Orang ke bepengarap Hindu pechaya, sesiku orang merinsa ketegal pengawa ke digaga sida empu, sekalika nya ba pengidup sida diatu tauka pengidup sida suba. Sida ngumbai, pemerinsa deka abis maya sesiku orang udah nyapai tahap moksha, iya nya badu agi diadaka baru. Kena nyapai tahap nya, sesiku orang patut ngelatih diri ngambika sida nadai besangkut-paut enggau semua pekara ba dunya.

Orang ke bepengarap Islam pechaya, tuju pemerinsa nya kena ngukum orang ketegal dosa sida, lalu kena nguji orang ke bepengarap. Nitihka Dr. Sayyid Syeed, presiden Persatuan Islam Amerika Utara, penusah ke ninggang nya siti tangkan nyadika pengingat, ngambika kitai “beterima kasih ngagai Petara ketegal semua berekat ke diberi Iya, lalu ngingatka kitai nulung orang ke begunaka bantu.”

Ba pengarap orang Judah, sesiku orang merinsa ketegal pengawa sida empu. Sekeda orang Judah pechaya, orang ke udah mati deka diangkatka baru, lalu orang manah ke merinsa deka bulih pengelurus. Nitihka ajar Kabbalah (pengarap mistik) Judah, sesiku orang deka diadaka baru bekali-kali ngambika iya bepeluang nebus penyalah diri.

Orang ke bepengarap Buddha pechaya, sesiku orang deka terus diadaka baru lalu terus merinsa nyentukka iya bibas ari semua pengawa, asai ati, sereta pengingin ti jai. Lebuh sesiku orang ngulihka penemu, ngereja pemadas lalu ngelatih runding iya, iya deka nyapai tahap nirwana lalu dibibaska ari semua pemerinsa.

A Dictionary of Comparative Religion madahka, nitihka ajar Konfusianisme, mayuh pemerinsa nyadi ketegal “penyilap enggau pengawa mensia ke enda mujur.” Taja pan pengawa ti manah ulih ngurangka pemerinsa, tang pemerinsa agi enda ulih ditagang mensia ari nyadi laban nya datai ari “semengat ti bekuasa agi. Ketegal tu, mensia patut beserah ngagai Nasit ti udah ditentuka.”

Nitihka adat sekeda bansa, sesiku orang merinsa ketegal kena puchau. Sida pechaya manang ulih meri tuah sereta pemedis. Ketegal tu, enti bisi orang sakit sida minta ubat ari manang, tauka ngasuh manang nya ngaga piring ngambi pemedis orang ke sakit nya ulih kurang.

Orang Kristian pechaya, mensia merinsa ketegal dosa sepasang mensia ke keterubah, baka ke ditulis ba bup Pemungkal. Tang, mayuh pengarap Kristian nambahka cherita ba ajar tu. Ambika chunto, sekeda orang Kristian madah pemerinsa kitai ulih ‘diserahka ngagai Petara,’ kena minta Petara merekat gerija tauka nulung orang bukai.