Bup Kudus madahka kitai pengujung nya deka mai pengerusak: “Lebuh maya nya ila penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sehari tu . . . Lalu enti penyampau hari nya enda dikurangka, nadai mensia ulih diselamatka.” (Matthew 24:21, 22) Tang Petara besemaya ngagai kitai, mayuh mensia deka selamat: ‘Dunya . . . deka lenyau, tang orang ke ngereja peneka Petara deka idup belama iya.’—1 John 2:17.

Enti nuan deka selamat, lalu “idup belama iya,” nama patut digaga nuan? Patut nuan berengkah nyimpan pemakai tauka barang bukai? Enda. Bup Kudus ngansak kitai ngenuluka utai bukai. Kitai macha: ‘Nya alai laban semua utai deka dirusak magang ngena chara nya, baka ni ku gaya kita patut idup? Kita patut diau kudus sereta nangika Petara, nganti sereta minta Hari Petara datai enggau jampat.’ (2 Peter 3:10-12) Ayat tu madahka “semua utai” ke deka dirusak nyengkaum perintah ke enda lurus ba dunya, enggau semua sida ke nyukung perintah nya, tang ukai nyukung Perintah Petara. Endang amat, enti kitai nyimpan barang, nya enda ulih nyelamatka kitai maya pengujung datai.

Iya ke bendar, kitai ulih selamat enti kitai nyembah Petara Jehovah sereta belajar pasal ulah enggau pengawa manah ti ngerinduka ati Iya. (Sepaniah 2:3) Ari ke nitihka orang mayuh kemaya hari tu, tauka enda ibuhka tanda ke nunjukka kitai idup ba maya ti semak enggau pengujung, kitai patut ingatka “Hari Petara datai enggau jampat.” Saksi-Saksi Jehovah ulih ngena Bup Kudus madahka nuan, baka ni chara ulih selamat maya pengujung nya datai.