Riput Penginjil Perintah Petara

Iya Tetemuka Tuju ba Pengidup

JESUS madahka iya ngelala semua bedus iya. (John 10:14) Nya alai, orang ke bisi ati ti manah, rinduka pemaik enggau pengelurus, deka datai nyadi murid Jesus. Nya meh utai ke nyadi ngagai seiku indu ba Belgium. Iya tetemuka tuju ba pengidup. Tu meh cherita pengidup iya:

“Suba aku bisi penanggul kemurungan lalu berunding deka munuh diri. Tang, bisi sekali, Saksi-Saksi Jehovah ngetuk pintu rumah aku. Aku berasai amat gaga lebuh sida madah ngagai aku, semua penanggul ba dunya tu deka nadai agi. Tang aku enda rindu lebuh aku ninga, Petara ke ulih mai ubah tu. Nama kebuah? Lapan taun sebedau nya, aku badu agi ngagai gerija laban orang ba dia pura-pura. Tang pengudah aku bejaku enggau bala Saksi, aku sedar, sida ngajar utai ti bendar. Lalu, aku mega nemu diri begunaka Petara ba pengidup.

“Sayau amat, enda lama udah nya, aku enda ulih ngiga bala Saksi. Aku berasai balat ditekan lalu nginsap dua kutak insap ninting hari. Aku mega berengkah makai dadah sereta ngereja pengawa bemanang kena bejaku enggau aki aku ke udah nadai. Ketegal nya, aku diserang roh ti jai pengelama beberapa bulan. Nya ngasuh aku amat takut lalu aku enda berani kediri maya malam hari.

“Bisi sekali maya aku benung bejalai, aku nengah jalai ke jarang dikena aku. Dia aku meda sebuah bengunan ti amat besai. Aku tekenyit meda mayuh orang dia. Kebendar iya, Saksi-Saksi Jehovah benung ngaga Palan Gempuru. Aku ngenang baru bala Saksi ke kala datai ngagai rumah aku, lalu aku berunding, ‘Endaka manah gaya dunya tu enti semua orang idup baka sida?’

“Aku deka bala Saksi ngelawa aku. Nyadi aku madah ngagai beberapa iku orang ke gawa dia. Aku mega besampi ngagai Petara. Sepuluh hari udah nya, Saksi ke ngelawa aku suba, datai ngagai rumah aku. Iya nanya sekalika aku deka nyambung belajarka Bup Kudus. Aku terus besetuju. Aku mega setuju lebuh iya mai aku datai ngagai gempuru Saksi-Saksi Jehovah. Kebendar iya, udah lama aku ngiga orang ke amat gaga ati sereta rinduka pangan diri. Tu meh utai ti dipeda aku ba gempuru nya!

“Kenyau ari nya, aku datai ngagai semua gempuru. Dalam timpuh kira-kira tiga minggu, aku mujur badu nginsap. Aku mega muai semua bup ti bekaul enggau astrologi sereta musik ke muji Sitan. Asil iya, aku enda agi dikachau roh ti jai. Aku enggau naka ulih nitihka standard Jehovah, lalu tiga bulan udah nya, aku berengkah enggau pengawa nginjil. Enam bulan udah nya aku dibaptisa. Dua hari pengudah aku dibaptisa, aku nyadi pengerintis sukung.

“Aku beterima kasih ngagai Jehovah ketegal semua utai ti udah digaga Iya ke aku. Diatu pengidup aku bisi tuju. Endang amat, nama Jehovah nya baka menara ti tegap, sereta alai aku belindung. (Jaku Dalam 18:10) Aku ngasaika baka pemasmur ke nulis Masmur 84:10: ‘Sehari dalam Rumah Nuan manah agi ari seribu hari ba endur bukai. Manah agi aku jaga ba mua pintu Rumah Petara aku ari ti diau dalam langkau kain orang ke jai.’”

Indu ke lurus ati tu tetemuka tuju ba pengidup. Semua orang ke benung ngiga Jehovah mega deka ngasaika utai ti sama.