MENSIA

Bup Kudus madah: Petara “nadai ngaga dunya nyadi endur ti sunyi nadai mensia, tang nyadi endur alai mensia diau.”​—ISAIAH 45:18.

BUMI

Bup Kudus madah: “Serak siti diganti serak siti, tang dunya mengkang enda berubah.”​—PENGAJAR 1:4.

RETI IYA: Nitihka Bup Kudus, bumi enda sekali-kali deka dianchurka, tang mengkang diuan mensia. Nyadi, nama reti ‘dunya deka lenyau’?

PERUNDINGKA: Bup Kudus madahka, utai ke nyadi maya ‘dunya deka lenyau,’ sama baka jeman Noah. Maya tu, bumi ‘penuh laban pengawa ke jai.’ (Pemungkal 6:13) Petara udah nyelamatka Noah enggau sida sebilik ke ngereja utai ti manah, tang ngena bah besai ngeluska orang ti jai. Maya pekara nya nyadi, Bup Kudus madahka, “Dunya nya udah mega diampuhka ngena ai, lalu dirusak.” (2 Peter 3:6) Pengudah bah besai nya, nama utai ke lenyau? Ukai bumi, tang orang ke jai ba bumi. Nya alai, lebuh Bup Kudus nyebut pasal ‘dunya deka lenyau,’ tu ukai reti iya bumi deka lenyau tauka anchur. Tang utai ke lenyau nya, orang ke jai ba bumi enggau semua pengawa ke dikereja sida.

PENANGGUL ENGGAU PENYAI

Bup Kudus madah: “Enda lama da agi orang ke jai deka abis; taja pen kita bebendar begigaka sida, tang kita nadai tetemuka sida. Tang orang ke baruh ati deka bempu menua tu lalu diau lantang ngena pengaya sida.”​—MASMUR 37:10, 11.

RETI IYA: Pengudah bah besai jeman Noah, orang jai bisi baru lalu mai mayuh penusah ngagai mensia. Tang enda lama da agi, Petara deka muai semua penyai. Penulis masmur madah, “orang ke jai deka abis.” Petara deka ngena Perintah Iya ti ba serega, ngerusak penyai. Perintah tu deka bekuasa atas serata bumi, lalu merintah semua mensia ke ngasika Petara.

PERUNDINGKA: Kati diatu, bala pemerintah ba bumi deka nyukung Perintah Petara? Enda. Bup Kudus madah, sida deka ngelaban Perintah Petara. (Masmur 2:2) Pengawa sida endang salah. Laban pengujung iya, Perintah Petara deka nganti semua perintah mensia, lalu “meruan belama iya.” (Daniel 2:44) Tang, nama kebuah perintah mensia patut dilenyauka?

Bup Kudus madah: “Nadai siku kami bisi kuasa ngatur pengidup diri.”​—JEREMIAH 10:23.

RETI IYA: Mensia enda digaga ngambika merintah diri empu. Sida enda ulih ngatur sereta mutarka penanggul.

PERUNDINGKA: Nitihka Britannica Academic, bala perintah enda ulih “mutarka penanggul baka penyeranta, lapar pungkang, penyakit, pengerusak alam, perang tauka penganas.” Bup nya mega nambah, “Sekeda orang pechaya, semua penanggul tu ulih diputarka, enti bumi tu diperintah siti aja perintah.” Pia mega, taja pan perintah mensia ulih bepakat, tang seagi dunya tu dipegai tauka diperintah mensia ke enda sempurna, semua penanggul ke disebut tadi enda ulih diputarka. Semina Perintah Petara ti ulih mutarka semua penanggul ba dunya belama iya.

Nya kebuah, nitihka Bup Kudus, orang ke manah enda ibuh berasai takut ke ‘dunya deka lenyau.’ Tang, sida patut berasai gaga laban dunya ti jai tu deka diganti enggau dunya ti baru ke manah agi.

Kemaya dunya baru Petara deka datai? Bacha meh saut iya ke diambi ari Bup Kudus, ba artikel ke nangkanka tu.