1, 2. Nama kebuah Jesus rinduka Marta, tang nama nunjukka iya bisi pengurang?

LEBUH nuan berundingka Marta, menyadi indu Lasarus, iya orang ke baka ni? Bup Kudus nunjukka Marta nya kawan rapat Jesus, lalu Jesus rinduka iya. Endang amat, ukai semina iya aja kawan indu ke dikerindu sereta dipebasa Jesus. Chunto, Maria, menyadi indu Marta mega kawan rapat Jesus. Lalu Jesus mega rinduka indai iya, Maria. (Jhn. 11:5; 19:25-27) Nama kebuah Jesus rinduka Marta?

² Jesus rinduka Marta laban iya manah ati sereta gerah jari, lalu iya mega bagas gawa. Tang utai ke ngasuh Jesus rindu amat ke iya, iya nya pengarap iya ke tegap. Iya arapka semua utai ti diajar Jesus, lalu iya mega arap bendar Jesus nya Messiah ti disemaya. (Jhn. 11:21-27) Taja pia, Marta enda sempurna. Baka kitai, iya mega bisi pengurang. Chunto, bisi sekali maya Jesus nemuai ngagai sida iya, Marta pedis ati ngagai menyadi iya Maria, lalu minta Jesus ngerara menyadi iya. ‘Tuan,’ ku Marta,  ‘kati nuan enda ibuhka menyadi aku ninggalka aku kediri mela utai? Asuh iya nulung aku!’ (Bacha Luke 10:38-42.) Nama kebuah Marta besebana, lalu nama ulih dipelajarka kitai ari saut Jesus?

3, 4. Nama pengawa Maria ti dipuji Jesus, lalu nama dipelajarka Marta? (Peda gambar ba pun artikel.)

³ Tentu Jesus berasai gaga lebuh Marta seduai Maria ngelaluka iya ke rumah sida, lalu iya deka ngena peluang nya ngajar sida pemendar ti berega. Maria lalu duduk semak kaki Jesus, ‘mendingka utai ti disebut iya.’ Iya deka enggau naka ulih belajarka semua utai ari Pengajar ti Tebilang. Marta mega ulih milih mendingka Jesus enti iya deka. Lalu Jesus tentu deka muji Marta enti iya ngetuka pengawa iya lalu mendingka Jesus.

⁴ Tang Marta dikelimpangka. Iya kiruh nyediaka mayuh pemakai sereta ngereja mayuh agi pengawa bukai ngambika Jesus nyamai diau enggau sida. Lebuh iya meda Maria nejuka iya kediri mela utai, iya pedis ati lalu besebana ngagai Jesus. Jesus nemu Marta udah nyediaka mayuh utai, nya alai Jesus enggau siru bejaku: “Marta, Marta! Nuan irau sereta nejuka diri dikelimpangka mayuh macham utai.” Saut Jesus tu nunjukka pemakai ti biasa aja, chunto semacham pemakai pan udah chukup. Udah nya, Jesus muji Maria ke mendingka iya enggau manah. Ku iya: “Maria udah milih utai ti manah agi, lalu utai nya enda ulih dirampas ari iya.” Maria engka enda ingat agi utai ke diempa sida, tang iya tetap ingatka utai ti dipelajarka iya ari Jesus sereta chara Jesus muji iya. Lebih 60 taun udah nya, rasul John nulis: “Jesus rinduka Marta, Maria.” (Jhn. 11:5) Jaku tu nunjukka Marta nerima jaku ajar Jesus, lalu nyembah Jehovah enggau tetap ati sepemanjai pengidup iya.

5. Nama kebuah kemaya hari tu senang limpang ari utai ti beguna agi, lalu nama tanya deka disaut kitai?

⁵ Kitai nemu kemaya hari tu majak mayuh agi utai ke ulih ngelimpangka kitai ari Jehovah, enti dibandingka enggau jeman Bup Kudus. The Watchtower, 15 September 1958, nangkan bala menyadi Kristian ngambika enda ngelakka teknologi ngelimpangka sida ari nyembah Jehovah. Indah ba maya nya, ninting hari bisi aja utai baru dikeluarka. Majalah ke narit ati, radio, cherita wayang, enggau TV udah majak tebilang. The Watchtower madahka, seraya kitai semak agi ngagai pengujung dunya, “utai ke ulih ngelimpangka deka majak nambah.” Kemaya hari tu, majak mayuh utai ke ulih ngelimpangka kitai ari ke udah. Nama patut digaga kitai ngambika kitai baka Maria, lalu enda limpang ari nyembah Jehovah?

6. Baka ni nembiak Jehovah ngena teknologi?

⁶ Nembiak Jehovah nginjil ngena teknologi ba dunya tu. Chunto iya, sebedau enggau lebuh maya perang dunya keterubah, sida mandangka “Photo-Drama of Creation.” Sida nginjil ngagai bejuta iku orang ba mayuh menua ngena slide enggau cherita pandak ke bisi kala enggau bunyi. Pengujung “Photo-Drama” ngambarka pemaik lebuh Jesus Kristus merintah dunya. Udah nya, nembiak Jehovah ngena radio naburka pesan pasal Perintah Petara ngagai bejuta iku orang di serata dunya. Kemaya hari tu, kitai ngena komputer enggau Internet ngenataika berita manah ngagai orang, enda ngira dini endur sida.

7. Nama kebuah kelalu ngena utai ba dunya tau ngenusahka?

 ⁷ Bup Kudus nangkan kitai anang kelalu ngena utai ba dunya. Tu nyengkaum ngena kelalu mayuh jam ba utai ke bisi ba dunya. (Bacha 1 Korint 7:29-31.) Sekeda ari utai tu tau dikena, tang iya ulih masau jam kitai. Chunto, kitai engka rindu ngereja utai ti diminat, macha bup, meda TV, raun ngagai endur ti ngerinduka ati, bebelika utai, belajar pasal perengka elektronik ti pemadu baru tauka utai bukai ke enda entu beguna. Mayuh orang rindu berandau ngena internet, sms sereta emel, tauka deka nemu berita enggau pemutus sukan. Tang, sekeda orang ulih gian ngereja utai tu. (P-jar. 3:1, 6) Enti kitai ngena mayuh jam ba utai ti enda entu beguna, kitai engka enda entu beratika utai ti pemadu beguna, iya nya sembah kitai ngagai Jehovah.—Bacha Epesus 5:15-17.

8. Nama kebuah kitai enda patut rinduka utai ba dunya tu?

⁸ Sitan enggau naka ulih nguji narit kitai ngagai dunya iya sereta ngelimpangka kitai ari nyembah Jehovah. Sitan ngereja tu ba kurun keterubah, lalu bebendar agi ngelimpangka kitai kemaya hari tu. (2 Tim. 4:10) Nya alai, kitai patut selalu meresa nama runding kitai pasal utai ba dunya tu, lalu ngaga ubah ke patut. Bup Kudus madahka, kitai enda tau rinduka utai ba dunya tu. Tang, kitai patut terus negapka pengerindu kitai ba Jehovah. Enti ngereja nya, kitai deka senang agi ngasika Jehovah, lalu mengkang semak ngagai Iya.—1 Jhn. 2:15-17.

9. Jesus ngajar bala murid enda limpang ari utai nama, lalu baka ni iya netapka teladan?

⁹ Baka Jesus ke enggau siru ngajar Marta ngambika enda dikelimpangka mayuh utai, iya mega ngajar bala murid iya utai ti sama. Iya meransang sida ngambika enda limpang ari nyembah Jehovah sereta Perintah Iya. (Bacha Matthew 6:22, 33.) Jesus empu nyadi teladan ti pemadu manah. Iya nadai ngembuan mayuh utai. Iya nadai rumah tauka tanah.—Luk. 9:58; 19:33-35.

10. Nama teladan manah ke diberi Jesus ngagai kitai?

¹⁰ Jesus enda ngelakka sebarang utai ngelimpangka iya ari pengawa nginjil. Chunto, enda lama pengudah iya berengkah nginjil, bala orang mayuh ba Kapernaum deka Jesus diau lama agi ba nengeri sida. Tang, nama digaga iya? Iya enda limpang ari pengawa nginjil. Iya madahka: ‘Aku enda tau enda mega nusui Berita Manah pasal Perintah Petara ngagai nengeri bukai, laban nya kebuah aku dikirumka.’ (Luk.4:42-44) Jesus bejalai jauh nginjil se reta enggau naka ulih ngajar mayuh orang. Iya nya orang ke sempurna, tang iya nemu lelak sereta patut belelak laban iya bagas amat gawa.—Luk. 8:23; Jhn. 4:6.

11. Nama digaga Jesus lebuh seiku lelaki minta Jesus mutarka penanggul iya? Nama diajar Jesus ngagai bala murid iya?

¹¹ Enda lama udah nya, lebuh Jesus benung ngajar bala murid iya siti utai ti beguna, seiku lelaki nyelepak bejaku: “Pengajar, asuh menyadi lelaki aku magi reta kami sebilik enggau aku.” Jesus enda mutarka penanggul lelaki nya. Iya enda dikelimpangka ari ngajar bala murid iya. Tang iya ngena peluang nya ngajar sida, enti sida deka ngembuan mayuh agi utai, sida ulih dikelimpangka ari nyembah Petara.—Luk. 12:13-15.

12, 13. (a) Nama utai ti digaga Jesus ke ngasuh sekeda orang Gerika di nengeri Jerusalem alit ati? (b) Nama digaga Jesus lebuh Philip minta iya betemu enggau orang Gerika?

¹² Beberapa hari sebedau Jesus mati, iya balat tusah ati. (Mat. 26:38; Jhn. 12:27) Iya nemu iya deka balat diperinsa sereta mati. Iya mega nemu iya agi bisi mayuh pengawa sebedau iya mati. Chunto, kena Hari Minggu, 9 Nisan, Jesus tama ngagai nengeri Jerusalem nepan seiku keledai. Bala orang mayuh ngelaluka iya nyadi Raja sida. (Luk. 19:38) Hari siti, Jesus enggau berani muru orang bejual ke amu ari Rumah Sembiang. Sida nyual barang enggau rega ti kelalu mar, lalu tu baka ke ngerumpak orang.—Luk. 19:45, 46.

¹³ Sekeda orang Gerika ke datai ngagai nengeri Jerusalem nyambut pengerami Paska, meda utai ke digaga Jesus, lalu sida alit ati. Nya alai, sida nanya rasul Philip sekalika sida ulih betemu enggau Jesus. Tang Jesus ukai ngiga orang ke ulih nyukung sereta nyaga iya ari munsuh. Iya nemu utai ti beguna agi. Iya enda limpang ari ngereja peneka Jehovah, iya nya nyerahka nyawa diri nyadika tebus. Nya alai, iya ngingatka bala murid iya enda lama da agi iya deka mati, lalu semua sida ke nitihka iya mega patut sanggup nyerahka nyawa diri. Ku iya: “Orang ke sayauka nyawa diri, deka ngelenyauka iya, lalu orang ke begedika nyawa diri di dunya tu, deka bulih pengidup ti meruan belama iya.” Tang Jesus mega besemaya, “Apai deka ngemesaika” murid iya, lalu meri sida pengidup ti meruan belama iya. Philip mega ulih bekunsi pesan ti meransangka ati tu enggau orang Gerika.—Jhn. 12:20-26.

14. Taja pan Jesus ngenuluka pengawa nginjil ba pengidup, nama agi utai bukai ke dikemeratka iya?

¹⁴ Lebuh Jesus ba dunya, iya ngenuluka pengawa nginjil. Taja pan iya beberatka pengawa nginjil ba pengidup, iya mega bisi ngereja pengawa bukai. Chunto, lebuh iya datai ngagai pengerami kawin, dia iya ngubah ai nyadi wain ti manah. (Jhn. 2:2, 6-10) Iya mega makai ba rumah bala kawan iya sereta orang bukai ke deka ninga berita manah. (Luk. 5:29; Jhn. 12:2) Keberat agi, Jesus selalu ngiga awak besampi, belemati sereta belelak.—Mat. 14:23; Mrk. 1:35; 6:31, 32.

15. Nama utai ti diasuh rasul Paul gaga orang Kristian, lalu baka ni iya nyadi teladan ti manah?

¹⁵ Rasul Paul madahka, orang Kristian baka orang ke belumba belanda jauh, lalu patut belanda terus ngagai adan. Sida patut muai semua utai ti nating sida tauka ngasuh sida ngetu. (Bacha Hebrew 12:1.) Paul empu nyadi teladan ti manah. Iya ulih nyadi kaya sereta tebilang enti iya nyadi tuai pengarap orang Judah, tang iya ninggalka pengawa nya laban iya “milih utai ti pemadu badas.” Iya bebendar  ba pengawa nginjil sereta ngagai mayuh menua, nyengkaum Siria, Asia Minor, Masedonia, enggau Judea. Paul nganti berekat pengidup belama iya ba serega. Ku iya: “Aku badu agi ngingatka utai ti udah, lalu bebendar ngulihka utai ti di mua. Aku majak belanda terus ngagai adan, ngulihka prais.” (Plp. 1:10; 3:8, 13, 14) Paul enda kawin, lalu tu nulung iya ‘enda belampung ati angkunka Tuan.’—1 Kor. 7:32-35.

16, 17. Sekalika kawin tauka enda, baka ni kitai ulih nitihka teladan ari Paul? Nama digaga Mark seduai Claire?

¹⁶ Baka Paul, sekeda ari nembiak Jehovah kemaya hari tu enda kawin, ngambika sida ulih ngereja mayuh agi pengawa ke Jehovah. (Mat. 19:11, 12) Orang ke enda kawin selalu iya kurang agi tanggungjawap ba ruang bilik ari orang ke udah kawin. Tang sekalika kitai kawin tauka enda, semua kitai ulih “muai semua utai ti berat ti nating kitai” iya ke ulih ngelimpangka kitai ari nyembah Jehovah. Kitai engka patut ngubah ulah kitai, ngambika enda masau jam, lalu ulih ngereja mayuh agi pengawa ke Jehovah.

¹⁷ Ngambika chunto, Mark seduai Claire ke besai ba menua Wales, berengkah nyadi pengerintis pengudah seduai iya abis sekula. Pengudah seduai iya kawin, seduai iya terus nyadi pengerintis. Tang seduai iya deka ngereja mayuh agi. Mark nerangka: “Kami nyual rumah kami ke bisi tiga iti bilik sereta badu agi kereja part-time. Enggau tu, kami ulih idup enggau pengumbas iya ngambika ulih enggau nirika begunan teokratik di serata dunya.” Kenyau 20 taun ti udah, seduai iya udah ngagai mayuh bengkah endur ba menua Afrika ngambika ulih nulung nirika Palan Gempuru. Kekadang seduai iya semina bisi mimit duit, tang Jehovah seruran nyaga seduai iya. Claire madahka: “Kami duai puas ati ulih gawa ke Jehovah ninting hari. Kami bulih mayuh kawan, lalu enda kurang nama-nama utai. Utai ti dilengkaka kami enda ulih ngalahka pengelantang ke diulih kami ari semina gawa ke Jehovah aja.” Mayuh nembiak Jehovah ke semina gawa ke Iya aja ngasaika utai ti sama. *—Peda nota kaki.

18. Nama tanya ke ulih ditanya kitai?

¹⁸ Kati nuan ngasaika diri ulih ransing agi gawa ke Jehovah? Kati bisi utai ti ngelimpangka nuan ari ngaga utai ke beguna agi? Enti pia, nama ulih digaga nuan? Nuan engka ulih ngemansangka agi chara nuan macha sereta belajarka Bup Kudus. Artikel pengudah tu deka nerangka baka ni nuan ulih ngereja nya.