Enda lama da agi, Perintah Petara ke ba serega deka merintah semua mensia. Maya nya, semua orang ke ba bumi deka idup enggau gaga ati sereta penuh enggau pemaik. Sida mega deka ngereja pengawa ke meri penguntung lalu ngemuaska ati. Petara udah milih Jesus Kristus merintah bumi. Enda baka pemerintah kemayaharitu, Jesus seruran ibuhka rayat iya. Nya alai, kitai andal iya endang deka nyadi Raja ti pengasih, manah ati, siru, sereta lurus.—Isaiah 11:4.

Semua mensia deka beserakup. Sida enda agi diseraraka entara sempadan menua tauka bansa. (Pemandang 7:9, 10) Semua orang ba bumi deka rinduka Petara sereta pangan diri. Sida deka bekerejasama ngereja peneka Petara, iya nya nyaga bumi.—Masmur 115:16.

Lebuh Perintah Petara merintah bumi, Penempa kitai deka nentuka gaya hari seruran ngam ke semua utai idup. (Masmur 24:1, 2) Maya Jesus ba bumi, iya nunjukka pemesai kuasa Petara. Chunto iya, iya ulih neduhka ribut ti balat enggau senang. (Mark 4:39, 41) Nya alai, lebuh Kristus merintah bumi, kitai enda ibuh takutka pengerusak alam. Kelimpah ari nya, maya Perintah Petara merintah, mensia enggau jelu ulih semak pangan diri, lalu mensia enda ngerusak rampa menua agi.—Hosea 2:18.

Nadai orang deka sakit, nyadi tuai, tauka mati. Maya nya semua orang gerai. (Isaiah 35:5, 6) Mensia deka meda rampa menua ti manah sereta beresi, baka ke diasaika mensia ti keterubah ba Kebun Eden. Ba dunya baru nya ila, tanah deka mansutka asil ti mayuh, lalu semua orang ba bumi deka bisi pemakai ti chukup baka ba Kebun Eden suba. (Pemungkal 2:9) Baka nembiak Petara kelia, semua orang ba Paradais “deka bulih semua utai ke diempa” sida.—Adat Lewi 26:4, 5.

Ba baruh Perintah Petara, semua orang ba serata dunya deka ngasaika pemaik, lalu sida manah ati sereta lurus enggau pangan diri. Nadai agi perang, salah guna kuasa, sereta semua orang enda merinsa agi ngulihka utai ti diguna sida ninting hari. Bup Kudus besemaya, “Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida.”—Mikah 4:3, 4.

Tiap iti ruang bilik deka ngembuan rumah diri empu, lalu enda ibuh irauka diri nadai endur diau, sereta semua kereja sida deka ngemuaska ati. Bup Kudus madahka, sida ke diau ba dunya ti baru “deka mujur.”—Isaiah 65:21-23.

Bup Kudus besemaya: ‘Dunya deka penuh laban penemu Jehovah.’ (Isaiah 11:9) Mensia ke idup ba baruh Perintah Petara Jehovah deka belajar pasal pemintar Petara sida ti enda nemu abis, sereta semua utai ti manah ke digaga Iya. Sida enda ngena penemu nya kena ngaga senyata tauka ngemediska orang bukai. (Isaiah 2:4) Tang sida deka belajar, idup enggau pemaik lalu nyaga bumi enggau manah.—Masmur 37:11.

Petara udah nyediaka bumi enggau manah ngambika kitai ulih idup lantang ninting hari. Iya dekaka mensia idup belama iya ba bumi. (Masmur 37:29; Isaiah 45:18) Ngambika tuju asal Petara ulih nyadi, Iya deka “ngerusak pemati belama iya!” (Isaiah 25:8) Bup Kudus mega besemaya, jemah ila “pemati nadai agi, nadai agi ngulit, nadai agi nyabak, nadai agi pedis.” (Pemandang 21:4) Petara deka meri peluang idup belama iya, ngagai semua mensia ke diselamatka maya Iya ngerusak dunya ti jai tu, enggau semua orang ke diangkatka ari mati ba dunya baru ila.—John 5:28, 29; Surat Kereja Rasul 24:15.

 Diatu, bejuta iku orang benung nyediaka diri idup ba baruh Perintah Petara. Taja pan sida enda sempurna, sida enggau naka ulih nyadi orang ke layak ba mata Petara lalu idup ba dunya baru. Baka ni sida ngereja nya? Iya nya belajarka pasal Petara Jehovah enggau Jesus Kristus ke dikirumka Iya.—John 17:3.

Peratika baka ni nuan ulih diselamatka ba pengujung dunya, sereta idup ba dunya ti manah agi, ke deka datai. Terima meh program belajarka Bup Kudus enggau pechuma ari siku Saksi-Saksi Jehovah, ngena bup Idup enggau Lantang Belama Iya!