Lebuh aku ada, apai indai aku bisi kebun ti mit ba siti endur ti jauh ba Galicia, timur Sepanyol. Aku anak ke empat ari lapan iku diri menyadi. Ruang bilik kami gaga ati. Maya nya, seiku anak ari ruang bilik ba Sepanyol, kesuah iya deka nyadi indu sembiang. Ba ruang bilik kami, aku enggau dua iku menyadi aku nyadi indu sembiang.

Lebuh aku beumur 13 taun, aku nitih menyadi indu aku ke tuai nyadi indu sembiang ba Madrid. Gaya ba dia enda ngerinduka ati—semina bisi atur, enggau sampi. Maya tumu pagi, kami begempuru ba gerija ti mit sereta belemati, tang kesuah iya runding aku kusung. Udah nya, kami nyanyi lagu pengarap lalu sembiang Misa, dalam jaku Latin. Aku enda mereti sebarang utai sereta enda berasai semak enggau Petara. Pengidup aku sunyi. Lebuh aku betemu enggau menyadi indu aku ke tuai, kami semina nyebut, “Puji Maria ti pemadu tuchi.” Kami semina dikemendarka bejaku pengelama tiga puluh minit aja. Pekara tu amat bebida enggau ruang bilik aku ti lantang! Aku berasai kediri lalu seruran nyabak.

Taja pan enda kala semak enggau Petara, aku tetap nyadi indu sembiang maya umur 17 taun. Ke bendar iya, aku semina ngereja utai ke diasuh aja. Aku berengkah kakang ati sekalika aku dipilih Petara nyadi indu sembiang. Bala indu sembiang seruran madah, orang ke bisi runding ke baka tu deka tama neraka! Tang aku agi kakang ati. Aku nemu Jesus enda ngasuh kitai ngenyauhka diri ari orang bukai. Tang, iya mengkang kisuk sereta ngajar orang bukai. (Matthew 4:23-25) Lebuh beumur 20 taun, aku enda beminat agi deka nyadi indu sembiang, nyentukka ketuai indu sembiang ngasuh aku badu. Engka iya irauka aku ngasut orang bukai. Nya alai aku ninggalka convent.

Apai indai meretika asai ati aku lebuh aku pulai ke rumah. Ketegal nadai kereja ba kampung, aku pindah ngagai Jerman. Seiku menyadi lelaki aku diau din. Iya enggau raban Komunis orang Sepanyol ke amat aktif. Aku nyamai begulai enggau orang ke ngetanka hak pekereja sereta hak orang indu. Nyadi aku enggau raban nya lalu pengujung nya aku jadi enggau seiku ari sida. Aku berasai puas laban ulih nyadung litaricha Komunis sereta enggau pengawa ngelaban perintah.

Tang, aku sekali agi berasai asa laban bala Komunis enda ngereja utai sejalai enggau ajar sida. Ba taun 1971, asai ati asa nya nyadi balat agi lebuh sekeda bala Komunis nunu Opis Kedutaan Sepanyol ba Frankfurt. Sida ngereja nya laban deka mantah pemerintah Sepanyol ke enda lurus.Tang aku enda setuju enggau utai ke digaga sida.

Pengudah anak keterubah kami ada, aku madah ngagai laki aku, aku deka badu enggau aum Komunis. Aku berasai kediri laban nadai orang ngabas aku enggau anak aku. Aku berunding pasal tuju pengidup. Kati nya bisi penguntung ngubah pengidup orang?

Ba taun 1976, dua iku Saksi bansa Sepanyol datai ngagai rumah kami, lalu aku nerima litaricha Bup Kudus ari sida. Kali kedua sida datai, aku betanyaka mayuh utai pasal pemerinsa, bechiping entara bansa, sereta pengawa ke enda lurus. Aku tekenyit lebuh sida ngena Bup Kudus nyaut tiap iti tanya! Aku berengkah belajarka Bup Kudus.

Terubah iya, aku semina deka bisi penemu. Tang semua nya berubah lebuh aku enggau laki aku datai ngagai gempuru Saksi-Saksi Jehovah. Maya nya, kami bisi dua iku anak. Bala Saksi mai kami sereta nulung nyaga anak kami lebuh ba gempuru. Aku berengkah rinduka sida.

Tang, aku agi kakang ati ngagai pengarap. Aku ngaga pemutus ngelawa ruang bilik aku ba Sepanyol. Aya aku, seiku paderi, lalu iya nguji nagang aku ari belajarka Bup Kudus. Tang bala Saksi ba dia mayuh nulung aku. Sida ngena Bup Kudus nyaut tanya aku, sama baka Saksi-Saksi Jehovah ba Jerman. Aku keran deka belajarka Bup Kudus baru pengudah aku pulai baru ngagai Jerman. Taja pan laki aku badu belajarka Bup Kudus, aku tetap enggau pengeran aku. Ba taun 1978, aku dibaptisa nyadi seiku ari Saksi-Saksi Jehovah.

Penemu Bup Kudus ti betul udah meri aku tuju sereta jalai pengidup ti terang. Ambika chunto, 1 Peter 3:1-4 meransang bini “nunduk” ngagai laki “enggau pemadas ulah” sereta ngemansangka ulah ti “nelap sereta imun, ti pemadu berega di mua Petara.” Prinsip tu udah nulung aku ngereja tanggung pengawa aku ke nyadi bini enggau indai.

Diatu aku udah nyadi Saksi pengelama 35 taun. Aku gaga ati gawa ke Petara lalu nyadi sebagi ari ruang bilik ti sama nyembah Jehovah. Aku amat gaga ati laban empat ari lima iku anak aku mega nyadi Saksi.