti manah ke digaga iya ba pengidup. Kebendar iya, lebuh Jehovah madah Daniel nya baka Noah enggau Jop, Daniel engka beumur kira-kira 20 taun aja. Taja pan Daniel agi biak, tang Jehovah ngumbai Daniel lurus baka Noah enggau Jop, ke udah nyembah Iya enggau tetap ati pengelama betaun-taun. (P-kal. 5:32; 6:9, 10; Jop 42:16, 17; bacha Esekiel 14:14.) Lalu Jehovah terus rinduka Daniel sepemanjai pengidup iya.—Dan. 10:11, 19.

 3. Nama deka dipejuraika kitai dalam artikel tu?

³ Dalam artikel tu, kitai deka beratika dua iti sifat Daniel ke ngasuh iya nyadi berega ba Jehovah. Keterubah, kitai deka berandauka tiap iti sifat nya lalu beratika situasi alai Daniel ngayanka sifat nya. Udah nya, kitai deka meda chara Daniel belajar ngemansangka sifat nya. Lalu ke pengujung iya, kitai deka berandauka chara kitai ulih neladan iya. Taja pan artikel tu ditulis ke bala nembiak, tang semua kitai ulih belajar ari teladan Daniel.

 4. Baka ni Daniel ngayanka pemerani? Beri siti chunto.

⁴ Orang ti berani mega ulih berasai takut. Taja pia, sida  enda nejuka asai ati tu nagang sida ari ngereja utai ti betul. Daniel siku nembiak lelaki ke amat berani. Peratika dua iti situasi alai iya ngayanka pemerani. Situasi ti keterubah engka nyadi kira-kira dua taun pengudah orang Babilon ngerusak Jerusalem. Raja Nebukadnesar ari Babilon, bisi mimpi ti ngenakutka pasal siti patung ti besai. Iya ngasuh bala lelaki ti bepenemu-dalam, nyengkaum Daniel, madah ngagai iya pasal utai ke bisi dalam mimpi iya sereta nerangka reti mimpi nya. Enti sida enda ulih ngereja nya, sida deka dibunuh. (Dan. 2:3-5) Daniel patut betindak enggau jampat. Enti iya enda ngereja nya, mayuh orang deka mati. Iya “betemu enggau raja lalu minta raja nginsur timpuh nya panjai agi, ngambika iya ulih madahka reti mimpi nya ngagai raja.” (Dan. 2:16) Tu nunjukka Daniel bisi pemerani enggau pengarap. Nama kebuah kitai ngumbai baka nya? Bup Kudus nadai rikut ke nunjukka Daniel kala nerangka reti mimpi. Iya minta bala kaban iya, iya nya Sadrak, Mesak, enggau Abednego, b ‘besampi ngagai Petara ti di serega minta pengasih ari Iya, lalu minta Iya nerangka misteri nya ngagai sida.’ (Dan. 2:18) Jehovah nyaut sampi sida. Enggau tulung ari Petara, Daniel ulih nerangka reti mimpi Nebukadnesar. Lalu Daniel ulih nyelamatka nyawa iya enggau bala kaban iya.

 5. Nama siti agi situasi alai Daniel begunaka pemerani?

⁵ Enda lama pengudah Daniel nerangka reti mimpi patung ti besai nya, pemerani iya sekali agi diuji. Nebukadnesar bisi siti agi mimpi ti ngenakutka. Mimpi tu pasal siti pun kayu ti amat besai. Daniel enggau berani nerang ngagai raja reti mimpi nya. Iya indah madah, Nebukadnesar deka nyadi gila lalu enda nyadi raja pengelama sesiti timpuh. (Dan. 4:25) Ketegal utai ti dipadah Daniel, Nebukadnesar engka ulih ngumbai Daniel nya munsuh iya, lalu ngasuh Daniel diukum bunuh. Tang Daniel ngayanka pemerani lalu terus nerangka reti mimpi nya.

 6. Nama utai ke engka nulung Daniel nyadi berani?

⁶ Nama utai ke engka nulung Daniel nyadi berani sepemanjai pengidup iya? Kitai ulih yakin, apai indai Daniel nya teladan ti manah ke iya. Seduai iya tentu ngasika iring ke diberi Jehovah ngagai bala apai indai orang Israel, lalu seduai iya ngajar Adat Petara ngagai anak seduai iya. (U-dat. 6:6-9) Daniel ukai aja nemu pasal Sepuluh iti Pesan, tang iya mega nemu  mayuh agi penerang ti silik pasal Adat. Ambika chunto, iya nemu nama utai ke ulih sereta ke enda ulih diempa orang Israel. c (Lew. 11:4-8; Dan. 1:8, 11-13) Daniel mega belajar pasal sejarah bala nembiak Petara, lalu iya nemu nama utai ke nyadi ngagai sida lebuh sida enda ngasika Jehovah. (Dan. 9:10, 11) Pengalaman Daniel sepemanjai pengidup iya nulung iya yakin, enda ngira nama utai ke nyadi, Jehovah enggau bala melikat Iya ti kering deka nulung iya.—Dan. 2:19-24; 10:12, 18, 19.

 7. Nama agi utai bukai ke nulung Daniel ngembuan pemerani? (Peda mega gambar.)

⁷ Daniel belajarka utai ti ditulis bala nabi Petara, nyengkaum jaku benabi ari Jeremiah. Ari utai ti dipelajarka iya, Daniel nyau nemu orang Judah ke nyadi orang tangkap ba Babilon deka bibas enda lama da agi. (Dan. 9:2) Daniel meda jaku Jehovah dikeamatka, lalu tu negapka agi pengarap Daniel ngagai Jehovah. Orang ke ngembuan pengarap ti tegap ngagai Petara ulih nyadi amat berani. (Banding Rome 8:31, 32, 37-39.) Lalu ke pemadu penting, Daniel seruran besampi ngagai Apai iya ti di serega. (Dan. 6:10) Iya ngaku dosa iya ngagai Jehovah, sereta bekunsika asai ati iya ngagai Jehovah. Lalu Daniel mega minta tulung. (Dan. 9:4, 5, 19) Baka semua kitai, lebuh Daniel ada, iya enda automatik bisi pemerani. Tang iya ngemansangka sifat tu lebuh iya belajar, besampi, sereta arapka Jehovah.

 8. Baka ni kitai ulih ngemansangka pemerani?

⁸ Nama patut digaga kitai kena ngemansangka pemerani? Apai indai engka meransang kitai nyadi berani. Lalu, taja pan apai indai bisi pemerani, tang sida enda ulih meri pemerani nya ngagai bala anak sida. Ngemansangka pemerani nya baka belajarka pengelandik ti baru. Siti chara nuan ulih ngemansangka sesiti pengelandik, iya nya enggau beratika utai ti digaga pengajar nuan, lalu udah nya nitihka teladan iya. Baka nya mega, kitai ulih belajar nyadi berani lebuh kitai beratika chara orang bukai ngayanka sifat nya, lalu nitihka teladan sida. Nyadi, nama udah dipelajarka kitai ari Daniel? Baka iya, kitai patut nemu Jaku Petara enggau manah. Kitai patut ngemansangka kaul ti rapat enggau Jehovah. Baka ni chara iya? Seruran bejaku enggau Jehovah, lalu madah ngagai Iya utai ti amat bisi dalam ati kitai. Kitai mega patut arapka Jehovah, lalu andal Iya seruran deka nulung kitai. Udah nya, lebuh pengarap kitai diuji, kitai deka nyadi berani.

 9. Nama penguntung ke diulih kitai lebuh kitai ngayanka pemerani?

⁹ Kitai bulih penguntung lebuh kitai ngayanka pemerani. Peratika pengalaman Ben. Ba sekula iya di Jerman, semua orang pechayaka teori evolusi, lalu sida ngasaika cherita Bup Kudus pasal semua utai ditempa nya bula magang. Bisi sekali, Ben diberi peluang bediri ba depan kelas iya, lalu nerangka kebuah iya pechaya pengidup nya ditempa. Iya enggau berani nerangka utai ti dipechayaka iya. Nama asil iya? Ku Ben madahka: “Pengajar aku ninga enggau manah. Iya mega ngaga beberapa iti salinan ari rujukan ti dikena aku nerangka pengarap aku. Lalu iya meri siti salinan ngagai tiap iku murid dalam kelas nya.” Nama reaksi bala murid bukai dalam kelas Ben? Ku Ben nampung baru: “Mayuh ari sida ningaka utai ti dipadahka aku, lalu sida madah sida kagum enggau aku.” Pengalaman Ben nunjukka, orang ti berani kesuah iya dipebasa orang bukai. Sida mega ulih nulung sekeda orang ngelala Jehovah. Endang amat, kitai bisi kebuah ti manah ngemansangka sifat pemerani.

10. Nama reti penetap ati?

¹⁰ Bup Kudus suah nyebut pasal penetap ati tauka pengerindu ti setia ke diayanka Petara ngagai bala kaban Iya. Bup Kudus mega nyebut pasal penetap ati ke diayanka bala nembiak Petara ngagai pangan diri. (2 Sam. 9:6, 7) Penetap ati kitai ulih nyadi majak tegap. Aram kitai meda baka ni penetap ati Daniel nyadi majak tegap.

11. Baka ni Daniel ngayanka penetap ati lebuh iya udah tuai? (Peda gambar ba mua majalah.)

¹¹ Penetap ati Daniel ngagai Jehovah mayuh kali diuji ba pengidup iya. Tang siti ari penguji ti pemadu besai nya datai lebuh iya beumur lebih ari 90 taun. Maya nya, menua Babilon udah dialahka orang Media enggau Persia, lalu sida dipegai Raja Darius. Bala pemesai ti gawa ke Raja Darius begedika Daniel sereta enda bebasaka Petara Jehovah. Nyadi, sida ngaga pelan ngambika Daniel dibunuh. Sida nyungkak raja ngaga siti atur. Atur nya deka nguji sekalika Daniel deka tetap ati ngagai Petara Jehovah tauka ngagai raja. Enti Daniel deka nunjukka diri tetap ati ngagai raja, iya patut ngetu besampi ngagai Jehovah pengelama 30 hari aja. Enggau nya, iya ulih nyeliahka diri ari kena ukum. Tang Daniel milih deka tetap ati ngagai Jehovah. Ketegal nya, iya dibuai ngagai lubang singa. Tang Jehovah merekatka penetap ati Daniel. Iya nyelamatka Daniel ari bala singa nya. (Dan. 6:12-15, 20-22) Baka ni kitai ulih mengkang tetap ati ngagai Jehovah baka Daniel?

12. Baka ni Daniel ulih mengkang tetap ati ngagai Jehovah?

¹² Ngambika ulih tetap ati ngagai Jehovah, kitai patut ngembuan pengerindu ti dalam ngagai Iya. Daniel mengkang tetap ati ngagai Jehovah laban iya rinduka Apai iya ti di serega. Endang amat, Daniel ngembuan pengerindu ti dalam ngagai Jehovah laban iya suah berunding pasal sifat Jehovah sereta chara Jehovah ngayanka sifat nya. (Dan. 9:4) Daniel mega belematika semua utai manah ke udah dikereja Jehovah ke iya sereta ke bala nembiak Iya, lalu Daniel amat beterima kasihka utai nya.—Dan. 2:20-23; 9:15, 16.

13. (a) Nama sekeda utai ke ulih nguji penetap ati bala nembiak kitai kemayaharitu? Beri siti chunto. (Peda mega gambar.) (b) Baka ke diayan dalam video, baka ni nuan deka nyaut lebuh orang nanya sekalika Saksi-Saksi Jehovah nyukung sida ke milih deka nyadi homoseksual?

¹³ Baka Daniel, bala nembiak kitai dikelingi  orang ke enda bebasaka Jehovah enggau standard Iya. Orang ke baka nya engka enda rinduka sapa-sapa ke madahka diri rinduka Petara. Sekeda ari sida indah ngansak bala nembiak kitai ngambika enda tetap ati ngagai Jehovah. Ambika chunto, peratika utai ke nyadi ngagai siku nembiak lelaki ke benama Graeme, ke diau ba Australia. Lebuh iya ba sekula menengah, iya napi siti penguji ti besai. Pengajar iya nanya ngagai kelas iya, nama reaksi sida enti siku kaban madahka diri homoseksual. Pengajar nya madah, orang ke nyukung kaban ke homoseksual nya patut bediri ba sepiak. Tang sida ke enda nyukung, patut bediri ba sepiak da agi. Graeme madahka, “Semua orang dalam kelas nya nyukung kaban ke nyadi homoseksual nya. Tang semina aku enggau siku da agi Saksi bediri ba piak ke enda nyukung chara pengidup nya.” Utai ke nyadi pengudah nya balat agi nguji penetap ati Graeme ngagai Jehovah. Iya madahka, “Timpuh belajar ba kelas nya sejam. Lalu sepemanjai kelas nya bala pemelajar ke bukai ngelese kami duai. Indah cikgu mega ngelese kami duai. Aku enggau naka ulih ngetanka pengarap aku enggau tenang sereta nerang enggau manah. Tang sida enggai ninga utai ti dipadah aku.” Nama asai ati Graeme? Ku iya madahka, “Aku enda rindu dikelese bala pemelajar ke bukai. Tang aku amat gaga ati laban aku ulih mengkang tetap ati ngagai Jehovah sereta ngetanka pengarap aku.” d

14. Nama siti chara kitai ulih ngemansangka penetap ati kitai ngagai Jehovah?

¹⁴ Baka Daniel, lebuh kitai ngenalamka agi pengerindu kitai ke Jehovah, kitai deka keran agi mengkang tetap ati ngagai Iya. Kitai ngenalamka agi pengerindu kitai ngagai Jehovah lebuh kitai belajarka sifat Iya. Ambika chunto, kitai ulih belajar pasal utai ti digaga Iya. (Rom. 1:20) Enti nuan deka ngenalamka pengerindu sereta basa nuan ke Jehovah, nuan ulih macha artikel ti pandak ke bisi dalam siri artikel “Kati Tu Ditempa?” tauka meda video ke bisi dia. Nuan mega ulih beratika utai ke bisi dalam brosur Adakah Kehidupan Diciptakan? enggau Asal Usul Kehidupan—Lima Soalan yang Patut Difikirkan dalam jaku Melayu. Peratika utai ti dipadah siku menyadi indu ke biak ari Denmark, ke benama Esther, pasal litaricha tu: “Penerang dalam majalah nya amat manah. Majalah nya enda madah utai ke patut dipechayaka nuan. Sida semina madahka fakta aja, lalu ngawakka nuan empu ngaga pemutus.” Ben, ke disebut tadi, madahka: “Penerang nya negapka pengarap aku. Iya nulung aku pechaya, Petara nya ke ngaga pengidup.” Pengudah belajarka semua penerang tu, nuan tentu deka setuju enggau utai ti dipadah Bup Kudus: “Petara kami, Jehovah, Nuan endang layak nerima mulia, basa, enggau kuasa laban Nuan udah ngaga semua utai.”—Pem. 4:11. e

15. Nama siti agi chara kitai ulih ngemansangka kaul ti rapat enggau Jehovah?

¹⁵ Siti agi chara kitai ulih ngenalamka agi pengerindu kitai ke Jehovah, iya nya enggau belajarka jalai pengidup Anak Iya, Jesus. Siku menyadi indu ti biak ke benama Samira, ke diau ba Jerman, ngereja utai tu. Ku iya madahka: “Aku ngelala Jehovah enggau manah agi nengah Jesus.” Maya Samira agi mit, iya tusah deka faham baka ni Jehovah ulih rinduka kitai. Tang iya ulih faham pasal asai ati Jesus. Ku iya nampung baru, “Aku rinduka Jesus laban iya nyamai enggau begulai, lalu iya mega rinduka bala anak mit.” Mayuh agi utai ti dipelajarka Samira pasal Jesus, dalam agi penemu enggau  pengerindu iya ke Jehovah. Nama kebuah? Iya madahka: “Aku nyau faham, Jesus neladan Apai iya enggau sempurna. Bisi mayuh utai ti sama ba seduai iya. Aku sedar, tu siti ari kebuah Jehovah nganjung Jesus ngagai dunya, ngambika mensia ulih ngelala Jehovah enggau manah agi.” (Jhn. 14:9) Enti nuan deka negapka kaul ti rapat enggau Jehovah, kena meh awak belajar mayuh agi pasal Jesus. Enti nuan ngereja nya, pengerindu enggau penetap ati nuan ngagai Jehovah deka majak mansang.

16. Nama kebuah kitai patut tetap ati? (Masmur 18:25; Mikah 6:8)

¹⁶ Kesuah iya, lebuh kitai tetap ati ngagai orang bukai, kitai deka ngembuan kaban ti rapat ke deka tetap ati ngagai kitai. (Rut 1:14-17) Lalu enti kitai tetap ati ngagai Jehovah, kitai ulih berasai tenang enggau lantang. Nama kebuah? Laban Jehovah besemaya, Iya deka tetap ati ngagai orang ke tetap ati ngagai Iya. (Bacha Masmur 18:25; Mikah 6:8.) Perundingka tu—taja pan kitai amat mit enti dibandingka enggau Penempa kitai ti bekuasa, Jehovah, tang Iya besemaya deka seruran rinduka kitai! Lalu lebuh kitai bisi kaul ti rapat enggau Jehovah, nadai penguji, penyakal, indah pemati ulih nyeraraka kitai ari Iya. (Dan. 12:13; Luk. 20:37, 38; Rom. 8:38, 39) Endang penting enti kitai neladan Daniel sereta mengkang tetap ati ngagai Jehovah!

17-18. Nama utai bukai ke ulih dipelajarka kitai ari Daniel?

¹⁷ Dalam artikel tu, kitai semina beratika dua iti sifat Daniel. Tang bisi mayuh agi utai ke ulih dipelajarka kitai ari iya. Ambika chunto, Jehovah meri Daniel siti siri genera enggau mimpi. Jehovah mega meri iya pengelandik nerangka reti jaku benabi. Mayuh ari jaku benabi nya udah dikeamatka. Jaku benabi ke bukai meri penerang pasal utai ti deka nyadi jemah ila. Jaku benabi tu bisi kaul enggau tiap iku orang ba dunya.

¹⁸ Ba artikel ke nangkanka tu, kitai deka beratika dua iti jaku benabi ke udah ditulis Daniel. Utai ke ditemu ari jaku benabi nya ulih nulung semua kitai, enda ngira tuai tauka biak, ngambika ulih ngaga pemutus ti manah diatu. Jaku benabi nya mega deka nulung kitai nyadi berani sereta tetap ati agi ngagai Jehovah. Enggau nya, kitai ulih besedia ke utai ti deka nyadi enda lama da agi.