1, 2. (a) Nama dipadah Elipas enggau Bildat pasal runding Petara bekaul enggau pengawa kitai ke Iya? (b) Nama dipadah Jehovah pasal pekara tu?

 LEBIH ari 3,000 taun ti udah, tiga iku lelaki bejaku enggau Jop, nembiak Petara ke tetap ati. Seiku ari sida nya, Elipas, ari nengeri Teman, nanya Jop sekeda utai: ‘Kati orang bisi tau diguna Petara, nyengkaum orang ke pemadu pintar? Kati Petara bisi penguntung enti nuan ngereja utai ti lurus? Kati pemadas pendiau nuan ulih mai penguntung ngagai Petara?’ (Jop 22:1-3) Elipas enggau terang ngumbai saut iya nadai. Seiku agi ari sida nya, Bildat ari menua Suah, udah nya madahka mensia enda ulih dikumbai lurus di mua Petara.—Bacha Jop 25:4.

² Elipas enggau Bildat deka Jop ngumbai pengawa iya ke nyembah Jehovah nya nadai guna. Seduai iya deka Jop pechaya, ba mata Petara kitai enda lebih ari indu buyah, ulat tauka belut. (Jop 4:19; 25:6) Kati sida bejaku munyi  nya ketegal sida baruh ati? (Jop 22:29) Amat, Jehovah endang besai enti dibanding enggau kitai. Enti kitai ba tuchung sigi bukit tauka meda utai ba luar ari jenila bilun, kitai ngasaika diri amat mit sereta enda beguna. Kati Jehovah ngasaika baka nya enggau pengawa kitai ke bebendar nyembah Iya sereta gawa ke Perintah Iya? Enda! Jehovah madahka Elipas, Bildat, enggau lelaki ketiga, Sopar, nyebut utai ti bula. Udah nya Petara madahka Diri lantang ati enggau Jop, lalu ngumbai iya “nembiak Aku.” (Jop 42:7, 8) Nya alai kitai tau arap, mensia ke enda sempurna ‘tau diguna Petara.’

 3. Nama dipadah Elihu pasal pengawa kitai ke bebendar nyembah Jehovah? Nama reti utai ku iya?

³ Seiku lelaki biak ke benama Elihu mendingka randau entara Jop enggau tiga iku lelaki nya. Pengudah sida tembu berandau, Elihu nanya Jop pasal Jehovah: “Enti nuan lurus, nama utai ti diberi nuan ngagai Iya? Nama utai ti diterima Iya ari jari nuan?” (Jop 35:7) Kati Elihu mega deka madahka pengawa kitai ke bebendar nyembah Petara nya enda beguna? Enda. Jehovah enda ngerara Elihu, baka Iya ke udah ngerara sida tiga nya. Elihu bisi penemu ke enda sebaka. Elihu madahka, Jehovah enda begunaka kitai nyembah Iya. Jehovah nadai begunaka nama-nama. Nadai utai ke ulih dikereja kitai deka ngasuh Iya kaya agi, tauka kering agi. Indah semua kualiti manah tauka penau ke dikembuan kitai datai ari Petara, lalu Iya meda chara kitai ngena semua nya.

 4. Nama runding Jehovah lebuh kitai manah enggau orang bukai?

⁴ Enti kitai ngayanka pengerindu ti meruan ngagai orang ke nyembah Jehovah, Iya deka ngumbai pengawa kitai nya baka ke dikereja ngagai Iya Empu. Kitai macha ba Jaku Dalam 19:17: ‘Lebuh nuan meri utai ngagai orang ke seranta, nuan baka ke nyali utai ngagai Jehovah, lalu Jehovah deka mayar nuan.’ Kebendar, Jehovah meda tiap kali kitai ngayanka pengasih ngagai orang bukai. Lalu taja pan Jehovah nya Penempa dunya raya, Iya indah ngumbai pengawa nya baka ke nyali utai ngagai Iya, ke deka dibayar Iya ngena mayuh pemeri ti ngerinduka ati. Anak Petara, Jesus, setuju enggau pekara tu.—Bacha Luke 14:13, 14.

 5. Nama tanya ke deka dikerandauka kitai diatu?

⁵ Menya, Jehovah minta nabi Isaiah ngarika Iya, lalu gawa ke Iya enggau chara ti spesial. (Isa. 6:8-10) Isaiah deka nerima kangau nya, lalu ku iya nyaut: ‘Aku, Jehovah! Kirumka aku!’ Kemaya hari tu mega, Jehovah meri mensia ke tetap ati peluang sama gawa enggau Iya. Beribu-ribu iku nembiak Jehovah ngayanka diri ngembuan ulah ti sama baka Isaiah. Sida deka nerima pengawa ari Jehovah dalam  mayuh chara enggau ba mayuh endur, sereta napi penanggul enggau pemar. Tang orang engka madah ngagai diri empu: ‘Aku beterima kasih ke peluang sanggup datai mantu gawa ke Jehovah, tang kati pengawa ke digaga aku amat bisi guna? Sekalika aku bisi datai mantu tauka nadai, kati Jehovah deka nentu pengawa ari Iya mujur dipejalaika?’ Kala nuan ngasaika baka tu? Aram kitai berandauka sekeda pekara ba pengidup dua iku nembiak Jehovah menya, Deborah enggau Barak, ulih nulung kitai nyaut tanya nya.

 6. Nama kebuah bala soldadu Jabin baka ke ulih ngalahka orang Israel?

⁶ Barak nya bujang berani bansa Israel, lalu Deborah nya nabi ke indu. Pengelama 20 taun, Jabin, raja menua Kanaan “balat amat nekan” orang Israel. Bala soldadu Jabin mangah sereta jai, nya alai orang Israel takut pansut ari endur sida belalai. Soldadu Jabin bisi 900 buah kerita perang ke bisi sabit ti dijantil ba batang besi dalam lubang roda, tang orang Israel nadai ngembuan senyata ti menyana kena belaban tauka baju besi kena ngelindung diri empu.—P-ulu. 4:1-3, 13; 5:6-8.

7, 8. (a) Nama pesan ti keterubah diberi Jehovah ngagai Barak? (b) Baka ni orang Israel ngalahka bala soldadu Jabin? (Peda gambar ba pun artikel.)

⁷ Enti dibanding enggau bala soldadu Jabin, orang Israel baka ke lemi, lalu senang dialahka. Tang Jehovah bepesan ngagai Barak nengah Deborah, nabi ke indu: “Bai sepuluh ribu iku orang ari raban bansa Naptali enggau Sebulun, lalu uluka sida ngagai Bukit Tabor. Aku deka mai Sisera, tuai soldadu Jabin, lalu ngasuh iya beperang ngelaban nuan ba Sungai Kison. Iya deka mai kerita perang iya enggau bala soldadu iya, tang Aku deka ngasuh nuan menang.”—P-ulu. 4:4-7.

⁸ Peminta ke ngasuh datai mantu beperang digerah, lalu 10,000 iku sida ke lelaki begempuru ba Bukit Tabor. Udah nya Barak enggau bala soldadu iya mupuk beperang ngelaban munsuh ba endur ke dikumbai Taanak. (Bacha Pengulu 4:14-16.) Kati bisi Jehovah nulung orang Israel? Bisi. Enggau enda memukai kabut datai mangka, lalu palan beperang ti rangkai berubah nyadi tanah luchak. Tu meri peluang ngagai orang Israel. Barak begagaika bala soldadu Sisera penyauh 24 kilometer (15 batu), nyentuk ngagai Haroset-ha-goiim. Tang lebuh ba rantau jalai, kerita perang Sisera mengkang ba luchak. Sisera pansut ari kerita perang, lalu rari ngagai Sananim, semak Kedes. Dia Sisera belalai dalam langkau kain seiku indu ke benama Jael. Sisera lelak amat, lalu tinduk jenak. Lebuh Sisera benung tinduk, Jael enggau berani munuh iya. (P-ulu. 4:17-21) Jehovah udah ngasuh orang Israel menang ngalahka munsuh. a (Peda nota kaki.)

 9. Nama ulih dipelajarka kitai ba Pengulu 5:20, 21 pasal perang ngelaban Sisera?

⁹ Kitai ulih nemu mayuh agi pasal pekara ke disebut ba Pengulu bab 4 enti  macha bab ke nangkanka iya. Pengulu 5:20, 21 madahka: “Bintang nyerang ari langit. Lebuh sida bejalai meraka langit, sida beperang ngelaban Sisera. Sida anyut ditabanka ai bah di Kison, Sungai Kison ti deras.” Kati reti nya bala melikat nulung orang Israel lebuh ke beperang nya, tauka kati reti nya deka bisi ujan meteor? Bup Kudus nadai nerangka. Tang kitai ulih ngumbai Jehovah nyelamatka nembiak Iya ngena ujan ti bangat ba endur sereta maya ti ngena, ngambika 900 buah kerita perang nya tusah deka bejalai. Ba Pengulu 4:14, 15, kitai macha lebih ari sekali pasal Jehovah dipuji ketegal nulung orang Israel menang. Nadai seiku ari 10,000 iku orang Israel ke sanggup datai mantu patut dipuji ketegal udah menang.

10, 11. Nama kebuah Meros disumpah?

¹⁰ Diatu aram kitai mansik utai ti amat ngalitka ati. Pengudah orang Israel menang, Deborah enggau Barak belagu muji Jehovah. Ku seduai iya belagu: ‘“Sumpah Meros,” ku melikat Jehovah bejaku, “siti sumpah ke orang ke diau dia, laban sida nadai datai nyaup Jehovah, nyadi soldadu lalu beperang ngarika Iya.”’—P-ulu. 5:23.

¹¹ Tang sumpah ke ninggang Meros balat bisa nyentukka bekau iya pan enda ulih ditemu. Tu engka ketegal orang ba nengeri nya enggai nyaup Barak beperang. Laban 10,000 iku orang ke sanggup datai mantu beperang ngelaban orang Kanaan, orang Meros tentu bisi ninga gerah ke ngasuh datai mantu beperang. Tauka Meros engka nengeri ke dipansa Sisera lebuh ngerarika diri ari Barak. Orang Meros engka bisi peluang nangkap Sisera tang sida enda ngereja nya. Uji gambarka, sida meda bujang berani ke mangah nya rari nyelamatka diri lebuh nengah nengeri sida! Sida ulih ngereja utai ke bisi reti kena nyukung tuju Jehovah. Enti sida ngereja nya, Jehovah tentu udah merekatka sida. Tang lebuh bisi peluang ngereja utai ke Jehovah, sida enda ngereja nya. Orang Meros enda baka Jael, ke berani munuh Sisera.—P-ulu. 5:24-27.

12. Nama bida ulah orang ke bisi ba Pengulu 5:9, 10? Baka ni tu bekaul enggau kitai?

¹² Ba Pengulu 5:9, 10, kitai meda ulah sida 10,000 iku ke datai mantu nya bebida ari ulah sida ke enggai datai mantu. Deborah enggau Barak muji “bala tuai soldadu orang Israel, enggau bala orang ke gaga ati nyerahka diri [sanggup datai mantu] mansang beperang.” Sida amat bebida ari sida ke “nepan keledai ti burak,” ke ngasaika diri enda patut enggau pengawa nya. Sida digambarka baka orang ke “ba atas penuduk” sereta orang “ke bejalai kaki,” iya nya gaga ati enggau pengidup ti nyamai. Tang sida ke datai mantu nya nyaup Barak beperang ba bukit Tabor ke bebatu sereta ba lebak Kison ke bepaya. Orang ke deka idup lantang nya diasuh berunding. Sida patut berati sereta berunding pasal peluang ke  dilepaska sida ketegal enda datai mantu ngereja pengawa ke Jehovah. Kemaya hari tu, kitai mega patut meresa ulah kitai bekaul enggau gawa ke Petara.

13. Baka ni ulah raban bansa Reuben, Dan, enggau Aser bebida ari Sebulun enggau Naptali?

¹³ Sida 10,000 iku ke datai mantu nya bisi peluang meda Jehovah bejalaika pengawa nyadi Pemerintah ti Pemadu Tinggi. Sida ulih madah ngagai orang bukai pasal utai nya lebuh sida bejaku pasal pengawa Jehovah ti lurus. (P-ulu. 5:11) Tang, suku raban bansa Reuben, Dan, enggau Aser ibuh agi ke pengaya sida, baka bedus, kapal sereta penyangkai kapal, ari sida ke gawa ke Jehovah. (P-ulu. 5:15-17) Taja pia, ukai semua suku raban bansa sida baka nya. Raban bansa Sebulun enggau Naptali “berambunka nyawa beperang” laban deka nyukung Deborah enggau Barak. (P-ulu. 5:18) Kitai ulih belajarka utai ti beguna ari ulah ti bebida bekaul enggau pengawa datai mantu.

14. Baka ni kitai nunjukka diri nyukung perintah Jehovah kemaya hari tu?

¹⁴ Kemaya hari tu, kitai enda beperang enti deka nyukung perintah Jehovah. Tang kitai ngayanka diri nyukung enti nginjil enggau berani sereta ransing. Lebih ari ke udah, kitai begunaka orang ke deka datai mantu ngereja pengawa ke Jehovah. Bejuta iku bala menyadi Kristian ke lelaki, ke indu, enggau sida ke biak datai mantu ngereja mayuh bengkah pengawa penuh jam ke Jehovah. Ngambika chunto, mayuh ari sida nyadi pengerintis, gawa ba Betel, nirika Palan Gempuru, sereta sukarela nulung ba gempuru besai sereta konvensyen. Sekeda bala tuai gempuru bebendar gawa ba Hospital Liaison Committees sereta ngatur konvensyen. Kitai tau arap, Jehovah gaga ati enggau pengawa kitai ke deka gawa ke Iya ba sebarang pengawa ke begunaka saup ari kitai, lalu Iya mengkang ingatka pengawa nya.—Heb. 6:10.

15. Baka ni kitai ulih nentuka diri enda lenyau pengeransing gawa ke Jehovah?

 ¹⁵ Kitai patut meresa ulah kitai bekaul enggau datai mantu ba pengawa ke Jehovah. Kitai ulih nanya diri empu: ‘Kati aku ngelakka orang bukai ngereja semua pengawa? Kati aku keran agi deka ngulihka reta ari ke gawa ke Jehovah? Tauka kati aku nunda pengarap enggau pemerani Barak, Deborah, Jael, sereta sida 10,000 iku ke datai mantu enggau ngena sebarang utai ti dikemisi aku gawa ke Jehovah? Kati aku bekira deka pindah ngagai nengeri tauka menua bukai ngambika ulih ngiga mayuh agi duit sereta bisi pengidup ti manah agi? Enti pia, kati aku besampi ngagai Jehovah pasal pemindah aku bekaul enggau kami sebilik sereta eklisia?’ b (Peda nota kaki.)

16. Taja pan Jehovah bisi semua utai, nama ulih diberi kitai ngagai Iya?

¹⁶ Jehovah meri kitai basa ti besai enggau ngemendarka kitai nyukung perintah Iya. Kenyau ari jeman Adam seduai Hawa, Sitan deka mensia setanah enggau iya ngelaban Jehovah. Tang lebuh kitai nyukung perintah Jehovah, kitai enggau terang nunjukka ngagai Sitan sapa ke disukung kitai. Pengarap enggau penaluk meransang kitai deka sukarela gawa ke Jehovah, lalu tu ngelantangka ati Iya. (J-lam. 23:15, 16) Jehovah ulih ngena penaluk kitai ke nyukung sereta ngasika Iya nyaut jaku Sitan ti bejai. (J-lam. 27:11) Ulah kitai ke ngasi nya utai ke diberi kitai ngagai Jehovah, lalu ulah ke baka nya berega ba Iya sereta ngelantangka ati Iya.

17. Nama dipadah Pengulu 5:31 pasal utai ke deka nyadi jemah ila?

¹⁷ Enda lama da agi, semua orang ba dunya deka agi milih perintah Jehovah enti dibanding enggau perintah ke bukai. Kitai enda sabar nganti maya nya datai! Kitai ngasaika utai ti sama baka Deborah enggau Barak ke belagu: ‘Awakka semua munsuh Nuan mati baka nya, O Jehovah, tang awakka bala pangan [orang ke rinduka, NW] Nuan manchar baka mata hari ti benung niki!’ (P-ulu. 5:31) Tu deka nyadi lebuh Jehovah ngujungka dunya Sitan ti jai. Maya perang Armagedon berengkah, Jehovah enda begunaka mensia mantu Iya ngerusakka munsuh Iya. Tang kitai deka “diau jenuh” lalu nengkilaka pengelepas ari Jehovah. (2 Ban. 20:17) Ke diatu, kitai bisi peluang ti badas nyukung perintah Jehovah enggau berani sereta ransing.

18. Baka ni pengawa sukarela nuan ulih nguntungka orang bukai?

¹⁸ Deborah enggau Barak ngepunka lagu pemenang enggau meri puji ngagai Jehovah, ukai ngagai mensia. Ku seduai iya belagu: ‘Ketegal orang sanggup datai mantu, puji meh Jehovah!’ (P-ulu. 5:1, 2, NW) Pia mega, lebuh kitai gawa ke Jehovah ba sebarang pengawa ke begunaka saup ari kitai, orang bukai mega diperansang ‘muji Jehovah!’