Lebuh napi penanggul, nuan tentu ngarapka pangan nuan nulung nuan. Ketegal tu, sekeda orang ngumbai Petara nya ukai pangan sida laban ngasaika Iya nadai ngereja nama-nama utai kena nulung sida. Kebendar, Petara ukai semina udah ngereja mayuh utai ke penguntung kitai. Tang Iya mega deka mutarka semua penusah enggau pemerinsa ke ditapi kitai kemayaharitu. Nama deka digaga Petara?

Petara muai semua penyai lebuh Iya ngerusak pun penatai penyai. Bup Kudus nerangka pun penatai penyai: “Semua dunya di baruh kuasa Sitan.” (1 John 5:19) Jesus madahka Sitan “ke merintah dunya tu.” (John 12:31) Dunya penuh enggau penusah ketegal mensia di baruh kuasa Sitan. Nama deka digaga Petara?

Enda lama agi, Petara Jehovah deka ngena Anak Iya, Jesus Kristus, “ngerusak Sitan ke megai kuasa pemati.” (Hebrew 2:14; 1 John 3:8) Indah Bup Kudus nunjukka, Sitan empu nemu “timpuh diri nyau deka abis” sebedau iya dipunaska. (Pemandang 12:12) Petara mega deka ngemunaska semua orang ke ngereja penyai.—Masmur 37:9; Jaku Dalam 2:22.

Pengudah muai semua penyai ari bumi, Penempa kitai deka ngamatka tuju asal Iya ti bekaul enggau mensia sereta bumi. Utai ke baka ni dianti kitai?

Pemaik enggau pengelikun ti meruan belama iya. “Orang ke baruh ati deka bempu menua tu lalu diau lantang.”—Masmur 37:11.

Mayuh pemakai ti manah. “Awakka gandum seruran mayuh di menua. Awakka bukit penuh laban utai ti ditanam.”—Masmur 72:16.

Rumah ti nyamai alai diau enggau kereja ti ngemuaska ati. “Orang deka ngaga rumah lalu diau dia. Rumah nya enda diuan orang bukai. Sida deka bekebun anggur lalu ngelantangka diri ngirup wain. . . . Sida deka lantang ati bekenaka utai ti udah ulih sida.”—Isaiah 65:21, 22.

Kati nuan keran deka meda semua utai tu? Enda lama agi, semua orang deka ngasaika semua utai nya ninting hari.

Kemayaharitu, semua orang ulih sakit lalu nemu mati. Tang nya nadai ngachau kitai agi jemah ila. Enda lama agi, Petara deka ngena genselan tebus Jesus ngambika ‘genap iku orang ke arapka iya [Jesus] enda mati tang bulih pengidup ti meruan belama iya.’ (John 3:16) Nama asil iya?

Penyakit deka nadai agi. “Nadai orang ke diau dalam menua kitai deka mutap madahka diri sakit, lalu semua dosa deka diampun magang.”—Isaiah 33:24.

Pemati enda agi ngachau mensia. “TUHAN [Jehovah] ti Pemadu Tinggi deka ngerusak pemati belama iya! Iya deka ngendas ai mata ari mata semua orang.”—Isaiah 25:8.

Orang deka idup belama iya. ‘Pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’—Rome 6:23.

Orang ke udah mati deka idup baru. “Semua orang ke lurus enggau ke enda lurus deka diangkatka ari mati.” (Kereja Rasul 24:15) Ketegal tebus ti diberi Petara, orang ke udah mati deka idup baru.

Baka ni Petara deka ngamatka semua nya?

Petara deka ngamatka tuju Iya bekaul enggau mensia sereta bumi ngena perintah Iya ti di serega, lalu Jesus Kristus nya Raja ti dipilih. (Masmur 110:1, 2) Nya meh perintah ti diasuh Jesus sampika bala murid iya lebuh iya nyebut: “Apai kami ti di serega: . . . Datai meh Perintah Nuan.”—Matthew 6:9, 10.

Perintah Petara deka merintah atas bumi lalu muai semua penusah enggau pemerinsa ke bisi ba bumi. Tu perintah ti pemadu badas ke mensia! Nya kebuah Jesus bebendar nusui ‘Berita Manah pasal Perintah Petara’ lebuh iya ba bumi lalu ngasuh bala murid iya ngereja utai ti sama.—Matthew 4:23; 24:14.

Ketegal balat rindu ke mensia, Petara Jehovah besemaya deka ngereja semua utai nya ke sida. Endaka tu ngasuh nuan deka ngelala sereta semak ngagai Iya? Enti nuan milih deka ngelala sereta semak ngagai Jehovah, nama penguntung ke diulih nuan? Artikel pengudah tu deka nerangka nya.