1. Nama kebuah kitai gaga ati sereta temegah ulih nyadi Saksi-Saksi Jehovah?

 KITAI amat gaga ati sereta temegah ulih nyadi Saksi-Saksi Jehovah! Kitai nembiak Jehovah lalu kitai nunjukka diri Saksi-Saksi Iya lebuh nginjil ngagai orang bukai sereta ngajar sida pasal Iya. Kitai gaga ati lebuh ulih nulung orang ke “bisi pengingin deka bulih pengidup ti meruan belama iya” nerima pemendar. (SKR. 13:48, NWT) Kitai engka ngasaika utai ti sama enggau Jesus. Iya “gaga ati” lebuh bala murid iya madahka pasal peneleba ti manah ke diulih sida ba pengawa nginjil.—Luk. 10:1, 17, 21.

 2. Baka ni kitai nunjukka diri ngemeratka pengawa nginjil?

² Kitai beberatka pengawa nginjil. Rasul Paul meransang Timoti: “Jaga diri empu, lalu jaga mega ajar ti diberi nuan ngagai orang. . . . Enti nuan ngereja nya, nuan deka nyelamatka diri empu enggau orang ke mendingka nuan.” (1 Tim. 4:16) Pengawa nginjil kitai ulih nyelamatka orang. Ketegal kitai rayat Perintah Petara, kitai seruran deka nentuka ulah diri meri mulia ngagai nama Jehovah sereta idup sejalai enggau Berita Manah ke dibai kitai. (Plp. 1:27) Kitai deka ‘nyaga ajar ti diberi ngagai orang.’ Kitai deka nunjukka diri ngereja nya lebuh nyediaka diri enggau manah ke pengawa nginjil sereta minta berekat ari Jehovah sebedau kitai nginjil ngagai orang bukai.

 3. Kati semua orang deka ningaka pesan ari Bup Kudus? Padahka siti chunto.

³ Taja pan kitai bebendar nginjil ngagai orang bukai, tang mayuh orang ba kandang endur kitai nginjil engka enggai ningaka pesan Berita Manah pasal Perintah Petara ke ditusui kitai. Peratika peneleba Menyadi Georg Lindal. Iya kediri aja ngereja pengawa nginjil ba mayuh endur di Iceland ari taun 1929 ngagai 1947. Iya udah nyadung beribu iti litaricha, tang nadai seiku orang ba dia nerima pemendar. Iya madah: “Sekeda orang enda rinduka pesan ari Bup Kudus, tang mayuh ari sida enda minat.” Pengerintis seberai tasik ke udah nerima latih ari sekula Gilead mega dianjung ngagai Iceland kena nulung ba pengawa nginjil.  Sida mega nginjil betaun-taun tang enda mayuh orang deka ningaka pesan Bup Kudus. Pengujung iya pengudah semilan taun, bisi sekeda orang Iceland nyerahka diri ngagai Jehovah sereta dibaptisa.

 4. Nama engka diasaika kitai lebuh orang enggai ningaka pesan ari Bup Kudus?

⁴ Kitai tentu berasai asa ati lebuh orang enggai belajarka Bup Kudus. Kitai engka ngasaika “penyinu enggau penusah ati” baka Paul. Nama kebuah Paul berasai baka nya? Laban orang Judah enggai nerima Jesus nya Messiah ke udah disemaya. (Rom. 9:1-3) Ambika chunto, nuan ngajar seiku orang pasal Bup Kudus. Nuan bebendar deka nyadi pengajar ti manah sereta besampi ke iya. Taja pia iya enda nitihka utai ti dipelajarka iya. Nya alai, nuan patut ngetu belajarka Bup Kudus enggau iya. Tauka nuan enda kala ngembuan pemelajar Bup Kudus ke ngaga pemansang nyentukka iya dibaptisa. Kati nuan berasai besalah ketegal nya, lalu ngumbai Jehovah enda merekatka pengawa nginjil nuan? Ba artikel tu, kitai deka nyaut dua iti tanya: (1) Nama ke ngasuh pengawa nginjil kitai mujur? (2) Nama runding ti betul ke patut dikembuan kitai lebuh nginjil ngagai orang bukai?

 5. Nama kebuah pengawa kitai ke Jehovah enda seruran mujur baka ke dikedekaka kitai?

⁵ Bekaul enggau orang ke ngereja peneka Petara, Bup Kudus madahka: “Iya mujur dalam semua utai ti dikereja iya.” (Mas. 1:3) Taja pia, tu ukai reti iya semua utai ti dikereja kitai ke Jehovah deka mujur baka ke dikedekaka kitai. Pengidup mensia seruran “ditinggang penusah,” tu ketegal semua kitai enda sempurna. (Jop 14:1) Pia mega, kekadang sida ke nyakal kitai ngachau pengawa nginjil kitai. (1 Kor. 16:9; 1 Tes. 2:18) Enti utai tu nyadi, nama asai ati Jehovah ke pengawa nginjil kitai? Diatu aram meh kitai beratika sekeda prinsip Bup Kudus ke ulih nulung kitai ngiga saut ke tanya tu.

 6. Nama asai ati Jehovah lebuh kitai ransing nginjil enda ngira orang nerima tauka enda?

⁶ Jehovah beratika pengawa sereta pengeliat ati kitai ba pengawa nginjil. Ba Jehovah, pengawa nginjil kitai mujur laban kitai ngereja nya enggau ransing sereta ketegal pengerindu ngagai Iya. Nya alai, enda ngira sekalika orang deka ninga tauka enda, Jehovah agi lantang ati enggau pengawa kitai. Paul madah: ‘Petara ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita lebuh kita bekereja nulung nembiak Petara.’ (Heb. 6:10) Taja pan kitai nadai pemelajar Bup Kudus ke ngaga pemansang nyentukka dibaptisa, tang Jehovah seruran ingatka pengawa sereta pengerindu kitai. Kingatka meh utai ti dipadah Paul ngagai orang Kristian ba Korint. Jaku tu mega ulih meransang nuan enda ngira nuan bisi asil ti manah ba pengawa nginjil tauka enda. Ku Paul: ‘Kita enda lebu gawa ke Iya.’—1 Kor. 15:58.

 7. Nama ulih dipelajarka kitai pasal rasul Paul bekaul enggau pengawa nginjil iya?

 ⁷ Rasul Paul landik ba pengawa nginjil. Iya udah nirika eklisia ba mayuh endur. Tang, lebuh sekeda orang bejaku jai pasal Paul lalu madahka iya ukai pengajar ti manah, Paul enda madahka diri udah mayuh nulung orang nyadi orang Kristian. Tang, Paul madahka: “Aku udah bebendar agi bekereja.” (2 Kor. 11:23) Baka Paul kitai mega deka ingat utai ke pemadu beguna ba Jehovah, iya nya pengawa kitai ti bebendar sereta liat ati ba pengawa nginjil.

 8. Nama patut dikingatka kitai pasal pengawa nginjil?

⁸ Pengawa nginjil kitai ulih ngelantangka ati Jehovah. Jesus nganjung 70 iku bala murid iya nginjil pasal Perintah Petara. Pengudah abis nginjil, sida “pulai enggau ati ti gaga.” Nama ngasuh sida amat gaga ati? Ku sida madahka: ‘Indah antu deh ngasika kami dalam nama nuan!’ Taja pia, Jesus ngemetulka runding sida lalu madah ngagai sida: “Anang kita gaga ati ketegal antu nunduk ngagai kita, tang awakka ati kita gaga laban nama kita ditulis di serega.” (Luk. 10:17-20) Jesus nemu sida enda seruran deka bulih asil ti manah ba pengawa nginjil. Kebendar iya, kitai enda nemu berapa penyampau orang ke nyadi orang ke arap pengudah bala murid Jesus nginjil sarinya. Bala murid Jesus patut nemu pengaga ati ke diulih sida enda bepanggai ba penyampau orang ke mendingka sida. Tang pengaga ati sida nya ketegal nemu Jehovah lantang ati enggau pengawa sida ti bebendar.

 9. Nitihka Galatia 6:7-9, nama deka nyadi enti kitai liat ati ba pengawa nginjil?

⁹ Enti kitai liat ati ba pengawa nginjil, kitai deka bulih pengidup ti meruan belama iya. Lebuh kitai bebendar nginjil sereta ngajar orang bukai pasal Berita Manah, kitai kebendar iya nitihka iring roh kudus. Reti nya, kitai ngelakka roh kudus Petara ngiring pengidup kitai. Enti kitai enda “leju” tauka “mantul ngapa,” Jehovah besemaya deka meri kitai pengidup ti meruan belama iya taja pan kitai enda mujur nulung orang nyentukka dibaptisa.—Bacha Galatia 6:7-9.

10. Nama kebuah sekeda orang deka ninga pesan kitai lalu sekeda agi enggai?

¹⁰ Sekalika orang deka nerima pemendar tauka enda, nya bepanggai ba ati sida. Jesus nerangka utai tu ba sempama pasal seiku orang ke naburka benih ba mayuh macham tanah. Semina benih ke tumbuh ba tanah ti ami aja ngasilka buah. (Luk. 8:5-8) Jesus madahka, semua tanah ba sempama nya ngambarka gaya ati orang lebuh nerima pesan pasal ‘jaku Petara.’ (Luk. 8:11-15) Baka penabur benih nya, kitai enda ulih ngasuh benih pemendar tumbuh ba ati orang. Tang, nya bepanggai ba gaya ati sida. Tanggung pengawa kitai nya, terus nanam benih pemendar ba orang. Baka ke dipadah rasul Paul, “genap iku deka diupah nitihka pengawa ti dikereja siku-siku orang,” ukai asil ari pengawa sida.—1 Kor. 3:8.

11. Nama kebuah Jehovah lantang ati enggau Noah lebuh nginjil taja pan orang enggai ningaka pesan ke dibai iya? (Peda gambar ba mua majalah.)

¹¹ Nembiak Jehovah suba pan nginjil tang mayuh orang enggai ningaka pesan ke dibai sida. Ambika chunto, Noah dikumbai orang “ke ngajar pasal pengelurus” pengelama empat puluh tauka lima puluh taun. (2 Pet. 2:5) Noah tentu ngarapka orang deka ningaka pesan ke dibai iya, tang Jehovah nadai kala madahka utai nya deka nyadi. Nya alai, lebuh Jehovah meri iring ngagai Noah kena ngaga bandung, Jehovah mega madahka siti pesan ngagai Noah: “Nuan, bini nuan, sida anak nuan, enggau bini sida, enda tau enda tama ngagai bandung  nya.” (P-kal. 6:18) Lalu, lebuh Jehovah madahka pemesai bandung ke patut digaga Noah, iya engka sedar enda mayuh orang deka ningaka iya laban pemesai bandung ke digaga nya enda chukup ke orang mayuh. (P-kal. 6:15) Baka ke ditemu kitai, nadai seiku pan orang deka ningaka Noah. (P-kal. 7:7) Kati Jehovah ngasaika Noah enda mujur ba pengawa nginjil? Enda! Ba Jehovah, Noah udah mujur nyadi penginjil laban iya enggau tetap ati ngereja utai ke dipinta Jehovah kereja iya.—P-kal. 6:22.

12. Baka ni nabi Jeremiah tetemuka pengaga ati ba pengawa nginjil taja pan orang enggai ninga sereta nyakal pengawa iya?

¹² Nabi Jeremiah ngereja pengawa nginjil lebih ari empat puluh taun taja pan orang enggai mendingka iya sereta nyakal pengawa iya. Iya berasai asa ati ketegal dikemeli sereta dipechat orang ke nyakal nya. Tu ngasuh iya deka badu ngereja pengawa nginjil. (Jer. 20:8, 9) Tang Jeremiah enda ngalahka diri! Nama nulung iya mutarka runding ti negatif lalu tetemuka pengaga ati ba pengawa nginjil? Iya beratika dua iti utai ti beguna. Kesatu, Jeremiah nemu iya patut madahka pesan Petara ngagai orang laban pesan nya ulih mai “pengidup enggau pengadang ke jemah ila.” (Jer. 29:11) Kedua, Jehovah udah milih Jeremiah ngarika Iya madahka pesan ngagai orang. (Jer. 15:16) Kitai mega mai pesan ti meri pengadang ngagai orang lalu madahka nama Jehovah ketegal kitai Saksi Iya. Lebuh kitai beratika dua iti utai ke beguna tu, kitai mega ulih tetemuka pengaga ati ba pengawa nginjil enda ngira baka ni gaya orang nerima pesan kitai.

13. Nama dipelajarka kitai ari sempama Jesus ba Mark 4:26-29?

¹³ Orang begunaka awak kena ngemansangka pengarap. Jesus madahka utai tu ba sempama pasal seiku orang ke naburka benih. (Bacha Mark 4:26-29.) Pengudah orang nya naburka benih, benih ke ditabur nya tumbuh enggau belubah-lubah. Iya enda ulih ngasuh benih nya tumbuh enggau jampat agi. Sama mega, kitai engka patut nganti lama sebedau kitai ulih meda pemelajar Bup Kudus kitai nitihka utai ke dipelajar iya. Kitai mega enda ulih ngansak pemelajar Bup Kudus mansang enggau jampat baka ke dikedekaka kitai. Nya alai, anang meh kitai berasai asa ati. Baka penabur benih nya, kitai patut liat ati nganti nyentukka pemelajar Bup Kudus kitai ngaga pemutus deka nyembah Jehovah.—Jas. 5:7, 8.

14. Nama chunto ke nunjukka orang engka begunaka awak sebedau iya deka ningaka pesan ti dibai kitai?

¹⁴ Ba sekeda endur, lebuh kitai nginjil, kitai engka enda ulih meda asil tekala nya. Peratika peneleba dua iku menyadi kandung, Gladys enggau Ruby Allen. Ba taun 1959, seduai iya dianjung nyadi pengerintis biasa ba bandar Quebec di Kanada. b Lebuh seduai iya nginjil ba dia, orang ke diau ba bandar nya enda berani bejaku enggau seduai iya. Tu ketegal sida takut enggau orang ke ngelingi sida sereta bala tuai pengarap gerija Katolik. Ku Gladys madahka: “Kami nginjil lapan jam sehari pengelama dua taun, tang nadai seiku pan deka berandau enggau kami! Lebuh sida meda kami duai, sida nutup pintu enggau jenila. Tang kami duai enda ngetu nginjil.” Nyau kelama orang ba dia berengkah deka berandau enggau seduai iya, lalu sekeda ari sida deka ningaka pesan ti dibai seduai iya. Diatu, bisi tiga buah iti eklisia ba bandar nya.—Isa. 60:22.

15. Nitihka 1 Korint 3:6, 7, nama ulih dipelajarka kitai ari pengawa ngaga orang nyadi murid?

¹⁵ Bala menyadi bekerejasama kena nulung orang nyadi murid Jesus. Bala menyadi ba eklisia ulih sama nulung pemelajar Bup Kudus  nyentukka dibaptisa. (Bacha 1 Korint 3:6, 7.) Ambika chunto, seiku menyadi lelaki ninggalka surat mit tauka majalah ngagai seiku orang ke bisi minat. Tang iya enda ulih datai ngabas ba maya orang nya bisi awak deka berandauka Bup Kudus. Nya alai, iya minta seiku agi menyadi lelaki datai ngabas orang nya. Menyadi lelaki nya berengkah belajarka Bup Kudus enggau orang nya. Udah nya, iya mai mayuh bala menyadi sama enggau belajarka Bup Kudus, lalu tiap iku sida meransang pemelajar nya. Tiap iku bala menyadi nulung pemelajar nya mansang ba pengarap. Enggau chara nya, semua menyadi ke nulung pemelajar nya ulih gaga ati lebuh pemelajar nya dibaptisa.—Jhn. 4:35-38.

16. Nama kebuah nuan ulih gaga ati ba pengawa nginjil taja pan nuan bisi penanggul ba pengerai?

¹⁶ Baka ni enti nuan enda ulih nginjil sereta ngajar ketegal penanggul ba pengerai? Nuan agi ulih gaga ati ketegal nuan bisi ungkup ba pengawa nginjil. Peratika chunto Raja David. Raja David enggau soldadu iya patut nyelamatka semua orang sereta ngambi baru semua utai ti udah dirampas orang Amalek, tu nyengkaum bini enggau anak sida. Tang dua ratus iku bala David kelalu lelak deka enggau beperang, nya alai sida nya tinggal lalu nyaga barang sida. Pengudah menang ba perang, David enggau bala ke enggau iya beperang ngambi baru semua utai ke udah dirampas bala munsuh. Udah nya, David deka semua utai dibagi bela. Iya deka orang ke tinggal ngemataka bekal diberi ungkup ngemayuh enggi orang ke enggau beperang. (1 Sam. 30:21-25) Cherita tu ngajar utai ti beguna ngagai kitai pasal ngaga orang nyadi murid. Nuan engka enda ulih ngereja mayuh utai ba pengawa nginjil sereta ba pengawa ngajar. Tang enti nuan bebendar ngereja utai ke ulih, nuan agi ulih gaga ati lebuh meda orang ngelala Jehovah sereta dibaptisa.

17. Nama kebuah kitai beterima kasih ngagai Jehovah?

¹⁷ Kitai gaga ati laban Jehovah nerima pengawa kitai ti bebendar ngagai Iya. Iya nemu kitai enda ulih ngansak orang mendingka pesan ke dibai kitai tauka mai orang nyembah Iya. Taja pia, Iya nemu kitai bebendar gawa ke Iya sereta penalam pengerindu kitai ke Iya. Lalu Iya tentu deka merekatka kitai. Pia mega, Iya ngajar kitai ulih tetemuka pengaga ati ba pengawa nginjil enda ngira pengawa kitai nya besai tauka mit. (Jhn. 14:12) Nya alai, andal meh Petara deka gaga ati enti kitai liat ati ba pengawa nginjil!