TOPIK RANDAU | KATI BISI PENGUNTUNG ENTI BESAMPI?
Nama Kebuah Orang Besampi?
“Aku balat bejudi. Aku besampi ngambika menang. Tang, aku enda kala menang.”—Samuel, * Kenya.
“Ba sekula kami nyebut leka sampi ke udah diajar ngagai kami.”—Teresa, Filipina.
“Aku besampi lebuh napi penusah. Aku besampi ngambika dosa aku diampunka sereta nyadi orang Kristian ke manah agi.”—Magdalene, Ghana.
Utai ke dipadah Samuel, Teresa, enggau Magdalene nunjukka orang bisi mayuh kebuah besampi, lalu sekeda ari sida bisi kebuah ti manah besampi. Sekeda orang besampi ari ati, lalu sekeda nya enda. Taja pia, sekalika sida besampi ngambika pas peresa ba sekula, tauka besampi ngambika tim sukan ke dikerindu sida menang, ngambika bulih iring ari Petara ba ruang bilik, tauka mayuh kebuah ti bukai, beratus juta iku orang ngasaika sida patut besampi. Pansik mega nunjukka, indah sekeda orang ke nadai pengarap pan seruran besampi.
Kati nuan bisi besampi? Enti bisi, nama utai disampika nuan? Sekalika nuan semampai besampi tauka enda, nuan engka berunding: ‘Kati bisi penguntung enti besampi? Kati bisi orang ninga?’ Seiku penulis ngumbai besampi nya baka “sebengkah chara berubat.” Sekeda pakar ba pengawa berubat bisi runding ti sama, ngumbai sampi nya sebengkah “chara berubat ke bukai.” Kati sampi nya semina utai ke patut digaga ninting hari, tauka chara berubat ke ulih meri penguntung?
Tang Bup Kudus madahka, sampi nya ukai semina chara berubat. Bup Kudus madahka kitai, bisi orang ningaka sampi ke digaga ngena chara enggau tuju ti betul. Kati tu amat? Aram kitai mansik iya.
^ per. 3 Sekeda nama udah ditukar.
