Bup Kudus Ngubah Pengidup

NAMA utai ti ditemu siku lelaki ari Scotland ke berega agi ari bisnis iya ti laku? Nama nulung siku lelaki ba Brasil muai tebiat ti enda bemoral sereta badu makai dadah kokain? Baka ni siku lelaki ari Slovenia ngetu gian ngirup? Bacha meh cherita ti ditusui sida.

“Pengidup aku baka ke manah.”—JOHN RICKETTS

TAUN ADA: 1958

MENUA ASAL: SCOTLAND

SEJARAH: BISI BISNIS TI LAKU

AKU KE SUBA: Lebuh aku dibesaika, pengidup aku senang. Apai aku siku pegawai ba soldadu Britain, nyadi kami sebilik suah pindah. Kelimpah ari Scotland, kami diau ba England, Jerman, Kenya, Malaysia, Ireland, enggau Cyprus. Kenyau ari umur lapan taun aku belajar ba asrama di Scotland. Aku graduet ari Universiti Cambridge.

Lebuh aku beumur 20 taun aku gawa ba bisnis minyak pengelama lapan taun. Keterubah, aku ngereja pengawa tu ba Amerika Selatan, udah nya ba Afrika, lalu ke penudi ba Australia Barat. Pengudah aku pindah ngagai Australia, aku bisi bisnis bukai lalu nyau kelama aku nyual bisnis nya.

Enggau duit ke diulih aku nyual bisnis nya, aku badu gawa maya umur aku 40 taun. Diatu aku bibas, nyadi aku ngena awak aku raun ngagai menua bukai. Ngena motosikal, aku raun ngelingi Australia penyampau dua kali. Lalu aku raun ngagai serata dunya. Pengidup aku baka ke manah.

BAKA NI BUP KUDUS NGUBAH PENGIDUP AKU: Indah sebedau badu gawa aku deka ngayanka terima kasih ngagai Petara ketegal pengidup aku ti manah. Laban aku dibesaika ba Gerija Anglican, nyadi aku berengkah ngagai gerija nya. Tang, gerija nya enda tentu ngajar utai ari Bup Kudus. Udah nya, aku ngagai gerija Mormon, tang aku enda minat laban sida enda bepanggai ba Bup Kudus.

Bisi sekali, Saksi Jehovah bisi ngetuk pintu rumah aku. Aku ulih meda ajar sida bepelasarka Bup Kudus. Sida bekunsika ayat 1 Timoti 2:3, 4 enggau aku. Ayat nya madah Petara “dekaka semua mensia diselamatka, lalu nemu penemu pasal pemendar.” Aku alit ati laban Saksi-Saksi Jehovah ukai semina ibuhka penemu Bup Kudus, tang pemendar Bup Kudus.

Belajarka Bup Kudus enggau Saksi-Saksi Jehovah nulung aku nemu pemendar Bup Kudus. Ambika chunto, aku belajar, Petara enggau Jesus nya ukai Triniti, tang dua iku ti bebida. (John 14:28; 1 Korint 11:3) Aku gaga ati belajarka pemendar ti senang dimereti. Tang aku mega pedis ati laban udah masau jam enggau pengering suba lebuh nguji belajarka utai ti pelesu sereta tusah dimereti!

Aku berengkah datai ngagai gempuru Saksi-Saksi Jehovah. Aku alit ati meda ulah sida ti peramah enggau bemoral. Ba aku, sida baka melikat! Pengerindu ke diayanka sida ngasuh aku andal, tu meh pengarap ti bendar.—John 13:35.

PENGUNTUNG KE DITERIMA AKU: Pengudah dibaptisa, aku betemu enggau siku indu ti amat manah ke benama Diane. Iya dibesaika ruang bilik Saksi-Saksi Jehovah, lalu iya bisi kualiti ti narit ati. Nyau kelama kami jadi. Diane siku kaban ti manah sereta nyukung aku. Tu berekat ari Jehovah.

Kami duai Diane ingin deka nulung ba endur ke begunaka bantu kena ngerembaika Berita Manah. Kena taun 2010, kami pindah ngagai Belize, Amerika Tengah. Ba ditu, kami nginjil ngagai orang ke rinduka Petara sereta ka ngelala Iya.

Aku berasai lantang laban udah tetemuka pemendar pasal Petara sereta jaku Iya, Bup Kudus. Laban aku gawa penuh jam ke Iya, aku ulih ngasaika pengaga ati lebuh ngajar orang Bup Kudus. Nadai utai ti manah agi ari meda Bup Kudus ngubah pengidup orang, baka ke nyadi ba pengidup aku. Diatu aku tetemuka chara meri terima kasih ngagai Petara ke pengidup aku.

“Sida amat manah enggau aku.”—MAURÍCIO ARAÚJO

TAUN ADA: 1967

MENUA ASAL: BRASIL

SEJARAH: GAYA PENGIDUP TI ENDA BEMORAL

AKU KE SUBA: Aku dibesaika ba Avaré, siti endur ti mit di nengeri São Paulo. Orang ke diau dia ukai bepangkat tinggi.

Apai aku mati lebuh indai aku benung ngandungka aku. Lebuh aku agi mit aku suah ngena gari indai aku lebuh iya nadai ba rumah. Aku berengkah nitihka gaya orang indu lalu orang ngumbai aku gay. Maya nya aku berengkah bisi hubungan seks enggau lelaki enda ngira umur sida.

Lebuh aku nembiak, aku suah ngiga orang ke ulih enggau aku bisi hubungan seks (lelaki tauka indu) ba sebarang endur—bar, pub, indah ba gerija. Maya bisi carnival aku ngena gari orang indu lalu enggau seraban orang ke bejugit samba. Aku amat tebilang.

Mayuh ari kaban aku nya gay, pelacur sereta orang ke gian makai dadah. Sekeda ari sida mai aku makai dadah kokain. Nyau kelama aku nyadi gian makai nya. Kekadang kami makai dadah nya sepemanjai malam. Ba maya bukai mega, aku ngurung diri sepemanjai hari ngambika ulih makai dadah. Aku nyadi amat kurus nyentukka orang ngumbai aku bisi penyakit AIDS.

BAKA NI BUP KUDUS NGUBAH PENGIDUP AKU: Maya nya aku betemu enggau Saksi-Saksi Jehovah. Sida amat manah enggau aku. Bisi sekali sida macha Rome 10:13 ngagai aku. Ayat tu madah: ‘Genap iku orang ke ngangauka nama Jehovah, deka diselamatka.’ Tu ngasuh aku sedar, amat penting kitai ngena nama Jehovah. Mayuh kali pengudah aku makai dadah sepemanjai malam, aku meda ke luar jenila lalu meda langit. Aku besampi ngagai Jehovah enggau sabak-sabak, ngambika Iya ulih nulung aku.

Aku mega berunding pasal indai aku ke tusah ati meda pendiau aku ke enda manah. Nya alai, aku bebendar ngetu makai dadah. Enda lama pengudah nya, aku belajar Bup Kudus enggau Saksi-Saksi Jehovah. Sida ngasuh aku andal, belajar Bup Kudus nya ulih nulung aku ngubah ulah ti enda manah, lalu aku mujur!

Seraya aku terus belajarka Bup Kudus aku sedar, aku patut ngubah pengidup aku. Ke pemadu tusah ba aku nya, ninggalka ulah homoseksual laban tu meh gaya pengidup aku ngelama tu. Utai ke ulih nulung aku nya, badu begulai enggau orang ke bisi ulah ti enda manah. Aku enda agi ngagai bar enggau pub.

Taja pan semua tu enda senang, tang aku gaga tai laban Jehovah ibuhka aku sereta nemu usaha ke digaga aku. (1 John 3:19, 20) Kena taun 2002, aku badu ngereja ulah homoseksual lalu aku mega dibaptisa nyadi siku ari Saksi-Saksi Jehovah.

PENGUNTUNG KE DITERIMA AKU: Indai aku amat alit ati meda ubah ke digaga aku. Nyadi iya pan berengkah belajarka Bup Kudus. Sayau amat, iya strok. Taja pan iya strok, iya terus ngenalamka pengerindu iya ngagai Jehovah sereta jaku Iya, Bup Kudus.

Sepemanjai lapan taun tu, aku nginjil penuh jam sereta ngena nulung orang bukai belajarka Bup Kudus. Aku ngaku diri agi ngelaban pengingin ti salah. Tang aku pechaya Jehovah gaga ati ke aku laban aku bebendar ngelaban pengingin nya.

Lebuh semak ngagai Jehovah sereta idup nitihka standard Iya, aku ulih ngumbai diri berega. Diatu aku amat gaga ati.

Aku Kelalu Balat Ngirup.—LUKA ŠUC

TAUN ADA: 1975

MENUA ASAL: SLOVENIA

SEJARAH: ORANG KE PENGIRUP

AKU KE SUBA: Aku ada ba Ljubljana, indu nengeri Slovenia. Maya agi mit, pengidup aku nadai penanggul. Tang lebuh aku beumur empat taun, apai aku munuh diri. Pengudah nya, indai aku tepaksa bebendar gawa ngemesaika kami duai madi aku.

Lebuh aku beumur 15 taun, aku pindah ngagai rumah ini aku. Aku rindu begulai enggau ini laban mayuh ari kaban aku diau semak rumah ini. Pia mega, ba rumah ini aku bibas. Lebuh aku beumur 16 taun, aku berengkah begulai enggau orang ke rindu ngirup maya ujung minggu. Aku nejuka buk aku panjai lalu nitihka gaya begari sida ti enda manah. Nyau kelama aku berengkah nginsap.

Taja pan aku kala nguji mayuh jenis dadah, tang aku rindu agi ngirup ai bisa. Keterubah aku semina ngirup beberapa gelas aja. Tang pengudah nya aku ulih nembuka lebih ari sebotol sekaligus. Aku ngelalaika tebiat ti enda manah tu. Nyadi nadai orang nemu aku udah ngirup mayuh ai bisa baka wain, beer, vodka, kelimpah ari sida nyium seput aku maya berandau.

Mayuh kali pengudah disco, aku patut nulung bala kaban aku ke udah mabuk taja pan ai bisa ke diirup aku nya jauh mayuh agi ari sida. Bisi sekali aku ninga siku kaban madah aku nya siku orang ke pengirup ti enda nemu puas. Dalam jaku Slovenia, tu jaku kelese. Ketegal jaku tu, aku amat pedis ati.

Aku berengkah berunding pasal tuju pengidup aku. Aku berasai nadai guna sereta masau jam pengidup aku.

BAKA NI BUP KUDUS NGUBAH PENGIDUP AKU: Maya nya aku bisi meratika siku orang ke sama kelas enggau aku udah berubah sereta enda kasar agi. Aku mai iya ngagai café laban aku deka nemu nama utai ke ulih nulung iya berubah. Iya madah, iya benung belajar Bup Kudus enggau Saksi-Saksi Jehovah. Iya bekunsika utai ti dipelajar iya, lalu utai ke dipadah iya negu ati aku. Kebendar iya, kenyau ari mit, aku enda minat pasal agama. Nyadi tu meh keterubah kali aku ninga pasal ajar Bup Kudus. Aku berengkah datai ngagai gempuru Saksi-Saksi Jehovah lalu belajar Bup Kudus enggau sida.

Pemendar Bup Kudus amat ngalitka ati. Siti ari nya, jaku benabi Bup Kudus pasal jeman kitai ke dikumbai “hari ti penudi.” (2 Timoti 3:1-5) Aku mega belajar Petara deka ngemunaska orang ke jai ari dunya tu lalu ngaga bumi nyadi Paradais ngambika orang ke manah ulih diau dia belama iya. (Masmur 37:29) Aku deka ngubah pengidup aku ngambika aku ulih nyadi sebagi ari nembiak Jehovah.

Aku berengkah madahka utai ti dipelajar aku ari Bup Kudus ngagai bala kaban aku. Mayuh ari sida ngeleseka aku, tang reaksi sida ngasuh aku sedar sida ukai kaban ti manah. Aku mega sedar ulah aku ke pengirup mega bisi kaul enggau orang ke enggau aku begulai. Kaban ke baka tu semina deka ngelantangka diri lalu ngirup nyentukka mabuk ba ujung minggu.

Aku badu begulai enggau sida lalu aku berengkah ngiga kaban ari Saksi-Saksi Jehovah. Lebuh begulai enggau sida, tu amat meransang aku. Sida amat rinduka Petara sereta deka nitihka idup ti sejalai enggau peneka Iya. Nyau kelama aku mujur ngubah ulah aku ke pengirup.

PENGUNTUNG KE DITERIMA AKU: Aku amat beterima kasih ngagai Jehovah laban aku enda begunaka ai bisa kena gaga ati. Aku enda nemu nama utai udah nyadi enti aku enda ngubah gaya pengidup aku ke suba. Aku pechaya, pengidup aku diatu jauh manah agi ari suba.

Pemanjai tujuh taun tu aku bisi peluang gawa ba pampang opis Saksi-Saksi Jehovah di Slovenia. Pengidup aku bisi reti pengudah ngelala Jehovah sereta nyembah Iya.