Enda lama pengudah orang Israel tama ngagai Menua ti Udah Disemaya kira 3,500 taun suba, Petara Jehovah madahka diri deka ngelindung sida ari “penyakit ti jai” ke nyadi di menua Ejip. (Ulang Adat 7:15) Siti ari chara nya, Jehovah meri sida pesan ti nyemetak pasal atur pemeresi sereta chara kena nyeliahka tauka nagang penyakit ari berampit. Ambika chunto:

•   Adat menua nya madahka sida enda tau enda mandi lalu masu gari.—Adat Lewi 15:4-27.

•   Bekaul enggau tai mensia, Petara madahka: “Kita enda tau enda bisi siti endur di luar kem alai kita kemi bira. Siti ari pekekas ti dibai kita nya utai kena ngeruang tanah; lebuh kita asai ti deka kemi bira, kita tau ngeruang lubang ngena pengeruang tanah nya, lalu udah nya ngelamun tai kita.”—Ulang Adat 23:12, 13.

•   Sida ke dijangka bisi penyakit ti tau ngerampit, diseraraka ari orang bukai enda lama. Sebedau sida ulih begulai baru enggau orang bukai, sida ke udah gerai patut masu gari sida lalu mandi enti sida deka dikumbai “tuchi.”—Adat Lewi 14:8, 9.

•   Sapa-sapa ke negu bangkai, deka diseraraka ari orang bukai.—Adat Lewi 5:2, 3; Penyampau 19:16.

 Adat orang Israel nunjukka penemu pasal chara berubat enggau pemeresi ti jauh ngelui ari penemu ke bisi maya jeman nya.

 Ba endur bukai maya jeman nya, standard pemeresi ti enda manah, agi dititihka. Ambika chunto:

•   Ai enggau pemakai ti kamah sereta uras ngujungka gaya pengidup ti kamah ke ngasuh mayuh orang kena penyakit lalu mayuh anak ke agi mit mati.

•   Bala lutur kelia menya nemu mimit aja tauka nadai nemu nama-nama pasal kuman ke mai penyakit. Orang Ejip ngena “ubat” baka darah tichak, tai burung undan, bangkai chit, ai kemi, enggau roti ke udah bekuap. Tai enggau ai kemi mensia sereta jelu mega suah dikena ba pengawa berubat sida.

•   Orang Ejip menya bulih mayuh penyakit ari parasit ke datai ari ai Sungai Nil ti kamah tauka jalai ai ti mit ke bepun ari Sungai Nil. Pia mega, mayuh anak ke agi mit ba menua Ejip mati ketegal penyakit chirit tauka penyakit bukai ke datai ari pemakai ti kamah.

 Tang orang Israel, bulih penguntung lalu gerai agi ari orang ari menua bukai laban sida nitihka standard ke ditetapka ba Adat Petara.