Enti saut nya au, kitai patut ulih ngurangka pemerinsa.

Ni naka mensia betanggungjawapka pekara ba baruh?

• Dijamah.

  Nitihka penyampau ke disebut Gerempung Pengerai Entarabansa (WHO), 1 per 4 orang ke besai tuai kala dijamah maya agi mit. Lalu, 1 per 3 orang indu kala dijamah ba fisikal sereta seksual (tauka kedua-dua nya sekali) ba pengidup sida.

• Pemati.

  Statistik Pengerai Dunya 2018 ke dikeluarka WHO madahka, “Kira-kira 477,000 orang dibunuh ba serata dunya kena taun 2016.” Penyampau tu enda nyengkaum 180,000 orang ke dijangka tebunuh ketegal perang sereta penyarut ke nyadi ba taun nya.

• Penanggul ba Pengerai.

  Ba siti artikel majalah National Geographic, siku penulis ke benama Fran Smith madahka: “Lebih ari satu biliun orang nginsap, lalu tebiat nginsap nya siti ari 5 batang kebuah ke ngujungka pemati: Penyakit jantung, strok, tusah enseput, penyakit penghalang pulmonari kronik enggau kanser lempuang.”

• Utai ti enda lurus.

  Jay Watts siku pakar psikologi madahka, “Enti orang miskin dilayan enggau enda adil, dikemaruhka ketegal bansa tauka penempa, diburu ari endur diau, tauka idup begulai enggau orang ke rindu bepekit, tu ulih ngasuh sida merinsa ba mental.”

  PENERANG KE BUKAI

  Peda video Nama Kebuah Petara Ngaga Dunya? ba jw.org/iba.

Mayuh ari pemerinsa ketegal mensia empu.

Pemerintah patut bekerejaka rayat, tang mayuh pemerintah ngenusahka rayat lalu ngujungka pemerinsa.

“Sekeda orang ke bisi kuasa diau, alai orang bukai ke natka diri merinsa dipegai sida.”​—PENGAJAR 8:9.

Pemerinsa ulih dikurangka.

Prinsip Bup Kudus ulih nulung kitai ngemanahka pengerai sereta ngembuan kaul ti manah enggau orang bukai.

“Ati ti lantang, ngasuh tubuh nuan bepengerai, tang ati ti kepapas baka penyakit riman.”​—JAKU-DALAM 14:30.

“Buai semua macham dendam, ati ti pedis, sereta ati ti ngeransi. Anang merak pangan diri. Buai mega jaku ti kasar sereta semua utai ti ngasuh pedis.”​—EPESUS 4:31.