Utai idup enda ulih nyadi pia aja. Sel endang bisi ba tiap iti utai idup. Tiap iti sel sempama kilang ti mit, ke ulih ngereja beribu-ribu bengkah proses ti tusah, kena nampung utai idup lalu ngemayuhka nya. Rekaan ke tusah dalam sel bisi ba nyauka semua utai idup. Ngambika chunto, yis tauka ragi ruti, utai idup ke ngembuan siti sel. Enti dibandingka enggau sel mensia, sel yis baka ke senang agi. Tang iya ke amat, sel yis nya tusah. Chunto, nukleus sel yis bisi DNA. Tiap iti sel yis mega bisi “mesin” ti mit kena nyerara, ngangkut, sereta ngubah molekul, ngambika sel yis nya ulih terus idup. Lebuh sel yis abis pemakai, sel nya deka ngaga siti proses kimia kena ngelubahka pengawa dalam sel nya. Nya kebuah, yis ulih disimpan lama, lalu ulih aktif baru maya dikena ngaga ruti.

Ngambika ulih faham agi sel mensia, bala saintis udah ngena bepuluh taun kena mansik pasal sel yis. Tang agi mayuh utai ke enda ditemu sida pasal yis. Ross King, seiku profesor ba Chalmers University of Technology di Sweden madahka, “Indah kena mansik sel yis ti senang pan, kami enda chukup pakar biologi kena ngaga semua eksperimen ke diguna.”

 Pengudah nemu sel yis nya enda senang, nyadi nama runding nuan? Kati sel yis tu ditempa tauka nyadi kediri empu aja?

Utai idup semina ulih diasilka ari utai ke idup. DNA ke dalam sel ngembuan mayuh molekul ke dikumbai nukleotida. Tiap iti sel mensia bisi 3.2 biliun nukleotida. Lalu tiap iti bengkah nukleotida patut ditusun dalam kombinasi ti nyemetak ngambika sel nya ulih ngasilka enzim enggau protein.

Nitihka pansik, nukleotida ulih “terbentuk” enggau kediri empu. Tang peluang tu nyadi kira-kira 1 dalam 10¹⁵⁰ (1 dititihka 150 kusung). Reti nya, peluang utai tu nyadi amat-amat mit nyentukka iya dikumbai mustahil ulih nyadi.

Nadai eksperimen saintifik, ke kala nunjukka utai idup ulih diasilka pia aja ari utai ke enda idup.

Mensia utai idup ti amat unik. Mensia bisi mayuh penau kena ngasaika pengidup. Ngambika chunto, nadai utai idup ti bukai ke ngembuan pengelandik ba seni, pengelandik ba sosial, sereta penau madahka asai ati, baka ke dikembuan mensia. Kitai ulih manding sereta ngasaika mayuh bengkah utai baka asai, bau, bunyi, warna, sereta meda rampa menua. Kitai mega ulih merambu pasal jemah ila sereta ngiga tuju pengidup.

Nama runding nuan? Kati penau ke dikembuan kitai nya nyadi ketegal evolusi, laban kitai begunaka nya kena neruska pengidup sereta mansang mayuh? Tauka kati penau nya nunjukka pengidup kitai nya siti pemeri ari Penempa ti pengerindu?