1. Marta pechayaka utai nama deka nyadi ba menyadi lelaki iya? (Peda gambar ba pun artikel.)

 MARTA, pangan rapat sereta murid Jesus, benung tusah ati. Menyadi lelaki iya, Lasarus, udah mati. Kati bisi utai ke ulih ngelantangka ati iya? Bisi. Jesus besemaya ngagai iya: “Menyadi nuan deka angkat idup baru.” Jaku nya tentu enda ulih muai semua penusah ba ati Marta. Taja pia iya arapka semaya Jesus nya, lalu ku iya madahka: “Aku nemu iya deka angkat idup baru lebuh pengangkat orang ari mati ba pengujung dunya [“ba hari ti penudi,” NW].” (Jhn. 11:20-24) Marta pechaya, jemah ila deka bisi pengangkat ari mati. Tang udah nya, Jesus ngaga siti kereja ajih. Jesus ngangkatka Lasarus idup baru hari nya mega.

 2. Nama kebuah nuan deka ngembuan pengandal ti sama baka Marta?

² Kitai enda patut ngarapka Jesus tauka Apai iya deka ngangkatka orang ti dikesayauka kitai diatu. Tang kati nuan baka Marta, amat pechaya jemah ila orang ti dikesayauka nuan deka diangkatka idup baru? Nuan engka udah lenyau laki tauka bini, indai, apai, aki ini, tauka indah anak ti dikesayauka  nuan. Nuan tentu nganti maya deka merap, bejaku, sereta ketawa enggau iya. Tang manah amat, baka Marta, nuan bisi kebuah ti manah ulih madahka: ‘Aku nemu orang ti dikesayauka aku deka angkat idup baru lebuh pengangkat orang ari mati.’ Taja pia, endang manah enti tiap iku orang Kristian berundingka kebuah kitai ngembuan pengandal tu.

3, 4. Nama pengangkat ari mati ke baru udah dikereja Jesus, lalu baka ni nya ngeringka pengandal Marta?

³ Marta diau semak Jerusalem, nya alai iya engka enda meda Jesus ngangkatka anak lelaki seiku indu balu semak nengeri Nain di Galili. Taja pia, iya engka bisi ninga pasal utai nya. Lalu iya mega engka bisi ninga pasal Jesus ngangkatka anak indu Jairus idup baru. Semua orang ba rumah nya “nemu anak mit nya endang udah mati.” Taja pia, Jesus megai jari anak mit nya lalu nyebut: “Anak, angkat nuan!” Lalu anak mit nya angkat tekala nya. (Luk. 7:11-17; 8:41, 42, 49-55) Marta enggau menyadi indu iya, Maria, nemu Jesus ulih ngeraika orang ke sakit. Nya alai seduai iya pechaya, enti sema Jesus bisi dia, Lasarus tentu enda mati. Diatu Lasarus udah mati. Tang nama disadang Marta? Peratika, iya madahka Lasarus deka idup baru jemah ila, “ba pengujung dunya [“ba hari ti penudi,” NW].” Nama kebuah iya amat pechayaka nya? Lalu nama kebuah nuan ulih pechaya, jemah ila deka bisi pengangkat ari mati ke nyengkaum orang ti dikesayauka nuan?

⁴ Endang bisi kebuah ti manah arapka pengangkat ari mati. Diatu kitai deka berandauka sekeda kebuah nya. Nuan mega deka tetemuka sekeda poin dalam Jaku Petara ke enda entu dipikirka nuan ngelama tu, tang nya ulih ngeringka pengarap nuan ke deka betemu baru enggau orang ti dikesayauka nuan.

 5. Nama kebuah Marta pechaya Lasarus deka diangkatka idup baru?

⁵ Peratika, Marta ukai nyebut: ‘Aku ngarapka menyadi lelaki aku deka angkat idup baru.’ Iya madahka: “Aku nemu iya deka angkat idup baru.” Nama kebuah Marta andal amat? Laban iya nemu pasal sekeda pengangkat ari mati ke udah nyadi menya. Iya engka nemu pasal utai nya ba rumah sereta ba balai gempuru lebuh iya agi mit. Diatu kitai deka mansik tiga iti pengangkat ari mati ke bisi disebut dalam Bup Kudus.

 6. Nama kereja ajih ke ditemu Marta?

⁶ Pengangkat ari mati ti keterubah nyadi maya Petara meri nabi Elijah kuasa kena ngaga kereja ajih. Di utara menua Israel, ba siti nengeri orang Ponisia ke dikumbai Sarepat, bisi seiku indu balu ti seranta ke ngayanka pengerah jari ngagai nabi nya. Udah nya, Jehovah ngaga siti kereja ajih. Iya nentuka indu balu nya deka seruran bisi tepung enggau minyak ngambika indu balu nya enggau anak lelaki iya ulih mengkang idup. (1 Raj. 17:8-16) Udah nya, anak indu nya sakit lalu mati. Tang Elijah nulung indu balu nya. Lebuh negu anak indu balu nya, Elijah besampi ngagai Jehovah: ‘O Jehovah Petara aku, asuh nembiak tu idup baru!’ Lalu nya amat nyadi! Petara ningaka sampi Elijah, lalu nembiak nya idup baru. Tu pengangkat ari mati ti keterubah ke bisi ditulis dalam Bup Kudus. (Bacha 1 Raja 17:17-24.) Nya alai, Marta tentu nemu pasal utai ti ngalitka ati nya.

7, 8. (a) Baka ni Elisa ngelantangka ati seiku indai ke tusah ati? (b) Kereja ajih Elisa nunjukka nama pasal Jehovah?

 ⁷ Pengangkat ari mati ti kedua ke ditulis dalam Bup Kudus digaga nabi Elisa. Ba nengeri ke dikumbai Sunem, bisi seiku indu bansa Israel ke nadai ngembuan anak. Ketegal iya ngayan pengerah jari ngagai Elisa, Jehovah merekatka indu nya sereta laki indu nya ke udah tuai enggau meri seiku anak lelaki. Tang beberapa taun udah nya, anak seduai iya mati. Uji gambarka penusah ba ati indai nya. Ati iya ti balat tusah ngasuh iya bejalai sepenyauh 30 kilometer (19 batu) ngiga Elisa ba Bukit Karmel. Elisa ngasuh Gehasi, orang gaji iya, mupuk dulu ke Sunem ngangkatka nembiak nya idup baru. Tang Gehasi enda ulih ngangkatka nembiak nya idup baru. Udah nya, indai ke tusah ati nya datai ba rumah enggau Elisa.—2 Raj. 4:8-31.

⁸ Elisa tama ngagai rumah ke alai bangkai nembiak nya, lalu iya besampi. Jehovah nyaut sampi Elisa, lalu ngidupka nembiak nya nengah kereja ajih. Lebuh indai nya meda anak iya idup baru, iya gaga amat ati! (Bacha 2 Raja 4:32-37.) Indai nya engka ingatka leka sampi Hanah. Hanah ke enda ulih beranak nyau bisi anak lelaki ke benama Samuel, pengudah Jehovah merekatka iya. Udah nya Hanah muji Jehovah laban Iya “mai orang ngagai dunya pemati lalu Iya mega ngangkatka sida.” (1 Sam. 2:6) Enggau nyengala ngangkatka anak lelaki di Sunem nya idup baru, Petara nunjukka Iya bisi penau ngangkatka orang ke udah mati idup baru.

 9. Padahka pengangkat ari mati ti ketiga ke bisi ditulis dalam Bup Kudus.

⁹ Siti agi utai ti ngalitka ati nyadi pengudah Elisa mati. Iya udah nyadi nabi lebih 50 taun, lalu udah nya iya sakit lalu ngujungka iya mati. Nyau kelama, lalu kengka utai ke agi tinggal nya rangkah tulang iya. Nyadi sekali, sekeda orang Israel benung nguburka orang ke mati. Enda memukai sida meda sekeda munsuh datai. Orang Israel beguai-guai ngerarika diri, nya alai sida nibarka bangkai orang nya ngagai kubur Elisa. Bup Kudus madahka: “Lebuh bangkai orang nya negu rangkah tulang Elisa, orang nya lalu idup baru, lalu bediri.” (2 Raj. 13:14, 20, 21) Ari semua cherita nya Marta nemu, Petara bisi kuasa atas pemati. Cherita nya mega patut ngasuh nuan andalka kuasa Petara nya besai amat sereta nadai tatak.

10. Baka ni Peter nulung seiku menyadi Kristian indu ke udah mati?

¹⁰ Bup Kudus Kristian jaku Gerika mega ngundan cherita pasal pengangkat ari mati ti dikereja nembiak Petara ke tetap ati. Kitai udah ngenang pasal pengangkat ari mati ke digaga Jesus semak nengeri Nain sereta ba rumah Jairus. Enda lama udah nya, rasul Peter ngidupka baru Dorkas, ke mega dikumbai Tabita. Peter ngagai bilik alai ngengkahka bangkai Dorkas, besampi, lalu udah nya bejaku: “Tabita, angkat nuan!” Dorkas lalu idup baru tekala nya, lalu Peter “mandangka iya amat idup” ngagai orang Kristian bukai ke  bisi dia. Utai ke nyadi tu amat ngandalka ati, nya alai mayuh orang ba nengeri nya ‘arapka Tuan.’ Bala murid ke baru tu ulih madah ngagai orang bukai pasal berita manah bekaul enggau Jesus sereta mega madah ngagai semua orang pasal penau Jehovah ke ulih ngangkatka orang idup baru.—SKR. 9:36-42.

11. Nama dipadah lutur Luke pasal seiku orang bujang, lalu baka ni asai ati orang ke meda utai nya?

¹¹ Bisi sekeda saksi ke siti agi pengangkat ari mati. Bisi sekali, rasul Paul benung enggau siti gempuru ba sadau rumah di Troas, diatu dikumbai barat laut Turkey. Paul bejaku nyentuk ngagai tengah malam. Seiku orang bujang ke benama Eutikus ke benung mending, duduk ba jenila. Tang iya nyau tinduk lalu labuh ke tanah ari tingkat tiga. Luke engka orang keterubah datai meresa Eutikus. Ketegal iya nya lutur, iya nemu orang bujang nya ukai bakal tauka luput aja. Orang bujang nya mati! Paul mega nurun ke baruh. Iya merap Eutikus lalu udah nya ngasuh semua orang alit ati, lebuh bejaku: “Iya agi idup!” Kereja ajih tu balat ngalitka ati semua orang ke meda utai ke udah nyadi nya. Ketegal nemu orang bujang nya udah mati, lalu udah nya diangkatka idup baru, “ati sida lantang amat.”—SKR. 20:7-12.

12, 13. Beduduk ba sekeda pengangkat ari mati ke udah dikerandauka kitai, nama sekeda tanya ke engka ditanya kitai?

¹² Sekeda pengangkat ari mati ke udah dikerandauka kitai patut meri nuan pengandal ti sama baka Marta. Kitai ulih pechaya, Petara kitai ke udah meri kitai pengidup, ulih ngidupka baru orang ke udah mati. Manah amat laban nembiak Petara ke tetap ati baka Elijah, Jesus, tauka Peter, bisi disebut ba tiap iti pengangkat ari mati nya. Lalu pengangkat ari mati nya nyadi lebuh maya Jehovah ngaga kereja ajih. Nya alai, baka ni enggau sida ke mati  ba maya bukai, iya nya lebuh kereja ajih ke baka nya nadai agi digaga? Ulih sida ke lelaki enggau ke indu ti tetap ati arapka Petara deka ngangkatka orang ke udah mati idup baru jemah ila? Ulih sida andal baka Marta lebuh iya bejaku pasal menyadi lelaki iya: “Aku nemu iya deka angkat idup baru lebuh pengangkat orang ari mati ba pengujung dunya [“ba hari ti penudi,” NW]”? Nama kebuah Marta pechaya jemah ila deka bisi pengangkat ari mati, lalu nama kebuah nuan ulih pechaya?

¹³ Sekeda cherita dalam Jaku Petara nunjukka nembiak Iya ke tetap ati nemu, jemah ila deka bisi pengangkat ari mati. Aram kitai beratika sapa sida nya.

14. Nama ulih dipelajarka kitai ari cherita Abraham pasal pengangkat ari mati?

¹⁴ Pikirka utai ti diasuh Jehovah gaga Abraham ba Isak, anak ke dianti iya ngelama tu. Ku Jehovah: “Bai anak nuan, anak tunggal nuan Isak, ke balat dikerinduka nuan, lalu mansang nuan ngagai menua Moriah, lalu serahka iya dia nyadika piring [“pemeri,” NW] tunu.” (P-kal. 22:2) Baka ni asai ati Abraham lebuh iya ninga utai tu? Jehovah udah besemaya, semua bansa deka diberekat nengah bala peturun Abraham. (P-kal. 13:14-16; 18:18; Rom. 4:17, 18) Pia mega, Jehovah madahka berekat nya deka datai “semina nengah Isak aja.” (P-kal. 21:12) Tang baka ni nya tau nyadi enti Abraham nyerahka anak iya nyadika pemeri? Paul ke diiring roh kudus madahka Abraham pechaya Petara ulih ngangkatka Isak idup baru. (Bacha Hebrew 11:17-19.) Taja pia, Bup Kudus nadai madahka Abraham deka ngumbai Isak idup baru tekala nya, engka dalam beberapa jam, sehari, tauka indah seminggu. Abraham enda nemu ni maya anak iya deka diangkatka idup baru. Tang iya pechaya, Jehovah deka ngidupka Isak baru.

15. Nama pengadang ti dikembuan Jop ke tetap ati?

¹⁵ Jop ke tetap ati mega nemu, jemah ila  deka bisi pengangkat ari mati. Jop nemu enti pun kayu ditebang, kayu nya ulih tumbuh baru lalu nyadi kayu ti baru. Tang nya enda ulih nyadi ba mensia. (Jop 14:7-12; 19:25-27) Enti mensia mati, iya enda ulih ngidupka diri empu baru. (2 Sam. 12:23; Mas. 89:48) Amat, nya ukai reti Petara enda ulih ngangkatka orang idup baru. Indah Jop pechaya, Jehovah deka ingatka iya. (Bacha Jop 14:13-15.) Jop enda nemu ni maya tu deka nyadi jemah ila. Taja pia, Jop pechaya Penempa ke meri mensia nyawa ulih sereta deka ingatka iya lalu ngangkatka iya idup baru.

16. Nama jaku peransang ke diberi seiku melikat ngagai Daniel?

¹⁶ Pikirka pasal seiku agi orang ke tetap ati, iya nya Daniel. Iya nembiak Jehovah ti taluk sepemanjai pengidup iya, lalu Jehovah nyukung iya. Bisi sekali, seiku melikat ngumbai Daniel nya orang ti balat dikerinduka lalu madahka Daniel deka “nadai utai ngawa [“bulih pemaik,” NW]” sereta “kering.”—Dan.9:22, 23; 10:11, 18, 19.

17, 18. Nama disemaya Jehovah ngagai Daniel?

¹⁷ Lebuh umur Daniel nyauka manggai 100 taun lalu semak enggau pengujung pengidup iya, iya engka bisi berunding pasal utai ke deka nyadi ba iya. Kati Daniel andalka diri deka idup baru? Tentu! Ba pengujung bup Daniel, kitai macha semaya Petara ngagai iya: “Nuan, Daniel, enda tau enda tetap ati nyentuk ke ujung. Udah bekau nya nuan deka mati.” (Dan. 12:13) Daniel nemu, orang ke mati nya baka ke belelak lalu “di dunya pemati . . . nadai runding, nadai penemu, nadai penemu-dalam,” lalu kia meh iya deka mupuk enda lama agi. (P-jar. 9:10) Tang, tu ukai pengujung ba Daniel. Jehovah meri iya semaya ti ngerinduka ati jemah ila.

¹⁸ Melikat Jehovah madah ngagai Daniel: “Nuan deka angkat idup baru lalu nerima upah nuan ba pengujung dunya [“ba pengujung hari nya,” NW].” Daniel enda nemu enggau nyemetak kemaya nya deka nyadi. Iya nemu diri deka mati lalu udah nya belelak. Tang lebuh Daniel ninga semaya, “Nuan deka angkat idup baru,” iya nemu iya deka diangkatka idup baru jemah ila. Nya deka nyadi nyau kelama pengudah iya mati, iya nya “ba pengujung dunya [“ba pengujung hari nya,” NW].”

19, 20. (a) Baka ni utai ti dikerandauka kitai bisi kaul enggau jaku ke disebut Marta ngagai Jesus? (b) Nama deka dikerandauka kitai ba artikel pengudah tu?

¹⁹ Marta endang amat bisi kebuah ti manah arapka menyadi lelaki iya ke tetap ati, Lasarus, deka angkat idup baru lebuh pengangkat orang ari mati ba pengujung dunya [“ba hari ti penudi,” NW].” Semaya Jehovah ngagai Daniel, sereta pengarap Marta ti teguh ba pengangkat ari mati jemah ila, patut meri kitai pengandal kemaya hari tu. Jemah ila deka bisi pengangkat ari mati.

²⁰ Kitai udah belajar pasal pengangkat ari mati ti amat nyadi menya. Tu nunjukka orang ke udah mati ulih idup baru. Kitai mega bisi meda sida ke lelaki enggau ke indu ti nyembah Petara enggau tetap ati arapka jemah ila bisi pengangkat ari mati. Taja pia, kati bisi bukti ke nunjukka pengangkat ari mati deka nyadi nyau kelama pengudah semaya nya dipadah? Enti pia, nya deka meri kitai mayuh agi kebuah deka nganti pengangkat ari mati ke nyadi jemah ila. Tang ni maya nya deka nyadi? Kitai deka berandauka pekara tu ba artikel pengudah tu.