“Enti suba, kitai engka tusah deka nerima litaricha digital, lalu tusah deka ngambarka nya mega.” Kati nuan setuju enggau jaku tu? Tu meh utai ke dipadah Menyadi Geoffrey Jackson ba cheramah ke dikenataika ba dalam video Berita ti Pemadu Baru ari Raban ti Ngiring 2020 #6. Ku iya nampung: “Tang diatu kitai engka berunding, baka ni kitai deka betan [sepemanjai pandemik tu] enti nadai litaricha digital ba JW Library? Udah betaun-taun Jehovah nyediaka kitai kena besedia napi utai ke baka tu.”

 Baka ni Jehovah nulung kitai besedia? Baka ni aplikasi JW Library digaga? Nama utai ke patut digaga kena ngaduka sereta ngemanahka agi aplikasi tu?

 Kena Mei 2013, Raban ti Ngiring minta Opis Program MEPS, iya nya siti begian ba indu opis, ngaga siti aplikasi ti ngembuan Bup Kudus Salin Dunya Baru. Paul Willies ke gawa enggau Opis Program MEPS madahka: “Sebedau tu, kami enda kala ngeluarka aplikasi ke ba dalam talipun. Tang kami berengkah ngaga tim, nangguhka sekeda projek bukai sereta bekerejasama enggau begian bukai kena ngaga aplikasi tu. Kami seruran besampi, lalu enggau tulung ari Jehovah, aplikasi tu ulih dikeluarka maya aum ninting taun ba kandang lima bulan aja!”

 Tang, library enda patut bisi siti aja bup. Enti nitih, aplikasi tu patut ngundan mayuh litaricha ba mayuh bansa jaku. Nyadi sida deka kemaskini aplikasi tu. Kena Januari 2015, mayuh ari litaricha ke baru ba bansa jaku English udah bisi ba dalam aplikasi. Lalu enam bulan pengudah nya, litaricha ulih didownload ba dalam beratus bansa jaku ke bukai.

 Kenyau ari nya, bala menyadi udah ngemanahka aplikasi tu dalam beberapa iti chara. Ngambika chunto, bisi video, semua litaricha enggau media ke diguna maya gempuru disegulaika ba siti tab, sereta bisi fungsi alai Bup Dikena Ngiga Pansik ulih dibuka terus ari ayat Bup Kudus.

 JW Library dibuka 8 juta perengka elektronik ninting hari lalu lebih ari 15 juta perengka elektronik ninting bulan! Nama utai ke patut digaga ngambika aplikasi tu ulih bejalai enggau manah? Menyadi Willies madahka: “Aplikasi ba talipun deka terus dikemaskini. Kami seruran nambah fungsi ti baru sereta nentuka aplikasi nya senang dikena orang mayuh. Ketegal sistem operasi ba dalam perengka elektronik seruran dikemaskini, kami patut seruran ngaduka aplikasi tu ngambika iya sejalai enggau sistem operasi ti baru. Ketegal litaricha audio enggau video ke dirikut ba dalam JW Library makin mayuh, kami patut ngaduka sereta kemaskini software kami.” Diatu, bisi kira-kira 200,000 litaricha sereta lebih ari 600,000 audio enggau video ke dirikut ba mayuh bansa jaku dalam JW Library!

 Ngambika bala menyadi ulih ngemanahka agi aplikasi tu, ukai semina perengka komputer aja ke diguna, tang sida mega patut meli software. Ungkus kena siti lisin software aja, $1,500 U.S. (RM6,236) setaun. Ninting taun, Opis Program MEPS ngena duit penyampau kira-kira $10,000 U.S. (RM41,575) kena meli perengka elektronik ti baru baka komputer, tablet, sereta talipun kena nentuka aplikasi tu ulih bejalai enggau manah tauka enda.

 Ketegal bisi JW Library, duit pemeri ke diguna ba pengawa nyelak, ngegam bup sereta nganjung litaricha nyau jauh kurang ari suba. Ambika chunto, bup mit Meresa Ayat Bup Kudus Ninting Hari. Dua belas juta salin bup nya dichelak kena taun 2013. Tang, kena edisi 2020, semina 5 juta salin dichelak, taja pan penyampau penginjil kira-kira 700,000 iku lebih agi ari 2013. Nama kebuah salin ke dichelak tu dikurangka? Laban mayuh bala menyadi kitai diatu benung macha ayat Bup Kudus ninting hari ba JW Library. a

 Aplikasi JW Library mega mayuh nulung orang ke ngena iya. Geneviève ke diau ba Kanada ngasika diri ulih belajar enggau bejarit agi ketegal bisi aplikasi nya. Ku iya ngaku: “Terus terang madah, enti aku patut ngumpulka mayuh bup kena belajar, asai aku, aku lembau deka belajar ninting pagi. Tang ketegal bisi aplikasi nya, aku semina ngambi tablet aku, laban semua utai bisi ba dalam nya magang. Pengawa belajar enggau tetap tu udah negapka pengarap aku, sereta ngasuh aku semak agi ngagai Jehovah.”

 Aplikasi nya amat nulung kelebih agi maya pandemik COVID-19 nyadi. Charlyn ari Amerika Serikat madahka: “Ketegal pandemik COVID-19 ke nyadi ba serata dunya aku nadai nerima sebarang litaricha kitai ke dichelak lebih ari setaun ti udah. Tang aplikasi JW Library udah nyediaka utai ke diguna kitai ngambika pengarap kitai mengkang tegap, lalu aku beterima kasih ke Jehovah ke pemeri tu.”

 Mayuh orang ngasaika utai ti sama baka Faye ke diau ba Pilipina. Ku iya: “Aku ngena aplikasi ke mayuh fungsi tu ngambika ulih mengkang semak ngagai Jehovah. Nya meh utai ke dibacha aku lebuh baru dani. Nya meh utai ke didinga aku lebuh ngereja pengawa ba rumah. Nya utai ke dikena aku kena nyediaka gempuru. Nya utai ke dikena aku kena nyediaka diri ke pengawa ngajar Bup Kudus. Lebuh aku belelak aku meda video ba dalam aplikasi nya. Lebuh bebaris, aku macha artikel tauka Bup Kudus ba dalam nya. Nya amat berega.”

 Aplikasi nya mega amat beguna ba pengawa nginjil. Ngambika chunto, seiku menyadi indu ba Cameroon bisi meda seiku menyadi indu ke bukai bisi ngena siti ayat Bup Kudus. Beberapa minggu udah nya, iya mega deka ngena ayat nya ba pengawa nginjil. Tang iya enda ingat nama ayat nya. Iya nerangka: “Baik meh aku ingat rambai jaku ba ayat nya. Aku pan muka aplikasi nya, nekan Bup Kudus lalu ngiga rambai jaku nya. Aku lalu terus tetemuka ayat ke digiga aku. Kekadang aku lupa ayat Bup Kudus, tang ketegal aplikasi nya aku ulih tetemuka ayat nya enggau senang.”

 Duit pemeri ke diberi kita ngena chara ke dipadah ba donate.dan124.com udah nulung kami ngaga, ngadu sereta ngemanahka agi aplikasi JW Library ke penguntung bala menyadi ba serata dunya. Terima kasih ke pengerah jari kita.

1. Oktober 2013—Aplikasi dikeluarka ti ngundan Bup Kudus Salin Dunya Baru ke diaduka baru

2. Januari 2015—Mayuh litaricha bisi ba jaku English, lalu udah nya bisi ba beratus bansa jaku bukai

3. November 2015—Fungsi ngaris ditambah

4. Mei 2016—Tab kena gempuru ditambah

5. Mei 2017—Fungsi ngaga nota ditambah

6. Disember 2017—Bup Kudus Edisyen Belajar ulih dibacha ba aplikasi nya

7. Mac 2019—Fungsi download audio ke dirikut, meda video ke dipandangka terus, sereta muka Bup Dikena Ngaga Pansik terus ari ayat Bup Kudus ditambah

8. Januari 2021—Fungsi spesial ditambah ngambika ulih ngena bup Idup enggau Lantang Belama Iya! ba JW Library