“Ukai Enggi Dunya”

“Dunya udah begedika sida, laban sida ukai enggi dunya.”—JOHN 17:14.

Reti: Jesus ukai sebagi ari dunya. Nya alai, iya enda enggau ba pengawa sosial tauka pengawa politik ba jeman iya. Iya madah, ‘Enti perintah aku ari dunya tu, bala orang ke nitihka aku tentu deka ngelaban ngambika aku enda diserahka ngagai orang Judah. Tang perintah aku ukai ari dunya tu.’ (John 18:36) Jesus mega meransang bala nembiak iya nyeliahka diri ari ulah, jaku, sereta pengawa ti ditagang dalam Bup Kudus.—Matthew 20:25-27.

Teladan Orang Kristian Abad Keterubah: Seiku penulis ke benama Jonathan Dymond madahka, “[Orang Kristian abad keterubah] enggai enggau [perang]. Sida sanggup dipechat, dijil tauka indah dibunuh.” Sida mega tetap neutral enda ngira utai ke nyadi. Kelimpah ari nya, standard moral sida mega enda sama enggau orang ba jeman nya. Rasul Peter madah ngagai orang Kristian abad keterubah, “Diatu sida tekenyit ati meda kita enda agi enggau sida ngereja utai nya, lalu sida bejai kita.” (1 Peter 4:4) Pakar sejarah Will Durant madah, “Orang kapir berasai ringat tauka enda nyamai ati laban orang Kristian bisi ulah ti manah sereta bepegai teguh ba pengarap sida.”

Sapa Nitihka Teladan Sida Kemayaharitu? Bup New Catholic Encyclopedia madahka, “Nya salah ba moral enti seseiku orang neutral sereta enggai megai senyata.” Nitihka riput ari gerempung hak mensia ba Afrika pasal pengawa munuh semua orang ari siti bansa ba menua Rwanda kena taun 1994, Reformierte Presse madahka, semua gerija bisi enggau pengawa tu. “Semina Saksi-Saksi Jehovah enda enggau.”

Seiku pengajar sekolah menengah berasai tusah ati lebuh berandau pasal Holocaust Nazi. Ku iya madahka, “Nadai raban tauka gerempung rayat biasa ke bepegai teguh ba utai ti dipechaya sida. Tang sida ngalahka diri lalu nerima semua utai ti bula, pengawa sereta ulah ti jai ke nyadi.” Tang, pengudah nerima penerang ari Muzium Pengingat Holocaust Amerika Syarikat, pengajar nya nulis, “Diatu baru aku nemu!” Iya belajar pasal Saksi-Saksi Jehovah ke bepegai teguh ba utai ti dipechaya sida taja pan diperinsa.

Bekaul enggau standard moral, majalah U.S. Catholic madah, “Mayuh nembiak Katolik kemayaharitu enda setuju laban gerija enda meransang orang ke bedau kawin diau begulai lalu ngereja pengawa seks.” Ba majalah tu, seiku tuai gerija madah, “Engka lebih ari 50 peratus orang ke datai ke gerija ngambika ulih kawin udah benung idup begulai.” Tang, nitihka The New Encyclopædia Britannica, Saksi-Saksi Jehovah “seruran nitihka standard moral ti tinggi ba pengidup sida.”