1. Nama ngasuh nuan pechaya Jaku Petara ngembuan kuasa? (Peda gambar ba pun artikel.)

 NEMBIAK Jehovah pechaya, jaku Iya ti ngembuan pesan ke mensia nya “idup sereta bekuasa.” (Heb. 4:12) Kitai udah meda kuasa ari Bup Kudus ba pengidup kitai empu sereta ba pengidup orang bukai. Sebedau nyadi Saksi, sekeda orang nyadi penchuri, gian makai dadah, tauka ngereja ulah seks ti kamah. Sekeda nya tebilang tauka bisi duit tang agi ngasaika pengurang ba pengidup. (P-jar. 2:3-11) Tang manah amat, mayuh orang ke nadai pengadang sereta nadai tuju ba pengidup diatu nyau bisi iring sereta pengadang. Ba majalah Menara Jaga, kitai bisi macha lalu gaga ati enggau peneleba dalam siri artikel “Bup Kudus Ngubah Pengidup.” Lalu taja pan udah nyadi orang Kristian, sida patut terus negapka kaul sida enggau Jehovah nengah bantu ari Bup Kudus.

 2. Baka ni kuasa ari Jaku Petara ngubah orang ba abad keterubah?

² Kitai enda tekenyit ati enti mayuh orang ngaga ubah ti besai lebuh sida belajarka pemendar. Bala menyadi Kristian kitai ba abad keterubah ke ngembuan pengadang ke serega ngaga ubah ti besai nya. (Bacha 1 Korint 6:9-11.) Lebuh  Paul bejaku pasal orang ke enda ulih bempu Perintah Petara, iya madahka: “Baka nya meh sekeda bala kita suba.” Jaku Petara enggau roh kudus Iya udah nulung sida berubah. Tang taja pan udah nyadi orang Kristian, sekeda ari sida ngaga penyalah ti besai ke ngeruga kaul sida enggau Jehovah. Ambika chunto, Bup Kudus nyebut pasal seiku menyadi Kristian lelaki ti diiri ngena roh kudus ke patut dibuai ari gerempung. Udah nya, iya ngaga ubah ngambika ulih diterima eklisia Kristian baru. (1 Kor. 5:1-5; 2 Kor. 2:5-8) Endang meransang ati laban bala menyadi Kristian kitai ulih ngaga mayuh ubah ketegal kuasa ari Jaku Petara.

 3. Nama deka dikerandauka kitai ba artikel tu?

³ Jaku Petara amat bekuasa. Ketegal Jehovah udah meri Jaku Iya ngagai kitai, kitai deka nentuka diri ngena Jaku Iya enggau manah. (2 Tim. 2:15) Artikel tu deka berandauka baka ni kitai ulih ngena kuasa ari Bup Kudus (1) ba pengidup kitai, (2) ba pengawa nginjil, sereta (3) lebuh kitai ngajar ba atas panggau. Utai ke dipelajarka kitai ditu deka nulung kitai mandangka pengerindu sereta terima kasih ngagai Apai kitai ti di serega ke ngajar kitai ke penguntung kitai.—Isa. 48:17.

 4. (a) Nama ulih digaga kitai ngambika Jaku Petara bekuasa atas kitai? (b) Baka ni nuan ulih ngiga awak macha Bup Kudus?

⁴ Ngambika Jaku Petara bekuasa atas kitai, kitai patut seruran macha iya. Kitai patut nguji macha iya ninting hari. (Jos. 1:8) Mayuh ari kitai kisuk ba pengidup, tang kitai enda patut ngelakka sebarang utai, nyengkaum tanggung pengawa kitai, nagang kitai macha Bup Kudus. (Bacha Epesus 5:15, 16.) Kitai ulih ngiga awak maya tumu pagi, maya siang hari, tauka maya malam hari. Kitai setuju enggau pemasmur ke nulis: “Aku rinduka adat Nuan! Aku belematika iya sepemanjai hari.”—Mas. 119:97.

5, 6. (a) Nama kebuah kitai patut belemati? (b) Baka ni pengawa belemati kitai tau mujur? (c) Baka ni pengawa macha enggau belematika Bup Kudus udah nulung nuan?

⁵ Taja pia, semina macha Bup Kudus aja enda chukup. Kitai patut belemati, tauka berunding enggau dalam pasal utai ti udah dibacha kitai. (Mas. 1:1-3) Nya baru kitai ulih nitihka penemu-dalam ari Bup Kudus ba pengidup kitai. Nya alai sekalika kitai macha Bup Kudus ke dichelak tauka ba perengka elektronik, kitai deka ngawakka Jaku Petara ngubah sereta meransang kitai.

⁶ Baka ni pengawa belemati kitai tau mujur? Lebuh macha Bup Kudus, kitai patut ngetu enda lama lalu nanya diri empu: ‘Nama dipelajarka aku pasal Jehovah ari ayat nya? Baka ni aku udah ngena utai ke dibacha aku ba pengidup? Nama ubah ke agi patut digaga aku?’ Lebuh kitai belematika Jaku Petara sereta besampi pasal utai ti dibacha, kitai deka nitihka utai ti dibacha. Udah nya kitai ulih  ngasaika kuasa ari Bup Kudus ba pengidup kitai.—2 Kor. 10:4, 5.

 7. Baka ni kitai ulih ngena Jaku Petara enggau manah ba pengawa nginjil?

⁷ Endang beguna kitai bejarit ngena Jaku Petara lebuh nginjil sereta ngajar. Seiku menyadi Kristian lelaki madahka, “Enti sema nuan nginjil ari rumah ke rumah enggau Jehovah, kati semina nuan aja ke bejaku tauka nuan deka meri Iya awak bejaku?” Lebuh kitai macha Bup Kudus ngagai orang bukai, kitai meri Jehovah awak bejaku enggau orang nya. Ayat Bup Kudus ke udah dipilih enggau manah bekuasa agi ari nama-nama utai ke disebut kitai. (1 Tes. 2:13) Lebuh nuan ba pengawa nginjil, kati nuan nguji enggau naka ulih macha ayat ari Bup Kudus enggau suah agi?

 8. Nama kebuah semina macha ayat Bup Kudus lebuh kitai nginjil enda chukup?

⁸ Taja pia, semina macha siti-siti ayat Bup Kudus ngagai orang ke alai kitai nginjil enda chukup. Mayuh orang enda nemu reti ayat dalam Bup Kudus. Tu bisi nyadi ba abad keterubah sereta kemaya hari tu. (Rom. 10:2) Kitai enda patut ngumbai orang ke bempu rumah meretika ayat ke dibacha kitai. Kitai ulih nulung iya enggau nandu batang penemu tauka leka jaku ti patut dikemeratka ari ayat nya lalu udah nya nerangka reti iya. Enggau chara tu, Jaku Petara ulih tama ba runding sereta ati orang.—Bacha Luke 24:32.

 9. Baka ni kitai ulih nulung orang masa Bup Kudus enggau utai ti disebut kitai sebedau macha siti-siti ayat? Beri siti chunto.

⁹ Utai ke disebut kitai sebedau macha siti-siti ayat mega ulih nulung orang ke bempu rumah masa Bup Kudus. Ambika chunto, kitai ulih nyebut, “Aram kitai meda utai ti dipadah Penempa kitai pasal pekara tu.” Tauka enti kitai bejaku enggau orang ke ukai Kristian, kitai ulih nyebut, “Aram kitai meda utai ti dipadah Bup Kudus ngagai kitai.” Enti kitai betemu enggau orang ke enda beduli pasal pengarap, kitai ulih nanya, “Kala nuan ninga jaku lama tu?” Enti kitai nemu tiap iku orang ngembuan gaya pengidup sereta utai ti dipechaya diri empu, kitai deka enggau naka ulih ngasuh jaku pemuka narit ati.—1 Kor. 9:22, 23.

10. (a) Nama peneleba ke bisi ba seiku menyadi Kristian lelaki? (b) Baka ni nuan nemu Jaku Petara bekuasa ba pengawa nginjil?

¹⁰ Mayuh orang setuju, ngena Jaku Petara lebuh nginjil ulih ngubah orang ke ditemu sida. Ambika chunto, seiku menyadi Kristian lelaki ngelawa seiku lelaki ti tuai ke udah macha majalah kitai betaun-taun. Bisi sekali, menyadi Kristian nya ukai semina meri iya majalah Menara Jaga ti pemadu baru, tang menyadi nya macha siti ayat Bup Kudus ke iya. Menyadi Kristian nya macha 2 Korint 1:3, 4, ke madahka: ‘Apai ti pun semua pengasih, Petara ti pun semua pengelantang . . . merindang kami lebuh kami dituntung semua  macham penusah.’ Ayat tu balat negu ati lelaki ti tuai nya dataika iya minta menyadi Kristian nya macha ayat nya baru. Udah nya, iya madahka iya enggau bini iya amat begunaka pengelantang ba ati. Ketegal ayat nya, iya deka nemu mayuh agi pasal Bup Kudus. Ngena Jaku Petara ba pengawa nginjil endang ulih ngubah orang!—SKR. 19:20.

11. Nama tanggung pengawa ke dikemisi bala menyadi Kristian lelaki ke ngajar ba atas panggau?

¹¹ Kitai rindu ngulu gempuru, gempuru besai, sereta konvensyen kitai. Batang kebuah kitai datai laban deka nyembah Jehovah. Kitai mega bulih penguntung ari utai ti dipelajarka kitai. Ketegal tu, bala menyadi Kristian lelaki ke ngajar ba atas panggau bisi peluang ti besai sereta tanggung pengawa ti berat. (Jas. 3:1) Sida patut nentuka utai ti diajar sida endang bepelasarka Jaku Petara. Enti nuan bisi peluang ke baka tu, baka ni nuan ulih ngena kuasa ari Bup Kudus negu ati bala ke datai?

12. Baka ni pencheramah ulih nentuka cheramah iya endang bepelasarka Bup Kudus?

¹² Tentuka Bup Kudus nya utai ti dikemeratka ba tiap iti cheramah. (Jhn. 7:16) Nya alai bejimat meh, anang ngasuh chara nuan ngenataika cheramah, peneleba, tauka sempama ke dikena nuan, nyulut agi ari Bup Kudus. Kingatka mega, macha ari Bup Kudus enda sebaka enggau ngajar ari Bup Kudus. Enti nuan macha  kelalu mayuh ayat, orang enda ulih ingatka ayat nya. Nya alai, bejimat meh milih ayat Bup Kudus ke deka dikena nuan. Udah nya beri awak endur macha, nerang, ngambar, sereta madahka chara ngena ayat nya enggau manah. (Neh. 8:8) Enti siti-siti cheramah bepelasarka langkar cheramah, tentuka nuan mansik langkar nya sereta ayat Bup Kudus ke dikena. Uji meretika baka ni langkar cheramah enggau ayat Bup Kudus bekaul enggau pangan diri. Udah nya, ngena sekeda ayat Bup Kudus nya ngajar batang pekara ke bisi ba langkar cheramah. (Nuan ulih nemu chara ke manah ba Pelajar 21 ngagai 23 ari bup Memperoleh Manfaat dari Pendidikan Sekolah Pelayanan Teokratis.-IN) Lalu keberat agi, minta Jehovah nulung nuan bekunsi penemu Iya ti berega ari Bup Kudus.—Bacha Esra 7:10 a; Jaku Dalam 3:13, 14.

13. (a) Nama nyadi ngagai seiku menyadi Kristian indu lebuh iya ninga siti ayat ba siti gempuru? (b) Baka ni chara Bup Kudus dikena ba gempuru kitai udah ngasuh nuan berunding?

¹³ Lebuh agi mit, seiku menyadi Kristian indu di Australia napi mayuh utai ti enda manah. Lalu taja pan iya udah nya nyau ngelala Jehovah, iya agi enda entu ulih pechaya Jehovah rinduka iya. Ba siti gempuru, menyadi Kristian indu nya ninga siti ayat ke balat ngasuh iya berunding. Iya belematika ayat nya lalu ngiga  pansik ke ngujungka iya macha ayat bukai ba Bup Kudus. Iya nyau pechaya Jehovah rinduka iya. b (Peda nota kaki.) Kala nuan ninga siti-siti ayat ba gempuru, gempuru besai, tauka konvensyen ke ngasuh nuan berunding?—Neh. 8:12.

14. Baka ni kitai ulih mandangka diri beterima kasih sereta rinduka Jaku Jehovah?

¹⁴ Endaka kitai beterima kasih ngagai Jehovah ke udah meri kitai Jaku Iya, Bup Kudus? Iya udah besemaya, Bup Kudus deka tan, lalu Iya ngamatka semaya nya. (1 Pet. 1:24, 25) Nya alai kitai deka nentuka diri seruran macha Bup Kudus, ngena iya ba pengidup kitai, sereta ngena iya nulung orang bukai. Lebuh kitai ngereja tu, kitai mandangka diri amat rindu sereta beterima kasihka reta tu, lalu keberat agi, beterima kasih ngagai Pengarang iya, Petara Jehovah.