Sapa Petara?
Mayuh orang madahka diri arapka Petara. Tang lebuh ditanya sapa Petara, saut ke diberi sida enda sama. Sekeda orang ngumbai Petara nya hakim ti nadai penyinu ke rindu ngukum orang ke ngereja penyalah. Sekeda da agi ngumbai Iya ngembuan pengerindu sereta deka ngampun, enda ngira nama utai ti dikereja sida. Bisi mega orang madahka Petara nya jauh sereta enda ibuhka kitai. Nya alai, mayuh orang ngasaika diri tusah deka ngelala sapa Petara.
Kati nya beguna ngelala sapa Petara? Au. Ngelala Petara enggau manah ulih nulung nuan ngembuan pengidup ke bisi tuju sereta reti. (Kereja Rasul 17:26-28) Enti nuan majak semak enggau Petara, Iya deka agi rindu sereta nulung nuan. (James 4:8) Lalu, ngembuan penemu ti betul pasal Petara ulih nulung nuan idup belama iya.—John 17:3.
Baka ni nuan ulih ngelala Petara? Pikirka pasal pangan rapat nuan. Baka ni seduai ngemansangka kaul enggau pangan diri? Nuan tentu nemu nama, personaliti, utai ti dikerindu sereta utai ti dipegedika iya, nyengkaum utai ti udah digaga sereta utai ti deka digaga iya, lalu mayuh agi. Tu meh utai ke narit nuan rapat ngagai orang nya—nuan deka belajar pasal iya.
Pia mega, kitai ulih ngelala Petara ari beratika tanya di baruh tu:
Majalah tu meri saut ke datai ari Bup Kudus. Semua artikel dalam majalah tu deka nulung nuan ngelala sapa Petara sereta chara deka bulih penguntung enti nuan bisi kaul ti rapat enggau Iya.
