Seraya taun 2023 berengkah, semua kitai ngarapka utai ti manah deka nyadi ba kitai enggau diri sebilik. Nama kebuah kitai ulih meda ke mua enggau penuh harapan?

 Bup Kudus bisi madahka Berita Manah ke nyebut pasal penanggul ke ditapi kitai kemayaharitu semina sementara aja, lalu deka abis enda lama da agi. Ke amat, Bup Kudus “ditulis kena ngajar kitai, laban Bup Kudus nulung kitai betan sereta meri kitai peransang. Nya alai, kitai andal nganti utai ke deka diberi Petara jemah ila.”—Rome 15:4.

•   Enti deka nemu mayuh agi pasal semaya ke bisi ba Bup Kudus, bacha meh artikel “Pengadang ti Bendar Pasal Jemah Ila.”

 Harapan ke datai ari Bup Kudus ulih disempamaka baka “sauh ke pengidup kitai.” (Hebrew 6:19) Harapan nya ulih ngeringka kitai, lalu nulung kitai napi penusah enggau mujur, ngembuan runding ti positif sereta bulih pengelantang. Ambika chunto:

•   Peratika baka ni harapan ke datai ari Bup Kudus udah nulung siku lelaki ke kala gian ngereja utai ti enda manah. Peda meh video Aku Udah Leju Enggau Chara Pengidup Aku.

•   Peratika baka ni harapan ke datai ari Bup Kudus ulih ngelantangka ati kitai lebuh kitai lenyau orang ke dikesayau. Peda meh video Tulung ngagai Sida ke Lenyau Orang ke Dikesayau.

 Mayuh orang deka ngembuan pengidup ti manah. Tang sida enda nemu sekalika utai ti dikedekaka sida ulih dikeamatka. Tang semaya ari Bup Kudus tentu deka dikeamatka. Nama kebuah? Laban semaya ke disebut ba Bup Kudus datai ari Petara Jehovah a lalu Iya Petara ke “enda nemu bula.” (Titus 1:2) Semina Jehovah aja bisi kuasa ngamatka semua semaya Iya. Iya ulih “ngereja sebarang utai ti dikedekaka Iya.”—Masmur 135:5, 6.

 Kami mai nuan ngambika sama bulih penguntung ari harapan ke datai ari Bup Kudus. Nuan deka majak arapka harapan tu enti nuan “bejimat mansik ayat Bup Kudus.” (Surat Kereja Rasul 17:11) Kami meransang nuan enggau kursus belajarka Bup Kudus ti pechuma. Aram meh mansang ngagai taun 2023 enggau penuh harapan!