1. Nama utai ti dikerandauka Jesus ba malam kepenudi lebuh enggau bala murid iya?

 BA MALAM kepenudi enggau bala murid sebedau iya mati, Jesus nyauka 30 kali nyebut pasal pengerindu. Iya madahka, sida patut “rinduka pangan diri.” (Jhn. 15:12, 17) Pengerindu sida nyata bendar nya alai orang ulih beratika iya lalu nemu sida nya amat murid Jesus. (Jhn. 13:34, 35) Pengerindu ke disebut Jesus nya ukai semina ba ati aja. Nya kualiti ti nyulut ke dipandangka nengah ulah ti sanggup ngelengkaka pengingin diri. Jesus madahka: ‘Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya. Kita pangan aku enti kita ngasika pesan aku.’—Jhn. 15:13, 14.

 2. (a) Nembiak Petara dikelala orang ketegal utai nama kemayaharitu? (b) Nama sekeda tanya ti deka disaut kitai ba artikel tu?

² Nembiak Jehovah kemayaharitu dikelala ketegal pengerindu sida ti tulin sereta ketegal penyerakup ti tegap. Sida mega sanggup ngelengkaka pengingin diri ngambika ulih mandangka pengerindu. (1 Jhn. 3:10, 11) Pengerindu ke baka nya enda ngira asal menua tauka raban bansa, jaku, ari ni penatai, tauka  baka ni chara kitai dibesaika. Nembiak Jehovah di serata dunya amat rinduka pangan diri. Nama kebuah pengerindu beguna bendar kemayaharitu? Baka ni Jehovah enggau Jesus ngemansangka kitai ngena pengerindu? Lalu baka ni kitai ulih merindang sereta ngeringka orang ngena pengerindu?—1 Kor. 8:1.

 3. Baka ni pengidup orang ba maya ti “mayuh macham penusah”?

³ Kitai idup ba maya ti “mayuh macham penusah,” lalu pengidup penuh “pemerinsa enggau ati ti tusah.” (2 Tim. 3:1-5; Mas. 90:10) Mayuh orang balat merinsa nya alai sida asai ke enggai agi idup. Lebih ari 800,000 iku orang, seiku orang tiap-tiap 40 sikin, munuh diri ninting taun. Indah sekeda ari bala menyadi Kristian kitai napi asai ati ti baka nya lalu pengujung iya sida pan munuh diri.

 4. Sapa bagi orang dalam Bup Kudus ke kala balat merinsa lalu minta diri mati?

⁴ Maya jeman Bup Kudus, sekeda nembiak Petara ke tetap ati balat tusah ati ketegal penanggul ke ditapi sida nya alai sida ingin deka mati. Ambika chunto, Jop balat pedis lalu ku iya: “Aku enggai agi idup. Aku nyau lelak idup.” (Jop 7:16; 14:13) Jonah balat tusah ati lalu ku iya: ‘Nya alai, awakka aku mati, Jehovah. Manah agi aku mati ari ke idup.’ (Jon. 4:3) Nabi Elijah balat nadai daya lalu ku iya: ‘Utai tu kelalu balat, Jehovah. Ambi nyawa aku. Manah agi aku mati!’ (1 Raj. 19:4) Tang Jehovah sayauka sida lalu deka sida idup. Iya enda nyalahka asai ati sida ke baka nya. Iya nulung sida ngulihka pengeran deka idup ngambika ulih terus nyembah Iya enggau tetap ati.

 5. Nama kebuah bala menyadi Kristian amat begunaka pengerindu ari kitai diatu?

⁵ Kemayaharitu, mayuh ari bala menyadi Kristian kitai napi penanggul ti balat nekan lalu sida begunaka pengerindu ari kitai. Sekeda nya dikelese tauka diperinsa. Bisi nya natka diri dikeduan tauka dikerandauka orang ba endur sida gawa. Tauka sida kelalu lelak laban gawa panjai jam tauka bisi kereja ti balat nekan. Bisi sekeda nya napi penanggul ti besai ba ruang bilik. Sida engka jadi enggau orang ke enda nyembah Jehovah lalu kaling pengidup sida enda ngetu nganu sida. Ketegal penanggul ke baka nya sereta iya ke bukai, mayuh orang ngasaika diri nadai agi pengering lalu engka berengkah kakang ati enggau diri empu. Sapa ulih nulung sida?

 6. Baka ni pengerindu Jehovah ngeringka nembiak Iya?

⁶ Jehovah madahka Diri rinduka nembiak Iya, diatu sereta belama iya. Uji gambarka baka ni asai ati orang Israel lebuh Jehovah madahka: “Laban Aku sayauka kita enggau laban Aku rinduka kita lalu meri kita basa,” sereta “Anang takut. Aku bisi enggau kita!” (Isa. 43:4, 5) Kitai nemu genap iku kitai berega ba Jehovah. a (Peda nota kaki.) Bup Kudus besemaya: ‘Kuasa Iya ngasuh nuan menang. Iya deka gaga ati ke nuan.’—Sep. 3:16, 17.

 7. Nama kebuah pengerindu Jehovah nya baka pengerindu indai ti nusuka anak? (Peda gambar ba pun artikel.)

⁷ Jehovah besemaya deka ngering sereta merindang nembiak Iya enda ngira nama penanggul ke ditapi sida. Ku Iya madahka: “Kita deka nyadi baka anak mit ke  ditusuka indai iya, dikerendut indai iya, lalu diibun enggau pengerindu. Aku deka merindang kita . . . baka indai ke merindang anak diri.” (Isa. 66:12, 13) Pikirka pengelikun ti diasaika anak mit lebuh indai ngerendut iya tauka bemain enggau iya! Jehovah sayau amat ke nuan lalu deka nuan berasai likun. Nuan endang berega ba Jehovah.—Jer. 31:3.

8, 9. Nama kebuah pengerindu Jesus ulih ngeringka kitai?

⁸ Tu siti agi kebuah kitai nemu Jehovah rinduka kitai: ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’ (Jhn. 3:16) Genselan Jesus nunjukka iya mega rinduka kitai, lalu pengerindu tu ngeringka kitai. Bup Kudus madahka indah “penusah, tauka pemedis” enda ulih “nyeraraka kitai ari pengerindu” Kristus.—Rom. 8:35, 38, 39.

⁹ Kadang-kadang, kitai napi penanggul ke ngasuh tubuh tauka emosi kitai lemi tauka ngasuh kitai enda gaga ati nyembah Jehovah. Tang ngingatka pemesai pengerindu ke udah diberi Kristus ulih meri kitai pengering dikena betan. (Bacha 2 Korint 5:14, 15.) Pengerindu Jesus meri kitai pengeran deka terus idup sereta nyembah Jehovah. Pengerindu Jesus ulih nulung kitai ngambika enda lemi, taja pan kitai merinsa ketegal pengerusak alam, diperinsa, asa ati, tauka irau.

10, 11. Sapa ke betanggungjawap ngemansangka bala menyadi Kristian ke lemi? Terangka.

¹⁰ Jehovah mega mandangka pengerindu  Iya ngagai kitai nengah eklisia. Lebuh kitai rinduka bala menyadi Kristian, kitai nunjukka pengerindu diri ke Jehovah. Kitai enggau naka ulih nulung sida nemu, sida berega lalu Jehovah sayauka sida. (1 Jhn. 4:19-21) Ku rasul Paul nulis: “Peransang sereta tulung sukung pangan diri, baka ke dikereja kita diatu.” (1 Tes. 5:11) Ukai semina tuai gempuru aja ke ulih ngereja tu. Tiap iku kitai ulih neladan Jehovah seduai Jesus lebuh meransang bala menyadi Kristian kitai.—Bacha Rome 15:1, 2.

¹¹ Sekeda bala ba eklisia ke balat ditekan pemerinsa dalam ati tauka irau patut betemu enggau lutur pakar sereta makai ubat. (Luk. 5:31) Bala tuai gempuru enggau sida ke bukai ba eklisia nemu taja pan sida nadai kala nerima latih nyadi lutur, tang bantu enggau jaku peransang ke diberi sida nya beguna amat. Semua bala ba eklisia ulih meransang orang ke balat ditekan pemerinsa dalam ati, “nulung orang ke lemi, lalu liat ati enggau semua sida.” (1 Tes. 5:14) Kitai nguji deka meretika asai ati bala menyadi Kristian kitai. Kitai patut sabar enggau sida lalu bejaku enggau chara ti ulih merindang sida lebuh sida lemi. Bisi nuan nguji ngeringka orang bukai? Nama deka digaga nuan ngambika ulih merindang sereta meransang orang bukai?

12. Padahka siti chunto pasal orang ke bulih peransang ari pengerindu bala menyadi Kristian.

¹² Seiku menyadi Kristian indu ari Eropah madahka: “Kekadang aku berunding deka munuh diri, tang bisi orang mantu aku. Bala menyadi Kristian udah nyelamatka nyawa aku. Sida seruran meransang sereta mandangka pengerindu. Taja pan semina beberapa iku aja ke nemu aku balat ditekan pemerinsa dalam ati, tang bala  menyadi Kristian seruran bisi enggau aku. Sepasang laki bini Kristian nyau baka apai indai aku. Seduai iya ngintu aku enggau manah, lalu ulih nulung aku 24 jam sehari.” Amat, ukai semua orang ulih nulung baka nya. Tang mayuh utai ke ulih digaga semua kitai kena nulung bala menyadi Kristian. b (Peda nota kaki.)

13. Nama patut digaga kitai kena merindang orang bukai?

¹³ Nyadi peninga ti manah. (Jas. 1:19) Kitai mandangka pengerindu enti kitai ninga enggau siru. Nanya tanya ke ulih nulung nuan meretika asai ati menyadi Kristian. Ari beratika mua nuan, iya ulih nemu enti nuan amat ibuhka iya. Nya alai lebuh iya bejaku, sabar sereta awakka iya madahka asai ati diri. Anang nyelepak lebuh iya bejaku. Enggau nyadi peninga ti manah, nuan ulih meretika iya agi lalu ulih meransang iya arapka nuan. Tu nyenangka iya agi mendingka utai ku nuan seraya nuan nguji nulung iya. Lebuh nuan amat ibuhka orang bukai, nya ulih merindang sida.

14. Nama kebuah kitai enda tau ngembuan runding ti enda manah pasal orang bukai?

¹⁴ Anang ngembuan runding ti enda manah pasal orang bukai. Orang ke balat ditekan pemerinsa dalam ati deka balat agi tusah ati enti iya nemu kitai ngembuan runding ti enda manah pasal iya. Tu ulih ngasuh kitai tusah nulung iya. ‘Leka jaku ti disebut enggau enda berunding, ngasuh ati balat telih baka diachuk pedang, tang jaku ti disebut enggau bejimat, ulih nyuman.’ (J-lam. 12:18) Taja pan kitai ukai sengaja deka ngemedis orang ke balat ditekan pemerinsa dalam ati ngena jaku, tang nya ulih ngemedis sida enti disebut enggau enda berunding. Nya alai kitai enda tau enda nulung sida arap kitai amat deka meretika utai ti ditapi sida.—Mat. 7:12.

15. Nama perengka ke ulih dikena kitai merindang orang?

¹⁵ Ngena Jaku Petara merindang orang. (Bacha Rome 15:4, 5.) Bup Kudus datai ari Petara ke meri “pengeliat ati enggau peransang,” nya alai kitai enda tekenyit enti kitai bulih pengelantang ari Bup Kudus. Kitai mega bisi Watch Tower Publications Index enggau Bup Dikena Saksi-Saksi Jehovah Ngiga Pansik. Ngena perengka dua iti tu, kitai ulih ngiga ayat Bup Kudus enggau litaricha ke ulih dikena kitai merindang sereta meransang bala menyadi Kristian.

16. Nama sekeda kualiti ke ulih nulung kitai meransang orang ke balat ditekan pemerinsa dalam ati?

¹⁶ Kasih sereta nelap. Jehovah nya Apai ti pengasih, lalu merindang nembiak Iya ba sebarang pekara. (Bacha 2 Korint 1:3-6; Luk. 1:78; Rom. 15:13) Paul netapka chunto ti manah ba pekara tu laban iya neladan Jehovah. Paul nulis: ‘Taja pen kami nyangka patut minta sebarang utai ari kita laban kami tu rasul Kristus. Tang kami nelap lebuh kami begulai enggau kita, baka indai ke siru enggau anak diri. Kami balat rinduka kita datai ke kami sedia deka bekunsi enggau kita, ukai semina Berita Manah ari Petara, tang mega nyawa kami empu, laban kami balat sayauka kita.’ (1 Tes. 2:7, 8) Lebuh kitai nelap baka Jehovah, kitai ulih meri pengelantang  ke dipinta bala menyadi Kristian kitai dalam sampi!

17. Runding ke baka ni ulih nulung meransang bala menyadi Kristian kitai?

¹⁷ Enda ngarapka bala menyadi Kristian kitai sempurna. Enda ngarap lebih ari ke patut. Enti nuan ngarapka sida sempurna, nuan deka asa. (P-jar. 7:21, 22) Kingatka, Jehovah enda ngarap lebih ari ke patut ari kitai. Nya alai kitai patut liat ati enggau pangan diri. (Eps. 4:2, 32) Kitai enggai bala menyadi Kristian kitai ngasaika diri enda ngereja mayuh pengawa ke Jehovah tauka mandingka sida enggau orang bukai. Tang, kitai meransang sida sereta madahka bagi utai manah ti benung digaga sida. Tu ulih nulung sida gaga ati seraya sida nyembah Jehovah.—Gal. 6:4.

18. Nama kebuah kitai deka ngemansangka orang ngena pengerindu?

¹⁸ Tiap iku Saksi Jehovah nya berega ba Iya sereta ba Jesus. (Gal. 2:20) Kitai balat rinduka bala menyadi Kristian kitai, nya alai kitai enda tau enda siru enggau sida. Kitai “ngereja utai ti mai pemaik, enggau utai ti tau ngeringka pangan diri.” (Rom. 14:19) Kitai enda sabar nganti pengidup ba Paradais, laban maya nya ila nadai agi orang deka berasai lemi! Penyakit enggau perang deka nadai agi. Nadai agi orang deka mati ketegal dosa, lalu pemerinsa, penanggul ba ruang bilik, tauka pengasa ba pengidup pan deka nadai agi. Ba ujung timpuh seribu taun, semua mensia deka nyadi sempurna. Sida ke mengkang tetap ati maya penguji ti kepenudi deka diiru Jehovah nyadi anak Iya ba dunya lalu sida deka bulih ‘pengelepas ti bemulia ti endang enggi bala anak Petara.’ (Rom. 8:21) Nya alai, ngarapka semua kitai mandangka pengerindu ti meransang sereta nulung pangan diri selamat tama ngagai dunya baru Petara.