1. Nama utai ke ngasuh kitai gaga ati?

 KITAI gaga ati lebuh ninga pasal nembiak Petara ngawakka penampak sida manchar! Taun nyin kemari, bisi lebih ari 10 juta iku orang belajarka Bup Kudus enggau nembiak Jehovah. Pia mega, bejuta-juta iku orang ke datai ngagai pengawa Ngingatka Pemati Jesus lalu belajar pasal tebus ke diberi Jehovah.—1 Jhn. 4:9.

2, 3. (a) Nama utai ke enda ulih nekul kitai “manchar baka bintang”? (b) Nama deka dikerandauka kitai ba artikel tu?

² Di serata dunya, Saksi-Saksi Jehovah bejaku ngena bemacham-macham bansa jaku. Tang tu enda nekul kitai beserakup muji Apai kitai, Jehovah. (Pem. 7:9) Enda ngira nama jaku ke dikena tauka dini alai kitai diau, kitai ulih manchar “baka bintang di dunya tu.”—Plp. 2:15.

³ Pengawa nginjil, penyerakup Kristian kitai, enggau ulah kitai ke terus bejaga ngenataika mulia ngagai Jehovah. Baka ni kitai ulih ngawakka penampak kitai manchar ba tiga iti pekara tu?—Bacha Matthew 5:14-16.

4, 5. (a) Kelimpah ari nginjil, baka ni kitai ulih ngawakka penampak kitai manchar? (b) Nama asil manah ke diulih ketegal manah enggau orang? (Peda gambar ba pun artikel.)

⁴ Pengawa nginjil enggau ngaga orang nyadi murid nya chara kitai ulih ngawakka penampak kitai manchar. (Mat. 28:19, 20) Ba taun 1925, artikel “Light in the Darkness” madahka ba hari ti penudi, orang enda ulih dikumbai tetap ati ngagai Tuan enti iya enda ngena “peluang ngawakka penampak iya manchar.” Artikel nya mega madahka: “Iya patut ngereja tu enggau madahka berita manah ngagai orang ba dunya, lalu idup sejalai enggau penampak.” (The Watch Tower, 1 Jun 1925) Kelimpah ari nginjil, ulah kitai mega ulih ngenataika mulia ngagai Jehovah. Mayuh orang beratika kitai lebuh kitai nginjil. Nya alai, lebuh kitai tuchum lalu meri jaku tabi enggau manah, tu nulung orang bisi runding ti manah pasal kitai sereta Petara ti disembah kitai.

⁵ Jesus madah ngagai bala murid iya: “Lebuh kita tama ngagai rumah orang, beri jaku tabi ngagai rumah nya.” (Mat. 10:12) Ba kandang endur Jesus nginjil, endang adat orang ngelaluka orang ti enda dikelala tama ngagai rumah sida. Ba mayuh endur kemayaharitu, utai ke baka tu nadai agi. Orang takut tauka enda nyamai ati lebuh orang ke enda dikelala bisi ba mua pintu sida. Tang enti kitai meri jaku tabi sereta manah enggau orang, sida enda nangika kitai. Lebuh nuan nginjil ngena troli litaricha ba endur orang mayuh, bisi nuan beratika, enti sema nuan tuchum sereta meri jaku tabi enggau manah, orang deka agi datai lalu ngambi litaricha? Sida indah deka berandau!

 6. Nama nulung sepasang laki bini ke udah tuai mengkang aktif ba pengawa nginjil?

⁶ Sepasang laki bini ke udah tuai di England enda ulih agi bejarit nginjil ari rumah ke rumah baka ke udah laban seduai iya enda tentu bepengerai. Nya alai seduai iya ngengkahka mija enggau litaricha ba luar rumah seduai iya. Laban diau semak sekula, nya alai seduai iya mandangka litaricha ke ulih narit ati bala apai indai ke datai ngambi anak pulai sekula. Sekeda bala apai indai bisi ngambi litaricha tu, nyengkaum bup Pertanyaan Kaum Muda—Jawaban Yang Praktis, Jilid 1 enggau Jilid 2, dalam jaku Indonesia. Seiku menyadi indu ke nyadi pengerintis suah enggau seduai iya. Bala apai indai beratika iya manah enggau orang lalu seduai laki bini nya amat deka nulung orang. Seiku ari apai indai nya udah berengkah belajarka Bup Kudus.

 7. Baka ni nuan ulih nulung bala pelari ba menua nuan?

⁷ Apin lama ti udah, mayuh orang udah ninggalka menua diri lalu diau ba menua bukai nyadi pelari. Nama ulih digaga nuan kena nulung bala pelari ba menua nuan belajar pasal Jehovah? Kesatu, nuan ulih belajarka chara meri jaku tabi ngena jaku sida. Kelimpah ari nya, ngena aplikasi JW Language, nuan  ulih belajarka sekeda rambai jaku ke ulih meransang sida berandau enggau nuan. Udah nya, nuan ulih mandangka video sereta litaricha ke bisi dalam jaku sida ba jw.org.—U-dat. 10:19.

8, 9. (a) Baka ni gempuru tengan minggu nulung kitai? (b) Baka ni apai indai ulih nulung bala anak sida ngemanahka saut ba gempuru?

⁸ Jehovah meri utai ti amat diguna kitai ngambika landik nginjil. Ambika chunto, utai ti dipelajar ba Gempuru Pengidup enggau Pengawa nulung kitai andal agi deka ngereja pengawa datai ngabas sereta ngepunka pengawa belajarka Bup Kudus.

⁹ Lebuh orang datai ngagai gempuru kitai, sida suah alit ati enggau saut ke diberi bala anak kitai. Nuan ulih ngajar bala anak meri saut ngena leka jaku sida empu. Sekeda orang deka nerima pemendar pengudah ninga bala anak kitai meri saut enggau chara ti mudah sereta ari ati.—1 Kor. 14:25.

10. Baka ni pengawa belajarka Bup Kudus ba diri sebilik ulih nulung ruang bilik beserakup?

¹⁰ Lebuh kitai bebendar ngelatih diri sebilik bekerejasama ngambika beserakup sereta bisi pengelantang, kitai ngenataika mulia ngagai Jehovah. Ambika chunto, enti nuan nya apai tauka indai, enggau tetap meh ngatur pengawa Belajarka Bup Kudus ba Diri Sebilik. Mayuh diri sebilik sama meda program Berita JW tiap bulan. Udah nya sida berandauka chara deka ngena utai ti udah dipelajarka sida. Kingatka, iring ke diguna anak ke  agi mit bebida ari iring ke diguna anak ke udah beumur bebelas taun. Enggau naka ulih meh nulung diri sebilik bulih penguntung ari pengawa belajarka Bup Kudus.—Mas. 148:12, 13.

11-13. Baka ni kitai ulih nulung bala menyadi Kristian kitai majak beserakup?

¹¹ Taja pan nuan agi biak, nuan ulih nulung tiap iku orang ngasaika diri beguna ba eklisia. Siti chara nya bebakih enggau bala menyadi Kristian ke tuai umur. Nuan mega ulih nanya sida pasal utai ke udah nulung sida mengkang nyembah Jehovah ngelama tu. Sida ulih ngajar nuan utai ti berega. Utai ke baka tu ulih meransang sida enggau nuan mega! Lalu semua kitai, enda ngira tuai tauka biak, ulih ngasuh bala ke datai ngagai Palan Gempuru kitai berasai diterima. Nuan ulih meri jaku tabi, tuchum, ngiga penuduk ke sida, sereta nulung sida bekelala enggau bala bukai. Awakka sida berasai nyamai.

¹² Enti sema nuan ngiring gempuru ba pengawa nginjil, nuan ulih nulung sida ke tuai terus mancharka penampak sida enggau terang. Tentuka sida bisi endur nginjil ti engkeman. Asuh sida ke biak agi gawa enggau sida. Bala menyadi ke tuai enggau sida ke bisi penanggul ba pengerai suah berasai lemi laban enda ulih bejarit nginjil baka ke udah. Tang sida berasai lantang ati lebuh nemu nuan ibuhka sida lalu meretika utai ti ditapi sida. Enda ngira ni penuai sida tauka pengelama sida dalam pemendar, ulah nuan ke manah enggau sida ulih meransang sida terus nginjil enggau ransing.—Lew. 19:32.

¹³ Orang Israel rindu begulai nyembah Jehovah. Pemasmur nulis: ‘Naka meh pemanah, naka meh penyamai lebuh nembiak Petara diau seati enggau pangan diri!’ (Bacha Masmur 133:1, 2.) Iya mandingka penyerakup tu baka minyak tata ti manah ke kulit sereta bebau rengut. Pia mega, kitai ulih ngenyamaika ati bala menyadi Kristian enti kitai manah sereta siru. Tu ngasuh bala menyadi Kristian kitai majak beserakup. Ulih nuan nunjukka diri deka begulai enggau sida?—2 Kor. 6:11-13.

14. Baka ni nuan ulih ngawakka penampak nuan manchar ba kandang endur alai nuan diau?

¹⁴ Nuan ulih mancharka penampak enda ngira dini alai nuan. Ulah nuan ti manah enggau orang ulih ngasuh sida ke berimbai pendiau enggau nuan deka belajar mayuh agi pasal Jehovah. Tanya diri empu: ‘Nama runding sida pasal aku? Kati rumah aku beresi sereta kemas? Kati nya ngasuh kandang endur alai aku diau manah dipeda? Kati aku rindu deka nulung orang?’ Tanya bala Saksi ke bukai baka ni teladan sereta ulah sida ti manah ngasuh kaban belayan, orang ke berimbai pendiau, bala ke sama enggau bekereja, tauka bala ke sama sekula bisi runding ti manah pasal sida.—Eps. 5:9.

15. Nama kebuah kitai patut terus bejaga?

¹⁵ Enti kitai dekaka penampak kitai terus  manchar enggau terang, kitai patut bejaga enggau timpuh kitai idup diatu. Jesus beberapa kali madah ngagai bala murid iya: “Bejaga kita.” (Mat. 24:42; 25:13; 26:41) Enti kitai ngumbai “penusah ti besai” agi jauh, tu tau ngujungka kitai enda beberatka pengawa nulung orang belajar pasal Jehovah. (Mat. 24:21) Penampak kitai deka belubah-lubah piam lalu padam, ukai manchar enggau terang.

16, 17. Nama ulih digaga kitai ngambika terus bejaga?

¹⁶ Ari diatu, kitai patut terus bejaga lebih agi ari ke udah. Gaya utai ba dunya majak jai. Tang kitai nemu pengujung deka datai ba jam ti udah diletak Jehovah. (Mat. 24:42-44) Sebedau jam nya datai, kitai patut sabar sereta beberatka utai ti udah disemaya Petara ke kitai jemah ila. Bacha meh Bup Kudus ninting hari, lalu anang ngetu besampi ngagai Jehovah. (1 Pet. 4:7) Belajar ari bala menyadi ke udah lama nyembah Jehovah. Ambika chunto, nuan ulih macha pasal peneleba ba pengidup, baka artikel “Berpegang pada Jubah Seorang Yahudi Selama Tujuh Puluh Tahun,” ke dikeluarka ba  Menara Pengawal kena 15 April 2012, lambar 18-21 dalam jaku Melayu.

¹⁷ Mengkang kisuk gawa ke Jehovah. Kereja utai ti manah ke orang bukai, lalu giga awak begulai enggau bala menyadi Kristian. Nya tentu deka nulung nuan berasai gaga, lalu ngasaika jam jampat amat. (Eps. 5:16, nota kaki.) Nembiak Jehovah nyapai mayuh pemujur dalam kandang seratus taun ti udah. Lalu kemayaharitu, kitai balat agi kisuk ari ke udah. Kereja Jehovah majak nambah. Penampak kitai manchar enggau terang!

18, 19. Baka ni bala tuai gempuru ulih nulung kitai nyembah Jehovah enggau ransing? Padahka siti chunto.

¹⁸ Taja pan kitai ngaga mayuh penyalah, Jehovah agi ngemendarka kitai nyembah Iya. Jehovah meri “pemeri,” iya nya bala tuai gempuru kena nulung kitai. (Bacha Epesus 4:8, 11, 12.) Nya alai lebuh sida datai meransang nuan, kena meh peluang nya ngambika nuan ulih belajar ari penemu sereta jaku ajar sida.

¹⁹ Ambika chunto, sepasang laki bini ari England bisi penanggul ba ruang bilik, lalu seduai iya minta bantu ari dua iku tuai gempuru. Bini ngasaika laki iya enda ngulu ba pengawa nyembah Jehovah. Laki ngasaika diri ukai pengajar ti manah lalu madahka diri enda ngatur pengawa belajarka Bup Kudus ba diri sebilik enggau tetap. Dua iku tuai gempuru nya nulung laki bini nya beratika teladan Jesus. Seduai iya meransang laki nya neladan chara Jesus ngintu bala murid iya. Seduai iya meransang bini nya liat ati enggau laki iya. Seduai iya mega madahka chara laki bini nya ulih belajarka Bup Kudus enggau dua iku anak sida. (Eps. 5:21-29) Laki nya bebendar nyadi tuai bilik ke menyana. Tuai gempuru nya enda ngasuh iya ngalahka diri, tang terus bepanggai ba roh kudus Jehovah. Pengerindu enggau penyiru ti diayanka tuai gempuru nya udah nulung ruang bilik nya!

20. Nama asil iya enti ngawakka penampak nuan manchar?

²⁰ ‘Beberekat meh orang ke nangika Jehovah, ke ngasika adat Iya.’ (Mas. 128:1) Nuan ulih gaga enti ngawakka penampak nuan manchar. Nya alai ajar orang pasal Petara, enggau naka ulih nulung diri sebilik sereta bala menyadi Kristian beserakup, lalu terus bejaga. Orang ulih beratika teladan manah nuan lalu mega deka ngemuliaka Apai kitai, Jehovah.—Mat. 5:16.