Utai ke dipelajar ari Bup Kudus ulih ngubah pengidup orang. Peratika chunto Ricardo enggau Andreas.

RICARDO: Lebuh beumur 15 taun, aku enggau seraban gengster. Aku amat rapat enggau sida nyentukka aku deka dijil pengelama 10 taun! Juluk ati tu engka nyelai, tang ba endur aku, orang ke kala dijil seruran dipebasa. Aku mega deka dilayan baka nya.

Aku nguji semua pengawa gengster, nyengkaum dadah, seks ti kamah enggau pemangah. Bisi sekali lebuh malam hari, aku enggau orang betimbak. Malam nya aku ngumbai diri mati, tang aku nadai apa nama. Pengudah nya aku berengkah berundingka pengidup aku, sereta jalai ke patut dipilih aku enggau serius agi. Aku bisi ati deka berubah, tang sapa ke ulih nulung aku?

Mayuh ari kaban belayan aku enda lantang ati, lalu pengidup sida mayuh penanggul. Tang seiku ari aya aku amat bebida. Sida sebilik orang ti manah, lalu idup nitihka ajar Bup Kudus. Bisi sekali sida madahka aku, nama Petara nya Jehovah. Nyadi enda lama pengudah pengawa betimbak nya, aku besampi lalu nyebut nama Jehovah. Aku minta tulung ari Iya. Ba hari siti, aku tekenyit bisi seiku Saksi-Saksi Jehovah ngetuk pintu aku. Iya nyadi pengajar Bup Kudus aku.

Enda lama pengudah nya, aku napi penanggul ti besai. Bala kaban aku ti suba suah betalipun, lalu mai aku lipak enggau sida. Taja pan tusah, aku enggai nitihka sida. Aku deka terus belajarka Bup Kudus, lalu aku beterima kasih laban pengeran tu meri aku pengelantang ti bendar sereta pengidup ti manah agi.

Aku kala madahka Petara, suba aku deka dijil pengelama 10 taun ngambika ulih nyadi gengster ti dipebasa. Nyadi aku besampi, ngambika Iya ngemendarka aku nginjil penuh jam abis nadai 10 taun. Enggau chara tu, baru meh aku ulih nulung orang bukai. Sampi aku udah disaut, laban aku udah nginjil penuh jam pengelama 17 taun!

Mayuh ari kaban aku ke suba udah nerima ukum jil ti panjai, lalu sekeda ari sida udah mati. Aku amat beterima kasih laban kaban belayan aku ke Saksi nya sanggup idup nitihka ajar Bup Kudus. Taja pan sida bebida, aku bebasaka sida lebih agi ari bala gengster ke suba. Aku amat beterima kasih ke Petara, laban ngajar aku chara pengidup ti pemadu manah.

 ANDRES: Aku dibesaika ba endur ti miskin ke penuh enggau penanggul dadah, ngenchuri, bebunuh sereta pelacuran. Apai aku balat ngirup ai bisa sereta gian makai dadah jenis kokain. Apai indai selalu belaya sereta bejamah pangan diri.

Kenyau ari biak, aku ngirup ai bisa sereta makai dadah. Aku selalu rerayau ba bela jalai lalu ngenchuri barang ngambika ulih dijual. Beberapa taun udah nya, apai nguji deka rapat agi enggau aku, tang enggau niat ti salah. Apai ngajar aku ngulihka dadah sereta barang haram, ngambika ulih dijual kami. Dalam sekelip mata, aku bulih mayuh duit. Tang, bisi sekali polis datai ke rumah aku, lalu nuduh aku nguji deka munuh. Ketegal tuduh tu, aku dijil pengelama lima taun.

Bisi sekali ba rumah jil mua ke pagi, aku bisi ninga jaku gerah semua orang tangkap dibai enggau belajarka Bup Kudus ke dipejalaika Saksi-Saksi Jehovah. Aku pan enggau pengawa nya. Utai ke disebut sida amat betul. Nya alai, aku pan berengkah belajarka Bup Kudus enggau Saksi. Enggau terus terang sida nerangka standard moral Petara ti tinggi, nyengkaum utai ti engka sensitif.

Udah nya, aku nemu diri begunaka bantu alai berubah, kelebih agi lebuh ditekan orang tangkap ke bukai, ti enda rindu meda aku belajarka Bup Kudus. Aku besampi minta pengering enggau penemu-dalam, lalu Jehovah nulung aku. Asil iya, aku ukai aja enda alah ditekan sida, indah aku ulih bekunsika Berita Manah ari Bup Kudus enggau orang tangkap ke bukai.

Lebuh aku dibibaska, aku berasai amat kesal nyentukka aku deka dijil lama agi! Maya aku mupuk, beberapa iku orang tangkap ngepaika jari, lalu bisi sekeda ari sida madahka, “Pulai meh nuan igat paderi.”

Aku enda nemu gaya pengidup aku diatu enti Petara enda ngajar aku. Aku amat beterima kasih laban Petara rinduka aku, lalu enda putus pengarap ngagai aku. a