BISI mayuh penemu pasal pengidup enggau pemati, lalu penemu nya bebida. Sekeda orang ngumbai sida deka mengkang idup pengudah sida mati, engka dalam tubuh ke bukai tauka ba endur bukai. Sekeda ke bukai ngumbai sida deka diadaka baru ba pengidup ke bukai. Bisi mega ngumbai pemati nya pengujung semua utai.

Nuan engka bisi runding kediri empu ba pekara tu, bepanggai ba chara tauka gaya idup nuan dibesaika. Ketegal runding pasal utai ke nyadi pengudah orang mati balat bebida, kati bisi orang tauka endur ke ulih alai kitai ngiga saut ti tau diandalka sereta enda bula ngagai tanya ti nyarutka runding nya?

Beratus taun, bala tuai pengarap ngajar doktrin pasal semengat mensia ke enda nemu mati. Nyauka semua penyembah pengarap ti tebilang​​​—⁠pengarap Kristian, Hindu, Judah, sereta iya ke bukai​​​—⁠pechaya semengat ke enda nemu mati endang amat bisi, lalu semengat nya mengkang idup pengudah tubuh mati sereta diau ba endur bukai. Orang ke megai pengarap Buddha pechaya, enti orang nya suah diadaka baru, nyau kelama iya deka lepas ari pemerinsa. Pengidup ti penuh pengelantang tu dikumbai Nirvana.

Ketegal ajar ke baka nya, mayuh orang di serata dunya pechaya pemati muka jalai nuju ngagai pengidup ba dunya bukai. Ba mayuh orang, pemati nya utai ti besai dalam pusin pengidup, lalu pemati nya sebagi ari peneka Petara. Tang nama dipadah Bup Kudus pasal pekara tu? Bacha meh artikel pengudah tu. Saut iya engka ngenyitka ati nuan.