Bisi bejuta iku orang diau ba Amerika Latin. Ba entara sida, bejuta iku rayat asal ke ngembuan jaku sereta adat sida empu. Mayuh ari sida nya, bala menyadi kitai, lalu sida pan amat rinduka adat ba menua sida empu. Bala menyadi ba menua nya deka nulung mayuh orang belajarka Bup Kudus, nyadi sida nyalin lalu nyadung litaricha Saksi-Saksi Jehovah dalam lebih ari 130 bengkah bansa jaku, ba serata Amerika Latin. a Tang sayau, beberapa iku ari sida disakal laban nyembah Jehovah, lalu nulak adat asal ke enda nitihka ajar Bup Kudus. Nyadi, baka ni pemeri kita ti sukarela ulih meri bantu ke sida?

 Ba Mexico, beberapa iku menyadi kitai disengkaum ba komuniti Huichol. b Sida diau ba sebelah gunung ke bisi ba Menua Jalisco. Enggau basa sida nulak sebarang pengawa ke enda nitihka ajar Bup Kudus. Ketegal tu, beberapa iku orang ba komuniti sida balat ringat. Kena 4 Disember 2017, seraban bala penganas nyerang seraban Saksi, sereta beberapa iku orang ke enggau sida. Raban penganas tu muru sida, ngerusak reta sida, lalu ngugut deka munuh sapa-sapa ari entara sida ke berani pulai baru ngagai komuniti nya.

 Bala Saksi ke semak endur nya, enggau jampat meri bantu ngagai menyadi ke napi penekul nya. Tang, baka ni sida ulih pulai baru ngagai endur komuniti diri empu? Seiku menyadi lelaki ke benama Agustín madahka, “Kami nadai duit mayar peguam, lalu kami pan enda nemu ka mai kes tu kini.”

 Ketegal bala menyadi kitai ba endur nya tusah deka neruska pengawa sida ke Jehovah, pampang opis Amerika Tengah terus ngaga atur. Keterubah, sida minta perintah ba endur nya nasat kes tu. Udah nya, ari sukung Komiti Ngatur Raban ti Ngiring Saksi-Saksi Jehovah, sida bekerejasama enggau Opis Undang-Undang ba Indu Opis, ngetanka hak bibas bepengarap ke menyadi kitai ba komuniti Huichol. Tu ngujungka kes tu dipechara ngagai kot besai ba Mexico.

 Siti raban peguam pan ditumbuhka. Sida datai ari mayuh bengkah menua. Sida ngerembaika kes tu enggau terang: Enti orang patut bebasaka adat dalam sesiti komuniti, pia mega komuniti nya pan patut bebasa sereta nyaga hak semua orang ke dalam komuniti nya. Tiap iku orang bisi hak, enda ngira dini alai sida diau.

 Kena 8 Julai 2020, Kot mutuska Saksi Jehovah menang ba kes tu. Sida ngasuh semua Saksi ke diburu, ulih pulai baru ngagai komuniti sida. Agustín, ke disebut tadi, madahka asai ati iya sereta bala menyadi ke bukai. Ku sida, “Kami amat gaga lalu beterima kasih ke tulung bala menyadi. Enti nadai bantu ari sida, kami nadai daya.”

 Bala menyadi kitai ba endur bukai mega bisi penekul. Chunto iya, rayat asal ba San Juan de Ilumán, iya nya siti kampung ba Ecuador. Kena taun 2014, sida berengkah nirika Palan Gempuru pengudah bulih pemendar. Tang, seiku tuai pengarap nguluka seraban penganas, lalu penyampau sida lebih ari 100 iku orang, mejal bala Saksi Jehovah ngetuka pengawa nirika palan nya. Udah nya, komuniti sida pan nagang bala Saksi Jehovah begempuru.

 Opis Undang-Undang ba pampang opis Ecuador enggau indu opis bekerejasama ngetanka hak bibas bepengarap bala menyadi ba kampung nya. Kes tu dipechara, lalu asil iya bala menyadi kitai enda ditagang agi. Sida dikemendarka begempuru baka selama, lalu ulih nembuka pengawa nirika Palan Gempuru. Tang, pengari ari gerempung kitai minta ngaga pemutus ti terang sereta amat beguna, ngambika utai tu enda nyadi baru dudi hari. Kati komuniti rayat asal patut bebasaka hak mensia nitihka ukum entarabansa?

 Kena 16 Julai 2020, kes tu dipechara ba Kot Perlembagaan Ecuador, iya nya kot ti pemadu besai ba menua nya. Bala menyadi kitai empu nyadi peguam ngarika bala Saksi ba menua nya. Kelimpah ari sida, bisi empat iku da agi menyadi lelaki ke bukai, ke bebichara ba kot nya. Sida peguam entarabansa ti bepeneleba. Ketegal sekat COVID-19, sida bebichara nengah conference video ari menua sida empu. Tu meh keterubah iya raban pechara, ngemendarka Saksi Jehovah ba serata dunya ngenataika pechara sida nengah conference video aja. c Bala peguam kitai mantaika beberapa iti ukum entarabansa, kena ngeringka agi bukti tiap iku orang ba komuniti rayat asal bisi hak sida empu. Taja sida dipegai tauka dibaruh ba sesiti komuniti, tang hak tu enda ulih dirampas ari sida.

 Ke diatu, bala menyadi kitai ba Otavalo benung nganti pemutus ari Kot Perlembagaan. Sida amat beterima kasih ke bantu ti diterima ngelamatu. César, seiku tuai gempuru ba Eklisia Ilumán Quichua madah, “Semina Jehovah nengah gerempung Iya, deka meri bantu ti amat ngalitka ati ngagai sekeda orang.”

 Semua peguam ke bebichara ke kes tu Saksi Jehovah. Sida gaga ati dikena ngetanka hak bala menyadi enggau enda bebayar. Taja pia, awak sereta duit agi diguna kena bebicharaka sesiti kes, nembuka pechara, sereta mantaika kes nya ba kot. Bala peguam kitai sereta menyadi ke bukai ngena lebih ari 380 jam ngatur pechara, lalu 240 jam kena nyalin dokumen ba kot Mexico. Nyauka 40 iku peguam ari mayuh menua ke ngena beratus jam mutarka kes ba Ecuador tu. Baka ni kitai bulih duit kena melanja ngaduka semua kes tu? Ari duit pemeri sukarela bala menyadi, enggau mayuh macham chara nengah donate.dan124.com. Besai terima kasih ke pengerah ati kita!