Sean Gladwell/Moment via Getty Images
MENGKANG BEJAGA!
Perintah ba Serata Dunya Ngena Lebih ari 2 Triliun Dolar ba Pengawa Beperang. Nama Utai ti Dipadah Bup Kudus Pasal Tu?
Kena taun 2022, perintah ba serata dunya ngena lebih ari 2.24 triliun dolar Amerika (kira-kira RM10.38 triliun) ba pengawa beperang. Tu rikut ti baru. Siti kebuah penyampau duit mayuh dikena nya ketegal Rusia nyerang Ukraine. Nitihka riput ke dikeluarka ba bulan April 2023 ari Stockholm International Peace Research Institute (SIPRI), sekumbang taun 2022:
Penyampau duit ke dikena ba Eropah nambah 13 peratus dalam taun nya. Kenyau ari 1991, perintah ba Eropah enda kala nambahka belanja perang baka ba taun 2022.
Perintah Rusia ngena kira-kira 9.2 peratus lebih agi duit ba perang dibanding enggau taun ke sebedau tu. Suba, menua Rusia nya lumur kelima ngeluarka mayuh duit ba pengawa beperang, tang diatu udah niki ngagai lumur tiga.
Amerika Serikat nya menua ti pemadu mayuh ngena duit ba pengawa perang; 39 peratus duit ke dikena ba perang nya dikena ba Amerika Serikat aja.
Ku Dr. Nan Tian ke nulung nulis riput SIPRI madah: “Perintah ba serata dunya majak nambahka duit ke dikena ba pengawa beperang. Tu nunjukka kitai benung diau ba dunya ti majak charut sereta nadai pengelikun.”
Bup Kudus madah laya entara menua deka majak nyadi kemayaharitu. Bup Kudus mega madahka chara bulih pengelikun ti bendar.
Laya entara menua deka majak balat nyadi
Bup Kudus madahka kitai benung diau ba “pengujung dunya.”—Daniel 8:19.
Bup Daniel madah, ba pengujung dunya, kuasa dunya deka “nyerang” sereta “ngelaban” pangan diri. Reti nya, sida deka bepekit laban deka nyadi menua ti pemadu bekuasa. Ketegal tu, sida ngena mayuh “pengaya,” tauka duit, ba pengawa perang.—Daniel 11:40, 42, 43.
Kena nemu mayuh agi pasal jaku benabi tu, peda meh video Jaku Benabi Dikeamatka—Daniel Bagi 11.
Chara ngulihka pengelikun ti bendar
Bup Kudus madahka Petara deka nganti perintah mensia. Iya “deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.”—Daniel 2:44.
Enda lama agi, Petara Jehovah a deka ngereja utai ke enda ulih dikereja mensia, iya nya mai pengelantang sereta pengelikun ti bendar. Baka ni? Perintah Iya ti di serega deka ngerusak semua senyata lalu ngujungka semua penganas.—Masmur 46:8, 9.
Kena nemu mayuh agi utai ke dikereja Perintah Petara, bacha meh artikel “Perintah Petara deka Ngenataika ‘Mayuh Pemaik.’”
a Jehovah nya nama Petara, ke bisi ayan ba senentang Jaku Penerang Bup Kudus.