Saut iya bisi kaul enggau runding kitai pasal pengidup.

Kati Petara deka ngaga dunya tu enggau lawa sereta manah enti Iya deka kitai idup merinsa?

Ba orang ke nadai pengarap, pemerinsa nunjukka (1) Petara enda ulih ngetuka pemerinsa, (2) Petara enda peduli pasal mensia, tauka (3) nadai Petara.

Kati tu aja alasan iya?

Petara enggai kitai merinsa.

Iya ngaga kitai, ngambika kitai ulih ngasaika pengidup.

‘Kitai semina ulih ngelantangka diri aja, lalu ngasaika penyamai idup sepemanjai umur kitai. Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Petara magang.’​—PENGAJAR 3:12, 13.

Petara meri sepasang mensia keterubah pengidup ti sempurna.

Iya enda kala nentuka sida sereta peturun sida merinsa.

‘Petara merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya.”’​—PEMUNGKAL 1:28.

Sepasang mensia ti keterubah udah ngelaban Petara.

Asil iya, sida ngujungka semua peturun sida merinsa.

“Dosa tama ke dunya nengah siku orang, lalu dosa mai pemati. Nya alai, pemati ngelekai ngagai semua orang, laban semua orang bela bedosa.”​—ROME 5:12. a

Enti nadai iring ari Petara, kitai enda ulih ngidupka diri.

Baka kitai ke enda digaga idup ba dalam ai, kitai mega enda digaga merintah diri empu.

“Nadai siku kami bisi kuasa ngatur pengidup diri. Nadai siku kami bisi kuasa atas seput diri empu.”​—JEREMIAH 10:23.

Petara enggai kitai merinsa.

Iya deka kitai naka ulih nyeliahka diri ari penusah ba pengidup.

“Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang.”​—ISAIAH 48:18.