Apai Rehoboam, Solomon, nyadi raja menua Israel sepengelama 40 taun. (1 Raja 11:42) Pengudah apai iya mati, Rehoboam mansang ngagai Sekem ari Jerusalem ngambika ulih nyadi raja. (2 Bansa Israel 10:1) Kati iya takut deka nyadi raja nganti apai iya? Solomon tebilang ketegal bepenemu-dalam. Enda lama udah nya, Rehoboam patut nunjukka diri pintar mutarka penanggul.

Pengidup orang Israel tusah lalu sida nganjung pengari kena madahka utai ti dipinta sida ngagai Rehoboam: “Apai nuan udah balat amat ngasuh kami gawa. Enti nuan ngasuh pengawa kami lempung agi, nya baru kami deka taluk ngagai nuan.”—2 Bansa Israel 10:3, 4.

Rehoboam tusah deka ngaga pemutus. Enti iya nitihka utai ti dipinta rayat, iya enggau diri sebilik sereta orang ke diau ba istana engka enda ulih agi ngembuan pengaya baka ke udah dikemisi sida. Tang, enti iya nulak utai ke dipinta rayat, sida engka angkat ngelaban iya. Nama digaga Rehoboam? Keterubah iya bejaku enggau bala orang ke tuai ti udah nulung apai iya. Sida ngasuh iya mendingka rayat. Tang udah nya Rehoboam bejaku enggau bala orang ke serambau enggau iya lalu mutus deka jai agi enggau rayat iya. Ku iya madah ngagai sida: “Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!”—2 Bansa Israel 10:6-14.

Nama ulih dipelajarka kitai? Diatu, kitai bisi mayuh orang ke tuai ti udah bepuluh taun nyembah Jehovah, lalu sida ulih nulung kitai ngaga pemutus ti manah. Kitai tentu deka ningaka jaku lalau ari sida.—Jop 12:12.

Rehoboam ngempuruka bala soldadu iya nyerang raban bansa ti ngelaban nya. Taja pia, Jehovah nganjung nabi Semaiah ngagai sida. Ku nabi Semaiah madahka: “Anang nyerang kaban belayan  kita orang Israel. Pulai semua kita. Utai nya nyadi ari asuh Aku.”—1 Raja 12:21-24. a—Peda nota kaki.

Kati senang Rehoboam deka ngasika pesan Jehovah nya? Nama runding rayat pasal raja sida ti baru nya? Rehoboam udah madahka diri deka ngukum sida “ngena penyipat ti bedurika besi,” tang diatu iya enda ulih ngereja sebarang utai kena mutarka pengawa orang ke angkat ngelaban iya! (Banding 2 Bansa Israel 13:7.) Taja pia, enda ngira nama runding rayat iya, Rehoboam enggau bala soldadu iya ‘ngasika pesan Jehovah, lalu pulai,’ baka ke diasuh Jehovah.

Nama ulih dipelajarka kitai? Taja pan kitai dikeleseka orang, kitai seruran deka ngasika Petara. Petara seruran deka merekatka kitai enti kitai ngasi.—Ulang Adat 28:2.

Kati Rehoboam diberekat ketegal ngasika Petara? Rehoboam agi merintah raban bansa Judah enggau Benjamin, lalu iya mutus deka nirika nengeri ti baru ba kandang endur ke dipegai iya. Iya mega negapka agi sekeda nengeri. (2 Bansa Israel 11:5-12) Tang keberat agi, iya bisi ngasika adat Jehovah taja pan enda lama. Ketegal perintah sepuluh bengkah raban bansa Israel belabuh nyembah engkeramba, mayuh ari sida mansang ngagai Jerusalem ngambika ulih nyukung Rehoboam sereta sembah ti bendar. (2 Bansa Israel 11:16, 17) Nya alai ketegal Rehoboam ngasika Jehovah, perintah iya nyadi tegap agi.

Lebuh perintah Rehoboam nyadi kering, iya ngereja utai ti salah. Iya badu ngasika adat Jehovah lalu berengkah nyembah petara pelesu! Nama kebuah? Kati indai iya ke bansa Amon bisi kaul enggau pemutus ke digaga iya? (1 Raja 14:21) Kitai enda tentu nemu. Tang bansa nya nitihka ulah Rehoboam ti enda manah. Nya alai Jehovah ngemendarka Raja Sisak ari menua Ejip ngalahka mayuh nengeri ba perintah menua Judah. Utai tu nyadi taja pan Rehoboam udah negapka sekeda nengeri!—1 Raja 14:22-24; 2 Bansa Israel 12:1-4.

Penusah tu majak balat lebuh Sisak enggau bala soldadu iya datai nyerang menua Jerusalem, palan alai Rehoboam merintah. Maya nya, nabi Semaiah ngenataika pesan Petara ngagai Rehoboam enggau bala tuai: “Kita udah ninggalka Aku, nya alai diatu Aku ninggalka kita. Awakka Sisak ngalahka kita.” Kati Rehoboam nerima disiplin tu? Au! Bup Kudus madahka: “Raja enggau bala tuai ngaku diri udah bedosa, lalu ku sida, ‘Utai ti dikereja Jehovah endang lurus.’” Nya alai, Jehovah nyelamatka Rehoboam, lalu Jerusalem enda dirusak.—2 Bansa Israel 12:5-7, 12.

Udah bekau nya, Rehoboam agi merintah menua Judah. Sebedau iya mati, iya meri mayuh pemeri ngagai bala anak lelaki iya. Iya engka enggai sida ngelaban menyadi sida, Abijah, ke deka nganti iya nyadi raja. (2 Bansa Israel 11:21-23) Enggau ngereja tu, Rehoboam nunjukka diri pintar agi enti dibandingka enggau lebuh iya agi biak.

Taja pan Rehoboam bisi ngereja sekeda utai ti manah, ku Bup Kudus madah pasal chara iya merintah: “Rehoboam ngereja utai ti jai.” Nama kebuah? Laban ‘iya enggai nguji ngiga peneka Jehovah.’ Nya alai Jehovah enda lantang ati enggau iya.—2 Bansa Israel 12:14.

Nama ulih dipelajarka kitai ari pengidup Rehoboam? Rehoboam kadang-kadang ngasika Jehovah sereta ngereja utai ti manah ke nembiak Jehovah. Tang iya nadai kaul ti rapat enggau Jehovah, lalu nadai pengeran deka ngelantangka ati Jehovah. Nya alai, iya badu ngereja utai ti ngena lalu berengkah nyembah petara pelesu. Nuan engka berunding: ‘Lebuh Rehoboam nerima jaku rara ari Jehovah, kati nya ketegal iya amat berasai besalah ke penyalah diri lalu deka ngelantangka ati Jehovah? Tauka kati nya semina ketegal nitihka utai ti diasuh orang bukai kereja iya?’ (2 Bansa Israel 11:3, 4; 12:6) Taja pia iya agi ngereja utai ti jai. Iya enda baka aki iya, Raja David! David endang amat bisi ngereja penyalah. Tang iya nesal ati ke dosa besai ti udah digaga iya. Sepemanjai pengidup David,  iya rinduka Jehovah sereta sembah ti bendar.—1 Raja 14:8; Masmur 51:1, 17; 63:1.

Mayuh utai ti ulih dipelajarka kitai ari cherita Bup Kudus. Endang manah enti orang ulih nyediaka utai ti diguna diri sebilik sereta ngereja utai ti manah ke orang bukai. Tang ngambika ulih diterima Jehovah, kitai patut nyembah Iya ngena chara ti ngelantangka ati Iya. Kitai mega patut ngembuan kaul ti tegap enggau Iya.

Ngambika ulih nyapai juluk ati nya, kitai patut ngembuan pengerindu ti dalam ngagai Jehovah. Sama baka kitai ngidupka api enggau nyimpan mayuh kayu ba api nya, kitai majak rinduka Petara enti kitai enggau tetap macha Bup Kudus, belematika iya, sereta seruran besampi. (Masmur 1:2; Rome 12:12) Lalu pengerindu tu deka meransang kitai ngelantangka ati Jehovah ba semua utai ti dikereja kitai. Pengerindu tu mega meransang kitai nesal ati lebuh ngereja penyalah lalu minta ampun ari Jehovah. Enggau nya, kitai enda baka Rehoboam, tang deka mengkang tetap ati ngagai sembah ti bendar.—Jude 20, 21.