1, 2. (a) Nama ngasuh kitai betanya: “Ni pengelama?” (b) Nama kebuah chunto bala nembiak Jehovah ke tetap ati kelia ulih meransang kitai kemaya hari tu?

 “NI PENGELAMA?” Nya utai ti ditanya nabi Isaiah enggau Habakuk ke tetap ati. (Isa. 6:11; Hab. 1:2) Lebuh Raja David nulis Masmur 13, iya lima kali nanya tanya ti sama. (Mas. 13:1, 2) Lalu lebuh Jesus Kristus dikelingi orang ke enda arap, iya nanya: ‘Ni pengelama aku enda tau enda begulai enggau kita?’ (Mat. 17:17) Kemaya hari tu, kitai mega engka nanya utai ti sama.

² Nama ngasuh kitai betanya: “Ni pengelama?” Tu engka ketegal utai ke enda lurus bisi nyadi ba kitai. Tauka kitai engka sakit tauka mansang tuai. Kitai engka berasai ditekan laban benung diau ba maya ti “mayuh macham penusah.” (2 Tim. 3:1) Tauka tu engka ketegal ulah enggau runding orang ke ngelingi kitai ngasuh kitai berasai lelak sereta  enda diperansang. Enda ngira nama kebuah, kitai berasai diperansang laban nemu Jehovah enda nyalahka bala nembiak Iya ke tetap ati kelia ke betanya baka nya.

 3. Nama ulih nulung kitai lebuh napi penanggul?

³ Nama ulih nulung kitai lebuh kitai napi penanggul ke tusah ditatka? James, menyadi tiri Jesus, ke diiring roh kudus madah ngagai kitai: “Menyadi, kita enda tau enda liat ati nyentuk ngagai maya Tuhan [“Tuan,” NW] datai.” (Jas. 5:7) Nya alai semua kitai patut liat ati. Tang nama reti ati ti liat, lalu baka ni kitai ulih ngayanka pemanah tu?

4, 5. (a) Nama reti ati ti liat, lalu baka ni kitai ulih liat ati? (b) Baka ni James nerangka ati ti liat? (Peda gambar ba pun artikel.)

⁴ Bup Kudus madahka, ati ti liat datai ari roh kudus Petara. Enti nadai tulung ari Petara, mensia ke enda sempurna tentu tusah deka liat ati lebuh napi penanggul ti berat. Ati ti liat nya pemeri ari Petara, lalu kitai nunjukka pengerindu diri ngagai Jehovah sereta orang bukai lebuh kitai ngayanka ati ti liat. Enti kitai enda liat ati, pengerindu entara kitai enggau orang bukai deka majak kurang. (1 Kor. 13:4; Gal. 5:22) Ati ti liat nyengkaum nama? Nya ukai semina tan natka penanggul, tang mega ngembuan runding enggau ulah ti positif. (Kol. 1:11; Jas. 1:3, 4) Ati ti liat mega nulung kitai meruan tetap ati ngagai Jehovah enda ngira penusah ke ditapi kitai. Ati ti liat deka nulung kitai nyeliah ari malas penyai lebuh kitai napi pemerinsa. Bup Kudus madahka, kitai enda tau enda sanggup nganti. Nya siti utai ti beguna ke dipelajarka kitai ari James 5:7, 8: “Peda kita pengeliat ati orang bumai nganti umai sida mansutka asil. Sida liat ati nganti hari ujan lebuh musin ruruh daun enggau lebuh musin bungai. Kita mega enda tau enda liat ati. Keringka ati kita, laban Tuhan [“Tuan,” NW] nyau semak.”

⁵ Nama kebuah kitai patut sanggup nganti Jehovah ngamatka semaya Iya? Murid Jesus ke benama James mandingka penanggul ti ditapi kitai enggau penanggul ti ditapi orang bumai. Taja pan orang bumai bebendar betanam, iya nadai kuasa atas mua hari tauka ngasuh utai tanam nya jampat tumbuh. Iya patut enggau ati ti liat nganti “umai [iya] mansutka asil.” Pia mega, bisi mayuh utai ke ukai di baruh kuasa kitai seraya kitai nganti semaya Jehovah dikeamatka. (Mrk. 13:32, 33; SKR. 1:7) Baka orang bumai nya, kitai patut nganti enggau ati ti liat.

 6. Nama ulih dipelajarka kitai ari chunto nabi Mikah?

⁶ Nabi Mikah natka penanggul ti sama baka ke ditapi kitai kemaya hari tu. Iya idup maya jeman Raja Ahas merintah. Ahas nya raja ti amat jai. Nya alai, mayuh pengawa ti jai bisi nyadi di menua nya. Ketegal penyai balat nyadi, Bup Kudus ngumbai orang “landik magang ngereja penyai.” (Bacha Mikah 7:1-3.) Mikah nemu, iya enda ulih ngubah penanggul nya. Nya alai, nama deka digaga iya? Mikah madah ngagai kitai: “Tang aku deka terus ngiga Jehovah. Aku deka  ngayanka ulah ti deka nganti Petara ti ngelepaska aku. Petara aku deka ninga aku.” (Mik. 7:7, NW) Baka Mikah, kitai mega patut ngayanka “ulah ti deka nganti.”

 7. Nama kebuah kitai patut ngereja utai bukai seraya nganti Jehovah ngamatka semaya Iya?

⁷ Enti kitai ngembuan pengarap baka ke dikembuan Mikah, kitai tentu sanggup nganti Jehovah. Penanggul ke ditapi kitai enda sebaka enggau penanggul orang jil ke nganti dalam sil sebedau iya diukum bunuh. Orang jil nya dipejal nganti, lalu hari nya ukai utai ti dianti iya. Penanggul ke ditapi iya endang enda sebaka enggau enggi kitai! Kitai sanggup nganti Jehovah laban kitai nemu ba maya ti ngena, Iya deka ngamatka semaya Iya ti deka meri kitai pengidup ti meruan belama iya! Nya alai kitai “tan natka semua pemerinsa enggau ati ti liat, . . . enggau ati ti gaga.” (Kol. 1:11, 12.) Seraya kitai nganti, kitai patut bejimat ngambika enda mutap ngumbai Jehovah lubah ngamatka semaya Iya. Enti kitai baka nya, Iya enda lantang ati.—Kol. 3:12.

 8. Nama dipelajarka kitai ari bala lelaki enggau indu ti tetap ati kelia menya?

⁸ Nama ulih nulung kitai sanggup agi nganti? Kitai ulih mikirka pasal bala lelaki enggau indu ti tetap ati kelia menya ke liat ati nganti Jehovah ngamatka semaya Iya. (Rom. 15:4)  Seraya kitai mikirka pasal chunto sida, endang manah enti kitai ngingatka ni pengelama sida patut nganti, nama kebuah sida sanggup nganti, lalu baka ni Jehovah merekatka sida ketegal liat ati.

9, 10. Ni pengelama Abraham seduai Sarah nganti Jehovah?

⁹ Peratika chunto Abraham seduai Sarah. Ketegal seduai iya ngayanka diri “arap sereta liat ati,” seduai iya nerima ‘utai ti udah disemaya Petara.’ Bup Kudus madahka, “lebuh Abraham udah nganti enggau ati ti liat,” Jehovah besemaya deka merekatka iya sereta nyadika iya, apai ke siti bansa ti besai. (Heb. 6:12, 15) Nama kebuah Abraham patut ngayanka ati ti liat? Laban semaya nya begunaka timpuh sebedau dikeamatka. Kena 14 Nisan ba taun 1943 sebedau Kristus datai, Abraham seduai Sarah sereta semua orang ke sebilik enggau seduai iya meraka Sungai Eupratis lalu tama ngagai Menua ti Udah Disemaya. Tang Abraham udah nya patut nganti 25 taun sebedau anak lelaki iya Isak ada, lalu nganti 60 taun da agi sebedau uchu iya Esau seduai Jakop ada.—Heb. 11:9.

¹⁰ Ni pemesai Menua ti Udah Disemaya ke diterima Abraham? Bup Kudus madahka, Jehovah “enda meri iya pesaka di menua nya, sekaki pen nadai, tang besemaya deka meri menua nya nyadika pesaka iya, enggau ngagai bala peturun iya, taja pen iya nadai anak.” (SKR. 7:5) Bala peturun Abraham nyadi bansa ke diau di menua nya, semina pengudah 430 taun Abraham meraka Sungai Eupratis.—P-sut. 12:40-42; Gal. 3:17.

11. Nama kebuah Abraham sanggup nganti, lalu nama berekat ke deka dipeda iya ketegal liat ati?

¹¹ Abraham sanggup nganti laban iya pechaya Jehovah deka ngamatka semaya Diri. Abraham ngembuan pengarap ba Jehovah. (Bacha Hebrew 11:8-12.) Abraham gaga ati nganti taja pan iya enda ulih meda semua semaya Petara dikeamatka sebedau iya mati. Tang uji gambarka pengaga ati Abraham lebuh iya diangkatka idup baru ba dunya paradais. Iya deka tekenyit ati lebuh macha pasal cherita pengidup iya enggau sida sebilik ba mayuh begian dalam Bup Kudus. a (Peda nota kaki.) Uji gambarka pengaga ati iya lebuh nemu diri bisi ungkup ti besai senentang ngamatka tuju Jehovah bekaul enggau Messiah ti disemaya! Kitai ulih pechaya, Abraham deka ngumbai diri enda rugi nganti berekat nya.

12, 13. Nama kebuah Josep begunaka ati ti liat, lalu nama runding enggau ulah ti positif ke dikembuan iya?

¹² Josep, ichit Abraham, mega ngembuan ati ti liat. Iya nyadi mansa sekeda pengawa ke enda lurus. Keterubah, iya dijual bala menyadi iya nyadi ulun lebuh iya beumur 17 taun. Udah nya, iya dituduh nguji masung bini tuan iya lalu dianjung ngagai rumah jil. (P-kal. 39:11-20; Mas. 105:17, 18) Taja pan Josep nya nembiak Petara ke tetap ati, iya baka ke diukum, ukai diberekat. Tang pengudah 13 taun, semua utai berubah. Josep dilepaska ari rumah jil lalu nyadi orang lumur  dua ke pemadu bekuasa di menua Ejip.—P-kal. 41:14, 37-43; SKR. 7:9, 10.

¹³ Kati pengawa ke enda lurus nya ngasuh Josep pedis ati? Kati iya ngasaika Jehovah udah ninggalka iya? Enda. Josep nganti enggau ati ti liat. Nama udah nulung iya? Pengarap iya ngagai Jehovah. Josep nemu, Jehovah bekuasa atas semua utai. Kitai nemu tu ari jaku iya ngagai bala menyadi iya: ‘Anang takut. Aku enda nemu ngaga diri nyadi Petara. Kita ngiga akal ti jai kena kita ngelaban aku, tang Petara udah mutarka utai nya nyadi utai ti manah, ngambika ngidupka nyawa orang mayuh, lalu orang mayuh agi mengkang idup diatu, ketegal utai nya udah nyadi.’ (P-kal. 50:19, 20) Josep nemu, endang enda rugi nganti berekat ari Jehovah.

14, 15. (a) Nama kebuah pengeliat ati David narit ati kitai? (b) Nama nulung David nganti enggau ati ti liat?

¹⁴ Raja David mega merinsa ketegal mayuh pengawa ti enda lurus. Jehovah nyiri David nyadi raja menua Israel lebuh iya agi biak. Tang David enda tau enda nganti 15 taun sebedau iya ulih nyadi raja ke raban bansa iya empu. (2 Sam. 2:3, 4) Dalam kandang timpuh nya, David ngerarika diri sereta belalai ari Raja Saul, ke nguji deka munuh iya. b (Peda nota kaki.) Ketegal tu, David nadai ngembuan rumah ke diri empu. Iya diau di menua bukai sereta dalam gua di menua puang. Pengujung iya, Saul mati dibunuh ba perang. Tang David agi nganti kira-kira tujuh taun sebedau iya ulih nyadi raja ke semua bansa Israel.—2 Sam. 5:4, 5.

¹⁵ Nama kebuah David sanggup nganti enggau ati ti liat? Iya meri kitai saut ba masmur ti sama ke alai iya lima kali betanya: “Ni pengelama?” Ku iya madahka: ‘Aku manggaika diri ba pengerindu Nuan ti meruan belama iya. Aku deka gaga ati laban Nuan deka ngidupka aku. Aku deka belagu ke Nuan, O Jehovah, laban Nuan udah [‘meri berekat ngagai,’ NW] aku.’ (Mas. 13:5, 6) David nemu, Jehovah rinduka iya lalu David seruran deka taluk ngagai Iya. David mikirka maya Jehovah udah nulung iya menya, lalu David nganti maya Jehovah deka muai penanggul iya. David nemu, endang enda rugi iya nganti berekat ari Jehovah.

16, 17. Baka ni Petara Jehovah enggau Jesus Kristus netapka chunto ti pemadu badas bekaul enggau sanggup nganti?

¹⁶ Jehovah nadai ngasuh kitai ngereja utai ke enda sanggup dikereja Iya. Iya udah netapka chunto ti pemadu badas bekaul enggau sanggup nganti. (Bacha 2 Peter 3:9.) Ngambika chunto, beribu taun menya ba Kebun Eden, Sitan nuduh Jehovah enda lurus. Jehovah  “nganti” maya alai nama Iya deka dikuduska. Asil iya, berekat ti ngerinduka ati ke orang ti terus nganti Iya.—Isa. 30:18.

¹⁷ Jesus mega sanggup nganti. Lebuh iya ba dunya, iya tetap ati nyentuk ke iya mati. Ba taun 33, iya nyerahka rega genselan iya ngagai Jehovah di serega. Tang iya nganti diri berengkah merintah nyadi Raja nyentuk ngagai taun 1914. (SKR. 233-35; Heb. 10:12, 13) Taja pia, Jesus agi nganti nyentuk ngagai pengujung Seribu Taun Merintah sebedau semua munsuh iya dirusak. (1 Kor. 15:25) Nya timpuh nganti ti lama. Tang, endang enda rugi nganti berekat nya.

18, 19. Nama ulih nulung kitai sanggup nganti enggau ati ti liat?

¹⁸ Amat, Jehovah deka kitai liat ati, sanggup nganti. Nama ulih nulung kitai ngereja tu? Kitai patut besampi minta roh kudus Petara. Anang enda ingat, ati ti liat datai ari roh kudus Petara. (Eps. 3:16; 6:18; 1 Tes. 5:17-19) Nya alai minta Jehovah nulung nuan tan!

¹⁹ Kingatka mega, utai ke nulung Abraham, Josep, enggau David nganti semaya Jehovah dikeamatka enggau ati ti liat. Utai nya pengarap sida sereta manggaika diri ba Jehovah. Sida enda berunding pasal diri empu sereta utai ti dikedekaka sida aja. Lebuh kitai mikirka berekat manah ke diterima sida, kitai mega diperansang ngayanka ulah ti deka nganti.

20. Nama utai ke keran deka digaga kitai?

²⁰ Nya alai, taja pan napi penanggul, kitai keran deka ngayanka “ulah ti deka nganti.” Kekadang kitai engka betanya, ‘O Jehovah, ni pengelama?’ (Isa. 6:11) Tang enggau saup ari roh kudus Petara, kitai ulih neladan nabi Jeremiah sereta nyebut: ‘Semina Jehovah aja ke dikemisi aku,’ sereta “Nya kebuah aku deka ngayanka ulah ti deka nganti, NW.”—Sab. 3:21, 24.