“Ngereja pengawa ti menyana ngena jari iya empu, ngambika iya bisi utai dipekunsika enggau orang ke suntuk.”​—EPESUS 4:28.

Petara deka kitai ngembuan runding ti manah pasal kereja. Nama kebuah? Orang ke bagas gawa ulih gaga ati laban iya ulih melanja diri empu sereta diri sebilik. Iya mega engka ulih nulung orang ke begunaka bantu. Suah iya, tuke rindu agi ke pekereja ke bagas. Nyadi, pekereja ke bagas jarang dibuai kereja. Bup Kudus nerangka, semua asil pengawa ti bagas nya ‘pemeri ari Petara.’—Pengajar 3:13.

“Kami nemu ati diri beresi, ingin deka ngereja utai ti badas berari.”​—HEBREW 13:18.

Enti kitai lurus, kitai nemu bebasaka diri empu. Runding kitai mega kurang pengirau, lalu ulih tinduk jenak. Nambahka nya, orang bukai senang agi pechaya sereta bebasaka kitai. Tang sayau, orang ke enda lurus enda ngasaika penguntung tu. Pia mega, sida selalu berasai besalah, sereta takutka orang nemu pasal penyalah ke digaga sida.

“Anang angkunka duit. Kita patut nemu puas ati ke utai ti dikemisi kita.”​—HEBREW 13:5.

Kitai begunaka duit kena meli pemakai sereta utai ke diguna. Taja pia, “pengangkun ke duit” nya ulih ngemedis. Orang ke kelalu rinduka duit deka ngena mayuh awak sereta pengering diri ngambi ngulihka duit. Ketegal iya deka ngulihka mayuh duit, kaul iya ba tikah mega ulih dikachau. Iya mega engka enda chukup awak begulai enggau bala anak. Indah iya pan engka enda ibuhka pengerai diri. (1 Timoti 6:9, 10) Nambahka nya, orang ke kelalu rinduka duit senang diuji ngereja utai ke enda lurus. Munyi ku orang ke bepenemu-dalam: “Orang ke lurus ati, deka idup lantang senang, tang enti nuan deka jampat kaya, nuan deka kena ukum.”—Jaku Dalam 28:20.

“Bepegai erat ba penemu-dalam enggau ba penalam runding.”​—JAKU DALAM 3:21.

Utai ke dipelajar ba sekula nulung kitai nyadi orang, sereta apai indai ti betanggungjawap. Taja pia, pelajar tu enda ulih nyadika jamin kitai deka seruran bulih utai ke diguna sereta gaga ati. Enti kitai deka mujur ba semua utai ke dikereja, kitai begunaka pelajar ti datai ari Petara. Bup Kudus madahka, orang ke ngasika pesan Petara deka “mujur dalam semua utai ti dikereja iya.”—Masmur 1:1-3.