1, 2. Nama penanggul ti ditapi Jeptah enggau anak indu iya?

 SEIKU indu ke biak pansut ngambat apai iya. Iya balat gaga ati meda apai iya selamat pulai beperang. Iya gaga ati sereta betanda laban apai iya udah menang beperang. Tang utai ti digaga sereta dipadah apai iya pengudah nya engka ngenyitka ati iya. Apai iya nyarikka gari diri lalu bejaku: “O anak! Nuan tu ngenusahka ati aku!” Udah nya, iya madah ngagai anak iya pasal semaya ke udah digaga iya enggau Jehovah. Semaya iya nya deka ngubah pengidup anak iya belama iya. Lalu tu ngasuh anak iya enda ulih belaki tauka ngembuan anak. Tang anak iya terus meri saut ti manah, meransang apai iya ngamatka semaya diri ngagai Jehovah. Saut iya nunjukka iya bisi pengarap ti besai. Iya pechaya sebarang utai ke diasuh Jehovah endang pulai ke pemanah iya. (P-ulu. 11:34-37) Lebuh apai iya meda pengarap iya, apai iya balat temegah ati ke iya laban apai iya nemu ulah iya nya ngelantangka ati Jehovah.

 ² Jeptah enggau anak indu iya manggaika pengarap ba Jehovah sereta pechaya enggau chara Iya ngereja utai. Seduai iya ngayanka pengarap taja pan nya enda senang ba seduai iya. Seduai iya keran deka diterima Jehovah, lalu ngasaika diri enda rugi ngelengkaka sekeda utai.

 3. Nama kebuah teladan Jeptah enggau anak indu iya ulih nulung kitai kemaya hari tu?

³ Endang enda senang deka seruran ngayanka pengarap ngagai Jehovah. Kitai patut “bebendar gawa ke pengarap.” (Jud. 3) Kena nulung kitai ngereja tu, aram kitai belajarka baka ni Jeptah enggau anak indu iya liat ati natka penanggul ba pengidup seduai iya. Baka ni seduai iya ngayanka pengarap ngagai Jehovah?

4, 5. (a) Nama pesan ti diberi Jehovah ngagai orang Israel lebuh sida tama ngagai Menua ti Udah Disemaya? (b) Nitihka Masmur 106, nama nyadi ngagai orang Israel ketegal sida enda ngasi?

⁴ Tiap hari, Jeptah enggau anak indu iya ingatka penusah ke ninggang orang Israel ketegal sida enda ngasika Jehovah. Nyauka 300 taun ti udah, Jehovah udah ngasuh orang Israel munuh semua penyembah pelesu ba Menua ti Udah Disemaya, tang sida enda nitihka pesan Iya. (U-dat. 7:1-4) Mayuh orang Israel berengkah nunda pengawa orang Kanaan, ke nyembah petara pelesu sereta ngembuan ulah ti kamah.—Bacha Masmur 106:34-39.

⁵ Ketegal sida enda ngasika Jehovah, Iya enda nyaga sida ari munsuh sida. (P-ulu. 2:1-3, 11-15; Mas. 106:40-43) Ruang bilik ti rinduka Jehovah tentu tusah deka ngayanka pengarap ba timpuh ti tusah nya. Taja pia, Bup Kudus bisi nyebut pasal sida ke ngayanka pengarap, baka Jeptah enggau anak indu iya sereta Elkanah, Hanah, enggau Samuel. Sida keran deka ngelantangka ati Jehovah.—1 Sam. 1:20-28; 2:26.

 6. Nama ulah ke bisi ba dunya kemaya hari tu, lalu nama patut digaga kitai?

⁶ Maya jeman kitai, orang bepikir sereta ngembuan ulah ti sama baka enggi orang Kanaan. Sida beberatka seks, ulah ti kasar sereta duit. Tang Jehovah meri tangkan ti terang ngagai kitai. Iya deka nyaga kitai baka Iya ke deka nyaga orang Israel ari ulah ti jai. Kati kitai deka belajar ari penyalah sida? (1 Kor. 10:6-11) Kita enda tau enda enggau naka ulih nyeliahka runding dunya. (Rom. 12:2) Kati kitai deka enggau naka ulih ngereja nya?

 7. (a) Nama digaga bala Jeptah ngagai iya? (b) Nama digaga Jeptah?

⁷ Maya jeman Jeptah, ketegal orang Israel enda ngasika Jehovah, sida ditekan orang Pilistin enggau orang Amon. (P-ulu. 10: 7, 8) Kelimpah napi penanggul ari bansa bukai, Jeptah mega napi penanggul ari bala menyadi iya empu sereta bala tuai orang Israel. Ketegal bala menyadi iya kepapas sereta begedika iya, sida ngansak iya ninggalka pesaka ke endang ungkup iya. (P-ulu. 11:1-3) Jeptah enda ngelakka ulah sida ti jai ngachau runding sereta asai ati iya. Baka ni kitai nemu? Laban lebuh bala tuai orang Israel minta iya nulung sida, iya nulung sida. (P-ulu. 11:4-11) Nama engka udah meransang Jeptah deka nulung bala tuai orang Israel nya?

8, 9. (a) Nama prinsip dalam Adat Moses ke engka udah nulung Jeptah? (b) Nama utai ti pemadu beguna ba Jeptah?

 ⁸ Jeptah nya soldadu ti berani, lalu iya amat nemu pasal sejarah orang Israel sereta adat Moses. Chara Jehovah ngintu nembiak Iya ngajar Jeptah pasal standard Iya ke bekaul enggau utai ti betul tauka salah. (P-ulu. 11:12-27) Jeptah ngena penemu nya ba pengidup iya lebuh iya ngaga pemutus. Iya nemu baka ni asai ati Jehovah bekaul enggau pengeringat sereta malas penyai, lalu baka ni Jehovah dekaka nembiak Iya rinduka pangan diri. Nambahka nya, Adat ngajar iya chara begulai enggau orang bukai, indah enggau orang ke begedika iya.—Bacha Pemansut 23:5; Adat Lewi 19:17, 18.

⁹ Teladan Josep ke ngayanka pengasih ngagai bala menyadi ke begedika iya, engka udah nulung Jeptah. (P-kal. 37:4; 45:4, 5) Berundingka teladan tu engka udah nulung Jeptah mutarka penanggul iya ngena chara ti ngerinduka ati Jehovah. Ulah bala menyadi Jeptah amat ngemediska ati iya. Tang ngetanka nama Jehovah enggau nembiak Iya nya utai ti beguna agi ari asai ati iya. (P-ulu. 11:9) Iya keran deka ngayanka pengarap ngagai Jehovah. Ulah iya tu ngenataika berekat ari Jehovah, ke iya empu enggau ke orang Israel.—Heb. 11:32, 33.

10. Baka ni kitai ngawakka prinsip Bup Kudus nulung kitai ngembuan ulah orang Kristian kemaya hari tu?

¹⁰ Kati kitai deka belajar ari teladan Jeptah? Nama deka digaga kitai enti sema bala menyadi Kristian ngenusahka ati kitai, tauka enti sema kitai ngasaika sida enggai begulai manah enggau kitai? Kitai anang ngelakka ati kitai ti pedis nagang kitai nyembah Jehovah. Anang ngetu datai ke gempuru Kristian tauka ngena awak begulai enggau bala menyadi Kristian. Aram meh kitai neladan Jeptah sereta ngasika Jehovah. Tu deka nulung kitai mutarka penanggul ngambika kitai mega ulih nyadi teladan ti manah.—Rom. 12:20, 21; Kol. 3:13.

11, 12. Nama semaya ke digaga Jeptah, lalu semaya nya bekaul enggau nama?

¹¹ Jeptah nemu iya begunaka saup ari Petara kena ngelepaska orang Israel ari orang Amon. Iya besemaya ngagai Jehovah, enti Jehovah ngasuh iya menang, iya deka nyerahka orang ke terubah-rubah pansut ngambat iya ari rumah nyadi “pemeri tunu” ngagai Jehovah lebuh iya pulai beperang. (P-ulu. 11:30, 31, NW) Nama reti nya?

¹² Nunu mensia nyadika pemeri nya pengawa ti dipegedika Jehovah. Nya alai, kitai nemu Jeptah ukai amat deka nunu anak indu iya nyadika pemeri. (U-dat. 18:9, 10) Nitihka Adat Moses, pemeri tunu nya pemeri ke semina diberi ngagai Jehovah aja. Nya alai reti utai ku Jeptah nya, orang ke deka diserahka iya ngagai Jehovah deka gawa ba langkau sembiang sepemanjai pengidup orang nya.  Jehovah ningaka utai ku Jeptah, lalu nulung iya menang beperang. (P-ulu. 11:32, 33) Tang sapa ke deka diserahka Jeptah ngagai Jehovah?

13, 14. Nama dipadahka jaku Jeptah ba Pengulu 11:35 pasal pengarap iya?

¹³ Pikirka pasal gaya utai ti dipadah ba pun artikel tu. Lebuh Jeptah pulai beperang, orang keterubah datai ngambat iya nya anak indu ti dikesayau iya, anak tunggal iya! Kati Jeptah deka ngamatka semaya iya? Kati iya deka nyerahka anak indu iya ngagai Jehovah ngambika gawa ba langkau sembiang sepemanjai pengidup iya?

¹⁴ Prinsip dalam Adat Petara mega engka udah nulung Jeptah ngaga pemutus ti betul. Iya engka ingatka jaku ke bisi ba Pemansut 23:19, ke ngasuh nembiak Jehovah meri utai ti pemadu manah ngagai Jehovah. Adat mega madahka, lebuh orang ngaga semaya enggau Jehovah, “orang nya enda tau mungkir ari semaya nya, tang ngereja semua utai ti disebut iya.” (P-pau. 30:2) Baka Hanah, ke engka idup sama jeman enggau Jeptah, Jeptah patut ngamatka semaya iya, taja pan iya nemu utai ke deka nyadi ba anak indu iya enggau iya empu. Ketegal anak indu iya deka gawa ba langkau sembiang, iya enda ulih ngembuan anak. Nya alai, nadai orang ke ulih neruska nama Jeptah sereta bempu pesaka. (P-ulu. 11:34) Taja pia, Jeptah ngayanka pengarap lalu bejaku: ‘Aku udah besumpah enggau Jehovah, nya alai aku enda ulih matak semaya diri!’ (P-ulu. 11:35) Jehovah nerima pemeri ti besai ari Jeptah sereta merekatka iya. Kati nuan deka ngayanka pengarap baka Jeptah?

15. Nama semaya ti udah digaga kitai, lalu baka ni kitai ulih ngayanka pengarap?

¹⁵ Lebuh kitai nyerahka pengidup kitai ngagai Jehovah, kitai besemaya deka enggau naka ulih ngereja peneka Iya. Kitai nemu endang enda senang deka seruran  ngamatka semaya. Tang nama deka digaga kitai enti sema kitai diasuh ngereja utai ke enda dikerinduka kitai? Enti kitai mutarka asai ati kitai sereta sanggup ngasika Petara, kitai nunjukka diri deka ngamatka semaya kitai. Utai ke dilengkaka kitai engka ngasuh kitai tusah ati, tang berekat ari Jehovah seruran manah agi. (Mal. 3:10) Tang baka ni enggau anak indu Jeptah? Nama digaga iya bekaul enggau semaya apai iya?

16. Nama digaga anak indu Jeptah bekaul enggau semaya apai iya? (Peda gambar ba pun artikel.)

¹⁶ Semaya Jeptah enda sama enggau enggi Hanah. Hanah besumpah deka nyerahka anak iya Samuel ngambika gawa ba langkau sembiang nyadi Nasir. (1 Sam. 1:11) Orang ke nyadi Nasir dikemendarka kawin sereta ngembuan ruang bilik. Tang anak indu Jeptah diserahka nyadi “pemeri tunu,” nya alai iya enda ulih ngasaika pengidup nyadi bini tauka indai. (P-ulu. 11:37-40, NW) Perundingka tu! Iya engka ulih jadi enggau lelaki ti pemadu manah ba menua nya, laban apai iya nyadi seiku tuai ba menua Israel. Tang diatu iya deka nyadi ulun ba langkau sembiang. Baka ni iya nerima nya? Iya nunjukka pengawa ke Jehovah nya utai ti dikenuluka iya lebuh iya madahka: “Kereja aja meh utai ti deka dikereja nuan ngagai aku.” (P-ulu. 11:36) Iya ngelengkaka pengingin iya ke deka bisi laki sereta ngembuan anak ngambika ulih gawa ke Jehovah. Baka ni kitai ulih neladan ulah iya ke sanggup ngelengkaka sekeda utai?

17. (a) Baka ni kitai ulih neladan pengarap Jeptah enggau anak indu iya? (b) Baka ni jaku ba Hebrew 6:10-12 meransang nuan ngelengkaka sekeda utai?

¹⁷ Ke diatu, beribu iku menyadi Kristian lelaki enggau indu ke biak sanggup enda kawin tauka milih enda ngembuan anak. Nama kebuah? Laban sida deka gawa ke Jehovah enggau mayuh agi. Pia mega, mayuh menyadi Kristian kitai ke udah tuai sanggup ngelengkaka awak ke dikena begulai enggau bala anak tauka bala uchu. Tang, sida ngena jam enggau  pengering sida ke Jehovah. Sekeda ari sida gawa ba projek nirika bengunan tauka masuk Sekula Penginjil Perintah Petara sereta mindah ngagai gempuru ke begunaka mayuh agi penginjil. Iya ke bukai ngaga pelan nambahka pengawa sida ke Jehovah maya musin Ngingatka Pemati Jesus. Jehovah seruran ingatka utai ke udah digaga semua menyadi Kristian ke ngayanka pengarap nya. (Bacha Hebrew 6:10-12.) Baka ni enggau nuan? Kati nuan ulih ngelengkaka sekeda utai ngambika ulih gawa ke Jehovah enggau mayuh agi?

18, 19. Nama udah dipelajarka kitai ari cherita Bup Kudus pasal Jeptah enggau anak indu iya, lalu baka ni kitai ulih neladan seduai iya?

¹⁸ Nama nulung Jeptah mutarka penanggul iya? Iya ngawakka Jehovah ngiring iya ngaga pemutus ba pengidup iya. Jeptah enggai milih nitihka ulah orang ke jai. Lalu iya mengkang ngayanka pengarap indah lebuh orang bukai ngenusahka ati iya. Ketegal Jeptah enggau anak indu iya sanggup ngelengkaka sekeda utai, Jehovah merekatka seduai iya. Lalu Jehovah ngena seduai iya nulung orang bukai nyembah Iya. Indah lebuh orang bukai badu agi ngereja utai ti betul, Jeptah enggau anak indu iya mengkang ngayanka pengarap ngagai Jehovah.

¹⁹ Bup Kudus madahka: ‘Tunda teladan orang ke arap sereta liat ati, ngambika kita nerima utai ti udah disemaya Petara.’ (Heb. 6:12) Aram meh kitai neladan Jeptah enggau anak indu iya, laban enti kitai mengkang ngayanka pengarap, Jehovah deka merekatka kitai.