1, 2. (a) Nama penyadi enti enda ulih nagang diri? (b) Nama kebuah kitai patut berandau pasal ulah ti ulih nagang diri?

 ULIH NAGANG DIRI nya ulah ti ulih dikemansangka kitai enggau bantu ari Petara Jehovah. (Gal. 5:22, 23) Jehovah ulih nagang diri enggau sempurna. Tang kitai enda ulih laban kitai enda sempurna. Kebendar, enda ulih nagang diri tau ngujungka mayuh penanggul nyadi ba orang kemaya hari tu. Ulah nya ulih ngasuh orang betangguh ngereja utai ti beguna tauka enda entu mujur ba sekula tauka ba endur kereja. Enda ulih nagang diri mega ulih ngujungka jaku ti jai, mabuk, kasar, sarak, udu berutang, gian, dijil, tusut runding, penyakit ke datai ari ulah seks, sereta kandung ke ukai dikedeka.—Mas. 34:11-14.

² Orang ke enda ulih nagang diri ngenataika penusah ngagai diri empu sereta orang bukai. Lalu diatu kitai ulih meda orang majak enda ulih nagang diri. Taja pia tu enda ngasuh kitai tekenyit, laban Jaku Petara madahka ulah ti enda ulih nagang diri nunjukka kitai benung idup ba “hari ti penudi.”—2 Tim. 3:1-3.

 3. Nama kebuah kitai begunaka ulah ti ulih nagang diri?

 ³ Nama kebuah kitai begunaka ulah ti ulih nagang diri? Bisi dua iti kebuah ti berat. Kesatu, orang ke ulih nagang asai ati sereta emosi diri selalu iya kurang napi penanggul. Sida mega senang agi bulih kaul ti menyana sereta nyeliahka asai ati ti tusah, ringat, tauka irau. Kedua, ngambika meruan nyadi pangan Petara, kitai patut ngelaban penguji sereta nagang pengingin ti salah. Nya meh utai ke enda ulih digaga Adam seduai Hawa. (P-kal. 3:6) Baka seduai iya, mayuh orang kemaya hari tu bisi penanggul ti besai laban sida enda ulih nagang diri.

 4. Nama ulih meransang orang ke tusah deka nagang pengingin diri ti salah?

⁴ Jehovah nemu, kitai enda sempurna lalu tusah deka nagang diri. Tang Iya deka nulung kitai bekuasa atas pengingin diri ti salah. (1 Raj. 8:46-50) Laban Iya Pangan ti ngembuan pengerindu, Iya enggau siru meransang orang ti kekadang ngasaika diri tusah deka nagang asai ati sereta pengingin diri. Dalam artikel tu, kitai deka belajar pasal ulah ti ulih nagang diri ari chunto Jehovah. Kitai mega deka berandau pasal sekeda chunto ke manah enggau ke jai ari Bup Kudus, sereta beratika sekeda chara ke ulih nulung kitai.

5, 6. Nama chunto pasal ulah ti ulih nagang diri ke ditetapka Jehovah ngagai kitai?

⁵ Ulah ti ulih nagang diri ke dikembuan Jehovah endang sempurna laban Iya sempurna dalam semua utai ke dikereja Iya. (U-dat. 32:4) Tang kitai enda sempurna. Taja pia, kitai patut mansik chunto Iya ke bekaul enggau ulah ti ulih nagang diri ngambika kitai ulih neladan Iya enggau manah agi. Tu deka nulung kitai nemu utai ke patut digaga lebuh napi utai ke ulih ngasuh kitai tusah ati. Nama sekeda chunto ke nunjukka Jehovah ulih nagang diri?

⁶ Pikirka nama digaga Jehovah lebuh Sitan ngelaban Iya di Kebun Eden. Endang amat, jaku tuduh Sitan ngasuh semua nembiak Petara ke taluk di serega berasai tekenyit, pedis ati, sereta begedi. Nuan engka ngasaika utai ti sama lebuh nuan berundingka semua pemerinsa ke datai ari Sitan. Tang Jehovah enda ngereja utai enggau enda berunding. Iya mutarka nya enggau chara ti patut. Jehovah lubah ringat sereta lurus lebuh mutarka pengawa Sitan ke ngelaban. (P-sut. 34:6; Jop 2:2-6) Nama kebuah? Jehovah udah meri awak laban Iya enggai orang dipunaska tang deka semua orang “nesal ati.”—2 Pet. 3:9.

 7. Nama ulih dipelajarka kitai ari chunto Jehovah?

⁷ Ari chunto Jehovah, kitai belajar, kitai patut berunding enggau bejimat sebedau mansutka jaku sereta enda ngereja utai enggau beguai-guai. Nya alai lebuh nuan patut ngaga pemutus ti berat,  beri awak ngagai diri empu berunding. Besampi minta penemu-dalam ngambika ulih nyebut tauka ngereja utai ti patut. (Mas. 141:3) Lebuh kitai ringat tauka pedis ati, kitai jampat deka ngelaban. Lalu nya meh kebuah mayuh orang nyau nesalka utai ti udah disebut tauka dikereja sida enggau enda berunding!—J-lam. 14:29; 15:28; 19:2.

 8. (a) Dini kitai ulih tetemuka chunto manah pasal ulah ti ulih nagang diri? (b) Nama nulung Josep ngelaban penguji lebuh bini Potipar nguji ngumbuk iya? (Peda gambar ba pun artikel.)

⁸ Nama sekeda chunto ari Bup Kudus ke ngemeratka ulah ti ulih nagang diri? Siti chunto ke ulih diperundingka nuan iya nya anak Jakop, Josep. Iya ngelaban penguji lebuh iya gawa ba rumah Potipar ke nyadi kepala bala soldadu ke nyaga istana raja. Bini Potipar ngasaika Josep nya ngerinduka ati laban Josep “tegap sereta sigat gamal,” lalu bini Potipar ngumbuk Josep beberapa kali. Nama nulung Josep ngelaban penguji nya? Iya engka udah berunding dulu pasal utai ti deka nyadi enti iya alah diumbuk bini Potipar. Nya alai, lebuh bini Potipar narit baju Josep, Josep ngerarika diri ari iya. Ku Josep madahka: ‘Baka ni ku aku tau ngereja utai ti kamah tu, lalu bedosa ngelaban Petara?’—P-kal. 39:6, 9; bacha Jaku Dalam 1:10.

 9. Baka ni nuan ulih nyikap diri empu ngambika ulih ngelaban penguji?

⁹ Nama dipelajarka kitai ari chunto Josep? Enti kitai diuji ngambika enda nitihka siti ari adat Petara, kitai patut ngelaban penguji nya. Sebedau nyadi Saksi-Saksi Jehovah, sekeda orang tusah nagang diri makai, udu ngirup ai bisa, nginsap, salah nguna dadah, ulah seks ti kamah, tauka penusah ti bukai. Indah pengudah dibaptisa, sida engka kekadang bisi ati deka ngereja utai nya. Enti tu nyadi ba nuan, perundingka baka ni kaul nuan enggau Jehovah deka rusak enti nuan alah laban penguji nya. Nuan ulih nguji mansik utai ke tau ngelemika nuan sereta mikirka baka ni nuan ulih nyeliahka utai nya. (Mas. 26:4, 5; J-lam. 22:3) Enti nuan napi penguji ke baka nya, minta Jehovah meri nuan penemu-dalam sereta ulah ti ulih nagang diri kena ngelaban penguji nya.

10, 11. (a) Nama nyadi ba mayuh orang ke nembiak di sekula? (b) Nama ulih nulung bala menyadi Kristian ke biak ngelaban penguji ngambika enda ngelanggar adat Petara?

¹⁰ Utai ke nyadi ba Josep mega nyadi ba mayuh orang Kristian ke biak kemaya hari tu. Siti chunto nya Kimberly. Orang ke sekelas enggau iya suah bejaku begah pasal pengawa beleman ke dikereja sida maya ujung minggu. Kimberly nadai cherita baka nya ke deka ditusui. Iya ngaku, ketegal iya bebida ari sida, iya kekadang berasai “enda dikeibuh sereta puang” lalu orang ke sekelas ngumbai iya beli laban nadai bedating. Tang kebendar, Kimberly nunjukka diri pintar. Iya nemu, pengingin deka beleman tusah deka ditagang lebuh kitai agi biak. (2 Tim. 2:22) Bala nembiak  ke bukai suah nanya sekalika iya agi dara bungas. Tu meri iya peluang nerangka kebuah iya enggai beleman. Kitai temegah ati ke bala menyadi Kristian biak ke bebendar ngelaban pengingin deka ngereja ulah seks ti kamah, lalu Jehovah mega temegah ati ke sida!

¹¹ Bup Kudus mega meri kitai sekeda chunto pasal orang ke enda ngelaban penguji deka ngereja ulah seks ti kamah. Lalu Bup Kudus madah pasal penusah ke nyadi enti kitai enda ulih nagang diri. Enti nuan napi penanggul ti sama baka enggi Kimberly, perundingka pasal seiku lelaki biak ke beli ti disebut ba Jaku Dalam bab 7. Perundingka mega pasal Amnon sereta penusah ke nyadi ketegal ulah iya. (2 Sam. 13:1, 2, 10-15, 28-32) Apai indai ulih nulung bala anak sida ngemansangka penemu-dalam sereta ulah ti ulih nagang diri lebuh berandauka sekeda chunto nya maya belajarka Bup Kudus ba diri sebilik.

12. (a) Baka ni Josep nagang asai ati diri lebuh begulai enggau bala menyadi iya? (b) Ba pekara baka ni kitai patut nagang asai ati diri?

¹² Josep sekali agi netapka chunto ti manah pasal ulah ti ulih nagang diri. Tu ulih dipeda lebuh bala menyadi iya datai ngagai menua Ejip meli pemakai. Kena nemu utai ke amat dirunding sida, Josep enda madahka diri menyadi sida. Lalu lebuh ati iya balat lelengauka sida, iya ninggalka sida ngambika ulih nyabak kediri. (P-kal. 43:30, 31; 45:1) Enti menyadi Kristian lelaki tauka indu ngereja siti-siti utai ke ngasuh nuan pedis ati, neladan ulah Josep ke ulih nagang diri deka nulung nuan nyeliah ari nyebut tauka ngereja siti-siti utai ke tau ngasuh nuan nesal dudi hari. (J-lam. 16:32; 17:27) Tauka nuan engka bisi kaban belayan ke udah dibuai ari gerempung. Enti bisi, nuan patut nagang asai ati diri ngambika ulih nyeliah ari betemu enggau sida enti nadai kebuah ti berat. Tu enda senang dikereja. Tang nya ulih diputarka enti nuan ngingatka diri neladan chunto Jehovah sereta ngereja utai ti diasuh Iya.

13. Nama ulih dipelajarka kitai ari utai ke nyadi ba pengidup Raja David?

¹³ Kitai mega bulih penguntung ari chunto Raja David. Lebuh Saul seduai Simei nyungkak David ringat, David enda ringat tauka ngena kuasa iya ngelaban seduai iya. (1 Sam. 26:9-11; 2 Sam. 16:5-10) Tang, David enda seruran ulih nagang diri. Kitai nemu tu ari macha pasal dosa iya enggau Batseba sereta utai ti digaga iya kena mutarka pengamu Nabal. (1 Sam. 25:10-13; 2 Sam. 11:2-4) Kitai ulih belajarka utai ti berega ari David. Kesatu, bala tuai ti ngemataka nembiak Petara kelebih agi patut nemu nagang diri ngambika enda salah nguna kuasa sida. Kedua, nadai seiku orang patut kelalu andalka diri empu, ngumbai diri kebal ari penguji.—1 Kor. 10:12.

14. Nama peneleba ke dikembuan seiku menyadi Kristian lelaki, lalu nama kebuah utai ke digaga kitai lebuh napi penusah ti sama beguna?

¹⁴ Nama ulih dikereja nuan kena ngemansangka  ulah ti ulih nagang diri? Peratika utai ke nyadi ba Luigi. Sebuah kerita ngelantak belakang kerita Luigi. Taja pan deriba kerita nya ke ngasuh penusah nya nyadi, tang deriba nya ke merak Luigi lalu deka ngelaya iya. Luigi besampi ngagai Jehovah ngambika enda pedis ati sereta nguji ngenyelapka ati deriba nya. Tang deriba nya majak merak iya. Nya alai Luigi nuliska lumur plat kerita lelaki nya lalu mupuk, taja pan lelaki nya majak merak iya. Seminggu udah nya, Luigi datai ngabas seiku indu. Laki indu nya orang ke ngelantak kerita iya! Lelaki nya malu lalu minta ampun ke ulah diri ti jai. Iya deka ngiga kompeni ke ngurus insuran kerita Luigi ngambika Luigi ulih ngaduka kerita iya enggau lengkas. Lelaki nya sama enggau berandauka Bup Kudus, lalu iya rindu enggau randau nya. Ketegal tu, Luigi beratika manah amat iya enda ngelaban pengudah utai ke nyadi nya, lalu enti sema iya pedis ati tentu tu ngujungka penanggul ti besai.—Bacha 2 Korint 6:3, 4.

15, 16. Baka ni belajarka Bup Kudus ulih nulung nuan enggau diri sebilik ngemansangka ulah ti ulih nagang diri?

¹⁵ Belajarka Bup Kudus enggau tetap sereta bisi tuju ulih nulung orang Kristian ngemansangka ulah ti ulih nagang diri.  Kingatka utai ti dipadah Petara ngagai Josua: “Anang ngetu macha Bup Adat tu enggau nyawa ti enda inggar; belematika iya siang malam, ngambika nuan ngereja semua utai ti ditulis dalam Bup tu. Nya baru nuan deka mujur lalu nuan deka ngereja utai enggau pintar.” (Jos. 1:8, NW) Tang baka ni belajarka Bup Kudus ulih nulung nuan ngemansangka ulah ti ulih nagang diri?

¹⁶ Kitai udah belajar, Bup Kudus bisi sekeda chunto ke nunjukka asil ti manah enti kitai ulih nagang diri sereta penusah ke nyadi enti kitai enda ulih nagang diri. Jehovah bisi kebuah ngasuh chunto tu ditulis. (Rom. 15:4) Endang manah enti kitai macha, belajar, sereta belematika chunto nya. Uji meretika baka ni chunto nya bekaul enggau nuan sereta diri sebilik. Minta Jehovah nulung nuan nitihka jaku lalau ari Bup Kudus. Enti nuan ngasaika diri enda ulih nagang diri ba sekeda pekara, anang nejuka iya. Besampi pasal utai nya, lalu bebendar beratika baka ni nuan ulih ngemansangka diri. (Jas. 1:5) Gaga pansik dalam litaricha kitai kena nemu jaku ajar ti ulih nulung nuan.

17. Baka ni apai indai ulih nulung anak sida ngemansangka ulah ti ulih nagang diri?

¹⁷ Baka ni nuan ulih nulung anak nuan ngemansangka ulah ti ulih nagang diri? Apai indai nemu, kualiti tu ukai datai kediri empu. Nya alai sida patut ngajar anak sida sekeda kualiti ti manah ngena chunto sida empu. (Eps. 6:4) Enti nuan beratika anak nuan enda ulih nagang diri, tanya diri empu sekalika nuan netapka chunto ti manah. Nuan ulih netapka chunto ti manah enggau seruran nginjil, datai begempuru, sereta ngiring pengawa belajarka Bup Kudus ba diri sebilik. Lalu anang takut nyebut enda tau ngagai anak nuan lebuh nuan ngasaika nya patut! Jehovah netapka tatak ngagai Adam seduai Hawa. Tatak nya ulih nulung seduai iya belajar masa kuasa Jehovah. Pia mega, lebuh apai indai disiplin anak sida sereta netapka chunto ti manah ke sida, nya ulih ngajar anak nemu nagang diri. Sekeda utai ti pemadu berega ke ulih dikemansangka nuan ba anak nuan iya nya bebasaka kuasa Jehovah sereta standard Iya.—Bacha Jaku Dalam 1:5, 7, 8.

18. Nama kebuah kitai patut milih bala pangan enggau pintar?

¹⁸ Sekalika kitai apai indai tauka ukai, semua kitai patut pintar milih bala pangan. Enti bala pangan nuan rinduka Jehovah, sida deka meransang nuan netapka juluk ati ti bisi reti sereta nyeliahka penusah. (J-lam. 13:20) Chunto sida ti manah deka meransang nuan neladan ulah sida ti ulih nagang diri. Lalu pendiau nuan ti manah tentu deka meransang sida. Ulah ti ulih nagang diri ke diulih kitai deka nulung kitai diterima Petara, lantang ati enggau pengidup kitai sereta bekunsi utai ti manah enggau orang ti dikerinduka kitai.