1, 2. (a) Nama runding sekeda orang pasal Petara ke ngembuan gerempung? (b) Nama deka dikerandauka kitai ba artikel tu?

 LEBUH berandau pasal sembah, sekeda orang madahka: “Nuan enda ibuh begunaka gerempung ngiring nuan. Utai ti diguna nuan iya nya kaul enggau Petara.” Kati nya amat? Nama dipadahka fakta ngagai kitai?

² Ba artikel tu, kitai deka meda, Jehovah ngereja utai enggau chara ti teratur, lalu Iya mega ngatur nembiak Iya. Kitai mega deka berandauka utai ti patut dikereja kitai lebuh gerempung Jehovah meri kitai atur. (1 Kor. 14:33, 40) Ba kurun keterubah, nembiak Jehovah nitihka atur ke bisi ba Bup Kudus, lalu ulih nusui berita manah ba mayuh endur. Baka sida, kitai ngawakka Bup Kudus ngiring kitai kemaya hari tu. Lalu kitai ngasika atur ke diterima kitai ari gerempung Petara. Asil iya, kitai ulih nusui berita manah di serata dunya. Kitai mega ulih nulung gempuru mengkang tuchi, bisi pemaik sereta beserakup.

 3. Nama ngasuh nuan pechaya, Jehovah nya Petara ti teratur?

³ Lebuh kitai beratika utai ti ditempa Jehovah, kitai nemu Iya endang Petara ti teratur. Iya “ngaga dunya ngena penemu-dalam. Ngena penemu Iya, Iya ngengkahka langit ba endur iya.” (J-lam. 3:19) Bisi mayuh utai ti enda ditemu kitai pasal utai ti ditempa Jehovah.  Endang amat, “semina jaku telai ti udah didinga kitai” pasal Iya. (Jop 26:14) Taja pan utai ke ditemu kitai pasal dunya raya mimit aja, tang kitai nemu dunya raya diatur enggau manah. (Mas. 8:3, 4) Bejuta-juta bintang bejalai ba langit luar enggau chara ti teratur. Lalu pikirka baka ni planet ke bisi ba sistem solar kitai bejalai ngelingi mata panas. Utai ti ngalitka ati tu ulih nyadi laban Jehovah udah ngatur chara pejalai planet enggau bintang. Enti kitai berundingka baka ni Iya udah “ngena penemu Iya, . . . ngaga langit” sereta bumi, kitai deka muji, nyembah, sereta taluk ngagai Iya.—Mas. 136:1, 5-9.

 4. Nama kebuah bala saintis enda ulih nyaut mayuh tanya ti berat?

⁴ Bala saintis udah ngena mayuh utai ti dipelajarka sida pasal dunya raya sereta bumi ngambika pengidup kitai ulih manah agi. Tang sida agi enda ulih nyaut mayuh tanya ti berat. Ngambika chunto, bala astronomi enda ulih madahka enggau terang baka ni dunya raya berengkah tauka kebuah mensia, jelu, sereta utai tumbuh tau bisi ba dunya. Lalu mayuh orang enda ulih nerangka kebuah mensia bisi pengeran deka idup belama iya. (P-jar. 3:11) Siti kebuah orang nadai saut ngagai semua tanya nya, laban bala saintis enggau sekeda ke bukai madahka Petara nya nadai, lalu sida nyukung teori evolusi. Tang Petara meri kitai saut ba Jaku Iya, iya nya Bup Kudus.

 5. Baka ni mensia nunjukka diri bepanggai ba ukum alam?

⁵ Jehovah ngaga mayuh ukum alam. Ukum tu enda berubah. Bala tukang elektrik, tukang paip, injinir, pilot, pakar bedah, sereta orang bukai bepanggai ba ukum nya kena bejalaika pengawa sida. Ngambika chunto, jantung mensia ba endur ti sama dalam tubuh. Nya alai, pakar bedah nemu endur iya ba dalam tubuh tiap iku pesakit. Lalu semua orang nemu, enti orang terejun ari endur ke tinggi, iya deka labuh lalu mati. Kitai ngasika ukum alam, baka graviti, laban kitai deka mengkang idup.

 6. Baka ni kitai nemu Jehovah deka orang nyembah Iya enggau chara ti teratur?

⁶ Jehovah ngatur dunya raya enggau chara ti ngalitka ati. Iya mega tentu dekaka nembiak Iya nyembah Iya enggau chara ti teratur. Endang amat, Jehovah udah nyediaka Bup Kudus kena ngajar kitai chara nyembah Iya. Semina enggau nitihka iring ke diberi Iya nengah Bup Kudus sereta gerempung Iya, kitai tau bulih pengidup ti lantang sereta ngemuaska ati.

 7. Nama ulih ditemu kitai ari chara Bup Kudus ditulis?

⁷ Bup Kudus nya endang pemeri ti amat manah ari Petara. Sekeda pakar madahka, Bup Kudus nya semina beberapa iti bup mit orang Judah enggau orang Kristian ke dipegulaika mensia nyadi siti bup. Tang Petara netapka sapa ke deka nulis bup mit dalam Bup Kudus, kemaya sida deka nulis bup nya sereta utai ke deka ditulis sida. Nya kebuah semua bup mit dalam Bup Kudus ulih nulung kitai meretika pesan Petara. Berengkah ari bup Pemungkal nyentuk ngagai bup Pemandang, Bup Kudus madahka pasal “anak” ke deka ngaga dunya nyadi paradais baru. Kitai nemu “anak” nya Jesus Kristus, lalu Perintah iya deka nunjukka Jehovah bisi hak merintah atas semua orang.—Bacha Pemungkal 3:15; Matthew 6:10; Pemandang 11:15.

 8. Nama nunjukka orang Israel diatur enggau manah?

⁸ Orang Israel nitihka Adat ti diberi Petara ngagai sida, lalu sida diatur enggau manah. Ngambika chunto, di baruh Adat Moses, bisi bala indu diasuh ‘bekereja ba penama ngagai Langkau Kain Jehovah.’ (Pem.  38:8) Orang Israel mega bisi atur bekaul enggau chara mindahka kim sereta langkau sembiang sida enggau chara ti teratur. Udah nya, Raja David ngatur bala imam sereta orang Lewi ngereja siti-siti pengawa ba rumah sembiang. (1 Ban. 23:1-6; 24:1-3) Enti orang Israel ngasika Jehovah, Iya merekatka sida. Sida deka teratur, bisi pemaik sereta beserakup.—U-dat. 11:26, 27; 28:1-14.

 9. Baka ni gempuru ba kurun keterubah diatur?

⁹ Gempuru ba kurun keterubah mega diatur enggau manah. Sida bisi raban ti megai, iya nya seraban orang lelaki ke meri atur ngagai gempuru. Terubah iya, raban tu semina bala rasul aja. Tang udah nya, bisi bala tuai sama enggau sida. (SKR. 6:1-6; 15:6) Jehovah ngiring orang ari raban ti megai sereta orang bukai ke sama gawa enggau sida nulis surat ke ngembuan jaku lalau sereta atur ngagai gempuru. (1 Tim. 3:1-13; Tit. 1:5-9) Baka ni gempuru tau bulih penguntung lebuh nitihka atur ke diberi raban ti megai?

10. Nama nyadi lebuh gempuru ba kurun keterubah nitihka atur ari raban ti megai? (Peda gambar ba pun artikel.)

¹⁰ Bacha Kereja Rasul 16:4, 5. Ba kurun keterubah, sekeda bala menyadi Kristian lelaki ngelawa gempuru laban deka madahka “pemutus aum bala rasul enggau bala tuai eklisia [gempuru] di Jerusalem,” iya nya pemutus ke digaga ari raban ti megai. Gempuru nitihka atur tu lalu “dikeringka dalam pengarap, lalu pemayuh tubuh sida nambah-menambah tiap hari.” Nama ulih dipelajarka kitai ari teladan sida ke ulih nulung kitai ba gempuru kemaya hari tu?

11. Nama patut digaga bala menyadi Kristian lelaki ke megai tanggung pengawa ba gempuru lebuh sida nerima iring ari gerempung Petara?

¹¹ Raban Komiti Pampang Opis tauka Komiti Menua, bala tuai ti ngabas, tuai gempuru sereta penulung gempuru patut ngasika iring ke diterima sida ari gerempung Petara. Amat, Jaku Petara ngasuh semua kitai ngasika orang ke ngiring. (U-dat. 30:16; Heb. 13:7, 17) Orang ke taluk ngagai Jehovah enda ngelaban tauka mutap pasal iring ke diterima sida. Kitai enggai baka Diotrepes ke enda bebasaka bala menyadi Kristian lelaki ke ngiring. (Bacha 3 John 9, 10.) Enti kitai nitihka iring ke diberi ngagai kitai, kitai nulung ngetanka pemaik enggau penyerakup ba gempuru. Nya alai kitai ulih nanya diri empu: ‘Kati aku meransang bala menyadi Kristian taluk ngagai Jehovah? Kati aku jampat nitihka iring ke diterima aku ari gerempung Petara?’

12. Baka ni bala tuai gempuru enggau penulung gempuru dipilih?

¹² Apin lama ti udah, Raban ti Megai udah ngubah chara bala tuai gempuru enggau penulung gempuru dipilih megai pengawa ba tiap iti gempuru. “Pertanyaan Pembaca” ba Menara Pengawal kena 15 November 2014 nerangka, maya kurun keterubah, raban ti megai meri kuasa ngagai tuai ti ngabas milih bala tuai gempuru sereta penulung gempuru. Nya alai, kenyau September 2014, tuai ti ngabas udah nitihka atur tu. Lebuh bala tuai gempuru ba siti-siti gempuru madahka pasal seiku-seiku menyadi Kristian lelaki ke tau nyadi tuai gempuru tauka penulung gempuru, tuai ti ngabas deka bekelala enggau iya sereta sida sebilik. Ngambika chunto, tuai ti ngabas deka sama bekereja enggau menyadi Kristian lelaki nya ba pengawa nginjil. (1 Tim. 3:4, 5) Udah nya, tuai ti ngabas deka berandau enggau bala tuai gempuru. Sida enggau bejimat beratika ayat Bup Kudus ke nerangka kualiti ke patut dikembuan orang ke nyadi tuai gempuru tauka penulung gempuru.—1 Tim. 3:1-10, 12, 13; 1 Pet. 5:1-3.

13. Baka ni kitai ulih nunjukka diri nyukung iring ari bala tuai gempuru?

¹³ Bala tuai gempuru meri kitai iring ari Bup Kudus laban sida deka nyaga sereta  ngintu gempuru. Kitai patut bekerejasama enggau sida laban iring tu pulai ke penguntung kitai. (1 Tim. 6:3) Ba kurun keterubah, sekeda orang “ngelusu.” Sida enggai gawa, tang kiruhka pengawa orang. Bala tuai gempuru nguji nangkan sida tang sida enggai berubah. Paul madah ngagai bala menyadi Kristian utai ti patut digaga sida ba orang ke baka nya. Ku iya madahka: “Kita enda tau enda nemu sapa orang nya. Anang begulai enggau iya.” Sida patut ngetu begulai enggau orang nya tang enda ngaga iya baka munsuh. (2 Tes. 3:11-15) Bala tuai gempuru kemaya hari tu mega nguji nulung orang ke enda kiruhka standard Petara, ngambika chunto, orang ke bedating enggau orang ke enda nyembah Jehovah. (1 Kor. 7:39) Enti orang nya enggai ngubah perangai iya, bala tuai gempuru tau berunding deka meri cheramah ke nerangka baka ni perangai ke baka nya ulih ngasuh orang bukai bejai gempuru. Enti bala tuai gempuru meri cheramah ke baka nya ba gempuru nuan, baka ni nuan deka nerima cheramah nya? Enti nuan ngelala sapa orang nya, kati nuan deka nyeliahka diri ari begulai enggau iya? Enggau tu, nuan ulih nulung iya nemu, perangai iya ulih ngemediska iya empu sereta enda ngelantangka ati Jehovah, lalu tu ulih meransang iya ngubah ulah diri. ^[1]—Peda nota penutup.

14. Baka ni kitai ulih nulung gempuru mengkang tuchi?

¹⁴ Jaku Petara madahka utai ke patut dikereja semua kitai ngambika enda ngelakka penyai nyadi ba gempuru kitai. Peratika utai ke nyadi ba Korint. Paul rinduka bala menyadi Kristian dia. Iya udah nulung mayuh ari sida belajarka pemendar. (1 Kor. 1:1, 2) Nya alai uji gambarka, baka ni asai ati Paul lebuh iya nemu seiku ari sida mengkang ngereja ulah seks ti kamah ba pengidup, tang bala menyadi Kristian agi ngemendarka iya ba gempuru! Paul ngasuh bala tuai gempuru “nyerahka orang nya ngagai Sitan.” Sida patut muai orang nya ari gempuru. (1 Kor. 5:1, 5-7, 12) Kemaya hari tu, bala tuai gempuru patut nentuka orang ke baka nya dibuai ari gerempung enti iya ngereja dosa ti besai sereta enda nesal ati. Enti pia, kati kitai deka nitihka utai ti diasuh Bup Kudus bekaul enggau orang ke dibuai ari gerempung? Enti kitai nitihka iring nya, kitai nulung gempuru mengkang tuchi. Lalu kitai ulih nulung orang nya nemu, iya patut nesal ati sereta minta Jehovah ngampun iya.

15. Baka ni kitai ulih mengkang bebaik ba gempuru?

¹⁵ Bisi siti agi penanggul ba Korint. Sekeda orang udah mai bala menyadi Kristian lelaki sida ngagai kot. Paul nanya sida: “Nama kebuah enda nejuka orang ngereja utai ti salah ngagai kita?” (1 Kor. 6:1-8) Kemaya hari tu, sekeda orang ba gempuru udah ngaga sempekat ba pengawa dagang enggau bala menyadi Kristian sida, tang udah nya napi pengerugi tauka ngasaika diri kena tipu. Nya alai, sida mai bala menyadi Kristian sida ngagai kot. Tang enti utai tu nyadi, tu ulih ngasuh orang bejai Jehovah enggau nembiak Iya. Lalu tu mega ulih ngasuh penanggul nyadi ba gempuru. Jaku Petara nulung kitai nemu, kitai enda tau enda  mengkang bebaik enggau bala menyadi Kristian kitai, taja pan kitai napi pengerugi. ^[2] (Peda nota penutup.) Amat, Jesus ngajar kitai chara mutarka penanggul ti besai tauka pengawa ke enda besetuju enggau pangan diri. (Bacha Matthew 5:23, 24; 18:15-17.) Enti kitai ngasika ajar Jesus, kitai ulih mengkang bebaik sereta beserakup ba gempuru.

16. Nama kebuah nembiak Petara beserakup?

¹⁶ Jaku Jehovah madah ngagai kitai: ‘Naka meh pemanah, naka meh penyamai lebuh nembiak Petara diau seati enggau pangan diri!’ (Mas. 133:1) Enti orang Israel ngasika Jehovah, sida deka teratur sereta beserakup. Petara madah pasal nembiak Iya: “Aku deka ngempuruka kita baka bedus ti pulai baru ngagai raban sida empu.” (Mik. 2:12) Jehovah mega madahka, nembiak Iya deka belajarka pemendar ari Bup Kudus sereta deka beserakup nyembah Iya. Iya madahka: “Aku deka ngubah jaku semua mensia ari semua bansa, lalu sida deka besampi ngagai Aku siku aja, ukai besampi ngagai petara bukai. Semua sida deka ngasika Aku magang.” (Sep. 3:9) Naka meh pengaga ati kitai ulih beserakup nyembah Jehovah!

17. Nama patut digaga bala tuai gempuru enti bisi orang ba gempuru ngereja dosa ti besai?

¹⁷ Enti orang ngereja dosa ti besai, bala tuai gempuru enda tau enda jampat nangkan iya enggau chara ti bepengerindu. Sida nemu Jehovah dekaka sida nyaga gempuru ari sebarang pengawa ke enda manah sereta nulung gempuru mengkang tuchi sereta beserakup. (J-lam. 15:3) Paul balat rinduka bala menyadi Kristian ba Korint, lalu nangkan sida lebuh sida begunaka jaku ajar, baka ke dibacha kitai ba surat iya ti keterubah ngagai sida. Kitai nemu, bala tuai gempuru jampat nitihka utai ti diasuh Paul laban beberapa bulan udah nya, iya muji sida ba surat ti kedua ke ditulis iya ngagai sida. Enti menyadi Kristian “bisi ditemu ngereja penyalah,” bala tuai gempuru patut nangkan iya enggau chara ti nelap.—Gal. 6:1.

18. (a) Baka ni iring ari Jaku Petara nulung gempuru ba kurun keterubah? (b) Nama deka dikerandauka kitai ba artikel pengudah tu?

¹⁸ Endang amat, enti orang Kristian ba kurun keterubah nitihka iring ari Jaku Petara, gempuru sida deka tuchi, bisi pemaik sereta beserakup. (1 Kor. 1:10; Eps. 4:11-13; 1 Pet. 3:8) Asil iya, bala menyadi Kristian nya ulih nusui berita manah “ngagai semua orang di baruh langit.” (Kol. 1:23) Pia mega kemaya hari tu, nembiak Jehovah beserakup sereta teratur, lalu sida nusui berita manah di serata dunya. Artikel pengudah tu deka meri mayuh agi bukti pasal pengeran sida, iya nya ngemuliaka Jehovah Petara ti Pemadu Tinggi sereta ngasika iring Iya dalam Jaku Iya, Bup Kudus.—Mas. 71:15, 16.