1-3. Nama kebuah seiku menyadi Kristian ke indu pechaya Jehovah nemu utai ti diguna iya?

LANA, seiku pengerintis biasa, semampai ingatka utai ke nyadi lebuh iya ngelawa menua Jerman ba taun 2012. Iya ngasaika Jehovah nyaut dua iti sampi iya. Lebuh iya ba kerita api mansang ngagai padang bilun, iya minta Jehovah nulung iya ngambika tetemuka orang ke ulih endur iya nginjil. Lebuh iya datai ba padang bilun, baru iya nemu bilun ke deka dikena iya ditangguh ngagai hari siti. Lana minta tulung ari Jehovah laban duit iya udah mayuh dikena, lalu iya begunaka endur bemalam.

² Pengudah Lana tembu besampi, iya ninga orang ngangau, “Lana, nama gaga nuan ditu?” Nya seiku nembiak lelaki ke kala sama sekula enggau iya. Lelaki nya enggau indai sereta ini iya. Sida nganjung iya ke deka mupuk ngagai Afrika Selatan. Lebuh Lana madahka sida pasal penanggul iya, indai enggau ini lelaki nya mai Lana bemalam ba rumah sida. Sida nanya iya mayuh utai pasal pengarap iya enggau pengawa iya ke nyadi pengerintis.

 ³ Pengudah makai pagi siti, Lana nyaut mayuh tanya ari seduai iya ke bekaul enggau Bup Kudus. Lana nanya baka ni chara ulih ngiga seduai iya ngambika orang bukai ulih datai nyaut tanya seduai iya. Lana datai ba menua iya enggau selamat, lalu iya agi nyadi pengerintis. Iya ngasaika Jehovah ningaka sampi iya, nemu utai ti diguna iya sereta nulung iya.—Mas. 65:2.

4. Nama deka dikerandauka kitai?

⁴ Lebuh kitai bisi penusah ti enda disadang, kitai ulih besampi minta tulung ari Jehovah, lalu Iya gaga ati ningaka sampi kitai. (Mas. 34:15; J-lam. 15:8) Tang, chunto sampi Jesus ngajar kitai pasal utai bukai ke patut disampika kitai. Ba pelajar tu, kitai deka berandauka baka ni empat iti peminta ke penudi ba chunto sampi nya ulih nulung kitai tetap ati ngagai Jehovah.—Bacha Matthew 6:11-13.

5, 6. Nama kebuah Jesus ngajar kitai minta “pemakai umbas dipakai kami,” taja pan kitai bisi mayuh pemakai?

⁵ Jesus ngajar kitai minta “pemakai umbas dipakai kami,” ukai semina “pemakai umbas dipakai aku.” Victor, seiku tuai ti ngabas ba menua Afrika nerangka: “Aku suah beterima kasih ngagai Jehovah laban aku enggau bini aku enda kelalu irauka pasal ari ni pemakai ke deka diempa kami, tauka irau pasal sapa ke deka mayar siwa. Bala menyadi Kristian ngintu kami duai enggau manah ninting hari. Aku mega besampi ngambika orang ke nulung kami duai ulih mutarka penanggul ba belanja ke ditapi sida.”

⁶ Kitai engka bisi mayuh pemakai, tang mayuh bala menyadi Kristian kitai miskin. Bisi mega udah dituntung penusah ngenyit. Kitai ulih besampi ke sida sereta nulung sida. Chunto, kitai ulih bekunsi enggau sida utai ti dikemisi kitai. Kitai mega ulih meri duit pemeri enggau tetap kena nyukung kereja ke digaga nembiak Jehovah di serata dunya. Kitai nemu pemeri kitai nya ulih nulung menyadi Kristian ke begunaka bantu.—1 Jhn. 3:17.

7. Baka ni Jesus ngajar ngambika kitai “anang irauka pasal pagila”?

⁷ Pengudah Jesus ngajar chunto sampi nya, iya ngajar kitai anang angkunka reta. Iya madah enti Jehovah nyaga bungai ti tumbuh ba babas, “enda ke Iya deka ngari kita? Naka meh pengemit pengarap kita. Nya alai, anang irau lalu nyebut: . . . ‘Nama gari ti deka dikena kitai?’” Udah nya iya ngulang: “Anang irauka pasal pagila.” (Mat. 6:30-34) Kitai enda patut irauka pasal utai ti diguna kitai dudi hari. Tang kitai patut puas ati enggau utai ti dikemisi kitai ninting hari. Chunto, kitai ulih besampika pasal endur diau, kereja kena melanja diri sebilik, enggau penemu kena ngaga pemutus ti betul pasal pengerai kitai. Tang, bisi utai bukai ke berat agi patut disampika kitai.

8. Jaku Jesus pasal pemakai ke diempa kitai ninting hari ngingatka kitai pasal utai nama? (Peda gambar ba pun pelajar.)

⁸ Jaku Jesus pasal pemakai ke diempa kitai ninting hari ngingatka kitai pasal utai bukai ti dipadahka iya: ‘Mensia enda ulih idup makai roti aja, tang beridup ba genap leka jaku ti pansut ari mulut Petara.’ (Mat. 4:4) Nya alai, kitai patut besampi ngambika Jehovah terus ngajar kitai, lalu meri kitai utai ti diguna kitai kena mengkang semak ngagai Iya.

9. Nama kebuah dosa kitai baka utang?

⁹ Ku Jesus: “Ampun kami penyalah [utang] kami.” Ba maya bukai, iya nyebut: “Ampun kami dosa kami.” (Mat. 6: 12; Luk. 11:4) Iya nyebut baka tu laban dosa kitai baka utang. Ba taun 1951, The Watchtower nerangka lebuh kitai bedosa, kitai baka ke berutang ngagai Jehovah. Kitai berutang ngasi enggau pengerindu ba Jehovah. Nya alai, enti kitai bedosa ngelaban Petara, kitai enda mayar utang kitai ba Iya. The Watchtower madahka, enti Jehovah deka, Iya ulih mutuska kaul Iya enggau kitai. Ba dia mega madahka: “Dosa nadai pengerindu ngagai Petara.”—1 Jhn. 5:3.

10. Nama kebuah Jehovah ulih ngampunka dosa kitai, lalu baka ni asai ati kitai pasal utai tu?

¹⁰ Kitai beterima kasih ngagai Jehovah laban meri Jesus nyadika tebus kena ngampunka dosa kita! Kitai begunaka pengampun ari Jehovah ninting hari. Jesus udah mati ke kitai kira-kira 2,000 taun. Tang kitai bulih penguntung ari tebus nya kemaya hari tu. Kitai patut seruran beterima kasih ngagai Jehovah ke meri hadiah ti berega tu. Nadai seiku ari kitai ulih mayar tebus ke ulih dikena ngelepaska kitai ari dosa enggau pemati. (Bacha Masmur 49:7-9; 1 Peter 1:18, 19.) Leka jaku “ampun kami dosa kami” ba chunto sampi ngingatka kitai enggau bala menyadi Kristian kitai sama begunaka tebus. Jehovah mega deka kitai berundingka bala menyadi Kristian kitai sereta kaul sida enggau Iya. Tu nyengkaum kitai patut jampat-jampat ngampunka sida enti sida besalah ngelaban kitai. Kesuah agi, nya semina penyalah ti mit. Tang enti kitai ngampunka bala menyadi Kristian kitai, tu nunjukka kitai rinduka sida. Kitai mega nunjukka kitai beterima kasih ngagai Jehovah ke udah ngampunka kitai.—Kol. 3:13.

11. Nama kebuah kitai patut ngampunka orang bukai?

¹¹ Laban kitai enda sempurna, kekadang engka tusah deka ngampunka orang ke salah enggau kitai. (Lew. 19:18) Enti kitai berengkah bejaku pasal utai ti udah digaga sida ba kitai, orang bukai ba gempuru engka kena rampit, lalu tu deka ngachau penyerakup ba gempuru. Enti kitai ngelakka tu terus nyadi, tu  nunjukka kitai enda beterima kasih ke tebus ti diberi Petara. Tu mega ngujungka kitai enda bulih berekat ari tebus nya. (Mat. 18:35) Enti kitai enggai ngampunka orang bukai, Jehovah pan enggai ngampunka kitai. (Bacha Matthew 6:14, 15.) Pia mega, enti kitai deka Jehovah ngampunka kitai, kitai enda patut terus ngereja utai ti dipegedika Iya.—1 Jhn. 3:4, 6.

12, 13. (a) Nama nyadi ngagai Jesus pengudah iya dibaptisa? (b) Nama kebuah kitai enda patut nyalahka orang bukai enti kitai alah kena uji? (c) Nama ditunjukka Jesus ke tetap ati nyentukka mati?

¹² Leka jaku “anang mai kami ngagai penguji” ba chunto sampi nya ngingatka kitai nama utai ke nyadi ngagai Jesus enda lama pengudah iya dibaptisa. Roh kudus Petara mai iya ngagai menua puang ‘ngambika iya diuji Sitan.’ (Mat. 4:1; 6:13) Nama kebuah Jehovah ngelakka utai tu nyadi? Jehovah nganjung Jesus ke dunya kena mutarka penusah ke nyadi, pengudah Adam seduai Hawa nulak kuasa merintah Jehovah. Seduai iya ke ngelaban Petara ninggalka tanya ti begunaka awak kena nyaut. Chunto, kati chara Jehovah ngaga mensia nya enda betul? Ulih mensia ti sempurna mengkang tetap ati ngagai Jehovah lebuh diuji Sitan? Lalu kati nya manah agi enti mensia merintah diri empu? (P-kal. 3:4, 5) Jemah ila, lebuh semua tanya Sitan udah disaut sereta ngemuaska ati Jehovah, semua orang ke ba serega enggau ke ba dunya deka nemu chara Jehovah merintah nya meh ti pemadu manah.

¹³ Jehovah nya kudus, nya alai Iya nadai kala nguji mensia ngena penyai. Iya ke amat, Sitan nya “Penguji.” (Mat. 4:3) Sitan nguji kitai ngena mayuh chara. Tang kitai ulih milih. Tiap iku kitai ulih milih sekalika deka nulak penguji tauka enggai. (Bacha James 1:13-15.) Lebuh diuji Sitan, Jesus jampat-jampat nulak iya ngena Jaku Petara. Jesus tetap ati ngagai Petara. Taja pia, Sitan enggai alah. Iya nganti “maya ti manah” endur alai nguji Jesus. (Luk. 4:13) Tang, enda ngira nama digaga Sitan, Jesus seruran ngasika Petara nyadi Pemerintah iya. Iya nunjukka mensia ti sempurna ulih tetap ati ngagai Jehovah, taja pan ba maya ti balat tusah. Tang Sitan nguji murid Jesus, nyengkaum nuan, ngambika enda ngasika Jehovah.

14. Nama patut digaga kitai kena nulak penguji?

¹⁴ Tanya pasal chara Jehovah merintah bedau abis disaut. Nya alai, diatu Jehovah agi ngelakka Sitan nguji kitai. Jehovah enda mai kitai “ngagai penguji.” Iya ke amat, Iya pechaya kitai ulih mengkang tetap ati ngagai Iya, lalu Iya deka nulung kitai. Tang, Iya enda kala mejal kitai ngereja utai ti patut digaga. Iya bebasaka hak kitai ke bibas milih. Nya alai, Iya nejuka kitai milih kediri empu sekalika kitai deka tetap ati tauka enggai. Ngambika enda alah diuji, kitai patut ngereja dua iti pekara: mengkang semak ngagai Jehovah sereta terus besampi minta tulung ari Iya. Baka ni Jehovah nyaut sampi kitai kena nulak penguji?

15, 16. (a) Nama sekeda penguji ke patut ditulak kitai? (b) Sapa patut disalahka enti kitai alah laban penguji?

¹⁵ Jehovah meri kitai roh kudus Iya kena nulung kitai ngelaban penguji ari Sitan. Jehovah mega meri kitai Bup Kudus enggau gempuru kena nangkan  kitai ari utai ti tau ngenusah. Chunto, Iya enda ngasuh kitai ngena kelalu mayuh jam, duit, enggau tulang ba utai ke enda entu beguna. Espen enggau Janne diau ba siti menua ti kaya ba Eropah. Betaun seduai iya nyadi pengerintis biasa, ba siti begian ari menua nya ke begunaka bala penginjil. Lebuh seduai iya udah bisi anak, seduai iya ngetu nyadi pengerintis. Diatu seduai iya bisi dua iku anak. Ku Espen: “Kami duai suah besampi ngagai Jehovah ngambika kami duai enda kena penguji diatu, laban kami duai enda ulih ngena mayuh awak ba pengawa teokratik baka ke udah. Kami duai minta Jehovah nulung kami ngetanka pengarap kami enggau pengeransing kami ba pengawa nginjil.”

¹⁶ Penguji bukai ke patut ditulak kitai iya nya meda pornografi. Enti kitai alah laban penguji tu, kitai enda ulih nyalahka Sitan. Nama kebuah? Laban Sitan enggau dunya tu enda ulih mejal kitai ngereja nama-nama utai ke salah. Sekeda orang meda pornografi laban sida enda nulak runding ti salah. Tang, mayuh bala menyadi Kristian kitai udah nulak penguji tu, lalu kitai mega ulih.—1 Kor. 10:12, 13.

17. (a) Baka ni kitai nunjukka kitai deka Jehovah ngelepaska kitai ari Sitan? (b) Nama pengelantang ti deka datai?

¹⁷ Baka ni kitai nunjukka kitai deka Jehovah ngelepaska kitai ari Sitan? Kitai patut “ukai enggi dunya.” Kitai mega “anang angkunka dunya tauka utai dunya.” (Jhn. 15:19; 1 Jhn. 2:15-17) Naka meh pengelantang enti Jehovah udah muai Sitan enggau penyai ba dunya tu! Tang sebedau nya, kitai patut ingat Sitan “balat pedis ati, laban iya nemu timpuh diri nyau deka abis.” Iya deka enggau naka ulih nagang kitai ari nyembah Jehovah. Nya alai kitai patut terus besampi, ngambika Jehovah nyaga kitai ari Sitan.—Pem. 12:12, 17.

18. Enti kitai deka selamat ba pengujung dunya Sitan, nama patut digaga kitai?

¹⁸ Deka nuan diau ba dunya ke nadai Sitan? Enti deka, terus meh besampi ngambika Perintah Petara datai, nama Petara dikuduska, lalu peneka Iya nyadi ba dunya. Seruran bepanggai ba Jehovah ngambika nyaga kitai sereta meri kitai semua utai ke diguna kena kitai mengkang tetap ati ngagai Iya. Amat, enggau naka ulih meh idup sejalai enggau chunto sampi nya.