1-3. (a) Nama patut disengkaum kitai nyadi utai ti dipechaya kitai? (b) Nama kebuah pengangkat ari mati nya beguna bendar? (Peda gambar ba pun artikel.)

 ENTI sema orang bisi nanya nuan, pengarap nuan beduduk ba batang ajar siti ni, nama saut nuan? Tentu nuan deka madahka diri pechayaka Jehovah nya Penempa lalu Iya ti udah meri kitai nyawa. Nuan mega engka deka madahka diri pechayaka Jesus, ke mati nyadi tebus. Nuan tentu deka berandau pasal Paradais ke bisi ba bumi tu jemah ila, alai nembiak Petara deka idup belama iya. Tang kati nuan deka madahka pengangkat ari mati nya siti ari utai ti dipechaya ke pemadu berega ba nuan?

² Kitai bisi kebuah ti manah deka nyengkaumka pengangkat ari mati nyadi siti ari utai ti dipechaya kitai, taja pan kitai ngarapka diri selamat maya penusah ti besai lalu idup ba bumi belama iya. Rasul Paul nunjukka kebuah pengangkat ari mati nya beguna bendar. Iya madahka: “Enti nadai pengangkat ari mati, reti nya Kristus nadai udah diangkatka ari mati.” Enti Jesus bedau diangkatka ari mati, iya enda ulih merintah nyadi Raja di serega lalu pengawa nginjil kitai nadai guna. (Bacha  1 Korint 15:12-19.) Taja pia, kitai nemu Jesus udah diangkatka ari mati. Ketegal kitai arapka pengangkat iya ari mati, kitai enda baka orang Saduki ke bansa Judah, ke balat ngumbai orang mati enda ulih idup baru. Indah lebuh orang bukai ngeleseka kitai, kitai mengkang arapka Petara ulih ngangkatka orang idup baru.—Mrk. 12:18; SKR. 4:2, 3; 17:32; 23:6-8.

³ Paul madahka ajar pasal “pengangkat ari mati” nya sebagi ari “pun pelajar pasal Kristus.” (Heb. 6:1, 2) Iya mega madahka diri arapka pengangkat ari mati. (SKR. 24:10, 15, 24, 25) Taja pan pengangkat ari mati siti ari batang ajar ke dipelajarka kitai ari Jaku Petara, tang kitai mega patut belajarka utai nya enggau bejimat. (Heb. 5:12) Nama kebuah?

 4. Nama sekeda tanya ke engka ditanya kitai pasal pengangkat ari mati?

⁴ Lebuh orang berengkah belajarka Bup Kudus, sida bisi macha cherita pasal pengangkat ari mati menya, baka pengangkat Lasarus ari mati. Sida mega nemu Abraham, Jop, enggau Daniel pechaya, jemah ila orang ke udah mati deka idup baru. Taja pia, nama deka dipadah nuan enti sema orang minta nuan meri bukti ari Bup Kudus ke nunjukka kebuah kitai tau arapka semaya pasal pengangkat ari mati ke udah digaga beratus taun ti udah? Lalu bisi Bup Kudus madahka ni maya pengangkat ari mati deka nyadi jemah ila? Saut ngagai tanya tu deka ngeringka pengarap kitai.

 5. Nama deka dikerandauka kitai dulu?

⁵ Kitai engka senang ngambarka orang diangkatka idup baru enda lama pengudah iya mati. (Jhn. 11:11; SKR. 20:9, 10) Tang, ulih kitai arapka semaya ke madahka orang deka diangkatka idup baru pengudah betaun, tauka beratus taun mati, maya jemah ila? Ulih kitai arapka semaya nya nyadi ba orang ke udah lama mati tauka ba orang ke baru udah mati? Kebendar, nuan udah arapka siti pengangkat ari mati ke nyadi beratus taun pengudah semaya pasal nya dipadahka. Pengangkat ari mati ke siti ni nya? Lalu baka ni iya bekaul enggau pengadang nuan pasal pengangkat ari mati ke jemah ila?

 6. Baka ni Jesus ngamatka utai ti dipadah ba Masmur 118?

⁶ Aram kitai berandau pasal siti pengangkat ari mati ke udah beratus taun dipadah dulu ngena Masmur 118, ke udah ditulis David. Masmur tu bisi nyebut: ‘Lepaska kami, O Jehovah, Lepaska kami!’ sereta ‘Beberekat meh iya ke datai dalam nama Jehovah!’ Ayat tu nyebut pasal Messiah, lalu orang nyebut ayat tu lebuh Jesus nepan keledai tama ngagai nengeri Jerusalem kena 9 Nisan, beberapa hari sebedau iya mati. (Mas. 118:25, 26; Mat. 21:7-9) Tang baka ni Masmur 118 madah pasal siti pengangkat ari mati ti deka nyadi beratus taun jemah ila? Peratika utai bukai ke dipadah masmur tu: “Batu ti enda diguna tukang rumah udah nyadi batu sukut ti pemadu beguna.”—Mas. 118:22, NW.

 7. Baka ni orang Judah nulak Jesus?

⁷ “Tukang rumah” ke nulak Messiah nya bala tuai bansa Judah. Sida ukai semina enda ibuhka Jesus tauka enggai nerima iya nyadi Kristus. Mayuh orang Judah nulak iya enggau minta Pilate ngeletak ukum bunuh ba Jesus. (Luk. 23:18-23) Au, sida mega betanggungjawapka pemati Jesus.

 8. Baka ni Jesus tau nyadi “batu sukut ti pemadu beguna”?

 ⁸ Enti Jesus ditulak sereta dibunuh, baka ni ku iya tau nyadi “batu sukut ti pemadu beguna”? Tu semina tau nyadi enti iya diangkatka idup baru. Jesus nunjukka tu amat lebuh iya nusui siti cherita pasal orang ke bempu tanah ti nganjung sekeda ulun ngagai bala orang ke nyua kebun iya. Sida ke nyua kebun nya jai enggau bala ulun iya. Pengujung iya, orang ke bempu tanah nya nganjung anak iya empu, ngarapka sida ke nyua kebun nya mendingka anak iya. Tang sida munuh anak orang ke bempu tanah nya. Pengudah nusui cherita tu, Jesus nyebut semaya ke dipadah Petara ba Masmur 118:22. (Luk. 20:9-17) Rasul Peter ngena ayat ti sama lebuh iya bejaku ngagai orang Judah. Sida tu “bala orang ke megai perintah, sida tuai bansa enggau sida pengajar Adat begempuru di Jerusalem.” Iya nyebut pasal ‘Jesus Kristus orang Nasaret, ke udah diregang kita [“udah dibunuh kita ba tiang,” NW], lalu udah diangkatka Petara idup baru ari mati.’ Udah nya ku iya: ‘Jesus nya meh “batu sukut ti ditulak kita ke tukang rumah, tang udah nyadi batu ti pemadu beguna.”’—SKR. 3:15; 4:5-11; 1 Pet. 2:5-7.

 9. Nama pekara besai ke dipadah ba Masmur 118:22?

⁹ Ayat ba Masmur 118:22 enggau terang madah pasal siti pengangkat ari mati ti deka nyadi beratus taun udah nya. Messiah deka ditulak sereta dibunuh. Tang iya deka diangkatka idup baru lalu deka nyadi batu sukut ti pemadu beguna. Sepengudah diangkatka idup baru, semina Jesus aja ke ulih nyelamatka mensia. Nya alai Bup Kudus madahka, “laban nadai nama bukai di baruh langit ti diberi ngagai mensia ti ulih nyelamatka kitai.”—SKR. 4:12; Eps. 1:20.

10. (a) Nama dipadah Masmur 16:10? (b) Nama kebuah kitai nemu Masmur 16:10 ukai dituju ngagai David?

¹⁰ Aram kitai beratika siti agi ayat ke nyebut pasal pengangkat ari mati. Ayat nya dikeamatka lebih ari seribu taun udah nya. Pekara tu patut ngasuh kitai andalka pengangkat ari mati ulih nyadi taja pan iya udah lama dipadah tauka disemayaka. Ba Masmur 16, kitai macha jaku David: “Nuan nyaga aku ari kuasa pemati. Aku udah betuaika Nuan enggau ati ti tetap,  lalu Nuan enda ninggalka aku di dunya pemati.” (Mas. 16:10) David ukai nguji deka madahka iya enda nemu mati sereta enda ba dunya pemati. Jaku Petara enggau terang madahka, David mansang tuai, mati, lalu “dikuburka di Nengeri David.” (1 Raj. 2:1, 10) Nya alai ayat tu dituju ngagai sapa?

11. Ni maya Peter nerangka Masmur 16:10?

¹¹ Lebih ari seribu taun pengudah David nulis jaku nya, Peter nerangka sapa bagi orang ke disebut ba Masmur 16:10. Beberapa minggu pengudah Jesus mati lalu diangkatka idup baru, Peter bejaku ngagai beribu iku orang Judah sereta orang bansa bukai ke udah masuk pengarap orang Judah. (Bacha Kereja Rasul 2:29-32.) Iya ngingatka sida, David udah mati lalu dikuburka. Lalu Bup Kudus nadai madahka sida enda setuju enggau Peter lebuh iya mega madahka David “nemu utai tu deka nyadi, nya alai iya [David] bejakuka pasal pengangkat” Messiah ari mati.

12. Baka ni Masmur 16:10 dikeamatka, lalu nama ulih diandalka kitai pasal semaya pengangkat ari mati?

¹² Peter nyukung penemu iya enggau nyebut jaku David ba Masmur 110:1. (SKR. 2:33-36) Kebuah ke disebut Peter ari Bup Kudus nulung orang mayuh andalka Jesus nya Tuan enggau Kristus. Sida ke dia nemu Masmur 16:10 nya dikeamatka lebuh Jesus diangkatka idup baru ari mati. Udah nya, rasul Paul ngena penerang ti sama lebuh iya bejaku enggau orang Judah ba nengeri Antiok di Pisidia. Sida amat rinduka penerang tu, lalu sida deka ninga mayuh agi. (Bacha Kereja Rasul 13:32-37, 42.) Taja pan pengangkat ari mati tu nyadi beratus taun pengudah iya disebut, tang penerang tu mega patut ngasuh kitai andalka semaya ari Bup Kudus pasal pengangkat ari mati jemah ila.

13. Nama sekeda tanya ke engka ditanya kitai pasal pengangkat ari mati?

¹³ Endang meransang ati nemu pengangkat ari mati ulih nyadi beratus-ratus taun pengudah semaya nya dipadah. Taja pia, sekeda orang engka nanya: ‘Kati reti nya aku patut lama nganti deka betemu enggau orang ti dikesayauka aku? Ni maya pengangkat ari mati deka nyadi?’ Jesus madah ngagai bala rasul iya, bisi utai ke enda ditemu sereta enda ulih ditemu sida. Lalu bisi pekara pasal “maya tauka musin ti udah diletak Apai ngena hak Iya Empu.” (SKR. 1:6, 7; Jhn. 16:12) Taja pia, kitai endang bisi penerang pasal ni maya pengangkat ari mati deka nyadi.

14. Baka ni pengangkat Jesus ari mati nya bebida ari ke sebedau iya?

¹⁴ Pengangkat ari mati ti pemadu besai reti ke ditulis dalam Bup Kudus nya pengangkat Jesus ari mati. Enti sema iya enda diangkatka idup baru, nadai seiku ari kita deka bisi pengadang betemu baru enggau orang ti dikesayauka kitai ke udah mati. Orang ke diangkat idup baru sebedau Jesus, baka sida ke diangkatka Elijah enggau Elisa idup baru, enda ulih mengkang idup belama iya. Sida agi mati lalu nyadi amau tanah dalam kubur. Tang Jesus udah “diangkatka ari mati.” Iya ‘enda agi mati. Pemati nadai agi kuasa atas iya.’ Di serega, iya idup “belama-lama iya.”—Rom. 6:9; Pem. 1:5, 18; Kol. 1:18; 1 Pet. 3:18.

15. Nama kebuah Jesus dikumbai “buah ke terubah”?

 ¹⁵ Pengangkat Jesus ari mati ke serega nyadi orang roh nya ti keterubah sereta ti pemadu besai reti ba pengangkat ari mati ke baka tu. (SKR. 26:23) Taja pia, ukai semina iya aja ti diangkatka ari mati ke serega. Jesus besemaya, bala rasul iya ti tetap ati deka merintah enggau iya di serega. (Luk. 22:28-30) Tang sida semina ulih nerima upah tu pengudah sida mati. Udah nya, baka Jesus, sida deka diangkatka idup baru enggau tubuh roh. Paul nulis “Kristus udah diangkatka ari mati, nyadi orang ke terubah [“buah ke terubah,” NW] diangkatka idup baru ari bala orang ke udah mati.” Paul udah nya madahka bisi orang bukai ke deka diangkatka idup baru lalu ke serega: “Genap iku deka diangkatka begintir-gintir: keterubah, Kristus ke buah bungas [“buah ke terubah,” NW], lalu lebuh Kristus datai baru [“enggau kitai,” NW], nya baru bala nembiak Kristus.”—1 Kor. 15:20, 23.

16. Nama tanda ke dikemisi kitai pasal ni maya pengangkat ari mati ke serega deka nyadi?

¹⁶ Jaku Paul meri kitai tanda pasal ni maya pengangkat ari mati ke serega deka nyadi. Nya deka nyadi lebuh Kristus enggau kitai. Betaun-taun Saksi-Saksi Jehovah ngena Bup Kudus nunjukka Kristus berengkah “enggau kitai” ba taun 1914. Kitai agi idup maya iya “enggau kitai,” lalu pengujung sistem ti jai tu semak amat.

17, 18. Nama deka nyadi ba sekeda orang ke dipilih ke serega maya Kristus enggau kitai?

¹⁷ Bup Kudus nerangka mayuh agi pasal pengangkat ari mati ke serega: ‘Kami enggai ke kita enda nemu, menyadi, pasal orang ke udah mati . . . Laban kitai arapka Jesus udah mati, lalu udah angkat idup baru, nya alai, ulih Jesus, Petara deka mai enggau iya orang ke udah mati. . . . Kitai ke idup, ke agi tinggal di dunya tu nyentuk ngagai maya penatai Tuan [“maya Tuan enggau kitai,” NW], enda mupuk dulu ari orang ke udah mati. Laban Tuan empu deka nurun ari serega enggau nyawa ti inggar, . . . lalu orang ke mati, ke udah arapka Tuan, deka angkat dulu. Udah nya baru kitai ke agi idup, ke agi tinggal, deka digempuruka sama enggau sida dalam remang lalu betemu enggau Tuan di langit, lalu kitai deka diau begulai enggau Tuan belama iya.’—1 Tes. 4:13-17.

¹⁸ Pengangkat ari mati ti keterubah iya nya pengangkat ari mati ke serega, deka nyadi enda lama pengudah Kristus enggau kitai berengkah. Orang ke dipilih ke serega ti idup maya penusah ti besai deka ‘betemu enggau Tuan di langit.’ Nama reti nya? Sida ke ‘betemu enggau Tuan’ “deka mati” enda lama. Tang lebuh sida mati, sida “deka diubah, tekala nya, dalam sekejap mata, lebuh terumpit ti penudi disepu.”—1 Kor. 15:51, 52; Mat. 24:31.

19. Nama reti “pengangkat ari mati ti menyana agi”?

¹⁹ Kemayaharitu, mayuh orang Kristian ke tetap ati enda dipilih ke serega sereta enda dipilih merintah enggau Kristus di serega. Tang, sida nganti “Hari Tuhan [“Hari Jehovah,” NW]” maya Iya deka ngemunaska dunya ti jai tu. Nadai seiku orang nemu enggau nyemetak kemaya pengujung deka datai, tang bukti nunjukka hari nya nyau semak. (1 Tes. 5:1-3) Lebuh dunya baru Petara datai, maya nya deka bisi sebengkah agi pengangkat ari mati. Maya nya, orang deka diangkatka idup baru ngambika ulih idup ba bumi  lalu bisi pengadang nyadi sempurna sereta enda nemu mati agi. Tu deka nyadi “pengangkat ari mati ti menyana agi” enti dibanding enggau pengangkat ari mati kelia menya laban orang ke diidupka maya nya suba, agi ulih mati baru—Heb. 11:35.

20. Nama kebuah kitai pechaya pengangkat ari mati deka teatur?

²⁰ Bup Kudus madahka, genap iku orang ke ngagai serega “deka diangkatka begintir-gintir.” (1 Kor. 15:23) Nya alai kitai ulih pechaya, pengangkat ari mati ba bumi mega deka teatur. Nya engka ngasuh kitai nanya: Kati orang ke mati maya jeman kitai deka diangkatka idup baru enda lama pengudah Seribu Taun Kristus Merintah berengkah lalu deka disambut orang ti dikesayau ke ngelala sida? Kati orang ke tetap ati menya ti landik ngiring deka tumu diangkatka idup baru ngambika ulih nulung ngatur nembiak Petara ba dunya baru? Nama deka nyadi ba orang ke enda kala nyembah Jehovah? Ni maya sereta dini alai sida deka diangkatka idup baru? Bisi mayuh tanya ke tau ditanya kitai. Tang kitai enda ibuh irau pasal utai nya ke diatu. Manah agi enti nganti sereta meda aja. Kitai ulih pechaya, kitai deka gagit ati ulih meda baka ni Jehovah deka ngereja utai.

21. Nama pengadang nuan?

²¹ Sebedau jam nya datai, kitai patut ngeringka pengarap kitai ba Jehovah. Iya udah besemaya nengah Jesus, Iya ingatka orang ti udah mati lalu sida deka idup baru. (Jhn. 5:28, 29; 11:23) Kena nunjukka Jehovah deka ngangkatka orang idup baru, Jesus kala madahka Abraham, Isak, sereta Jakop agi “idup magang” ba mata Petara. (Luk. 20:37, 38) Kitai endang bisi mayuh kebuah ti manah ulih nyebut, baka rasul Paul ti madahka: “Aku bisi siti pengadang ngagai Petara . . . deka bisi pengangkat ari mati.”—SKR. 24:15, NW.