SEIKU indu balu ke miskin merap anak lelaki iya, nya anak tunggal iya. Iya enda ulih pechaya ke utai ti dipeda iya. Baru tadi iya ngerendut anak iya ke udah mati. Diatu, indu nya meda anak iya udah diidupka baru. Iya gaga amat ati meda anak iya tuchum. Ku temuai iya: “Tu anak nuan. Iya idup!”

Pekara tu nyadi kira-kira 3,000 taun ti udah. Nuan ulih macha pasal pekara tu ba 1 Raja bab 17. Temuai nya Elijah, nabi Petara. Sapa indu balu nya? Kitai enda nemu nama iya, tang iya diau ba nengeri Sarepat. Pengangkat anak iya ari mati nya siti pekara ti ngeringka pengarap iya. Enti kitai macha jerita pasal iya, kitai deka belajarka utai ti beguna bendar ba pengidup.

Jehovah madahka kemarau ti panjai deka nyadi ba menua Israel maya Raja Ahap ke jai merintah. Lebuh kemarau berengkah, Petara ngelalaika Elijah ari Ahap, lalu ngena burung kak mai roti enggau dagin ke pemakai iya. Udah nya Jehovah madahka Elijah: “Alai nuan mansang diatu ngagai nengeri Sarepat, semak Sidon, lalu diau dia. Aku udah ngasuh siku indu balu, ti diau dia, nupi nuan.” —1 Raj. 17:1-9.

Lebuh Elijah datai ba Sarepat, iya meda seiku indu balu ke miskin benung ngumpul kayu api. Kati iya nya indu ke deka nyediaka pemakai ke nabi Petara nya? Baka ni iya ulih ngereja nya enti iya amat miskin? Taja pan Elijah engka kakang ati, iya berengkah berandau enggau indu nya. Ku Elijah: “Endu, uji bai ai irup ngagai aku.” Lebuh indu nya mansang ngambi ai, Elijah ngangau: “Lalu bai mega roti ke aku.” (1 Raj. 17:10, 11) Indu balu nya enda irau meri ai ngagai orang ke enda dikelala, tang meri orang nya roti utai ti berat ba iya.

 Ku indu nya nyaut: ‘Aku besumpah dalam nama Jehovah Petara nuan ti idup, aku nadai roti. Utai ti dikemisi aku nya semina segenggam aja tepung dalam sigi mangkuk, enggau minyak kana mimit dalam kebuk. Aku datai ditu deka ngumpul kayu api, lalu aku baru deka pulai ke rumah lalu nyendiaka utai ti mimit nya ke anak aku enggau ke aku empu. Nya meh naka kami duai ulih makai. Udah nya kami duai deka mati keberuran.’ (1 Raj. 17:12) Nama ulih dipelajarka kitai ari randau tu?

Indu balu nya nemu Elijah nya bansa Israel ke nyembah Petara. Kitai nemu laban ku iya: ‘Aku besumpah dalam nama Jehovah Petara nuan ti idup.’ Iya baka ke nemu sekeda pekara pasal Petara bansa Israel, tang iya enda nyembah Jehovah. Iya enda ngumbai Jehovah nya “Petara aku.” Iya diau ba Sarepat, semak Sidon, ke dipegai menua Ponisia. Nya alai, menua Sarepat diuan mayuh orang ke nyembah Baal. Taja pia, Jehovah meda utai ti manah ba ati indu balu nya.

Taja pan indu balu ke miskin ari Sarepat nya diau ba entara orang ke nyembah engkeramba, iya ngayanka pengarap. Jehovah nganjung Elijah ngagai indu balu nya ke penguntung seduai iya. Ari tu, kitai ulih belajarka utai ti beguna.

Ukai semua orang ke diau ba Sarepat nyembah Baal nya jai. Enggau nganjung Elijah ngagai indu nya, Jehovah nunjukka Iya meda orang ke bisi ati ti manah, taja pan bedau nyembah Iya. Endang amat, “dalam semua bansa, barang sapa nangika Iya, lalu ngereja utai ti ngena sigi dikerinduka Iya.”—SKR. 10:35.

Kati bisi orang ke ba endur nuan nginjil baka indu balu ari Sarepat nya? Taja pan sida engka dikelingi orang ke megai pengarap pelesu, sida engka keran ke utai ti manah agi. Sida engka nadai tauka semina bisi penemu ti mimit pasal Jehovah, nya alai sida begunaka bantu enti deka megai pengarap ti bendar. Kati nuan benung ngiga sereta nulung orang ke baka nya?

Peratika nama diasuh Elijah gaga indu balu nya. Iya baru madahka Elijah, iya semina bisi mimit aja pemakai agi tinggal ke iya enggau anak iya. Udah nya, seduai iya deka mati keberuran. Tang, nama ku Elijah? “Anang irau, Endu,” ku Elijah bejaku enggau iya. ‘Mupuk meh nuan lalu sediaka pemakai nuan. Tang gaga dulu siti tuku roti ti mit ari utai ti dikemisi nuan, lalu bai utai nya ngagai aku. Udah nya baru nuan nyendiaka teda utai nya ke seduai menyanak. Laban tu utai ti disebut Jehovah Petara ke disembah orang Israel, “Mangkuk nya deka seruran bisi tepung, lalu kebuk nya deka seruran bisi minyak, sebedau Aku, ti TUHAN [Jehovah], ngasuh hari ujan.”’—1 Raj. 17:11-14.

Sekeda kitai engka berunding: ‘Enda patut aku nyerahka kengka pemakai ti dikemisi aku.’ Tang, indu balu nya enda berunding baka nya. Taja pan iya enda entu ngelala Jehovah, iya pechayaka Elijah lalu ngereja utai ti diasuh Elijah. Peminta tu balat nguji pengarap indu balu nya. Tang, iya ngaga pemutus ti manah!

Petara merekat indu balu ke miskin nya. Baka ke disemaya Elijah, Jehovah nambahka pemakai indu balu nya ngambika chukup ke pemakai Elijah, iya  enggau anak iya nyentuk ke musin kemarau abis. Amat, ‘munyi jaku ti udah disebut Jehovah ngena Elijah, mangkuk nya enda kala nadai tepung, lalu kebuk nya enda kala nadai minyak.’ (1 Raj. 17:16; 18:1) Enti indu nya nulak peminta Elijah, kengka roti ke digaga ari tepung enggau minyak ke dikemisi iya engka amat nyadi pemakai ti penudi. Tang iya ngayanka pengarap, pechayaka Jehovah, lalu nyediaka pemakai ke Elijah dulu.

Ari tu kitai ulih belajarka, Petara merekat orang ke ngayanka pengarap ba Iya. Jehovah deka nulung nuan, enti nuan pechaya ke Iya maya penaluk nuan diuji. Iya deka nyadi Pemeri, Pengelindung, enggau Pangan kena nulung nuan betan ngelaban penguji.—P-sut 3:13-15.

Ba taun 1898, Zion’s Watch Tower nerangka ajar pasal indu balu tu: “Enti indu balu nya bisi pengarap sereta ngasika Elijah, iya deka bulih tulung ari Jehovah. Enti iya enda ngayanka pengarap ba Jehovah, indu balu ke bukai engka deka dipilih. Majalah nya mega madahka utai ti sama pasal kitai. Kekadang Jehovah nejuka pengarap kitai diuji. Majalah nya madah, enti kitai bisi pengarap, kitai deka bulih berekat; enti kitai nadai pengarap, kitai deka lenyau berekat.”

Lebuh kitai merinsa kena penguji, kitai patut ngiga iring Jehovah ba Bup Kudus enggau litaricha kitai. Udah nya, kitai patut nitihka iring Jehovah, taja pan iya engka tusah dititihka. Kitai deka diberekat enti kitai ngereja tu: ‘Panggaika diri ba Jehovah enggau pengabis ati nuan. Anang manggaika diri ba penemu diri empu. Awakka Jehovah seruran ngiring nuan, nya baru Iya deka nunjukka jalai ti ngena ngagai nuan.’—J-lam 3:5, 6.

Siti da agi pekara nguji pengarap indu balu nya. Ku Bup Kudus madah: “Nyau kelama udah bekau nya, anak indu balu nya sakit. Iya majak balat-sebalat, lalu mati. Ku indu nya bejaku enggau Elijah, ‘Nabi, nama kebuah nuan ngereja utai tu ngagai aku? Kati nuan datai ditu deka ngasuh Petara ngingatka dosa aku, lalu ngasuh anak aku mati?’” (1 Raj. 17:17, 18) Nama reti jaku indu balu tu?

Kati indu nya ngingatka dosa ke ngachau ati iya? Kati iya ngumbai pemati anak iya nya ukum ari Petara, lalu Elijah dianjung Petara mai pemati ke anak iya? Bup Kudus nadai madah, tang kitai nemu tu: Indu balu nya enda nuduh Petara ngereja utai ti enda lurus.

Elijah tentu tekenyit enggau pemati anak indu balu nya. Pia mega, enggau penemu ti ngumbai iya ngasuh utai tu nyadi. Elijah mai nembiak ke udah mati nya ke sadau, lalu besampi enggau nyawa ti inggar: ‘O Jehovah Petara aku, nama kebuah Nuan udah ngereja utai ti ngenyai tu ngagai indu ke balu tu? Iya udah manah enggau aku lalu ngintu aku, lalu diatu Nuan udah munuh anak iya!’ Elijah balat tusah ati ngenangka nama Jehovah engka enda dipebasa, enti indu ke manah sereta deka nerima temuai nya ditejuka balat agi merinsa. Nya alai Elijah besampi: ‘O Jehovah Petara aku, asuh nembiak tu idup baru!’—1 Raj. 17:20, 21.

Jehovah ninga. Indu balu nya udah ngayanka pengarap sereta ngintu Elijah. Nyadi, Petara nejuka nembiak nya mati laban Iya deka ngangkatka nembiak nya ari mati, lalu tu meri peluang ngagai orang ke jemah ila. Tu pengangkat ari mati ti keterubah dipadah ba Bup Kudus. Jehovah ningaka sampi Elijah, lalu ngidupka nembiak nya baru. Pikirka pengaga ati indu balu nya lebuh Elijah madah: “Tu anak nuan. Iya idup!” Indu balu nya madahka Elijah: ‘Diatu baru aku nemu nuan tu amat nabi, lalu Jehovah sigi amat bejaku ngena nuan!’—1 Raj. 17:22-24.

Jerita ba 1 Raja bab 17 nadai agi nyebut pasal indu balu tu. Indu tu engka nyadi nembiak Jehovah ti taluk laban Jesus kala nyebut pasal iya. (Luk. 4:25, 26) Jerita iya ngajar kitai, Petara merekat orang ke ngereja utai ti manah ngagai nembiak Iya. (Mat. 25:34-40) Tu nunjukka Petara ngintu orang ke tetap ati ngagai Iya taja pan maya sida benung natka penguji ti besai. (Mat. 6:25-34) Jerita tu mega madahka kitai Jehovah bisi pengeran sereta kuasa ngangkatka orang ari mati. (SKR. 24:15) Tu endang kebuah ti manah ngingatka indu balu ari Sarepat.