“Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia.”​—ROME 5:12.

Lebuh Petara ngaga Adam enggau Awa, iya nya mensia keterubah ba dunya, Iya meri runding sereta tubuh ti sempurna. Iya ngengkahka seduai iya ba Paradais, tauka Kebun Eden ti lawa ba dunya. Iya ngemendarka seduai iya makai buah ari semua pun kayu ba kebun nya, kelimpah siti aja pun kayu ke ditagang. Tang, Adam enggau Awa makai buah ari pun kayu ke ditagang nya, lalu berengkah ari nya meh dosa nyadi. (Pemungkal 2:15-17; 3:1-19) Ketegal enda ngasi, Petara muru seduai iya ari Kebun Eden lalu pengidup seduai iya berengkah merinsa. Nyau kelama, seduai iya bisi anak, lalu pengidup anak seduai iya mega merinsa. Sida nyadi tuai lalu mati. (Pemungkal 3:23; 5:5) Kitai ulih sakit, tuai sereta mati laban kitai peturun Adam enggau Awa.

“Semua dunya di baruh kuasa Sitan.”​—1 JOHN 5:19.

Sitan, melikat ke enda ulih dipeda ke ngelaban Petara. (John 8:44; Pemandang 12:9) Nyau kelama, melikat ke bukai mega nitihka Sitan. Sida dikumbai bala antu. Bala melikat ke jai tu ngena kuasa sida nipu mensia ngambika mensia limpang ari Petara. Sida nyungkak mensia ngereja utai ti jai. (Masmur 106:35-38; 1 Timoti 4:1) Sitan enggau bala antu rindu merinsa pengidup mensia.

“Kita deka ngetau utai ti ditanam kita empu.”​—GALATIA 6:7.

Mayuh ari nya, kitai merinsa ketegal dosa sereta dunya ke dipegai Sitan. Tang kekadang, mensia empu ke merinsa pengidup diri. Baka ni? Lebuh sida ngereja utai ti salah, tauka ngaga pemutus ti beli, sida empu ke ngetau asil ti enda manah. Pia mega, enti orang ngereja utai ti manah, sida mega deka bulih asil ti manah. Ngambika chunto, seiku apai ke lurus, bendar gawa sereta rinduka diri sebilik, deka bulih mayuh utai ke manah sereta ngelantangka ruang bilik iya. Tang orang ke rindu bejudi, selalu mabuk, tauka ngelusu, deka ngenusahka diri enggau ruang bilik iya. Nyadi, kitai nunjukka diri bepenemu-dalam enti kitai ningaka Petara. Iya dekaka kitai bulih asil ti manah, nyengkaum “diau likun belama.”—Masmur 119:165.

“Ba hari ti penudi . . . , orang deka semina berundingka diri empu aja, angkunka duit, . . . enda ngasika apai indai, . . . enda nemu nagang diri, mangah, begedika utai ti badas.”​—2 TIMOTI 3:1-5.

Kemayaharitu, semua utai ke disebut ba ayat tu amat nyadi. Ulah ke diayanka sida nyadika bukti kitai amat idup “ba hari ti penudi.” Bup Kudus mega madahka, ba maya kitai deka bisi perang, lapar pungkang, tanah berenyang sereta penyakit. (Matthew 24:3, 7, 8; Luke 21:10, 11) Utai ke nyadi tu ngasuh kitai balat merinsa lalu ngujungka pemati.