Alam semesta amat teratur. Nitihka siti artikel ba majalah Astronomy, “Galaksi ukai betabur pia aja, tang ditusun enggau amat manah baka pukat empelawa.” Baka ni utai tu ulih nyadi? Bala saintis pechaya, tu nyadi engka ketegal sejenis utai ke enda ulih dipeda, ke dikumbai jirim gelap (dark matter). Jirim gelap tu “baka rangka ti enda ulih dipeda . . . ke nentuka galaksi, gugusan galaksi, tauka gugusan galaksi ke besai agi . . . ditusun nitihka endur sida empu.”

Nama kebuah alam semesta amat teratur? Kati utai nya nyadi kediri empu? Peratika utai ke disebut niang Allan Sandage. Iya dikumbai, “seiku pakar astronomi ti tebilang sereta dipebasa kena abad ke-20,” lalu iya pechaya Petara nya amat bisi.

 Ku iya madahka, “Aku enda pechaya alam semesta ti amat teratur tu ulih nyadi ari penyarut. Tentu bisi prinsip ke ngasuh nya teratur.”

Alam semesta ulih alai idup. Pikirka chunto daya nuklear lemi. Daya tu nentuka mata panas mancharka pengangat dalam penyampau ti tetap. Enti daya tu majak lemi, mata panas enda ulih nyadi. Tang enti daya tu nyadi kelalu kuat, mata panas ulih lenyau.

Iya ke bendar, ba alam semesta bisi mayuh daya ke bukai ti patut ditetapka enggau betul, nya baru utai idup ke bukai ulih bisi. Anil Ananthaswamy seiku penulis bup sains madahka, Enti siti ari daya nya enda ditetapka enggau betul, “bintang, planet, galaksi enggau semua utai idup enda ulih nyadi.”

Alam semesta rumah ti pemadu manah alai mensia. Bumi bisi atmosfera ti ngena, penyampau ai ti ngena, sereta sais bulan ti ngena. Tu ngasuh bumi kitai amat stabil. Siti artikel National Geographic madahka, “Nitihka pansik bala saintis, ketegal bisi geologi, ekologi, enggau biologi ba bumi, tu nyadika bumi nya kengka planet ti pemadu manah alai mensia diau.” a

Nitihka ku seiku penulis, sistem suria kitai jauh ari bintang ke bukai. Tang ketegal takah nya, baru meh utai idup ba bumi ulih nyadi. Enti endur kitai semak agi enggau bintang, enda ngira sekalika nya ba tengah tauka ba tisi galaksi Bima Sakti, panchar radiasi nya ulih ngachau nyawa kitai. Sekeda saintis madahka, kitai ba “zon ke ulih alai diau” di galaksi Bima Sakti.

Bepelasarka penemu iya pasal alam semesta enggau ukum alam, Paul Davies seiku pakar fizik madahka, “Aku enda ulih pechaya kitai tau idup ba alam semesta tu enggau pia aja tauka kediri empu. . . . Tentu bisi kebuah kitai tau bisi ditu.” Davies enda madahka Petara ke nempa alam semesta enggau mensia. Tang ari jaku iya tu, nama runding nuan deh? Pengudah kitai belajarka alam semesta enggau bumi ulih alai utai idup diau, kati nuan ngasaika semua utai nya ditempa tauka nyadi pia aja?