1, 2. Baka ni gaya orang Judah di menua Jerusalem ba ujung genera Sekariah ti ketujuh?

 SERAYA genera Sekariah ti ketujuh nyau abis, Sekariah bisi mayuh utai ti deka dipikirka. Iya tentu berasai dikeringka ulih semaya Jehovah ti deka ngukum orang ke enda lurus. Tang nadai entu mayuh utai ke berubah. Mayuh orang agi ngereja utai ti jai sereta enda lurus, lalu pengawa ngaga baru Rumah Sembiang di Jerusalem bedau tembu. Nama kebuah orang Judah jampat endar ninggalka pengawa ti udah diberi Jehovah ngagai sida? Kati sida pulai baru ngagai Jerusalem ketegal deka ngemanahka agi pengidup sida?

² Sekariah nemu, orang Judah ke pulai baru ngagai menua Jerusalem nya penyembah Jehovah. Sida nya ‘semua orang bukai ti udah ditegu Petara ati’ ngambika ninggalka rumah sereta pengawa dagang sida di menua Babilon. (Esr. 1:2, 3, 5) Sida ninggalka menua ti dikelala sida lalu pindah ngagai  menua ti enda kala dipeda sekeda ari sida. Pengawa ngaga baru Rumah Sembiang Jehovah nya besai amat reti ba orang Judah, nya alai sida sanggup berantuka nyawa bejalai penyauh kira-kira 1,600 kilometer (1,000 batu) nengah menua ti bebukit sereta enda rata.

3, 4. Nama penanggul ti ditapi orang Judah ke pulai baru?

³ Uji gambarka pejalai ti jauh ari menua Babilon ngagai Jerusalem. Orang Judah bisi mayuh awak mikir sereta bejaku pasal menua ke deka alai sida diau. Orang ke tuai bisi madah ngagai sida pasal pemanah menua Jerusalem enggau Rumah Sembiang ke suba. (Esr. 3:12) Enti nuan bisi sama enggau sida, baka ni asai ati nuan lebuh keterubah iya meda menua Jerusalem? Kati nuan berasai tusah ati meda tembawai ke penuh laban madang babas sereta dinding kuta ti runtuh lalu bisi lubang ti besai ba senentang endur ke kala alai nirika pintu kuta enggau menara? Nuan engka mandingka dinding kuta ke runtuh nya enggau dinding kuta di menua Babilon ke besai sereta tegap. Tang orang Judah enda lemi semengat. Nama kebuah? Laban lebuh sida benung bejalai jauh, Jehovah udah nulung sereta nyaga sida. Sepengudah sida datai di menua Jerusalem, sida ngaga alta ba endur ke kala alai ngaga Rumah Sembiang lalu berengkah meri pemeri ngagai Jehovah tiap hari. (Esr. 3:1, 2) Sida penuh enggau pengeransing lalu sedia deka gawa. Baka ke nadai utai tau ngelemika sida.

⁴ Kelimpah ari ngaga baru Rumah Sembiang, orang Judah mega patut ngaga baru nengeri sereta rumah sida. Sida patut betanam ngambika ulih nyediaka pemakai ke diri sebilik. (Esr. 2:70) Pengawa ke digaga sida mayuh amat. Enda lama udah nya, munsuh sida datai lalu nguji nagang sida. Pengawa nyakal nya nyadi pengelama 15 taun, lalu orang Judah belubah-lubah nyau lemi semengat. (Esr. 4:1-4) Siti agi penanggul nyadi ba taun 522, lebuh raja menua Persia ngasuh semua pengawa ngaga di menua Jerusalem diketuka. Nengeri nya baka ke enda ulih digaga baru.—Esr. 4:21-24.

 5. Baka ni Jehovah nulung nembiak Iya?

⁵ Jehovah nemu, nembiak Iya begunaka pengering sereta pemerani. Iya meri Sekariah genera ti ke penudi ngambika nembiak Iya nemu, Iya rinduka sida sereta beterima kasihka pengawa sida ke nyembah Iya. Iya besemaya deka nyaga sida enti sida nampung baru pengawa ke udah diberi ngagai sida. Pasal pengawa ngaga Rumah Sembiang, Jehovah madahka: ‘Semua utai tu deka nyadi magang enti kita ngasika semua pesan Jehovah Petara kita.’—Sek. 6:15.

 6. (a) Baka ni genera Sekariah ti kelapan berengkah? (Peda gambar ba pun artikel.) (b) Nama kebuah raban kuda nya bebida chura?

⁶ Genera Sekariah ti kelapan sereta ke penudi engka iya ti pemadu ngeringka pengarap semua sida. (Bacha Sekariah 6:1-3.) Uji gambarka utai ti dipeda Sekariah. “Ari entara dua igi bukit” ke digaga ari temaga pansut seraban kuda ke narit empat buah kerita perang. Raban kuda nya bisi chura ti bebida, lalu tu senang kena ngelala sapa bagi ke nepan kuda nya. Sekariah nanya: “Nama utai nya?” (Sek. 6:4) Kitai mega deka nemu, laban genera nya bisi kaul enggau kitai.

7, 8. (a) Dua igi bukit nya ngambarka nama? (b) Nama kebuah bukit nya digaga ari temaga?

 ⁷ Dalam Bup Kudus, bukit ulih ngambarka perintah. Bukit ke dipeda Sekariah sama enggau dua igi bukit ke dibacha kitai ari bup Daniel. Sigi ari bukit nya ngambarka perintah Jehovah ti nyengkaum bumi enggau langit luar sereta meruan belama iya, lalu ke sigi agi ngambarka Perintah Messiah ke alai Jesus nyadi Raja. (Dan. 2:35, 45) Kenyau hari musin rarah ba taun 1914, lebuh Jesus nyadi Raja, kedua-dua igi bukit nya udah bisi lalu bisi ungkup ti spesial kena ngamatka tuju Petara bekaul enggau dunya.

⁸ Nama kebuah bukit nya digaga ari temaga? Temaga nya besi ti amat berega sereta beperenching. Indah Jehovah ngasuh orang Israel ngena temaga lebuh sida ngaga langkau sembiang sereta Rumah Sembiang di menua Jerusalem udah nya. (P-sut. 27:1-3; 1 Raj. 7:13-16) Dua igi bukit ke digaga ari temaga nya ngambarka kualiti badas perintah Jehovah ti nyengkaum bumi enggau langit luar sereta Perintah Messiah, ke deka ngasuh mensia berasai likun sereta mai mayuh berekat ke sida.

 9. Sapa orang ke nepan kerita perang, lalu nama pengawa sida?

⁹ Nama digambarka kerita perang enggau orang ke nepan iya? Orang ke nepan nya melikat, engka raban melikat ti bebida. (Bacha Sekariah 6:5-8.) Sida pansut udah bekau betemu enggau “TUHAN [“Tuan,” NW] ti merintah semua dunya” enggau siti pengawa ti spesial. Sida melikat nya diasuh ngagai endur ke udah ditetapka ngambika nyaga nembiak Petara, kelebih agi ari menua Babilon ke di “utara.” Ngena genera tu, Jehovah nulung nembiak Iya nemu, sida enda agi nyadi ulun menua Babilon. Uji gambarka baka ni tu ngelantangka ati orang ke ngaga Rumah Sembiang maya jeman Sekariah! Sida nemu munsuh sida enda ulih nagang sida.

10. Baka ni jaku ti dipadah Sekariah pasal kerita perang enggau orang ke nepan ulih nulung kitai kemaya hari tu?

¹⁰ Kemaya hari tu, Jehovah agi ngena melikat nyaga sereta ngeringka nembiak Iya. (Mal. 3:6; Heb. 1:7, 14) Kenyau ari taun 1919, lebuh nembiak Jehovah dilepaska ngena chara simbolik ari nyadi orang tangkap ba Babilon ti Besai, munsuh sida udah bebendar nguji deka nagang sembah ti bendar mansang sereta ngerembai. (Pem. 18:4) Tang munsuh sida enda mujur. Ketegal melikat bisi nyaga gerempung Jehovah, kitai enda ibuh irauka nembiak Jehovah deka nyadi orang tangkap ngagai pengarap ti pelesu agi. (Mas. 34:7) Tang kitai deka terus gaga ati sereta kisuk nyembah Jehovah. Jaku ti dipadah Sekariah nulung kitai nemu, kitai likun sereta dijaga ulih dua igi bukit.

11. Nama kebuah kitai enda patut takut lebuh nembiak Petara diserang?

¹¹ Enda lama da agi, raban politik ari dunya Sitan deka begempung nguji ngerusak nembiak Petara. (Esk. 38:2, 10-12; Dan. 11:40, 44, 45; Pem. 19:19) Ba jaku ti  dipadah Esekiel, kitai meda raban nya ngelamun dunya baka remang. Sida nepan kuda lalu datai enggau pengeringat nyerang nembiak Jehovah. (Esk. 38:15, 16, NW) a (Peda nota kaki.) Patut kitai takutka sida? Enda! Kitai bisi bala soldadu Jehovah enggau kitai. Lebuh maya penusah ti besai, melikat Jehovah deka nyaga nembiak Iya sereta deka ngerusak semua orang ke ngelaban perintah Jehovah. (2 Tes. 1:7, 8) Nya endang hari ti dianti kitai! Tang sapa deka nguluka bala soldadu Jehovah ti di serega nya?

12, 13. (a) Nama agi diasuh Jehovah gaga Sekariah? (b) Baka ni kitai nemu orang ke dikangau Telesak nya Jesus Kristus?

¹² Semina Sekariah aja ke meda lapan iti genera nya. Tang udah nya iya ngereja utai ke ulih dipeda orang bukai sereta ke ulih meransang orang ke ngaga baru Rumah Sembiang Petara. (Bacha Sekariah 6:9-12.) b Tiga iku orang iya nya Heldai, Tobijah,  enggau Jedaiah, datai ari menua Babilon. Jehovah ngasuh Sekariah ngambi pirak enggau emas ari sida lalu ngena utai nya ngaga “siti makota.” (Sek. 6:11) Kati makota tu ke Gabenor Serubabel ari suku Judah sereta peturun David? Ukai. Jehovah ngasuh Sekariah ngerasukka makota nya ba pala Imam Besai Josua. Tu tentu ngasuh orang ke meda berasai tekenyit.

¹³ Kati pengawa nyiri nya ngasuh Imam Besai Josua nyadi raja? Enda. Josua ukai peturun David, nya alai iya enda layak nyadi raja. Pengawa nyiri iya ngambarka utai ke deka nyadi dudi hari ba chalun raja sereta imam ti meruan belama iya, ke dikumbai Telesak. Bup Kudus madahka Telesak nya Jesus Kristus.—Isa. 11:1; Mat. 2:23.

14. Ketegal nyadi Raja sereta Imam Besai, nama pengawa ke digaga Jesus?

¹⁴ Jesus nya Raja sereta Iman Besai. Iya nguluka bala soldadu melikat Jehovah sereta bebendar nulung nembiak Petara berasai likun ba dunya ti mangah tu. (Jer. 23:5, 6) Enda lama da agi, Kristus deka ngalahka mayuh bansa lebuh iya nyukung perintah Jehovah lalu ngelindung nembiak Jehovah. (Pem. 17:12-14; 19:11, 14, 15) Tang sebedau hari nya datai, Jesus, tauka Telesak, bisi pengawa ti besai ke patut digaga.

15, 16. (a) Baka ni nembiak Petara diadu sereta dituchi kemaya hari tu, lalu sapa ke bejalaika pengawa nya? (b) Baka ni gaya dunya ba ujung Seribu Taun Kristus Merintah?

¹⁵ Ketegal nyadi Raja sereta Imam Besai, Jesus diberi pengawa “ngaga Rumah Sembiang.” (Bacha Sekariah 6:13.) Ba taun 1919, iya ngereja pengawa nya enggau ngelepaska nembiak Petara ari dikuingka pengarap pelesu, Babilon ti Besai. Jesus ngaduka baru eklisia, lalu nyiri “ulun ke tetap ati sereta bepenemu-dalam.” Raban ke diiri ngena roh kudus tu ngiring pengawa ti besai iya nya sembah ti tuchi ba dunya. (Mat. 24:45) Jesus mega benung nuchi nembiak Petara, iya nya nulung sida nyembah Petara enggau chara ti tuchi.—Mal. 3:1-3.

¹⁶ Jesus enggau 144,000 iku orang ke sama enggau nyadi raja sereta imam deka merintah pengelama seribu taun. Maya nya, sida deka nulung mensia ti tetap ati nyadi sempurna. Lebuh bala raja sereta imam tu udah nembuka pengawa nya,  semina penyembah Jehovah ti bendar ke deka diau ba dunya. Ke penudi iya, sembah ti bendar deka tembu diaduka!

17. Nama agi jamin ke diberi Jehovah ngagai orang Judah, lalu baka ni pesan Iya bisi kaul enggau sida?

¹⁷ Baka ni pesan ari Sekariah bisi kaul enggau orang Judah maya nya? Jehovah udah besemaya deka nulung sereta nyaga sida ngambika sida ulih nembuka Rumah Sembiang. Semaya tu meri sida pengadang. Tang sida engka agi berunding baka ni pengawa ti mayuh nya ulih ditembuka ngena mimit aja orang. Nya alai Sekariah madahka utai ke tau ngasuh sida badu irau sereta kakang ati. Ketegal bisi Heldai, Tobijah, enggau Jedaiah ke udah datai nulung sida, Jehovah madahka mayuh sida ke bukai mega deka “datai lalu nulung ngaga Rumah Sembiang nya baru.” (Bacha Sekariah 6:15.) Orang Judah pechaya, Jehovah nyukung pengawa sida. Sida enggau berani nampung baru pengawa ngaga Rumah Sembiang, taja pan raja menua Persia udah meri atur rasmi ke nagang orang begagaka Rumah Sembiang nya baru. Pengawa nagang nya baka sigi bukit ti besai ke ngempang jalai sida, tang enda lama udah nya Jehovah muai bukit nya. Lalu Rumah Sembiang nya tembu ba taun 515 sebedau Kristus ada. (Esr. 6:22; Sek. 4:6, 7) Taja pia, jaku ari Jehovah nya mega madah pasal utai ti besai agi ke benung nyadi kemaya hari tu.

18. Baka ni Sekariah 6:15 dikeamatka kemaya hari tu?

¹⁸ Kemaya hari tu, bejuta iku orang nyembah Jehovah. Sida gaga ati meri Iya utai “ti pemadu manah,” baka awak, pengering, sereta reta sida. Enggau chara tu, sida nyukung sembah ti tuchi. (J-lam. 3:9) Lalu kitai ulih pechaya, Jehovah gaga ati enti kitai taluk nyukung Iya. Kingatka, Heldai, Tobijah, enggau Jedaiah mai pirak sereta mas lalu Sekariah ngaga utai nya nyadi sigi makota. Makota nya dikena “ngingatka” pengawa sida ke nyukung sembah ti bendar. (Sek. 6:14) Jehovah deka seruran ingatka pengawa ke dikereja kitai sereta pengerindu ke diayanka kitai ngagai Iya.—Heb. 6:10.

19. Baka ni genera Sekariah bisi kaul enggau kitai?

¹⁹ Ba hari ti penudi tu, nembiak Jehovah ulih ngereja pengawa ti besai. Tu ulih dipejalaika ketegal berekat ari Jehovah sereta ketegal betuaika Jesus. Kitai gaga ati ulih enggau gerempung ti tegap, likun, sereta meruan, lalu kitai nemu tuju Jehovah ke sembah ti tuchi deka dikeamatka. Nya alai gaga ati meh enggau ungkup nuan ba bala nembiak Jehovah, lalu ‘ngasika [“mendingka,” NW] semua pesan Jehovah Petara kita.’ Enggau nya nuan ulih dijaga Raja sereta Imam Besai kitai enggau bala melikat. Enggau naka ulih meh nyukung sembah ti bendar. Jehovah deka ngelindung nuan sepemanjai sistem dunya tu, sereta belama iya!