Laki bini ke bisi basa deka rinduka pangan diri, taja pan lebuh sida enda sepenemu. Bup Ten Lessons to Transform Your Marriage madahka, “Sida enda keran nitihka penemu diri. Tang, sida deka terus berandau pasal laya, bebasa, sereta mendingka runding pangan diri, lalu ngiga jalai ti ngena ba seduai iya.”

PRINSIP BUP KUDUS: “Pengerindu . . . enda berundingka diri empu.”—1 Korint 13:4, 5.

“Bebasaka bini aku reti iya, aku beterima kasih ngagai iya, sereta nyeliahka sebarang utai ke engka ulih ngemedis tauka ngerusak tikah kami.”—Micah.

Enti nadai basa, randau entara laki bini engka dichampur enggau jaku kutuk, sindir, sereta ransi. Nitihka pemansik, tu meh tanda deka sarak.

“Enti nuan nyindir, ngemeli, tauka ketawa ke bini nuan, nuan tau ngasuh iya berasai lemi semengat ngagai diri empu sereta enda pechaya ke nuan agi. Tu ngerusak tikah nuan empu.”—Brian.

UJI MEH DIRI

Peratika randau enggau ulah nuan dalam seminggu. Udah nya, tanya diri empu:

• ‘Ni bagi utai ke suah agi dikereja aku? Ngutuk tauka muji kaling aku?’

• ‘Baka ni aku udah ngayanka diri bebasaka kaling aku?’

BERANDAU MEH ENGGAU KALING PENGIDUP NUAN

• Ni bagi ulah enggau leka jaku ke ngasuh seduai berasai dipebasa?

• Ni bagi ulah enggau leka jaku ke ngasuh seduai berasai enda dipebasa?

TIP

• Tuliska tiga chara nuan deka dipebasa, sereta pinta kaling nuan ngereja utai ti sama. Seduai ulih nukar lis nya enggau pangan diri, lalu naka ulih ngereja utai ke ditulis.

• Tuliska pemanah kaling nuan lalu padah ngagai iya nuan amat beterima kasihka pemanah iya nya.

“Bebasaka laki aku reti iya, aku ngereja utai ke nunjukka aku beterima kasih sereta deka iya gaga ati. Ukai reti iya aku patut ngaga utai ti spesial. Indah, ba utai ti mit pan aku ulih nunjukka basa ngagai iya.”—Megan.

Iya ke pemadu penting nya, ukai nuan ke patut ngasaika diri bisi ngayanka basa tauka enda, tang kati kaling nuan bisi berasai dipebasa tauka enda.

PRINSIP BUP KUDUS: “Rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat.”—Kolosi 3:12.