Lebuh deka bekelala enggau orang, kitai tentu nanya, “Sapa nama nuan?” Enti sema nuan nanya Petara baka nya, nama saut Iya?

‘Semina Aku aja ti TUHAN [Jehovah] Petara nuan.’ a—Isaiah 42:8.

Nama nya beguna bendar ba Petara Empu. Nadai orang meri nama nya ngagai Petara. Iya Empu ke milih nama nya. Ku Jehovah madahka: “Tu nama Aku, lalu nama tu deka meruan belama iya. Tu meh nama ti deka dikena semua turun-menurun ngangauka Aku jemah ila.” (Pemansut 3:15) Dalam Bup Kudus, nama Petara suah agi dikena enti dibanding enggau gelar baka Pemadu Bekuasa, Apai, Tuan, tauka Petara, lalu suah agi ayan ari nama orang baka Abraham, Moses, David, tauka Jesus. Pia mega, Jehovah deka nama Iya ditemu orang. Bup Kudus madahka: “Awakka sida nemu Nuan siku aja ti TUHAN [Jehovah], Raja ti Pemadu Tinggi ke serata dunya.”—Masmur 83:18.

Nama Petara beguna bendar ba Jesus. Dalam sampi Apai Kami, Jesus ngajar bala murid iya minta ngagai Petara: “Kudus meh nama Nuan.” (Matthew 6:9) Jesus empu besampi ngagai Petara: “Apai, muliaka nama Nuan!” (John 12:28) Ngemuliaka nama Petara nya utai ti dikenuluka Jesus ba pengidup, lalu tu meh kebuah iya ulih nyebut dalam sampi: ‘Aku udah madahka nama Nuan ngagai sida, lalu aku deka majak ngasuh sida nemu nama Nuan.’—John 17:26.

Nama Petara beguna bendar ba orang ke ngelala Iya. Nembiak Petara menya nemu, pengelikun enggau pengelepas sida bepanggai ba sekalika sida nemu nama Petara lalu bebasaka nama nya. “TUHAN [Jehovah] baka menara ti tegap, endur alai orang ke lurus tau datai lalu diau enggau likun.” (Jaku Dalam 18:10) “Lalu barang sapa  ngangauka nama Tuhan [Jehovah], deka diselamatka.” (Kereja Rasul 2:21) Bup Kudus nunjukka, nama Petara deka nulung orang ngelala sapa ke nyembah Iya enggau sapa ke enda. ‘Genap bengkah bansa deka nyembah sereta ngasika petara sida empu, tang kitai deka nyembah sereta ngasika TUHAN [Jehovah] Petara kitai belama lama iya.’—Mikah 4:5; Kereja Rasul 15:14.

Nama nya nerangka sapa Petara. Mayuh pakar Bup Kudus madahka, reti nama Jehovah nya “Iya ti Ngasuh Nyadi.” Petara Jehovah madahka reti nama Iya lebuh bejaku ngagai Moses: “Aku Deka Nyadi Sebarang Utai Aku Deka.” (Pemansut 3:14, nota kaki) Nya alai, nama Petara ukai semina nunjukka Iya nya Penempa semua utai. Nama Iya nunjukka, Iya ulih ngasuh Diri Empu enggau utai ti ditempa Iya nyadi sebarang utai ti dikedekaka Iya kena ngamatka tuju Iya. Taja pan gelar ulih nunjukka penuduk, hak, tauka kuasa Petara, tang nama Iya, Jehovah, ngambarka sapa Iya ke bendar sereta utai ke ulih digaga Iya.

Nama Petara nunjukka Iya ibuhka kitai. Reti nama Petara nunjukka Iya seruran ibuhka kitai sereta utai bukai ti ditempa Iya. Ketegal Petara udah ngasuh nama Iya ditemu orang, nya nunjukka Iya deka kitai ngelala Iya. Indah sebedau kitai nanya sapa nama Iya, Iya Empu udah dulu madahka nama Diri. Petara enggau terang nunjukka Iya enggai kitai ngumbai Iya jauh ari kitai. Tang Iya deka kitai ngumbai Iya Petara ti nyata lalu kitai ulih semak enggau Iya.—Masmur 73:28.

Ngena nama Petara nunjukka kitai ibuhka Iya. Uji gambarka, nuan tentu deka pangan nuan ngangau nuan ngena nama ke diberi nuan. Baka ni asai ati nuan enti iya enggai ngena nama nuan? Nyau kelama nuan engka berunding sekalika orang nya amat deka semak enggau nuan tauka enggai. Pia mega enggau Jehovah. Iya udah madahka nama Diri ngagai mensia, lalu deka kitai ngena nama Iya. Enti ngena nama Iya, kitai nunjukka diri deka semak ngagai Iya. Iya indah beratika orang ti “bebasaka” nama Iya!—Malaki 3:16.

Nemu nama Petara nya chara ti keterubah deka ngelala Iya. Tang tu enda chukup. Kitai patut mansik pasal Iya sereta nemu kualiti Iya.