SAUT BUP KUDUS: ‘Maya deka datai alai semua orang ke udah mati deka ninga nyawa [Jesus], lalu deka pansut ari kubur.’—John 5:28, 29.

Nya alai Jesus madahka, jemah ila ba baruh Perintah iya, Dunya Pemati deka dikusungka. “Aku tekenyit maya aku keterubah iya macha John 5:28, 29,” ku Fernando, ke disebut ba artikel sebedau tu tadi. “Aku arap bendar ke semaya tu, lalu aku berengkah bisi runding ti manah pasal jemah ila.”

Kelia menya, Jop ke tetap ati pechaya pengudah iya mati, Petara deka ngangkatka iya idup baru. Jop nanya: “Enti orang mati, kati iya ulih angkat idup baru?” Enggau enda kakang ati iya nyaut: “Aku deka nganti maya ti manah agi, nganti maya [Dunya Pemati] penusah tu abis. Nya baru Nuan deka ngangau, lalu aku deka nyaut.”—Jop 14:14, 15.

Pengangkat ari mati ukai penemu ti baru ba menyadi indu Lasarus ke benama Marta. Pengudah Lasarus mati, ku Jesus madahka iya: “Menyadi nuan deka angkat idup baru.” Ku Marta nyaut: “Aku nemu iya deka angkat idup baru lebuh pengangkat orang ari mati ba pengujung dunya.” Udah nya, Jesus madahka iya: ‘Aku tu meh pengangkat enggau pengidup. Orang ke arapka aku, deka idup taja pen sida mati.’ (John 11:23-25) Udah nya, Jesus ngangkatka Lasarus idup baru! Cherita tu madahka kitai pasal utai ti amat manah ke deka nyadi jemah ila. Uji gambarka, pengangkat ari mati deka nyadi di serata dunya!

SAUT BUP KUDUS: Jaku Petara nunjukka pengangkat Jesus ari mati enda sebaka enggau lapan iti pengangkat ari mati ke bukai ke bisi dipadah ba Bup Kudus. Sida lapan iku tu diangkatka idup baru ba dunya. Tang pasal pengangkat Jesus ari mati, kitai macha: ‘Jesus Kristus . . . ke udah niki ke serega, lalu duduk muak ari kanan Petara.’ (1 Peter 3:21, 22) Kati semina Jesus aja ke diangkatka idup baru niki ke serega? Jesus udah madahka bala rasul: ‘Enti aku mupuk lalu nyendiaka endur ke kita, aku deka pulai kitu baru, lalu mai kita ngagai aku empu, ngambika dia endur alai aku, dia mega endur alai kita.’—John 14:3.

Kristus ke serega, lalu besedia ke penatai sekeda ari bala murid iya. Semua sida ke diangkatka idup baru ke serega nya 144,000 iku. (Pemandang 14:1, 3) Tang, nama pengawa sida di serega?

 Sida deka bisi mayuh pengawa! Bup Kudus madahka kitai: ‘Beberekat sereta kudus meh orang ke diangkatka ari mati ti keterubah tu! Pemati ti kedua nadai kuasa atas sida, tang sida deka nyadi imam Petara, enggau imam Kristus, lalu sida deka merintah enggau iya seribu taun.’ (Pemandang 20:6) Sida ke diangkatka idup baru ke serega deka merintah nyadi raja enggau imam, begulai enggau Kristus merintah atas dunya.

SAUT BUP KUDUS: Bup Kudus madahka jaku ari rasul Paul tu: “Aku bisi siti pengadang baka ti diterima sida empu, iya nya semua orang ke lurus enggau ke enda lurus deka diangkatka ari mati.”—Kereja Rasul 24:15.

Sapa orang ke dikumbai Paul “orang ke lurus”? Peratika siti chunto. Ba pengujung pengidup Daniel ke tetap ati, iya dipadahka: “Nuan deka mati, tang nuan deka angkat idup baru lalu nerima upah nuan ba pengujung dunya.” (Daniel 12:13) Dini endur Daniel pengudah iya diangkatka idup baru? “Orang ke lurus deka bempu menua tu lalu diau ditu belama iya.” (Masmur 37:29) Lalu Jesus madahka: “Beberekat meh orang ke baruh ati, laban sida deka bempu dunya.” (Matthew 5:5) Daniel enggau semua orang bukai ke tetap ati deka diangkatka idup baru diau ba dunya belama iya.

Sapa orang ke dikumbai Paul orang “ke enda lurus”? Sida tu bebiliun iku mensia ke kala idup, tang udah mati. Mayuh ari sida nadai peluang nemu tauka nitihka pemendar ari Bup Kudus. Pengudah sida diangkatka idup baru, sida deka belajar pasal Jehovah * enggau Jesus sereta beterima kasih ke seduai iya. (John 17:3) Semua orang ke milih nyembah Jehovah deka idup belama iya, baka Jehovah.

SAUT BUP KUDUS: Petara “deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” (Pemandang 21:4) “Orang deka ngaga rumah lalu diau dia. Rumah nya enda diuan orang bukai. Sida deka bekebun anggur lalu ngelantangka diri ngirup wain. Wain nya enda diirup orang bukai.”—Isaiah 65:21.

Uji gambarka nuan begulai enggau orang ke dikesayauka nuan ke udah diangkatka idup baru ba dunya nya! Tang, tanya ke bedau agi disaut, Baka ni nuan ulih nemu pengangkat ari mati nya amat deka nyadi?