MAYUH orang deka nemu saut ngagai tanya tu. Bup Kudus meri jamin, Jehovah ninga sampi kitai. Tang, nama utai ke patut dikingatka kitai?

Aram kitai pulai baru ngagai jeman Jesus. Iya ngutuk tuai pengarap, laban sampi sida enda datai ari ati. Sida rindu minta puji sereta pepura ba mua mayuh orang. Jesus madah, “sida udah nerima upah sida.” (Matthew 6:5) Nama reti tu? Ketegal bala tuai pengarap deka ditemu orang, nya meh utai ke diulih sida. Tang Petara enda ningaka sampi sida. Nama utai ke dipelajarka kitai ari cherita tu? Enti kitai enda ibuhka peneka Petara, sereta enda nitihka jalai Iya, sampi kitai pan enda diterima Iya.

Kelimpah ari nya, Bup Kudus madah, ‘Petara endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.’ (Surat Kereja Rasul 10:34, 35) Nya alai, enda ngira bansa, jaku sereta gaya pengidup kitai, Jehovah sigi deka ningaka sampi kitai enti kitai bebasa sereta ngereja utai ti ngena ba mata Iya. Ari mansik Bup Kudus, nuan ulih belajarka chara ngelantangka ati Petara sereta nentuka sampi nuan diterima Iya. *

Bisi sekeda orang ngarapka Petara nyaut sampi sida nengah kereja ajih. Tang Bup Kudus madahka, kereja ajih nadai agi pengudah jeman bala rasul. (1 Korint 13:8-10) Ke bendar iya, indah ba jeman Bup Kudus pan, kereja ajih ukai pengawa ninting hari. Pengudah siti kereja ajih nyadi, engka beratus taun udah nya baru meh kereja ajih ke bukai nyadi. Enti baka nya, kati reti tu Iya enggai nyaut sampi kitai? Tentu enda! Aram kitai meda baka ni Iya nyaut sampi kitai.

Petara meri penemu-dalam. Jehovah nya pun penemu-dalam. Iya amat gerah jari. Iya meri penemu-dalam ngagai orang ke nitihka prinsip Iya.—James 1:5.

Petara meri roh kudus Iya sereta bantu ke bukai. Roh kudus Petara nya kuasa ti pemadu bekuasa ba alam semesta. Roh kudus Petara nulung kitai sabar, bulih pengelantang ba ati, sereta ngemansangka ulah ti manah. (Galatia 5:22, 23) Jesus madah, Petara sigi deka meri roh kudus Iya ngagai orang ke minta ari Iya.—Luke 11:13.

Petara meri penemu pasal utai ti bendar ngagai orang ke ngiga Iya. (Surat Kereja rasul 17:26, 27) Ba serata dunya, mayuh orang deka nemu pemendar pasal Petara, nama iya, tuju Iya ke bumi sereta mensia, enggau chara semak Iya. (James 4:8) Saksi-Saksi Jehovah selalu betemu enggau orang ke baruh ati, lalu nulung sida bulih saut ari Bup Kudus pasal topik tu.

Kati nuan mega benung ngiga Petara ti bendar? Enti au, engka Jehovah benung nyaut sampi nuan nengah majalah tu.