1. Baka ni Bup Kudus nerangka reti disiplin?

 NAMA runding nuan lebuh ninga leka jaku “disiplin”? Mayuh orang ngumbai nya bekaul enggau pengawa ngukum. Tang disiplin ukai semina nya aja. Bup Kudus madahka disiplin nya manah ke kitai lalu kekadang nyebut iya sama enggau penemu, penemu-dalam, pengerindu, sereta pengidup. (J-lam. 1:2-7; 4:11-13) Nya ketegal disiplin ari Petara nunjukka Iya rinduka kitai sereta deka kitai idup belama iya. (Heb. 12:6) Taja pan disiplin ari Petara kekadang nyengkaum pengawa ngukum, tang disiplin ari Iya enda kasar tauka nganu kitai. Kebendar, reti leka jaku “disiplin” nyengkaum ngajar, baka ajar ti diberi apai indai ngagai anak ti dikesayauka sida.

2, 3. Baka ni disiplin nya nyengkaum pengawa ngajar sereta ngukum? (Peda gambar ba pun artikel.)

² Peratika chunto tu. Seiku anak mit lelaki ke benama Johnny nikauka bul dalam rumah. Ku indai iya madah: “Johnny, anang main bul dalam rumah! Enggaika utai pechah.” Tang Johnny enda mendingka rara indai iya lalu  majak main bul. Bul nya kena pasu bungai, lalu pasu nya pechah! Baka ni indai Johnny deka disiplin iya? Iya nerangka kebuah ulah Johnny nya salah. Iya deka Johnny sedar ngasika apai indai nya utai ti manah lalu disiplin ke diberi apai indai nya patut sereta enda berat. Ngambika Johnny ulih belajar ari utai ke nyadi, indai iya mega ngambi bul iya enda lama kena ngukum iya. Utai tu enda ngelantangka ati Johnny. Tang nya nulung Johnny nemu, iya deka tusah enti iya enda ngasi.

³ Kitai tu orang Kristian ke enggau ruang bilik Petara. (1 Tim. 3:15) Apai kitai, Jehovah, bisi hak nentuka utai ti betul enggau utai ti salah sereta disiplin kitai lebuh kitai enda ngasi. Pia mega, penusah ke diulih kitai ketegal pengawa salah ti dikereja kitai nulung kitai nemu, kitai patut ngasika disiplin ari Jehovah. (Gal. 6:7) Petara sayauka kitai lalu Iya enggai kitai merinsa.—1 Pet. 5:6, 7.

 4. (a) Nitih ku Jehovah, baka ni kitai patut ngelatih orang bukai? (b) Nama deka dipejuraika kitai ba artikel tu?

⁴ Lebuh kitai meri disiplin ti bepelasarka Bup Kudus, kitai ulih nulung anak tauka pemelajar Bup Kudus nyadi murid Kristus. Kitai ngena Bup Kudus ngajar bala pemelajar pasal utai ti betul sereta nulung sida nemu reti sereta ‘ngasika semua pesan ti udah diberi Jesus ngagai kitai.’ (Mat. 28:19, 20; 2 Tim. 3:16) Jehovah deka sida dilatih ngena chara tu ngambika sida mega ulih nulung orang bukai nitihka Kristus. (Bacha Titus 2:11-14.) Diatu aram kitai bejuraika tiga iti tanya tu: (1) Baka ni disiplin ari Petara nunjukka Iya rinduka kitai? (2) Nama ulih dipelajarka kitai ari orang ke didisiplin Petara? (3) Baka ni kitai ulih nunda chara Jehovah enggau Anak Iya lebuh meri disiplin?

 5. Baka ni disiplin ari Jehovah nunjukka Iya sayauka kitai?

⁵ Jehovah ngerara, ngajar, sereta ngelatih kitai laban Iya sayauka kitai. Iya deka kitai mengkang rapat enggau Iya sereta idup belama iya. (1 Jhn. 4:16) Iya enda kala ngemaruh tauka ngasuh kitai berasai enda beguna. (J-lam. 12:18) Tang Jehovah beratika kualiti manah kitai sereta ngemendarka kitai ngembuan peluang bibas milih. Ulih nuan meda baka ni disiplin ke diulih kitai nengah Bup Kudus, litaricha kitai, apai indai kitai, tauka bala tuai gempuru nunjukka Jehovah rinduka kitai? Lebuh bala tuai gempuru ngerara kitai enggau chara ti siru sereta bisi pengerindu indah sebedau kitai sedarka diri udah ngereja utai  ti salah, kebendar sida mandangka pengerindu Jehovah ke kitai.—Gal. 6:1.

 6. Baka ni disiplin nunjukka pengerindu Petara taja pan orang enda ulih agi megai siti-siti pengawa?

⁶ Kekadang disiplin ukai semina bekaul enggau meri jaku lalau aja. Enti orang udah ngereja dosa ti besai, iya enda ulih agi megai pengawa ba eklisia. Taja pia, disiplin nunjukka Petara rinduka iya. Ambika chunto, disiplin ulih nulung iya nemu iya patut ngena mayuh agi jam belajarka Bup Kudus, belemati, sereta besampi. Ngereja semua utai tu ulih ngenegapka agi kaul iya enggau Jehovah. (Mas. 19:7) Nyau kelama, iya deka bulih baru pengawa iya ke udah lenyau. Indah lebuh orang udah dibuai ari gerempung, nya nunjukka pengerindu Jehovah laban nya nyaga eklisia ari ulah ti enda manah. (1 Kor. 5:6, 7, 11) Disiplin ari Jehovah endang seruran lurus, nya alai disiplin ulih nulung orang ke udah dibuai ari gerempung nemu diri udah ngereja dosa ti besai. Tu ulih nulung iya nesal ati ke penyalah diri.—SKR. 3:19.

 7. Sapa Sebna, lalu nama kualiti enda manah ti dikemisi iya?

⁷ Ngambika nemu kebuah disiplin nya beguna, kitai deka berandau pasal dua iku orang ke udah didisiplin Jehovah. Seiku nya Sebna, bansa Israel ke idup maya jeman Raja Hesekiah, lalu seiku agi nya Graham, menyadi lelaki ke idup kemayaharitu. Sebna nya “orang ke ngemataka ruang bilik raja,” iya nya ruang bilik Raja Hesekiah, lalu iya bisi mayuh kuasa. (Isa. 22:15) Tang Sebna nyau nyadi sumbung lalu deka orang ngeninggika iya. Iya indah ngaga lumbung ti mar ke iya empu lalu nepan “kerita perang ti dikemegahka.”—Isa. 22:16-18.

 8. Baka ni Jehovah disiplin Sebna, lalu nama nyadi?

⁸ Ketegal Sebna deka ngemuliaka diri  empu, Jehovah nyerahka pengawa ke dipegai Sebna ngagai Eliakim. (Isa. 22:19-21) Tu nyadi maya Raja Senakerip ari menua Asiria bekira deka nyerang Jerusalem. Senakerip nganjung seraban pegawai enggau seraban bala soldadu ti besai kena ngenakutka orang Judah sereta deka Raja Hesekiah nyerah diri. (2 Raj. 18:17-25) Hesekiah ngasuh Eliakim betemu enggau bala pegawai ari menua Asiria nya. Tang Eliakim enda kediri. Iya enggau dua iku agi orang. Seiku ari orang nya Sebna, ke nyau nyadi sekretari maya nya. Ari tu kitai nemu, Sebna engka udah ngemaruhka diri, sereta enda pedis ati tauka kasihka diri empu. Iya sanggup nerima pengawa ke mit. Lalu kitai ulih belajarka tiga iti pekara ari utai ke nyadi ba Sebna.

9-11. (a) Nama ulih dipelajarka kitai ari Sebna? (b) Baka ni asai ati nuan pasal chara Jehovah disiplin Sebna?

⁹ Kesatu, lebuh Sebna lenyau pangkat, tu ngingatka kitai pasal jaku Bup Kudus ke madahka “penyumbung nuju ngagai pengerusak.” (J-lam. 16:18) Kitai engka bisi diberi pengawa ba eklisia, lalu orang ba eklisia engka ngumbai kitai beguna bendar. Enti pia, kati kitai deka baruh ati? Kati kitai deka ngumbai sebarang penau ke dikemisi kitai enggau semua utai manah ke diulih kitai nya datai ari Jehovah? (1 Kor. 4:7) Ku rasul Paul nangkan: “Aku bejaku ngagai genap iku kita: anang ngumbai diri pama agi ari ti patut, tang enggau ati ti baruh, peresa diri empu.”—Rom. 12:3.

¹⁰ Kedua, jaku lalau ke diberi Jehovah ngagai Sebna nunjukka Jehovah pechayaka Sebna ulih berubah. (J-lam. 3:11, 12) Orang ke udah lenyau pengawa ba eklisia ulih belajar ari utai tu. Ari ke pedis ati tauka enda nyamai ati, sida ulih terus meri Jehovah utai ti pemadu badas. Sida ulih ngumbai disiplin nya bukti pengerindu Jehovah ke sida. Anang enda ingat, Apai kitai deka meri upah ngagai orang ke mengkang baruh ati. (Bacha 1 Peter 5:6, 7.) Disiplin ari Jehovah ulih ngubah kitai enti kitai baruh ati sereta baka tanah liat ti lembut.

¹¹ Ketiga, kitai belajarka utai ti manah ari chara Jehovah disiplin Sebna. Taja pan chara Jehovah meri disiplin nunjukka Iya begedika dosa, tang nya mega nunjukka Iya agi rinduka orang ke udah ngereja dosa. Jehovah meda utai manah ke bisi ba orang. Enti sema nuan nya apai indai tauka tuai gempuru, kati nuan deka nunda chara Jehovah meri disiplin?—Jud. 22, 23.

12-14. (a) Baka ni asai ati sekeda orang lebuh nerima disiplin ari Jehovah? (b) Baka ni Jaku Petara nulung seiku menyadi lelaki ngubah runding enggau ulah, lalu nama nyadi udah nya?

¹² Tang sayau amat, sekeda orang berasai pedis ati lebuh sida diberi disiplin. Nya alai sida ngenyauhka diri ari Petara sereta bala menyadi Kristian. (Heb. 3:12, 13) Kati reti nya nadai orang ke ulih nulung sida? Enda! Peratika chunto Graham. Iya udah dibuai ari gerempung tang udah nya iya diterima pulai baru. Taja pan udah diterima pulai baru, iya enda agi nurun nginjil sereta datai begempuru. Seiku tuai gempuru bebendar deka nyadi bakih Graham, lalu beberapa taun udah nya Graham minta belajar Bup Kudus enggau iya.

¹³ Ku tuai gempuru nya ngenang: “Graham nya orang ke sumbung. Iya bisi runding ti enda manah ngagai bala tuai gempuru  ke muai iya ari gerempung. Nya alai lebuh belajar enggau iya beberapa kali, kami duai berandauka ayat Bup Kudus pasal penyumbung sereta utai ke nyadi ketegal ulah nya. Graham ulih meresa diri nengah Jaku Petara ke baka cheremin, lalu iya enda rindu enggau utai ti dipeda iya! Asil iya amat manah! Pengudah nemu diri buta ketegal penyumbung ti baka “lumpung kayu,” lalu nemu diri bisi runding ti enda manah ngagai orang bukai, iya jejampat ngaga ubah. Iya berengkah datai begempuru enggau tetap, bebendar belajarka Jaku Petara, sereta besampi ninting hari. Iya mega ngiring sida sebilik ba pengarap, lalu nya ngagaka ati anak bini iya.”—Luk. 6:41, 42; Jas. 1:23-25.

¹⁴ Ku tuai gempuru nya nampung: “Bisi sekali, Graham madahka utai ti negu ati aku. Graham madahka, ‘Aku udah lama nemu pemendar, lalu aku mega nyadi pengerintis. Tang baru diatu aku ulih madahka diri rinduka Jehovah.’” Enda lama udah nya, Graham diasuh megai mikrofon lebuh begempuru, lalu iya gaga ati bulih pengawa nya. Tuai gempuru nya madahka: “Ari teladan iya aku belajar, enti orang ngemaruhka diri lebuh nerima disiplin ari Petara, iya deka bulih mayuh berekat!”

15. Nama patut digaga kitai ngambika disiplin ke diberi kitai ulih mujur?

¹⁵ Enti deka nyadi pengajar ti manah, kitai empu patut nyadi pemelajar ti manah. (1 Tim. 4:15, 16) Pia mega, enti Jehovah ngena nuan disiplin orang bukai, nuan patut mengkang baruh ati sereta ngawakka Jehovah ngiring nuan ba pengidup. Enti orang meda nuan baruh ati, sida deka bebasaka nuan sereta senang agi nerima jaku ajar tauka jaku lalau ari nuan. Kitai ulih belajarka nya ari teladan Jesus.

16. Nama ulih dipelajarka kitai ari Jesus bekaul enggau chara disiplin sereta ngajar ti manah?

¹⁶ Jesus seruran ngasika Apai iya indah lebuh iya tusah deka ngereja nya. (Mat. 26:39) Iya madahka utai ti diajar sereta penemu ke dikembuan iya datai ari Apai iya. (Jhn. 5:19, 30) Jesus baruh ati sereta ngasi, lalu tu nulung iya nyadi pengajar ti bisi penyinu ati. Orang ke lurus ati rindu begulai enggau iya. (Bacha Matthew 11:29.) Jaku Jesus ti siru meransang orang ke asa ati sereta orang ke lemi. (Mat. 12:20) Taja pan pengeliat ati Jesus diuji, iya mengkang nelap sereta bisi pengerindu. Tu ulih dipeda lebuh iya ngerara bala rasul iya ke bekelikuh pasal sapa ke pemadu besai.—Mrk. 9:33-37; Luk. 22:24-27.

17. Nama kualiti ke deka nulung bala tuai gempuru ngibun bala menyadi Kristian?

¹⁷ Lebuh bala tuai gempuru meri disiplin bepelasarka prinsip Bup Kudus, sida patut neladan Kristus. Enti ngereja nya, sida nunjukka diri deka diiring Petara  enggau Anak Iya. Ku rasul Peter nulis: ‘Ibun bala nembiak Petara ke diasuh ibun kita, ukai ari pejal, tang enggau ati ti ransing, baka ti dikedekaka Petara kereja kita, lalu ukai laban kita minta gaji. Anang ngaga diri nyadi tuan atas orang ke diibun kita, tang nyadi teladan ke sida.’ (1 Pet. 5:2-4) Bala tuai gempuru ke nunduk ngagai Petara sereta ngagai Kristus enggau ati ti gaga deka bulih penguntung, lalu pia mega enggau orang ke diibun sida.—Isa. 32:1, 2, 17, 18.

18. (a) Nama dikedekaka Jehovah ari apai indai? (b) Baka ni Petara nulung apai indai?

¹⁸ Baka ni enggau disiplin sereta latih ba ruang bilik? Jehovah nangkan tuai bilik: ‘Anang ngereja utai ti tau ngemediska ati anak kita, tang iring sida nyadi orang ke besai tuai dalam disiplin enggau ajar Jehovah.’ (Eps. 6:4) Kati latih enggau disiplin patut diberi? Ayat ba Jaku Dalam 19:18 nunjukka, apai indai ke enda disiplin anak tau ngujungka sida betanggungjawapka pemati anak sida. Jehovah meri apai indai tanggungjawap disiplin anak sida. Enti enda bejalaika nya, sida deka betanggungjawap ngagai Jehovah! (1 Sam. 3:12-14) Tang Jehovah meri apai indai penemu-dalam sereta pengering ke diguna sida, enti sida ngiga iring nengah sampi sereta bepanggai ba Bup Kudus enggau roh kudus Iya.—Bacha James 1:5.

19, 20. (a) Nama berekat enti kitai nerima disiplin ari Petara? (b) Nama deka dipejuraika kitai ba artikel pengudah tu?

¹⁹ Enti kitai nerima disiplin ari Jehovah sereta nunda chara Iya enggau Jesus meri disiplin, kitai deka bulih mayuh berekat! Diri sebilik enggau bala menyadi Kristian deka bisi pemaik, lalu tiap iku orang deka ngasaika diri dikesayau, dikerindu, sereta likun. Tu semina sekeda pemaik enggau pengelantang ke deka diulih kitai jemah ila. (Mas. 72:7) Disiplin ari Jehovah nyikap kitai idup begulai belama iya baka siti ruang bilik ti lantang sereta beserakup, di baruh ibun Jehovah ke nyadi Apai kitai. (Bacha Isaiah 11:9.) Enti kitai beratika tuju disiplin ari Jehovah nya, kitai deka nemu reti disiplin: chara manah ke dikena Jehovah mandangka pengerindu Iya ngagai kitai.

²⁰ Ba artikel pengudah tu, kitai deka belajar mayuh agi pasal disiplin ba ruang bilik enggau ba eklisia. Kitai deka bejuraika chara kitai ulih disiplin diri empu. Kitai mega deka belajarka chara kitai ulih nyeliahka penanggul ke ditapi ketegal enggai nerima disiplin.