“Pengudah menua kami balat kena inflasi, pemakai majak mar sereta kurang,” ku Paul, apai ke bisi dua iku anak. “Kami bebaris bejam-jam deka meli pemakai, tang kesuah agi pemakai udah abis sebedau datai ba senentang kami. Orang balat kurus ketegal lapar, lalu sekeda ari sida luput ba sebelah jalai. Rega barang ke diguna besehari-hari jampat niki, ari rega bejuta nyadi bebiliun. Pengujung iya, mata duit nadai rega agi. Duit aku ke ba bank, insuran enggau pinchin aku nadai agi.”

Paul nemu enti iya dekaka sida sebilik terus idup, iya patut ngena “penemu-dalam.” (Jaku Dalam 3:21) Ku iya: “Aku kontraktor elekterik, tang aku nerima sebarang pengawa ke ulih dikereja aku, taja pan gaji iya kurang ari ke patut. Sekeda orang ngaji aku ngena utai ti diempa tauka utai ti dikena ba rumah. Enti aku digaji ngena empat igi sabun, aku ngena dua igi lalu dua igi da agi dijual aku. Udah nya aku bisi 40 iku anak manuk. Pengudah anak manuk nya besai, aku nyual sida, lalu meli 300 iku da agi anak manuk. Udah nya aku nukar 50 iku manuk enggau dua guni (50 kg seguni) jagung kisar. Tu pemakai kami sebilik enggau sekeda ruang bilik ke bukai. Kami ulih lama makai iya.”

Paul mega nemu utai ti pemadu manah ke patut digaga, iya nya bepanggai ba Petara. Enti kitai nitihka utai ti diasuh Petara, Iya nulung kitai. Pasal ngulihka utai ti diguna ba pengidup, Jesus madahka: ‘Anang irau. . . Apai kita ti di serega nemu kita begunaka utai nya.’—Luke 12:29-31.

Tang Sitan, munsuh Petara ti pemadu besai, udah nipu mayuh orang ngambika sida semina berundingka utai ti diguna ba pengidup. Orang balat irau pasal utai ti diguna sida, lalu bebendar ngulihka utai nya taja pan enda entu diguna sida. Mayuh orang berutang lalu ngasaika pemedis, enti “nuan nginjau duit, nuan nyadi ulun orang ke nyali nuan duit nya.”—Jaku Dalam 22:7.

 Sekeda orang ngaga pemutus ti ulih ngenusah. “Mayuh orang ke diau semak aku ninggalka sida sebilik enggau bala kawan sida, ketegal deka ngiga pengawa ke manah agi ba menua bukai,” ku Paul. “Sekeda ari sida nadai dokumen pejalai ti sah, lalu enda ulih ngiga kereja. Sida suah belalai ari polis, lalu tinduk sengapa sebelah jalai. Sida enda ngelakka Petara nulung sida. Tang ketegal tulung ari Petara, kami sebilik ulih mutarka penanggul ba penatai pemisi.”

Ku Paul nambah: “Jesus madahka: ‘Anang irauka pasal pagila, laban pagila chukup pengirau ke diri empu. Penusah ke sehari tu chukup ke sehari tu.’ Nya alai, ninting hari aku besampi minta Petara ‘meri ngagai kami sehari tu pemakai umbas dipakai kami’ ngambika kami ulih terus idup. Lalu Petara nulung kami baka ke disemaya Jesus. Kami enda selalu bulih utai ti dikedekaka kami. Bisi sekali aku enggau orang bebaris meli pemakai, taja pan enda nemu utai ke bisi dijual. Lebuh datai ba senentang aku, baru aku nemu utai ke dijual nya yogurt. Aku enggai makai yogurt. Tang nya mega pemakai. Nya alai, malam nya kami makai yogurt. Aku beterima kasih ngagai Petara laban kami enda kala lapar sepemanjai penusah nya.” *

“Ke diatu kami bisi manah mimit ba penatai pemisi. Tang ari utai ke udah nyadi, kami belajarka chara ti pemadu manah kena mutarka pengirau, iya nya bepanggai ba Petara. Jehovah * seruran deka nulung kami seagi-agi kami ngereja peneka Iya. Kami udah meda pemendar jaku ba Masmur 34:8 ke madahka: ‘Awakka kita empu ngasaika pemadas Jehovah. Beberekat meh orang ke nemu pengelikun lebuh sida begulai enggau Iya.’ Nya alai, kami enda agi takut napi penusah ba penatai pemisi.

“Diatu kami nemu enggau terang, ngambika ulih terus idup mensia begunaka pemakai, ukai kereja tauka duit. Kami enda sabar nganti maya alai semaya Petara deka dikeamatka: ‘Awakka gandum seruran mayuh di menua.’ Ke diatu, ‘bisi pemakai enggau gari, kitai patut nemu puas ati ke nya.’ Kami bulih pengering ari jaku Bup Kudus: ‘Anang angkunka duit. Kita patut nemu puas ati ke utai ti dikemisi kita, laban Petara udah nyebut, “Aku enggai sekali-kali ninggalka kita, tauka ngelengkaka kita.” Nya alai, kitai kempang ati nyebut, “Tuhan endang penyaup aku, nya alai aku enda takut.”’” *

Kitai begunaka pengarap ti teguh enti deka ‘diau begulai sejalai enggau Petara’ baka Paul enggau sida sebilik. (Pemungkal 6:9) Enda ngira kitai napi penusah ba penatai pemisi kemaya hari tu tauka dudi hari, teladan Paul ba pengarap enggau penemu ti ulih dikena ngajar kitai utai ti beguna.

Tang, baka ni enti penanggul ba ruang bilik ngasuh kitai irau?