Seiku laki madahka: “Maya kami jadi melaki-bini, aku enggau bini aku ngembuan runding ti enda sebaka pasal ngayanka basa. Tang nya ukai reti iya, iya tauka aku ke salah, tang nya semina runding kami ke enda sebaka. Aku ngasaika bini aku patut lebih agi bebasaka aku maya iya bejaku.”

Seiku bini madahka: “Aku dibesaika dalam ruang bilik ti bejaku kasar, gaya mua ti balat ngayanka asai ati, lalu nyelepak maya orang bukai benung bejaku. Ba kami, nya nadai nama-nama. Tang, nya amat bebida enggau chara laki aku dibesaika.”

Basa ukai semina sekali-sekala aja diayanka, tang patut terus diayanka. Baka ni nuan bebasaka kaling pengidup?

Laki lebih agi begunaka basa. Bup Kudus bisi lalau ti manah ke laki: ‘Genap iku kita patut rinduka bini diri, baka kita ke rinduka diri empu.’ Ayat tu mega ngasuh: “Bini patut masa laki.” (Epesus 5:33) Laki bini sama deka ngasaika diri dikesayau sereta dipebasa. Tang laki lebih agi deka dipebasa. Seiku laki ke benama Carlos a madahka: “Laki patut ngasaika diri ulih ngereja semua utai, mutarka penanggul, sereta nyaga ruang bilik.” Enti bini bebasaka laki, nya meri penguntung ngagai iya empu sereta laki iya. Ku seiku bini ke benama Corrine madah: “Laki aku deka sayau agi ke aku, enti aku bebasaka iya.”

Bini mega patut dipebasa. Nya endang amat, laban laki ke enda bebasaka bini, enda sayauka bini iya. Daniel madah: “Aku patut bebasaka penemu sereta runding bini aku. Aku mega patut bebasaka emosi iya. Taja pan aku enda amat meretika utai ke diasaika iya, tang nya ukai reti iya aku patut enda ibuhka asai ati iya.”

Tiap iku orang ngembuan runding ti enda sama pasal ngayanka basa. Enda ngira nuan ngumbai diri udah ngayanka basa tauka enda, tang utai ti pemadu beguna nya, kaling pengidup nuan patut ngasaika nuan bebasaka iya. Tu meh utai ke dipelajarka seiku bini ke disebut tadi, ba baruh tajuk “Penanggul.” Iya madah: “Taja pan aku ngumbai diri udah ngayanka basa ngagai laki aku, tang enti iya enda ngasaika diri dipebasaka, nyadi, aku agi patut berubah.”

• Tuliska tiga iti pemanah kaling pengidup nuan. Enggau chara tu, nuan bisi kebuah ngayanka basa ngagai iya.

• Dalam minggu tu, uji peratika ulah nuan dalam beberapa pekara tu (ukai ulah kaling pengidup nuan).

Nengah jaku. Nitihka pansik pasal tikah, laki-bini ti ngembuan kaul ti manah deka nyebut utai ti positif, lima kali lipat lebih agi ari ke nyebut utai ti negatif. Tang laki-bini ti deka sarak deka nyebut utai ti negatif, suah agi ari nyebut utai ti positif.” b—Prinsip Bup Kudus: Jaku Dalam 12:18.

Tanya diri empu: ‘Kati aku nunjukka basa maya bejaku enggau kaling pengidup? Kati aku suah agi nganu ari ke muji? Baka ni tiun nyawa aku maya madahka penemu tauka penanggul?’ Kati kaling pengidup setuju enggau saut nuan?—Prinsip Bup Kudus: Kolosi 3:13.

Uji tu: Tetapka sekali sehari meri jaku puji ngagai kaling pengidup nuan. Kingatka pemanah ke ditulis nuan tadi. Nelebaka diri madah ngagai kaling pengidup utai ke dikerinduka nuan pasal iya.—Prinsip Bup Kudus: 1 Korint 8:1.

Nengah ulah. Seiku bini ke benama Alicia madahka: “Aku amat kisuk ngereja pengawa ba rumah, seraya laki aku nusun barang lalu nuchi pinggai iya empu. Aku ngasaika iya bebasaka aku. Nya ngasuh aku berasai beguna ba tikah kami.”

Tanya diri empu: ‘Kati chara aku begulai enggau kaling pengidup ngayanka basa? Kati aku meri chukup awak sereta ibuhka iya?’ Kati iya setuju enggau saut nuan?

Uji tu: Tuliska tiga chara nuan deka dipebasaka. Pinta meh kaling pengidup nuan ngereja utai ti sama, lalu betukar penemu enggau pangan diri ngambika seduai ulih ngayanka basa enggau chara ti ngena ngagai pangan diri. Befokus meh ngagai chara nuan patut ngayanka basa. Enti seiku udah dulu ngereja nya, seiku da agi deka nitih.