1. Baka ni kitai tau bulih penemu-dalam, lalu baka ni penemu nya nulung kitai?

 PENEMU-DALAM datai ari Jehovah, lalu Iya enggau gerah jari bekunsika penemu nya enggau orang bukai. Ayat ba James 1:5 madahka: ‘Enti kita nadai penemu-dalam, pinta ngagai Petara ke meri enggau gerah mudah sereta enda mansik penyalah.’ Siti chara kitai tau bulih penemu-dalam nya enggau nerima disiplin ari Petara. Penemu-dalam ulih nyaga kitai ari ngereja utai ti salah sereta nulung kitai meruan rapat enggau Petara. (J-lam. 2:10-12) Lalu nya deka nulung kitai bulih pengidup ti meruan belama iya.—Jud. 21.

 2. Baka ni kitai ulih belajar rinduka disiplin ari Petara?

² Ketegal enda sempurna tauka ketegal chara kitai dibesaika, kekadang kitai tusah deka nerima disiplin tauka ngumbai disiplin nya utai ti manah. Tang lebuh kitai bulih penguntung ari disiplin Petara ba pengidup, kitai nemu Iya amat rinduka kitai. Ayat ba Jaku Dalam 3:11, 12 ngasuh kitai: ‘Anak, lebuh Jehovah madahka penyalah nuan, dingaka Iya enggau manah.’ Ayat nya mega madahka: ‘Petara madahka penyalah orang ke dikerinduka Iya.’ Ari tu kitai ulih nemu, Petara dekaka utai ti pemadu badas ke kitai. (Bacha Hebrew 12:5- 11.) Ketegal Petara amat ngelala kitai, nya alai disiplin ari Iya endang seruran manah sereta amat diguna kitai. Ba artikel tu, kitai deka berandauka empat iti utai ke bekaul enggau disiplin: (1) disiplin diri empu, (2) disiplin ke patut diberi apai indai ngagai anak, (3) disiplin ke diulih kitai ari eklisia, sereta (4) penanggul ke ditapi ketegal enggai nerima disiplin.

 3. Baka ni anak ulih ngembuan disiplin diri empu? Beri siti chunto.

³ Enti kitai ngembuan disiplin diri empu, kitai ulih nagang pendiau diri sereta chara kitai berunding. Ulah ke ulih disiplin diri empu ukai dibai kitai ari ada. Nya kebuah kitai patut belajar ngembuan ulah nya. Ambika chunto, lebuh anak belajar ngena basikal, apai tauka indai nulung megai basikal ngambika enda tumbang. Tang enda lama udah nya, anak belajar chara ngimbang diri ba basikal, lalu apai tauka indai ulih ngelekaka basikal nya enda lama. Lebuh anak udah nemu ngena basikal, apai tauka indai ulih terus ngelekaka basikal nya. Pia mega, lebuh apai indai enggau sabar ngelatih anak ‘dalam disiplin enggau ajar Jehovah,’ sida nulung anak ngembuan disiplin diri empu sereta penemu-dalam.—Eps. 6:4.

4, 5. (a) Nama kebuah disiplin diri empu nya beguna ba “mensia ti baru”? (b) Nama kebuah kitai enda patut lemi ati taja pan bisi ngereja penyalah?

⁴ Sama mega enggau orang ke ngelala Jehovah lebuh sida udah besai tuai. Taja pan sida engka ulih disiplin diri, tang sida bedau agi nyadi orang Kristian ke tegap ba pengarap. Tang lebuh sida berengkah nyadi “mensia ti baru” sereta deka neladan Kristus, sida deka tegap ba pengarap. (Eps. 4:23, 24) Ulah ti ulih disiplin diri empu nulung kitai ‘muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Petara dalam dunya tu.’—Tit. 2:12.

⁵ Taja pia, semua kitai bedosa. (P-jar. 7:20) Nya alai enti kitai ngereja siti-siti penyalah, kati reti nya kitai kurang ngembuan disiplin diri empu tauka nadai ngembuan ulah nya? Enda. Ari ayat ba Jaku Dalam 24:16 kitai nemu: “Orang ke lurus ati nyangka rebah tujuh kali, lalu sida angkat baru.” Nama ulih nulung kitai “angkat baru”? Iya nya roh kudus Petara, ukai pengering ari kitai empu. (Bacha Pilipi 4:13.) Buah roh kudus nya nyengkaum ulih nagang diri, ke sama reti enggau disiplin diri empu.

 6. Baka ni kitai ulih nyadi pemelajar Bup Kudus ke manah agi? (Peda gambar ba pun artikel.)

⁶ Besampi, belajarka Bup Kudus, sereta belemati mega ulih nulung kitai ngembuan disiplin diri. Tang baka ni enti belajarka Bup Kudus nya tusah ba nuan tauka nuan enda rindu belajar? Anang alah. Enti nuan ngawakka Jehovah nulung nuan, Iya deka nulung nuan “seruran auska” Jaku Iya. (1 Pet. 2:2) Minta Jehovah nulung nuan disiplin diri empu ngambika ulih ngiga awak belajarka Bup Kudus. Nuan ulih berengkah belajar beberapa minit dulu. Belubah-lubah, pengawa belajar nya deka senang agi sereta ngerinduka ati. Nuan tentu mega begunaka maya ti sunyi alai nuan ulih belematika runding Jehovah.—1 Tim. 4:15.

 7. Baka ni ulah ti ulih disiplin diri empu nulung kitai nyapai juluk ati gawa ke Jehovah?

 ⁷ Ulah ti ulih disiplin diri empu nulung kitai nyapai juluk ati gawa ke Jehovah. Ambika chunto, seiku apai ngasaika diri lenyau pengeransing deka nginjil. Nya alai iya netapka juluk ati deka nyadi pengerintis biasa. Baka ni disiplin diri empu ulih nulung iya? Iya macha artikel pasal pengerintis ba majalah kitai lalu besampi pasal utai nya. Enggau ngereja nya, iya ngenegapka kaul enggau Jehovah. Iya mega nyadi pengerintis sukung maya bisi peluang. Iya enda ngelakka sebarang utai nekul iya. Tang seruran ngenuluka juluk ati iya. Nyau kelama, iya ulih nyadi pengerintis biasa.

8-10. Nama nulung apai indai ngemesaika anak ngambika anak ulih nyembah Jehovah? Beri siti chunto.

⁸ Jehovah udah meri apai indai tanggungjawap ngemesaika anak ‘dalam disiplin enggau ajar Jehovah.’ (Eps. 6:4) Tu utai ti tusah dikereja kemayaharitu. (2 Tim. 3:1-5) Pengudah ada, anak enda nemu bida entara utai ti betul enggau salah, lalu ati sida bedau dilatih. Nya alai anak begunaka disiplin kena ngelatih ati sida. (Rom. 2:14, 15) Seiku pakar Bup Kudus madahka leka jaku “disiplin” dalam jaku Gerika mega ngembuan reti “pemansang ba anak,” tauka ngemesaika  anak ngambika ulih nyadi orang besai tuai ti betanggungjawap.

⁹ Lebuh apai indai disiplin anak ngena pengerindu, anak deka ngasaika diri likun. Anak deka nemu semua utai ke digaga ba pengidup bisi tatak lalu ulih mai penguntung tauka pengerugi. Nya alai apai indai ke Kristian patut bepanggai ba penemu-dalam ari Jehovah ngambika ulih ngemesaika anak sida. Penemu pasal ngemesaika anak ba siti-siti endur enda sebaka, lalu penemu nya selalu berubah. Taja pia, apai indai ke mendingka Petara tau enda ibuh selalu nanya diri empu pasal chara deka ngemesaika anak, lalu sida mega enda ibuh bepanggai ba peneleba tauka penemu mensia.

¹⁰ Kitai ulih belajar ari teladan Noah. Lebuh Jehovah ngasuh iya ngaga bandung, iya enda nemu baka ni chara ngaga bandung nya. Iya patut bepanggai ba Jehovah, lalu Bup Kudus madahka Noah “nitihka asuh” Jehovah. (P-kal. 6:22) Nama nyadi? Bandung nya nyelamatka Noah enggau sida sebilik! Noah mega apai ke mujur. Nama kebuah? Laban iya bepanggai ba penemu-dalam Jehovah. Noah ngajar bala anak iya enggau manah lalu iya mega nyadi teladan ti manah ke sida. Nya ukai utai ti senang dikereja ba maya ti jai sebedau Bah Besai datai.—P-kal. 6:5.

11. Nama kebuah apai indai patut bebendar ngelatih anak sida?

¹¹ Kita ke apai indai, baka ni kita ulih “nitihka asuh” Jehovah? Pendingka Jehovah. Awakka Iya nulung kita ngemesaika anak kita. Kena meh jaku ajar ari Bup Kudus sereta gerempung Iya. Dudi hari, anak kita tentu deka beterima kasih ke utai ti udah digaga kita! Seiku menyadi lelaki nulis: “Aku amat beterima kasih ke chara apai indai ngemesaika aku. Seduai iya enggau naka ulih negu ati aku.” Iya madahka, apai indai ke nulung iya rapat enggau Jehovah. Taja pia, bisi mega anak ninggalka Jehovah taja pan apai indai udah bebendar ngajar sida. Enti apai indai udah ngereja nya, sida enda ibuh nyalahka diri tang sida ulih pechaya anak sida deka pulai baru ngagai Jehovah.

12, 13. (a) Enti sema anak dibuai ari gerempung, baka ni apai indai nunjukka diri ngasika Jehovah? (b) Baka ni siti ruang bilik bulih penguntung ketegal apai indai ngasika Jehovah?

¹² Ba sekeda apai indai, utai ti pemadu pedis ditapi nya lebuh anak dibuai ari gerempung. Seiku menyadi indu ke bisi anak indu ti udah dibuai ari gerempung ngaku: “Aku ngiga kebuah ke ulih dikena aku begulai enggau anak indu sereta uchu aku ari litaricha kitai.” Tang laki iya enggau siru nulung iya nemu anak seduai iya nya ukai agi di baruh tanggungjawap seduai iya, lalu seduai iya patut taluk ngagai Jehovah.

¹³ Beberapa taun udah nya, anak indu seduai iya diterima pulai baru. Ku indai nya madahka: “Diatu iya nyauka ninting hari betelefon tauka sms ngagai aku! Lalu iya bebasa bendar ke kami duai laban iya nemu kami ngasika Jehovah. Kami bisi kaul ti manah amat.” Enti sema anak nuan dibuai ari gerempung, kati nuan deka ‘manggaika diri ba Jehovah enggau pengabis ati nuan’? Kati nuan deka nunjukka diri enda bepanggai ba “penemu diri empu”? (J-lam. 3:5, 6) Anang enda ingat, disiplin ari Jehovah nunjukka Iya bepenemu sereta rindu bendar ke kitai. Kingatka, Iya udah meri Anak Iya ke semua mensia, lalu nya  nyengkaum anak kita. Jehovah dekaka semua orang bulih pengidup ti meruan belama iya. (Bacha 2 Peter 3:9.) Nya alai kita ke apai indai, terus meh bepanggai ba disiplin enggau iring ari Jehovah taja pan pedis deka ngereja nya. Dingaka disiplin ari Jehovah, lalu anang ngelaban.

14. Nama penguntung ke diulih kitai ari iring ke diberi Jehovah nengah “ulun ke tetap ati”?

¹⁴ Jehovah besemaya deka ngibun, nyaga, sereta ngajar bala menyadi Kristian kitai. Bisi beberapa iti chara dikena Jehovah ngereja tu. Ambika chunto, Iya milih Anak Iya Jesus ngambika ngibun eklisia, lalu Jesus milih “ulun ke tetap ati” nyediaka utai ti diguna kitai ba pengarap ngambika kitai mengkang tetap ati. (Luk. 12:42) “Ulun ke tetap ati” nya meri kitai iring tauka disiplin ti beguna. Nuan engka ngenang maya diri ke kala ninga cheramah tauka macha artikel dalam majalah kitai ke udah nulung nuan ngubah chara berunding tauka ngereja siti-siti utai. Nuan patut gaga ati enti nuan udah ngaga sekeda ubah nya, laban nya nunjukka nuan udah ngemendarka Jehovah disiplin nuan.—J-lam. 2:1-5.

15, 16. (a) Baka ni kitai tau bulih penguntung ari pengawa ti dipejalaika bala tuai gempuru? (b) Baka ni kitai ulih nulung bala tuai gempuru deka ngereja pengawa sida enggau ati ti gaga?

¹⁵ Jesus mega ngena bala tuai gempuru ngibun eklisia. Bup Kudus ngumbai sida mensia ke diberi Petara. (Eps. 4:8, 11-13) Baka ni kitai tau bulih penguntung ari pengawa ti dipejalaika bala tuai gempuru? Siti chara nya, nunda pengarap sereta teladan manah sida. Siti agi chara nya, nitihka jaku lalau ari Bup Kudus ke diberi sida. (Bacha Hebrew 13:7, 17.) Bala tuai gempuru rinduka kitai sereta deka kitai rapat agi enggau Petara. Enti sida beratika kitai nadai enggau begempuru tauka enda entu ransing agi, sida deka jejampat nulung kitai. Sida deka mendingka kitai lalu udah nya, meri jaku peransang sereta jaku lalau ti manah ari Bup Kudus. Kati nuan ngumbai tulung ke diberi sida nya nunjukka Jehovah rinduka nuan?

¹⁶ Kingatka, tuai gempuru enda senang meri jaku lalau ngagai kitai. Ulih nuan ngambarka asai ati nabi Natan lebuh iya patut ngerara Raja David pengudah raja nya nguji ngelalaika dosa besai ke udah digaga iya? (2 Sam. 12:1-14) Baka ni asai ati rasul Paul lebuh iya patut ngerara Peter, seiku ari 12 rasul, ketegal Peter rindu agi ke orang Kristian bansa Judah ari orang Kristian ke ari bansa bukai? Paul tentu begunaka pemerani ngambika ulih ngerara Peter. (Gal. 2:11-14) Nya alai nama ulih digaga nuan ngambika tuai gempuru senang agi meri jaku lalau ngagai nuan? Nuan patut baruh ati, deka beterima kasih, sereta senang enggau berandau. Nuan deka bulih penguntung, lalu bala tuai gempuru deka ngereja pengawa sida enggau ati ti gaga.

17. Baka ni bala tuai gempuru nulung seiku menyadi Kristian indu?

¹⁷ Seiku menyadi Kristian indu madahka diri tusah deka rinduka Jehovah ketegal utai ke udah nyadi ba iya, lalu nya ngasuh iya balat tusah ati. Ku iya madahka: “Aku nemu aku patut bejaku enggau bala tuai gempuru. Sida enda nganu tauka ngiga penyalah aku, tang sida meransang sereta ngeringka aku. Pengudah tiap kali begempuru, taja pan sida bisi mayuh pengawa, abis nadai pan bisi seiku  ari sida deka nanya rita aku. Ketegal utai ti udah nyadi suba, aku ngasaika diri enda layak nerima pengerindu Jehovah. Taja pia, Jehovah seruran ngena bala menyadi sereta bala tuai gempuru madahka pengerindu Iya ke aku. Aku ngarapka diri meruan enggau Iya.”

18, 19. Nama penanggul ke ditapi ketegal enggai nerima disiplin? Beri siti chunto.

¹⁸ Disiplin endang utai ti pedis ditapi. Tang utai ke nyadi ketegal nulak disiplin ari Petara pedis agi ditapi. (Heb. 12:11) Kitai ulih beratika tu ari utai ke nyadi ba Kain enggau Raja Sedekiah. Lebuh Petara meda Kain begedi sereta deka munuh menyadi iya, Petara nangkan Kain: “Nama kebuah nuan ringat, lalu mengut-mengut? Enti nuan udah ngereja utai ti ngena, nuan tentu deka tuchum; tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.” (P-kal. 4:6, 7) Kain nulak disiplin ari Jehovah, munuh menyadi iya, lalu ketegal nya iya merinsa sepemanjai pengidup iya. (P-kal. 4:11, 12) Enti Kain mendingka Petara, iya tentu enda napi mayuh pemerinsa.

¹⁹ Sedekiah nya raja ti lemi sereta jai. Lebuh iya merintah, rayat iya ba Jerusalem balat merinsa. Nabi Jeremiah suah nangkan Sedekiah ngambika iya berubah. Tang Sedekiah nulak disiplin ari Jehovah, lalu nya ngujungka iya napi penusah ti balat. (Jer. 52:8-11) Jehovah enggai kitai merinsa ketegal penusah ke ulih diseliahka!—Bacha Isaiah 48:17, 18.

20. Nama nyadi ngagai orang ke nerima sereta ke nulak disiplin ari Petara?

²⁰ Kemayaharitu, mayuh orang ba dunya ngemaruhka disiplin ari Petara sereta enda bedulika disiplin nya. Tang enda lama agi, semua orang ke nulak disiplin ari Petara deka napi penusah ti balat. (J-lam. 1:24-31) Nya alai aram meh kitai ‘mendingka utai ti diajar ngagai kitai. Diau ngena pemintar.’ Baka ke dipadah ba Jaku Dalam 4:13, “seruran kingatka utai ti udah dipelajarka nuan. Pelajar nuan nyadika pengidup nuan - jaga iya enggau manah.”